Bèrdatnan Esensial—Nos Nesesidat pa Aktua
E Promé Vishon i e Profeta Jose Smith a trese konosementu dilanti i bèrdat ku ta esensial pa nos goso den e bida aki i pa nos eksaltashon.
Tempu mi tabata mas o ménos shete aña, mi a puntra mi mama, “Ora abo i ami muri i bai shelu, lo bo ta mi mama ainda?” E no a spera un pregunta asina. Pero kontestando na su mihó konosementu, el a bisa, “No, den shelu nos lo bira ruman. Lo mi no ta bo mama.” Esei no tabata e kontesta ku mi a spera.
Algun tempu despues di e kombersashon kòrtiku aki, dos hòmber hóben a yega na e h`ki di nos kas. Pa algun milager, mi tata a pèrmití nan drenta paden. Nan a bisa ku nan tabata mishoneronan di e Iglesia di JesuCristu di e Santunan di e Delaster dianan.
E èldernan aki, manera nos a siña yama nan, a kuminsá siña nos famia. Mi ta kòrda bon kla nos sentimentunan di felisidat i eksitashon kada bia ku nan a bini nos kas. Nan a bisa nos ku un hòmber hóben a bai na un arboleda pa puntra Dios kua iglesia tabata bèrdadero i ku el a mira Dios i JesuCristu.1 E èldernan a mustra nos un ilustrashon di e vishon, i ora mi a mir’é, mi tabata sa ku José Smith enbèrdat a mira Dios e Tata i JesuCristu. E mishoneronan a bisa ku pa motibu di e vishon aki, e Iglesia berdadero di JesuCristu tabata un biaha mas na mundu.2
E mishoneronan a siña nos tambe Dios su plan di felisidat i a kontestá e preguntanan di nos famia tokante religion. Nan a siña nos ku famianan di bèrdat por ta huntu despues di e bida aki komo tata, mama, i yunan.
Nos famia a wòrdu boutisá. E kaminda pa kambia kustumbernan bieu, laga tradishonnan, i bira miembronan aktivo di Iglesia tin biaha tabata un poko difísil. Pero pa motibu di e miserikòrdia i amor di Dios i ku yudansa di hopi lider i miembro, nos logra pasa dor di e promé añanan desafiante.
Miónes ku a djòin Iglesia kaba, huntu ku e hopi di esnan ku ta kombèrtí i batisá kada siman, a haña un testimonio di e Promé Vishon. E Spiritu Santu por ripití esaki e testimonio aki hopi bia na kada un di nos miéntras nos ta hasi esfuerso pa biba e bèrdatnan simpel di e evangelio di JesuCristu.
E Promé Vishon i e Profeta José Smith a trese dilanti mas konosementu i bèrdat ku ta esensial pa nos felisidat den e bida aki i nos eksaltashon den e presensia di Dios. Lo mi menshoná tres di e bèrdatnan ku nos ta gana i mester aktua na dje pasobra un mucha hòmber yòn a hasi orashon sinsero na rudia.
Dios ta Yama Profetanan pa Dirigí i Guia Nos
Un bèrdat esensial nos por siña di e Promé Vishon i e Profeta José Smith ta ku Dios ta yama profetanan,3 videntenan, i reveladónan pa instruí , guia , atvertí , i dirigí nos.4 E hòmbernan aki ta Dios su mensaheronan na mundu,5 ku e outoridat pa papia i aktua den nòmber di Señor.6Dor di sigui nan konseho estriktamente, nos lo ta protehá i risibí bendishonnan di nos skohensia, nos lo ta protehá i risibí bendishonnan eskohido nos biahe riba e mundu aki.
Tempu mi tabata studia na Universidat Brigham Young komo un mishonero regresá, y soltero, mi a asistí na un seshon di saserdosio di konferensia general den e Tabernakulo na Temple Square. Presidente Ezra Taft Benson, e tempu ei e di dies Presidente di Iglesia, a urgi tur mishonero regresá pa tuma kasamentu na serio i hasié un prioridat haltu den nan bida.7 Despues di e seshon, mi tabata sa ku mi a wòrdu yamá pa arepentimentu i mester a aktua na e konseho di e profeta.
Pues, mi a disidí pa bai mi pais natal, Brasil, pa haña un esposa. Promé ku mi a bai Brasil pa un stage di dos luna, mi a yama mi mama i algun amigu via telefòn i a bini ku un lista di mas o ménos 10[dies] muher hóben—kada un, un potensial esposa.
Na Brasil, despues di hopi meditashon i orashon, mi a sera konosí, sali, i a komprometé, i a pone un fecha pa kasa ku un di e muhernan hóben riba e lista. No tabata un kibramentu di record pa studiantenan na Provo, Utah, pa sali huntu i komprometé, pero e tabata lihé pa normanan di Brasil.
Algun luna despues, mi a kasa ku Elaine. E ta e amor di mi bida i un bendishon eskohí.
Mi no ta sugeriendo ku tur hende tin ku hasi un lista similar, pero mi ta sugirí—kisas mas ku sugirí—ku semper nos por aktua ora nos profeta papia.
Dios su profeta di awendia ta Presidente Thomas S. Monson, i nos lo wòrdu bendishoná ku nos sigui su konseho ku eksaktitut.
E Konosementu di e Naturalesa Berdadero di Dios
Un otro bèrdat ku nos ta siña pa motibu di e Promé Vishon i e Profeta José Smith ta e bèrdadero naturalesa di Dios. Djis imaginá kon bendishoná nos ta pa sa ku Dios ta un ser ku un kurpa di karni i wesu mes palpabel ku esun di nos,8 ku nos por adorá un Dios ku ta real, ku nos por komprondé, i ku a mustra i revelá Su mes i Su Yu na Su profetanan—tantu di antigwedat i di e delaster dianan.9 E ta un Dios ku ta skucha i ta kontestá orashonnan;10 un Dios ku ta wak nos for di ariba den shelu11i ku konstantemente ta preokupá pa nos bienestar spiritual i temporal; i ku a duna nos albedrio pa disidí pa nos mes pa siguié i obedesé Su mandamentunan sin fòrsamentu;12 un Dios ku ta duna nos bendishon i ta pèrmití nos pa enfrentá nos pruebanan p’asina nos por krese i bira manera e.
E ta un Dios amoroso ku a duna un plan pa medio si kua nos por gosa di felisidat den e bida aki i den eternidat.
JesuCristu Ta Nos Salbador
For di e Promé Vishon i di e Profeta José Smith, nos a risibí konosementu di e realidat i mishon sagrado di Señor JesuCristu, ku ta e piedra angular di nos religion.
Pasobra morto a drenta den mundu, mes sigur ku nos ta biba awe, un dia nos lo muri. Un di e efektonan di morto lo ta pa ta e pèrdida permanente di nos kurpa físiko; nos lo no ta kapas pa hasi nada pa reklam’é. Aserka, pasobra nos tur ta hasi piká durante nos biahe aki na mundu, nunka nos lo no ta kapas pa regresá den presensia di nos Tata Selestial.
Boso por imaginá e konsekuensianan di ta ningá di e presensia di Dios i di nunka mas tin un kurpa?
Un Salbador i Redentor tabata nesesario a libra nos for di morto i piká. Bou di direkshon di Tata Selestial, JesuCristu a bini na mundu, a sufri, muri na krus, i a resusitá p’asina nos tambe por resusitá i, ku arepentimentu sinsero i hasimentu i wardamentu di kombenionan sagrado, ta atrobe den presensia di Dios.
Jakob a splika, “O kon grandi e bondat di nos Dios, ku ta prepará un kaminda pa nos skapa for di e gara di e mònster teribel aki; si, e mònster ei, morto i fièrnu, ku mi ta yama e morto di e kurpa, i tambe e morto di e spiritu.”13
Jesus ta e Mesias primintí, e Legisladó, Esun Santu di Israel, nos Señor, nos Salbador, nos Redentor, nos Rei, nos Tur Kos.
Ku nos tur lo sigui aktua na e bèrdatnan i konosementu esensial aki, ofresiendo nos obedensia na Dios i Su Yu Stimá. Den e nòmber di JesuCristu,amèn.