Balor ku no por Midí

Durante di mi bishita na e pais di Sierra Leone na Wèst Afrika, mi a partisipá na un reunion dirigí pa un lider di Primaria di estaka. Mariama a dirigí ku tal amor, grasia, i konfiansa ku tabata fásil pa asumí ku e tabata miembro di Iglesia pa hopi tempu. Sinembargo, Mariama, tabata un konverso bastante resien.

Su ruman mas yòn a uni na Iglesia i a invitá Mariama pa bai un lès na Iglesia ku n’e. Mariama tabata profundamente impreshoná pa e mensahe. E lès tabata tokante e lei di kastidat. El a pidi pa e mishoneronan siñ’é mas i pronto el a risibí un testimonio di e Profeta José Smith. El a wòrdu boutisá na 2014, i su yu muhé a wòrdu boutisá luna pasá. Imaginá, e dos enseñansanan fundamental ku a hiba na Mariama su kombershon tabata e lei di kastidat i e Profeta José Smith, dos punto ku e mundu hopi bia ta mira komo irelevante, antikuá, òf inkumbiniente. Pero Mariama a testifiká ku e tabata manera un mòt atraé pa lus. El a bisa, “Ora mi a haña e evangelio, mi a haña mi mes.” El a deskubrí su balor mediante e prinsipionan dibino. Su balor komo un yu muhé di Dios a wòrdu revelá na dje mediante e Spiritu Santu.

Awor laga nos sera konosí ku e rumannan Singh di India. Renu, mas leu na man drechi, e promé di sinku ruman muhé ku a uni na Iglesia, a kompartí e pensamentunan aki:

“Promé ku mi a kuminsá investigá Iglesia, mi no tabata sinti realmente ku mi tabata masha spesial. Mi tabata djis un dje tantu hendenan, i mi sosiedat i kultura no a siña mi realmente ku mi tabatin kualke balor komo un persona. Tempu mi a konosé e evangelio i a siña ku mi tabata un yu muhé di Tata Selestial, el a kambia mi. Diripiente mi a sinti asina spesial—Dios en realidat a krea ami, mi alma, i mi bida ku balor i propósito.

“Promé ku mi tabatin e evangelio den mi bida, mi tabata purba semper di proba na otronan ku mi tabata un persona spesial. Pero ora mi a siña e bèrdat, ku mi ta un yu muhé di Dios, mi no tabatin ku proba nada na niun hende. Mi tabata sa ku mi tabata spesial. … Nunka no pensa ku bo no ta nada.”

Presidente Thomas S. Monson a bisa perfektamente ora el a sita e palabranan: “E balor di un alma ta su kapasidat pa bira manera Dios.” ¹

Resientemente mi a wòrdu bendishoná pa konosé un otro muher hóben ku ta komprondé e mes un bèrdat aki. Su nòmber ta Taiana. Mi a konosé na Primary Children’s Hospital na Salt Lake City. Taiana tabata un studiante di skol sekundario tempu el a wòrdu diagnostiká ku kanser. El a hiba un bataya ku kurashi pa 18 luna promé ku el a muri algun siman pasá. Taiana tabata yen di alegria i amor. E tabata konosí pa su sonrisa kontagioso i su distintivo dùimnan na haltu.” Na pregunta di otronan, “Di kon abo Taiana?” su kontesta tabata, “Di kon ami no?” El a buska pa bira manera su Salbador, ken el a stima masha hopi. Durante di nos bishitanan, mi a siña ku Taiana a komprondé su balor dibino. Sabiendo ku e tabata un yu di Dios a dun’é pas i kurashi pa enfrentá su prueba abrumador den e manera positivo ku el a hasi.

Mariama, Renu, i Taiana, ta siña nos ku e Spiritu lo konfirmá na kada un di nos individualmente nos balor dibino. Sa berdaderamente ku boso ta un yu muhé di Dios lo afektá tur aspekto di boso bida i guia boso den servisio ku boso ta duna kada dia. Presidente Spencer W. Kimball a splika den e palabranan glorioso aki:

“Dios ta boso Tata. E ta stima boso. E i boso mama na shelu ta balorá boso di un manera ku no por midi.  .…Boso ta úniko. Úniko den boso klase, kreá for di inteligensia eterno ku ta permití boso reklamá bida eterno.

“Laga no tin duda den boso mente tokante boso balor komo un persona. Henter e intenshon di e plan di salbashon ta pa proveé un oportunidat pa kada un di boso pa alkansá boso potensial kompletu, kual ta progreso eterno i e posibilidat di dibinidat.”²

Pèrmití mi señalá e nesesidat pa hasi diferensia entre dos palabra kritiko: balori dignidat.Nan no ta meskos. Balor spiritualta nifiká pa balorá nos mes na e manera ku Tata Selestial ta balorá nos, no manera e mundu ta hasi. Nos balor a wòrdu determiná hasta promé ku nos a bini na e mundu aki. “Dios su amor ta infinito i e lo dura pa semper.³

Na otro banda, dignidat ta wòrdu lográ dor di obedensia. Si nos hasi piká, nos ta ménos digno, pero nunka nos no ta sin balor! Nos ta sigui arepentí i hasi esfuerso pa bira manera Jesus ku nos balor intakto. Manera Presidente Brigham Young a siña: “Esun di ménos, e spiritu di mas inferior awor aki riba tera  … , ta bal mundunan.⁴ No ta importá kiko pasa, semper nos tin dignidat den bista di nos Tata Selestial.

Apesar di e bèrdat maravioso aki, kuantu di nos ta lucha, tin bia, ku pensamentunan òf sentimentunan negativo di nos mes? Ami! Ta un trampa fásil. Satanas ta e tata di tur mentira, spesialmente ora e ta bini pa duna presentashon robes di nos mes naturalesa i propósito dibino. Pensa poko di nos mes no ta bon pa nos. Enbes e ta stroba nos. Manera nos a siña hopi bia, “ Niun hende no por pone bo sinti inferior sin bo konsentimentu.⁵” Nos por stòp di kompará nos abilidatnan di mas pió ku esnan di otro hende. “Komparashon ta ladron di alegria.”⁶

Komo kontraste, Señor ta sigurá nos ku ora nos tin pensamentunan birtuoso, E lo bendishoná nos ku konfiansa, hasta e konfiansa pa sa ken nos ta realmente. No tabatin un tempu mas krusial pa hasi kaso na Su palabranan: ku si nos laga birtut embeyesé nos pensamentunan konstantemente, nos konfiansa lo krese bira fuerte den presensia di Dios i  … e Spiritu Santu lo ta nos kompañero konstante.⁷

Señor a revelá e bèrdat adishonal aki na e Profeta José Smith: Esun ku ta risibí Dios, lag’é duna krédito na Dios; lag’é gosa ku e ta konsiderá digno pa risibí.⁸ Ora nos ta sinti e Spiritu, manera e verso aki ta splika, nos ta rekonosé ku lokual nos ta sinti ta bini for di nos Tata Selestial amoroso. Nos ta rekonosé i alabá E pa bendishoná nos. Despues nos ta gosa ku nos ta konsiderá digno pa risibí.

Imaginá ku boso ta lesando e skrituranan un mainta i e Spiritu suavemente ta susurá na boso ku lokual boso ta lesando ta bèrdat. Boso por rekonosé e Spiritu i ta kontentu ku boso a sinti Su amor i tabata digno pa risibí?

Mamanan, boso por ta na rudia banda di boso yu di kuater aña ora e ta hasi orashon pa bai drumi. Un sentimentu ta pasa riba boso ora boso ta skucha. Boso ta sinti kalor i pas. E sentimentu ta breve, pero boso ta rekonosé ku boso, na e momentu ei, ta konsiderá pa risibí. Por ku de bes en kuando,si e sosedé nos por risibí manifestashonnan spiritual grandi den nos bida: pero ku frekuensia nos por gosa di e susuro plasentero di Spiritu Santu, konfirmando e bèrdat di nos dignidat spiritual.

Señor a splika e relashon entre nos balor i Su gran sakrifisio ekspiatorio ora El a bisa:

Nos mester kòrda ku balor di almanan ta grandi den bista di Dios.

Señor nos Redentor a sufri morto den karni i dolor di tur hende p’asina tur hende por arepentí i bini serka Dje.⁹

Rumannan, pa motibu di lokual El a hasi pa nos, “nos tin obligashon na dje pa lasonan di amor.”¹⁰ El a bisa, “Mi Tata a manda mi pa mi wòrdu halsá riba krus; i despues ku mi a wòrdu halsá riba krus, pa mi atraé tur hende na ami.”¹¹

Rei Benjamin tambe a splika e konekshon obligatorio aki ku nos Salbador: “I mira, e lo sufri tentashonnan, i doló di kurpa, hamber, set, i fatiga, asta mas ku hende por sufri, eksepto te na morto; pasobra at’akí, sanger ta bini di kada porio, asina grandi su angustia ta,” pa motibu di nos pikánan.¹² E sufrimentu aki i su resultadonan ta yena nos kurason ku amor i gratitut. Elder Paul E. Koelliker a siña, “Ora nos kita e distraishonnan ku ta hala nos na e mundu i ehersé nos albedrio pa busk’é , nos ta habri nos kurason na forsa selestial ku ta atraé nos na Dje.”¹³ Si e amor ku nos ta sinti pa e Salbador i lokual El a hasi pa nos ta mas grandi ku e energia ku nos ta duna nos debilidatnan, duda, òf mal kustumbernan, e ora ei E lo yuda nos vense e kosnan ku ta kousa sufrimentu den nos bida. E ta salba nos di nos mes.

Permití mi enfatisá atrobe: si e atrakshon di e mundu ta mas fuerte ku e fe i konfiansa ku nos tin den e Salbador, e ora ei e atrakshon di e mundu lo gana kada biaha. Si nos skohe pa enfoká riba nos pensamentunan negativo i duda nos mes balor, enbes di dependé di e Salbador, ta bira mas difísil pa sinti e impreshonnan di e Spiritu Santu.

Rumannan, laga nos no ta konfundí tokante ken nos ta! Miéntras ku ta mas fásil pa ta spiritualmente pasivo ku ta pa sigui dilanti ku esfuerso spiritual pa kòrda i brasa nos identidat dibino, nos no por pèrmití e indulgensia aki den e delaster dianan aki. Tin speransa; keda riba boso kaminda; sigui e Spiritu su guia. Ku nos, komo rumannan por, “ta fiel den Cristu;   … ku Cristu por lanta [nos]ariba, i ku su sufrimentunan, i morto,  ... i su miserikòrdia i sufrimentu grandi i doloroso, i e speransa di su gloria i di bida eterno, lo keda den [nos mente] pa semper.”¹⁴  Den e nòmber sagrado di Jesucristu, amèn.