Ku Bo Goso Lo Ta Kompletu
JesuCristo ta e fuente di tur kuramentu, pas, i eterno progreso.
Rumannan, ta un goso pa ta huntu ku boso. I esei ta loke ku mi papia ku boso riba dje e mainta aki—tin un plenitut di goso.
Un notisia titular resien tabata bisa, “Desasternan ta shòk e nashon [i] mundu.”1 For di horkannan i diluvionan pa olanan di kalor i sekuranan, for di kandelanan di mondi i temblornan pa gueranan i malesanan desolá, e ta parse “henter mundu [ta] den konmoshon.”2
Mion di hende a wòrdu desplasá, i bidanan sin konta a wòrdu interumpí pa e retonan aki. Frikshon den famianan i komunidatnan i tambe luchanan di paden ku miedo, duda, i speransanan ku no a kumplí tambe ta laga nos ku insertidumbre. E por ta difísil pa sinti e goso ku Lehi a siña ta e propósito di bida.3 Nos tur a yega di puntra: “Unda mi por bai pa pas? Unda ta mi konsuelo … ?”4 Nos ta puntra nos mes, kon mi lo haña goso apesar di e difikultatnan di bida mortal?
E kontesta por parse muchu simpel, pero e la wòrdu pruba bèrdat for di tempu di Adam. Duradero goso ta wòrdu hañá den enfoká riba nos Salbador, JesuCristo, i bibá e evangelio manera a wòrdu demostrá i siñá p’E. Mas ku nos ta siña tokante, tin fe den, i imitá JesuCristo, mas nos ta yega di komprondé ku E ta e fuente di tur kuramentu, pas, i eterno progreso. E ta invitá kada un di nos pa bini na djE,5 un invitashon ku Presidente Henry B. Eyring a karakterisá manera “e mas importante invitashon kualke hende lo por akseptá.”6
Siña di JesuCristo
Kon nos ta bini na djE? Aprel ku a pasa ei, Presidente Russell M. Nelson i Elder M. Russell Ballard a enkurashá nos pa studia “E Cristu Bibu” ”7 komo parti di siña tokante e Salbador. Hopi a akseptá e reto i a wòrdu bendishoná. No hopi tempu pasa un amiga stimá a duna kada un di su yunan adulto kopia di e dokumento ku pòrtrètnan di evangelio pa ilustrá kada frase. El a enkurashá su yunan pa yuda su nietunan komprond’é i memoris’é. Algun tempu despues mi amiga a kompartí un video di su nieta di seis aña, Laynie, resitá su vershon memorisá ku entusiasmo i kompostura. Mi a realisá ku si un mucha di seis aña tabata por hasié, asina mi tambe por!
Segun mi a studia e bida i siñansanan di JesuCristo ku mas enfoke i a siña “E Cristo Bibu” for di memoria, mi gratitut i amor pa nos Salbador a oumentá. Kada frase di e dokumento inspirá ei ta kontené un predikashi i a mehorá mi komprendementu di Su dibino ròlnan i mishon terenal. Loke mi a siñá i sinti durante e periodo aki di studio i reflekshon ta konfirmá ku Jesus berdaderamente “ta e lus, e bida, i e speransa di e mundu.”8 Skritura antiguo i palabranan di profetanan di e delaster dianan skirbí òf papiá den alabansa di djE ta duna testimonio ku “Su kaminda ta e kaminda ku ta guiá pa felisidat den e bida aki i bida eterno den e mundu benidero.”9
Tin Fe den JesuCristo
Miéntras bo ta studia Cristo Su bida i siñansanan na diferente manera, bo fe den djE lo oumentá. Lo bo yega di sa ku E ta stima bo individualmente i komprondé bo perfektamente. Den Su 33 aña di mortalidat, El a sufri rechaso, persekushon, hamber físiko, set, i kansansio;10 soledat, abuso verbal i físiko, i finalmente, un morto horibel na man di hòmbernan pekaminoso.11 Den e hòfi di Getsemani i riba e krus di Gólgota, E la sinti di tur nos doló, aflikshon, tentashon, malesa, i enfermedat.12
No ta importá kiko nos a sufri, E ta e fuente di kuramentu. Esnan kin a eksperensia kualke forma di abuso, pèrdida grandi, malesa króniko òf aflikshon inkapasidat, akusashonnan falsu, persekushon visioso, òf daño spiritual for di piká òf mal komprendementu por tur wòrdu drechá pa e Redentor di e mundu. Sin embargo, E no lo drenta sin invitashon. Nos mester bini na djE i lag’É traha Su milagernan.
Riba un dia bunita di primavera mi a laga e porta habri pa gosá e aire fresku. Un para chikí a bula den e porta habri i e ora a realisá esaki no tabata unda e tabata kier ta. El a bula desesperadamente rònt e kamber, konstantemente bulando den e glas di bentana tratando di skapa. Mi a purba di gui’é gentilmente na e porta habri, pero e tabatin miedo i a sigui bula for di mi. Finalmente e la bahá riba e tòp di e kòrtina den kansansio konfundí. Mi a tuma un basora i pokopoko a yegá e kabei steif ku fin ariba na unda e para a sinta nervioso. Miéntras mi tabata wanta e kabes di e basora na banda di su pianan, e para a stap tentativamente riba e kabei steif. Pokopoko, mi a kana na e porta habri, wantando e basora mas stèdi ku mi tabata por. Manera nos a yega na e porta habri, e para a bula lihé na libertat.
Manera e para ei, tin biaha nos tin miedo pa konfia pasobra nos no ta komprondé Dios Su apsoluto amor i deseo pa yuda nos. Pero ora nos ta studia Tata Selestial Su plan i JesuCristo su mishon, nos ta komprondé ku Nan úniko ophetivo ta nos eterno felisidat i progreso.13 Nan ta deleitá pa yuda nos ora nos ta puntra, buska.14 i bati. Ora nos ta ehersitá fe i humildemente habrí nos mes na Nan kontestanan, nos ta bira liber di e restrikshon di nos mal komprendementu i suposishon, i nos por wòrdu mustra e kaminda padilanti.
JesuCristo tambe ta e fuente di pas. E ta invitá nos pa “sten riba [Su] brasa amplio”15 i ta primintí e “pas … ku ta pasa tur komprendementu,”16 un sentimentu ku ta bini ora Su Spiritu “ta papia pas na nos almanan”17 no importá kua retonan ta rondoná nos. Sea nan ta luchanan personal, problemanan di famia, òf krísisnan di komunidat, pas lo bini ora nos ta konfia ku Dios Su Yu Hòmber Unígenito tin poder pa kalma nos almanan ku ta sufrí.
Snježana Podvinski, un di e tiki Santunan na Karlovac, Kroatia, a sten riba e Salbador ora su esposo i tur dos su mayornan a muri entre un periodo di seis luna aña pasa. Yen di ferdrit, pero teniendo un testimonio ku famianan ta pa semper, e la usa tur su sparmentu pa biaha na e tèmpel unda el a wòrdu seyá na su esposo i mayornan. E la kompartí ku e dianan ei den e tèmpel tabata un toke di lus den su bida. Pasobra su testimonio firme di JesuCristo i Su Ekspiashon, el a sinti pas i a kuramentu eksperensiá ku tambe a bira un forsa pa esnan rònt di dje.
Fe den JesuCristo ta trese asta mas donnan ku kuramentu i pas. Manera Presidente Henry B. Eyring a kompartí: “Mi ta gradisí pa e hopi maneranan Señor a bishitá mi ku e Konsoladó ora mi tabatin mester di pas. Riba dje nos Tata na Shelu ta preokupá no solamente ku nos konsuelo pero asta mas ku nos progreso mas ariba.”18
Dor di JesuCristo Su Ekspiashon, ku ta inkluí e donnan di redenshon i resurekshon, nos tambe por arepentí, kambiá, i progresá eternamente. Pasobra di e poder E ta duna nos ora nos ta obediente, nos por bira mas ku nunka nos lo por bira riba nos mes. Por ta nos no ta komprondé kompletamente kon, pero kada un di nos ku a sinti fe den Cristo oumentá tambe a risibí un komprendementu mas grandi di nos identidat i propósito dibino, guiando nos pa hasi eskohonan ku ta konsistente ku e konosementu ei.
Apesar un mundu ku lo trata di bati nos abou na e nivel di “djis animalnan,”19 sabiendo ku Dios ta nos Tata ta sigurá nos ku nos tin potensial dibino i un promesa real. Apesar di un mundu ku ta konta nos e bida aki ta un fin morto, sabiendo ku Dios Su Yu Hòmber Unígenito a hasié posibel pa nos por wòrdu redimí i resusitá ta duna nos speransa pa eterno progreso.
Imitá JesuCristo
Segun nos ta siña mas tokante JesuCristo, nos ta desaroyá fe mas grandi den djE i nos kier naturalmente sigui Su ehèmpel. Wardando Su mandamentunan ta bira nos deseo mas grandi. Nos kurasonnan ta anhelá pa aliviá sufrimentu di otronan, manera E la hasi, i nos kier pa nan eksperensia e pas i felisidat ku nos a haña.
Dikon tratando pa hasi manera E a hasi ta asina poderoso? Pasobra ora nos ta pone nos fe den akshon, e Spiritu Santu ta duna testigu di eterno bèrdatnan.20 Jesus a instruí Su disipelnan pa warda Su mandamentunan pasobra E sa ku ora nos ta sigui Su ehèmpel, nos lo kuminsá pa eksperensia goso, i ora nos ta kontinuá riba Su kaminda, nos lo yega na un plenitut di goso. E la spliká, “Mi a bisa e kosnan aki pa mi legria por ta den boso i boso legria por ta kompleto.”21
Nos testimonionan ta trahá riba e fundeshi firme di JesuCristo i Su evangelio? Ora e tormentonan di bida ta primi riba nos, frankamente nos ta buska pa un buki di kon pa hasi òf un publikashon riba Internèt pa yuda? Tumando e tempu pa trahá i fortalesé nos konosementu i testimonio di JesuCristo lo duna dividènt den tempunan di prueba i atversidat. Lesá e skrituranan kada dia i reflekshoná riba e palabranan di profetanan bibu, empleá orashon personal signifikante, tumá di e santa sena kada siman, dunando sirbishi manera e Salbador lo hasi—kada un di e simpel aktividatnan aki ta bira un blòki di konstrukshon pa un bida gososo.
Kiko ta trese goso pa bo? E bista di bo ser kerí na fin di un dia largu? E satisfakshon di un trabou bon hasi? E lus den un hende su wowonan ora bo a kompartí nan karga? E palabranan di un himno ku ta alkansá profundo den bo kurason? E primi man di un bon amigu? Tuma un momentu privá pa reflekshoná riba bo bendishonnan, i e ora haña maneranan pa kompartí nan. Segun bo ta alkansá pa sirbi i hisa bo rumannan den bo bario i rònt e mundu aki ku ta den asina hopi konmoshon, bo lo sinti pas i kuramentu mas grandi i asta progreso.
Bin na djE. Mi ta testifiká ku ora bo ta sentrá bo bida riba JesuCristo, bo lo haña goso den bo sirkunstansianan, no importá kiko nan ta. Defakto, “E, solamente Un,”22 ta e kontesta. Traha tempu i tuma tempu pa yega di konosé JesuCristo dor di studia diligentemente, desaroyando fe mas grandi den djE, i lucha pa bira mas manera E. Segun nos ta hasi esei, nos tambe lo wòrdu move pa bisa, ku nos chikitin Laynie, “Duna danki na Dios pa e regalo inkomparabel di Su dibino Yu Hòmber.”23 Den e sagrado nòmber bendishoná di JesuCristo, amèn.