Apart, pero Ainda Unu

Na yüni 1994 mi tabata ansiosamente koriendo bai bek mi kas despues di trabou pa wak riba televishon nos ekipo nashonal di futbòl hunga den e Kopa Mundial. Djis despues ku mi a kuminsá mi biahe, mi a wak djaleu un hòmber kantu di kaminda koriendo lihé ku un ròlstul dekorá ku nos bandera di Brasil. Mi tabata sa na e momentu ei ku e tambe tabata bayendo kas pa wak e wega!

Ora nos kaminda a krusá i nos wowonan a topá otro, pa un frakshon di un sekònde, mi a sinti fuertemente uní ku e hòmber ei! Nos tabata bayendo den diferente direkshon, nos no tabata konosé otro, i tabatin klaramente diferente kondishonnan sosial i físiko, pero nos mesun pashon pa futbòl i amor pa nos pais a hasi nos sinti manera unu den e momento ei! Ami no a wak e hòmber ei nunka mas, pero awe, añanan despues, ainda mi por wak e wowonan ei i sinti e konekshon fuerte ku e hòmber ei. Di tur manera, nos a gana e wega i e Kopa Mundial e aña ei!

Den Iglesia, apesar di nos diferensianan, Señor ta spera di nos pa ta uni! E la bisa den e Doktrina i Kombenionan, “Sea un; i si boso no ta un boso no ta di mi.”¹

Ora nos ta drenta un kas di orashon pa adorá manera un grupo, nos mester laga atras nos diferensianan, inkluí rasa, status sosial, preferensianan polítiko, i logronan akadémiko i profeshonal, i mas bien konsentrá riba nos ophetivonan spiritual komun. Huntu nos ta kanta himnonan, reflekshoná riba e mesun kombenionan durante e santa sena, i bisa simultáneo un “amèn” ku tur por skucha despues di diskursonan, lèsnan, i orashonnan—signifikante ku nos ta di akuerdo mutuamente ku loke a wòrdu kompartí.

E kosnan aki ku nos ta hasi kolektivamente ta yuda kreá un sentido fuerte di unidat den e kongregashon.

Sin embargo, loke realmente ta determiná, solidifiká, òf destruí nos unidat ta kon nos ta aktuá ora nos ta apart di nos miembronan di Iglesia. Manera nos tur sa, e ta inevitabel i normal ku eventualmente nos ta papia otro.

Dependé riba kiko nos ta skohé pa bisa tokante un i otro, nos palabranan lo tin òf nos “kurasonnan mará huntu den unidat,”² manera Alma a siña esnan ku el a boutisá na e Awanan di Mormon, òf nan lo gasta e amor, konfiansa, i bon boluntat ku mester eksistí meimei di nos.

Tin komentarionan ku súptilmente ta destruí unidat, manera “Si, e ta un bon obispu; o, pero bo mester a wak e ora e tabata un hóben!”

Un vershon mas konstruktivo di esaki por ta “E obispu ta asina bon, i el a krese asina hopi den madures i sabiduria durante e añanan.”

Hopi biaha nos ta pone etikètnan permanente riba hende ora nos ta bisa algu manera “Nos presidenta di Sosiedat di sokoro ta un kousa pèrdí; e ta asina kaprichoso!” Kontrali [na esaki], nos lo por bisa, “E presidenta di Sosiedat di sokoro tabata ménos fleksibel últimamente; por ta e ta pasando den tempunan difísil. Laga nos yud’é i sosten’é!”

Rumannan, nos no tin niun derechi pa pinta niun hende, inkluyendo for di nos sirkulo di Iglesia, manera un produkto kompletá malu! Mas bien, nos palabranan tokante nos próhimo mester reflehá nos kreensha den JesuCristo i Su Ekspiashon i ku, den djE i dor di djE, nos semper por kambiá pa e mihó!

Algun ta kuminsá kritiká i birá dividí ku lidernan i miembronan di Iglesia pa kosnan ku ta asina chikitu.

Esei tabata e kaso di un hòmber yamá Simonds Ryder, ken a bira un miembro di Iglesia na 1831. Despues di a lesa un revelashon ku tabata spesial p’e, e tabata konfundí pa wak ku su nòmber a wòrdu spèl robes Rider ku e lèter i en bes di e lèter y. Su reakshon riba e evento aki a kontribuí na su interogashon di e profeta i a eventualmente resultá den e persiguídi Joseph i e kaida afó di Iglesia.³

E tambe ta probablemente ku nos tur lo eksperensia algun korekshon for di nos lidernan eklesiástiko, lokual lo ta un tèst di kon uní nos ta ku nan.

Mi tabatin 11 [aña], mi ta kòrda 44 aña pasa, e edifisio di reunion unda mi famia a asistí iglesia tabata di eksperensia renobamentu mayó. Promé ku e proyekto ei a kuminsá, tabatin un reunion den kua lidernan lokal i di area tabata diskutí kon e miembronan lo partisipá ku trabou den e esfuerso ei. Mi tata, ken a presidí ántes riba e unidat ei pa añanan largu, a ekspresá su opinion fuerte ku e trabou aki mester a wòrdu hasi pa un kontratista i no pa amatùrnan.

No solamente tabata su opinion rechasá, pero nos a tende ku e tabata revoká públikamente i severamente na e okashon ei. Awor, esaki tabata un hòmber ken tabata hopi dediká na Iglesia i tambe un veterano di e Di Dos Guera Mundial na Europa, kustumbrá ku resistí i bringá pa loke e tabata kere den dje! Bo por puntra bo mes kiko su reakshon tabata di bai ta despues di e insidente aki. E lo persistí ku su opinion i kontinuá di oponé e desishon ku a wòrdu tuma kaba?

Nos a wak famianan den nos bario ken a bira mas debil den e evangelio i a stòp atendé reunionnan pasobra nan no tabata por ta un ku esnan ken tabata guiá. Mi tambe a mira hopi d nos amigunan for di Primario no keda fiel den nan hubentut pasobra nan mayornan semper tabata buska falta ku esnan den Iglesia.

Mi tata, sin embargo, a disidí pa keda un ku nos próhimo Santunan. Algun dia despues, ora miembronan di bario a reuní pa yuda den e konstrukshon, e la “invitá” nos famia pa siguié na e edifisio di reunion, unda nos a hasi nos mes disponibel pa yuda den kualke manera.

Mi tabata furioso. Mi tabata sinti pa puntr’é, “Papi, dikon nos ta bai yuda den e konstrukshon si bo tabata kontra di tin miembronan hasié?” Pero e mirada riba si kara a deskurashá mipa hasi esei. Mi kier tabata non pa e rededikashon. Asina, afortunadamente, mi a disidí pa ta ketu i djis bai i yuda den e trabou!

Tata no tabatin e privilegio pa wak e kapia kompletá, pasobra e la fayesé promé ku e konklushon di e trabou aki. Pero nos den e famia, dirigí awor pa mi mama, a kontinuá hasi nos parti te ora e tabata kompletá, i esei a keda nos uní ku mi tata, ku e miembronan, ku nos lidernan, i, mas importante, ku Señor!

Djis momentunan promé ku Su eksperensia agonisá na Getsemani, ora Jesus tabata hasi orashon na e Tata pa Su Apòstelnan i nos tur e Santunan, E la bisa, “… mare nan tur por ta un, manera Abo ta den Mi i Ami den Bo.”⁴

Rumannan, mi ta testifiká ku ora nos ta disidí pa ta un ku e miembronan i lidernan di Iglesia—tantu ora nos ta reuní huntu komo spesialmente ora nos ta apart—nos lo tambe sinti mas perfektamente uní ku nos Tata Selestial i e Salbador. Den e nòmber di JesuCristo, amèn.