Dios Su Testigu ku ta Urgi: E Buki di Mormon

E Buki di Mormon no ta solamente e pilar di nos religion, pero tambe e por bira e pilar di nos testimonionan asina ku ora tribulashonnan i preguntanan sin kontesta konfrontá nos, e por tene nos testimonionan ankrá na lugá. E buki aki ta esun peso riba e balansa di bèrdat ku ta surpasá e peso kombiná di tur e krítikonan su argumentunan. Dikon? Pasó si e ta bèrdat, e ora ei José Smith tabata un profeta i esaki ta e Iglesia di JesuCristu restourá, negligente di tur historia òf otro argumentunan di lo kontrario. Pa e motibu aki, e krítikonan ta intenshoná pa repudiá e Buki di Mormon, pero e opstákulonan ku nan ta enfrentá ta ínsurpasabel, pasó e buki ta bèrdat.

Promé, e krítikonan tin ku splika kon José Smith, un mucha kunukero di 23 aña di edat ku edukashon limitá, a krea un buki ku mas di shenti piko di nòmbernan i lugánan úniko, mesun kos ku historianan i eventonan detayá. Di akuerdo ku esei, diferente krítikonan ta proponé ku e tabata un genio kreativo ku a stèns riba numeroso buki i otro medionan lokal pa krea e kontenido históriko di e Buki di Mormon. Pero kontrario di nan preteksto, no tin ningun testigu ku ta pretendé di a mira José ku niun di e medionan aportá promé ku e tradukshon a kuminsá.

Hasta sí e argumento aki tabata bèrdat, e ta lamentablemente insufisiente pa splika e Buki di Mormon su eksistensha. Nan tambe tin ku kontestá e pregunta: Kon José a lesa tur e medionan aportá, sefta dor di tur e kosnan insignifikante, tene e échonan kompliká ei stret den sentido di ken tabata na unda i ki ora, i despues dikta perfektamente for di memoria? Pasó ora José tabata tradusí, e no tabatin ningun nota serka dje. En écho, su kasá Emma ta kòrda: “E no tabatin ni manuskrito ni buki pa lesa for di dje  …Si e tabatin kualke kos manera esei, e no por a skondé pa mi.”¹

Asina ta ku kon José a ehekutá e prestashon remarkabel aki di dikta un buki di mas ku 500 página sin ningun nota? Pa hasi esaki, e mester no solamente tabata un genio kreativo pero tambe tabatin un memoria fotográfiko di proporshon milagroso. Pero si esaki ta bèrdat, dikon su krítikonan no a yama atenshon na e talento remarkabel aki?

Pero tin mas. E argumentunan aki ta tene kuenta solamente ku e buki su kontenido históriko. E dispúta real tei ainda: kon José por a produsí un buki ku ta bria ku e Spiritu, i unda ela haña asina un doktrina profundo, hopi di lòke ta klarifiká òf kontradisí e kerenshanan Kristian di su tempu?

Por ehèmpel, e Buki di Mormon ta siña, kontrario ku Mayoría di e kerenshanan Christian, ku e Kaída di Adán tabata un stap positivo pa dilanti. E ta revelá e kombenionan hasí na boutismo, ku no ta wòrdu apuntá den Beibel.

Ademas, nan por puntra, unda José ta haña e komprenshon poderoso ku dor di Cristu su Ekspiashon, E por no solamente limpia nos pero tambe perfekshoná nos? Unda el a haña e diskurso asombroso tokante fe den Alma 32? Òf Rei Benjamin su diskurso tokante e Salbador su Ekspiashon, porta e diskurso di mas remarkabel over di e tópiko aki den henter skritura? Òf e alegoría di e palu di oleifi ku henter su komplikashon i rikesa doktrínal? Ora mi lesa e alegoria aki, mi tin ku nota pa por komprondé henter su nifikashon sofistiká. Nos ta suponé di kere ku José Smith gewon a diktá e diskursonan aki for di su kabes sin ningun nota mes?

Kontrario di un konklushon asina, Dios su hueya digital ta riba henter e Buki di Mormon, komo ta evidente dor di su bèrdatnan doktrínal mahestuoso, partikularmente su diskursonan tokante e Ekspiashon di JesuCristu.

Si José no tabata un profeta, e ora ei, pa por splika over di e komprenshon aki i hopi otro dòktrinanan remarkabel, e krítikonan mester duna tambe e argumento ku e tabata un genio teológiko. Pero si esei tabata  e kaso, nan por puntra: Dikon José tabata e úniko den e 1800 añanan despues di Cristu su ministerio pa produsí asina un kandidat di doktrinanan úniko i evidente? Pasó tabata revelashon, no e genio, ku tabata e fuente di e buki aki.

Pero hasta si nos ta suponé José tabata un genio kreativo i teológiko, ku un memoria fotográfiko—e talentonan aki so no ta hasié un outor kapasitá. Pa splika e Buki di Mormon su eksistensha, e krítikonan tin ku hasi e preteksto ku José tabata un outor ku un don natural na edat di 23 aña. Sino, kon e la hinka tantu nòmber, lugá, i eventonan harmonisamentu asina den otro sin inkonsistensia? Kon e la detayá strategianan di guera, komponé diskursonan elokuente, i inventá frasenan ku ta wòrdu marká, memorisá, sitá, i poné riba portanan di frishidèr dor di miónes di hende, manera, “Ora ku bo ta den servisio di bo próhimo bo ta solamente den servisio di bo Dios” (Mosiah 2:17) òf “ Hende ta, pa nan por tin goso” (2 Nefi 2:25). Esakinan ta mensahenan ku ta bibu—mensahenan ku ta biba i respirá i inspirá. Pa sugerí ku José Smith na edat di 23 tabata poseé e disposishon nesesario pa skibi e obra monumental aki den un biaha i den aproksimadamente 65 dia di trabou ta simplemente kontra di e irealidatnan di bida.

Presidente Russel M. Nelson, un outor eksperenshá i kapasitá, a kompartí ku e tabatin mas ku 40 reedishon di un diskurso di un konferensia general resien. Nos tin ku kere awó ku José Smith, riba su mes, a dikta henter e Buki di Mormon den un biaha ku prinsipalmente un par di kambionan gramatikal despues?

José su kasá Emma a konfirmá e imposibilidat di un esfuerso asina: “José Smith [komo un hóben] no por a skibi ni dikta un karta koherente i bon bosiferá; laga para dikta un buki manera e Buki di Mormon.”²

I finalmente, hasta si nos aseptá tur argumentunan menshoná, kuestionabel manera nan por ta, e krítikonan ainda ta enfrentá un otro opstákulo. José a mantené ku e Buki di Mormon tabata skibí riba planchanan di ora. E preteksto aki a risibí krítika sin fin den su tempu—pasó “tur hende” tabata sa ku historia di antigwedat tabata wòrdu skibí riba papirus òf pèrkamènt, te ora ku añanan despues, ora ku planchanan di metal ku skrituranan antiguo a wòrdu deskubrí. Ademas, e krítikonan a pretendé ku e uso di semènt, manera ta wòrdu deskribí den e Buki di Mormon, tabata fuera di e área di ekspertisio tékniko di e Amerikanonan antiguo aki—te ora ku strukturanan di semènt a wòrdu hañá den Amérika antiguo. Kon e krítikonan ta splika esaki awor i deskubrimentunan no probabel similar? José, bo tin ku sa, tambe mester tabata un hende ku por rei bon, ku hopi suerte. Di algun forma, apesar di tur e probabilidatnan ku tabata kontra di dje, kontra di tur konosementu sientífiko i akadémiko ku tabata eksistí, el a rei bon ora tur otro hende tabata fout.

Al final ora tur kos bisá i hasí, bo por puntra bo mes, kon un hende por kere ku tur e échonan i forsanan pretendé aki, komo a wòrdu proponé dor di e krítikonan, kasualmente a kombiná na un manera asina ku a laga José Smith skibi e Buki di Mormon i di e manera aki kultivá un fregamentu satániko. Pero kon esaki por ta sensato? Den oposishon direkto ku un preteksto asina, e buki aki a inspirá miónes pa rechasá Satanas i biba mas manera Cristu.

Miéntras ku un hende por skohe pa kere e krítikonan su manera di rasoná, e ta, pa mi, intelektualmente i spiritualmente un fin. Pa kere un kos asina, lo mi tin ku aseptá un asumpshon no proba tras di otro. Tambe, lo mi tin ku neglishá e testimonio di kada unu di e 11  testigonan,³ ounke tur a keda fiel na nan testimonio te na final; lo mi tin ku rechasá e doktrina divino ku ta yena página tras di página di e buki sagrado aki ku bèrdatnan máksimo; lo mi tin ku ignorá e echo ku multitutnan, inkluyendo mi mes, a yega mas serka di Dios dor di lesa e buki aki ku ningun otro, i mas ainda, lo mi tin ku ninga e susuro konfirmá di e Spiritu Santu. Esaki lo ta kontrario di tur kos ku mi sa ku ta bèrdat.

Un di mi bon i inteligente amigunan a bai for di Iglesia pa un temporada. Resientemente el a skibi esaki na mi ora el a regresá: “Inisialmente, mi tabata ke pa e Buki di Mormon wòrdu proba na mi histórikamente, geográfikamente, lingüístikamente, i kulturalmente. Pero ora mi a kambia mi enfoke pa lòke e ta siña tokante di e evangelio di JesuCristu i Su mishon ku ta salba, mi a kuminsá haña un testimonio di su realidat. Un dia segun mi tabata lesa e Buki di Mormon den mi kamber, mi a pousa, hinka na rudia, i duna un orashon sinsero i a sinti trankil ku Tata Selestial ta susurá na mi spiritu ku e Iglesia i e Buki di Mormon definitivamente tabata bèrdat. Mi periodo di tres aña i mei di investigá e Iglesia atrobe, a guia mi bèk ku henter mi kurason i konvikshon na su realidat.”

Si bo lo tuma e tempu pa humildemente lesa i deliberá e Buki di Mormon, manera mi amigu, i duna oido na e dushi frutanan di e Spiritu, e ora ei kualke un lo risibí ku tempu e testimonio deseá.

E Buki di Mormon ta un di Dios su donnan sin preis pa nos. E ta tur dos, spada i eskudo—i ta manda e palabra di Dios den bataya pa bringa pa e kurasonnan di e hustu i ta sirbi komo un defendedó di marka mayó di e bèrdat. Komo Sántunan, nos no tin ku solamente tin e privilegio di defendé e Buki di Mormon pero e oportunidat pa tuma e promé plano—pa prediká ku poder su doktrina divino i duna testimonio di su evento krusial ku ta JesuCristu.

Mi ta duna mi testimonio solèm ku e Buki di Mormon a wòrdu tradusí dor di e don i poder di Dios. E ta Dios su testigu ku ta urgí, di e divinidat di JesuCristu, e yamamentu profétiko di José Smith, i e bèrdat apsoluto di e Iglesia aki. Ku e por bira e pilar di nos testimonionan, asina ku por wòrdu bisá over di nos, manera e tabata bisá di e Lamanitanan ku a kombertí, nan “nunka a kai” (Alma 23:6). Den e nòmber di JesuCristu, amèn.