Poseedornan di Lus Selestial

Tin biaha malesa spiritual ta bin komo un resultado di piká òf malesa emoshonal. Tin biaha kaida spiritual ta bin asina gradualmente ku meramente nos por bisa kiko ta pasando. Meskos ku kapanan di piedranan di baranka, doló i tristesa spiritual por krese ku tempu, pisando riba nos spiritu te ora e kasi bira demasiado pisá pa soportá. Por ehèmpel esaki por pasa ora nos responsabilidatnan na trabou,kas, i Iglesia bira asina abrumador ku nos ta pèrdè bista riba e goso di e evangelio. Nos por asta sinti manera ku nos no tin nada mas pa duna òf ku biba e mandamentunan di Dios ta  mas ku su forsa ta permití.

Pero djis pasó pruebanan spiritual ta real no ta nifiká ku no por kura nan.

Nos por kura spiritualmente.

Asta e heridanan di mas profundo—si, asta esnan ku ta parse di ta inkurabel—por wòrdu kurá.

Mi kerido amigunan, e poder kurativo di JesuCristu no ta ousente awendia.

Su [manera di] tochi spiritual por transformá bidanan awendia, meskos ku esaki a pasa den esun di Dje. Si djis nos tin fe, E por tuma nos man, yena nos almanan ku lus i sanashon selestial, i papia ku nos e palabranan bendishoná, “Lanta, kue bi kama, i kana.”¹

Kualkier sea e kousa di nos malesanan spiritual, nan tur tin un kos komun: e ousensia di lus divino.

Skuridat ta redusí nos abilidat pa mira kla. E ta skuresé nos vishon di loke un tempu tabata kla i raspá. Ora nos ta den skuridat, mas probablemente nos lo tuma desishon malu, pasó nos no por mira peliger riba nos kaminda. Ora nos ta den skuridat, mas probablemente nos a pèrdè speransa, pasó nos no por mira e pas i goso ku ta warda nos si nos sigui pèrta bai dilanti.

Lus, di otro banda, ta permití nos wak e kosnan manera nan ta. E ta permití nos diserní entre bèrdat i eror, entre loke ta vital i loke ta trivial. Ora nos ta den lus, nos por tuma desishonnan hustu basá riba prinsipionan berdadero. Ora nos ta den e lus, nos tin “un perfekto brio di speransa”² pasó nos por wak nos pruebanan mortal for di un perspektiva eterno.

Nos lo haña sanamentu spiritual ora nos kita for di e sombra di e mundu i drenta den e Lus eterno di Cristu.

Mas nos komprondé i apliká e konsepto di lus, mas nos por kuida kontra e malesa spiritual ku ta aflihí òf preokupá nos unda ku bo bira, i mihó nos por sirbi komo e poseedó di saserdosio ku ta energétiko, yen kurashi, ku ta kuida i ku ta humilde—berdadero siervonan i disípulonan di nos Rei stimá i eterno.

JesuCristu a bisa, “Ami ta e lus di e mundu: Esun ku sigui Mi lo no kana den [e] skuridat, pero lo tin lus di bida.”³

Kiko esaki ta nifiká?

Simplemente esaki: Esun ku humildemente sigui JesuCristu lo eksperensiá i kompartí den Su lus. I e lus ei lo krese te ora e eventualmente kuri ku asta e skuridat di mas profundo.

E ta nifiká ku tin un poder, un influensia fuerte, ku ta Sali for di e Salbador. E ta prosedé “for di e presensia di Dios pa yena e inmensidat di espasio.”⁴ Pasó e poder aki ta klara, edifiká, i iluminá nos bida, e skrituranan hopi biaha ta yam’é lus, pero tambe ta referí na dje komo e spiritu di bèrdat.

Den Doktrina i Kombenio nos ta lesa, “E palabra di e Señor ta bèrdat, i tur loke ta bèrdat ta lus, i tur loke ta lus ta Spiritu, kual ta e Spiritu di JesuCristu.”⁵

E lus profundo aki—e lus ei ta spiritu ku ta bèrdat i ku e lus ei por bria riba kada alma ku ta bin na mundu—ta mes importante ku e ta duna speransa. E lus di Cristu ta iluminá i saturá e almanan di tur ku ta skucha e bis di e Spiritu.⁶

E Lus di Cristu ta yena e universo.

E ta yena e mundu.

I e por yena kada kurason.

“Dios no ta hasi eksepshon di persona.”⁷ Su lus ta optenibel pa tur—grandi òf chikí, riku òf pober, privilegiado f [esnan ku] desbentaha.

Si boso habri boso mente i kurason pa risibí e Lus di Cristu i humildemente sigui e Salbador, boso lo risibí mas lus. Liña riba liña, aki un tiki, i aya un tiki, lo boso reuní mas lus i bèrdat den boso bida, te ora skuridat wòrdu alehá for di boso bida.⁸

Dios lo habri boso wowonan.

Dios lo duna bo un kurason nobo.

Dios Su amor, lus i bèrdat lo kousa kosnan inaktivo pa surgi di nobo, i lo bo renasé den e bida renobá den Cristu Jesus.⁹

E Señor a primintí, “Si bo wowo ta solamente riba Mi gloria, hinter bo kurpa lo ta yená ku lus, i lo no tin niun skuridat den bo, i e kurpa ei ku ta yená ku lus, ta komprondé tur kos.”¹⁰

Esaki ta e remedi prinsipal pa malesa spiritual. Skuridat ta desaparesé den presensia di lus.

Sinembargo, Dios lo no fòrsa nos pa brasa Su lus.

Si nos bira konfortabel ku e skuridat, no ta probabel ku nos kurason lo kambia.

Pa kambio por tuma lugá, nos mester aktivamente laga e lus drenta.

Durante mi vuelonan, komo kapitan di aeroliña, rònt  di nos mundu, semper mi tabata fasiná dor di e bunitesa i perfekshon di Dios Su kreashon. Mi tabata haña spesialmente koutivante e relashon entre e mundu i e solo. Mi ta konsider’é un lès profundo di kon skuridat i lus ta eksistí.

Manera nos tur sa, kada 24 (bintikuater) ora nochi ta kambia den dia i dia ta kambia den nochi

E ora ei, kiko ta nochi?

Nochi  ta nada mas ku un sombra.

Asta den e nochi di mas skur, solo no ta stòp di radia su lus. E ta sigui lumbra mes briante ku semper. Pero mitar di e mundu ta den skuridat.

E ousensia di lus ta kousa skuridat.

Ora skuridat di nochi yega, nos no ta desesperá i pensa ku solo a paga. Nos no ta kere ku e solo no tei einan òf ku el a muri. Nos ta komprondé ku nos ta den skuridat, i ku e mundu lo sigui drai, i ku eventualmente e rayonan di solo lo alkansá nos atrobe.

Skuridat no ta un indikashon ku no tin lus. Mas biaha, simplemente e ta nifiká [ku] nos no ta na e lugá korekto pa risibí e lus. Durante e eklipse solar mas resien, hopi a hasi gran sakrifisio pa ta den e parti smal di e sombra kreá pa e luna, meimei di un dia ku hopi solo.

Di mesun manera, lus spiritual semper ta bria riba hinter e kreashon di Dios. Satanas lo i hasi tur esfuerso pa krea sombra òf laga nos bai den un sombra ku nos mes a traha. El lo obligá nos pa krea nos propio eklipse; el lo pusha nos den skuridat di su kueba.

Skuridat spiritual por laga nos lubidá e lus spiritual rònt di asta esnan ku tabata kana den e lus i regosihá den e Señor,Sinembargo, asta den momento di skuridat mas profundo, Dios ta skucha nos petishonnan humilde, ora nos ta resa, “Señor, mi ta kere; Yuda mi den mi inkredulidat.”¹¹

Den e dianan di Alma tabatin hopi ku tabata lucha pa aseptá kosnan spiritual, i “dor di nan inkredulidat”, Dios su lus i bèrdat no por drenta nan kurason; ï nan kurason a wòrdu enduresé.”¹²

Hermanos, ta keda na nos pa ta den e lugá korekto pa wak e lus divino di e evangelio di JesuCristu. Asta ora nochi yega i mundu ta parse skur, nos por skohe pa kana den e lus di Cristu, warda Su mandamentunan i testifiká ku kurashi di su realidat i Su grandesa.

Komo poseedornan di Dios su saserdosio i komo disípulonan di JesuCristu boso ta poseedó di lus. Keda hasi e kosnan ku boso sa ku lo nutri Su lus divino. “Lanta boso lus”¹³ i “laga [e] obra, i glorifiká e Tata ku ta na shelu.”¹⁴

Mi kerido hermanos, boso ta instrumentonan den e man di Señor ku e propósito pa trese lus i sanashon pa e almanan di e yunan di e Tata Selestial. Kisas bo no ta sinti kalifiká pa sana esnan ku ta spiritualmente enfermo---sigur no mas ku un empleado na pòstkantor ta kalifiká pa yuda ku artrítis. Kisas bo ta konfrontando desafionan spiritual di bo mes. No opstante Señor a yama bo. El a duna bo e outoridat i responsabilidat pa ekstendé [bo mannan] pa esnan den nesesidat. El a invistí bo ku su poder sagrado di saserdosio pa trese lus den e skuridat i edifiká i bendishoná e yunan di Dios. Dios a restourá Su Iglesia i Su evangelio presioso, “ku ta sana e alma heridá.”¹⁵ el a prepará e kaminda pa bienestar spiritual, pa haña sanashon pa stagnashon i move pa salú vibrante i spiritual.

Kada biaha bo bira  bo kurason pa Dios den orashon humilde, bo ta eksperensiá Su lus. Kada biaha ku bo buska Su palabra i boluntat den e skrituranan, e lus ta krese den brio. Kada biaha bo nota un hende den nesesidat i sakrifiká bo mes komodidat pa ekstendé [bo mannan] den amor, e lus di ta ekspandé i ta hincha. Kada biaha bo nenga tentashon o skohe puresa, kada biaha bo skohe òf ekstendé pordon, kada biaha ku yen kurashi bo testifiká di bèrdat, e lus ta kuri ku skuridat i ta atraé otronan ku tambe ta buska lus.

Pensa riba propio eksperensianan, momentonan di servisio na dios i na e próhimo ora lus divino a bria den bo bida den e tèmpel sagrado, na e mesa di Santa Sena, na un momento ketu di reflekshon orando, den reunionnan familiar, òf durante un akto di servisio di saserdosio. Kompartí e momentonan aki ku famia, amigunan, i spesialmente ku nos hubentut ku ta buskando lus. Nan mester di tende di bo ku ta ku e lus aki speransa i sanashon ta bin asta den un mundu yen di skuridat.

Cristu su lus ta trese speransa, felisidat, i sanashon di tur herida spiritual òf enfermedat.¹⁶ Esnan ku eksperensiá e influensianan ku ta refiná aki, ta bira instrumento den e mannan di e Lus di e Mundu pa duna lus na otro.¹⁷ Nan lo sinti loke Rei Lamoni a sinti: “E lus aki a inyektá asina tantu goso den su alma, [ku] e nubia di skuridat a wòrdu kitá, i …e lus di bida eterno a wòrdu sendé den su alma.”¹⁸

Mi rumannan stimá, mi amigunan stimá, ta nos meta pa buska Señor te ora Su lus di bida eterno kima briantemente den nos i nos testimonio bira konfiansa i fuerte asta meimei di skuridat.

Ta mi orashon i bendishon ku boso lo logra den kumpli ku boso destino komo poseedornan di saserdosio do e Dios todopoderoso i komo poseedornan di Su Lus Selestial. Den e nòmber sagrado di JesuCristu, nos Maestro, amèn.