No Tene Miedu pa Hasi Bon

Mi kerido rumannan, ta mi humilde orashon ku e Espíritu di Señor lo ta ku nos miéntras mi ta papia awe. Mi kurason ta yena ku gratitut pa Señor, di ken e Iglesia aki ta, pa e inspirashon ku nos a sinti den orashonnan ferviente, sermonnan inspirá, i kanto angelikal den e konferensia aki.

Na aprel último, Presidente Thomas S. Monson a duna un mensahe ku a konmové kurasonnan rònt mundu inkluso di mi. E la papia di e poder di e Buki di Mormon. E la urgi nos pa studi’é, skrudiñ’é i apliká su enseñansanan. E la primintí ku si nos dediká tempu kada dia na studia i skrudiñá i warda e mandamentunan ku e Buki di Mormon ta kontené, nos lo tin un testimonio vital di su bèrdat, i e testimonio resultado di e Kristu bibiente lo yuda nos pa yega na un lugá sigur den e tempunan di problema. (Wak “E Poder di e Buki di Mormon,” Liahona, Mei 2017, 86–87.)

Manera hopi di boso, mi a skucha e palabranan di e profeta komo e bos di Señor pa ami. I, meskos ku hopi di boso, mi a disidí di obedesé su palabranan. Awó, for di tempu mi tabata un mucha, mi a sinti e testimonio ku e Buki di Mormon ta e palabra di Dios, ku e Tata i e Yu a aparesé i papia ku Jose Smith, i ku Apòstelnan di antaño a bin serka e Profeta Jose pa restourá e yabinan di e saserdosio pa e Iglesia di Señor.

Ku e testimonio ei, ami a lesa Buki di Mormon tur dia pa mas ku 50 aña. Pues kisas mi por a pensa rasonabelmente ku e palabranan di Presidente Monson tabata pa otro hende. Pero, manera hopi di boso, mi a sinti e enkurashamentu di e profeta i su promesa a invitá mi pa hasi un esfuerso mas grandi. Hopi di boso a hasi loke ma hasi: hasi orashon ku mas intenshon, skrudiñá e eskrituranan mas intenso, i purba mas duru na sirbi Señor i otronan p’E.

E resultado felis p’ami, i pa hopi di boso, tabata loke e profeta a primintí. Nos ku a tuma e konseho inspirá na kurason a skucha e Espíritu mas profundamente. Nos a haña mas poder pa resistí tentashon i nos a sinti fe mas grandi den un JesuCristo resusitá, den Su evangelio, i den Su Iglesia bibiente.

Den un temporada di tumulto kresiente den e mundu, e kresementu den testimonio a saka duda i temor i a trese pa nos sentimentunan di pas. Skuchando Presidente Monson su konseho tabata tin dos efekto maravioso mas riba mi: Promé, e Espíritu ku e la primintí a produsí un sentido di optimismo tokante kiko ta bin dilanti, hasta ora e konmoshon den e mundu ta parse di ta krese mas. I di dos, Señor a duna mi - i abo - un sentimentu ainda mas grandi di Su amor pa esnan den problema. Nos a sinti un kresementu den e deseo pa sali i reskatá otronan. E deseo ei tabata den e kurason di e ministerio i enseñansa di Presidente Monson.

Señor a primintí amor pa otronan i kurashi na e Profeta Jose Smith i Oliverio Cowdery ora e obra pone nan dilanti tabata parse hopi pisa. Señor a bisa ku e kurashi nesesario lo bin for di fe den djE komo nan baranka:

“No teme pa hasi bon, mi yunan, pasobra loke bo planta, esei tambe lo bo kosecha; p’esei, si bo planta bon lo bo kosecha bon pa bo rekompensa.

“P’esei, no teme, mi rebaño; hasi bon; laga mundu i fièrnu kombiná kontra bo, pasobra si bo konstruí riba mi baranka, nan no por gana bo.

“P’esei, mi no ta kondena bo; bai bo kaminda i no peka mas; kumpli ku soberbio bo obra kual mi a manda bo hasi.

“Wak na ami den kada pensamentu; no duda, no teme.

“Wak e heridanan ku a penetrá den mi banda, i tambe e markanan di e klabunan den mi man i pia; ta fiel, warda mi mandamentunan, i lo bo heredá e reino di shelu” (D&C 6:33–37).

Señor a bisa Su lidernan di e Restourashon, i E ta bisa nos, ku ora nos ta para ku fe riba Su baranka, duda i temor ta bira tiki; e deseo pa hasi bo ta krese. Ora nos akseptá Presidente Monson su invitashon pa planta den nos kurason e testimonio di JesuCristo, nos ta haña poder, e deseo, i e kurason pa bai reskatá otronan si preokupá pa nos propio nesesidatnan.

Mi a mira fe i kurason hopi bia ora Santunan di Delaster Dia kreyente a para dilanti algun prueba teribel. Por ehèmpel, mi tabata na Idaho ora e Dam di Tenton a kibra dia 5 di yüni 1976. Un muraya di awa a bin abou. Míles a hui for di nan hogar. Míles di kasnan i negoshinan a wòrdu destruí, ménos ku 15 hende a muri.

Loke mi a mira ei, mi a mira semper ora Santunan di Delaster Dia a para firme riba e baranka di un testimonio di JesuCristo. Pasobra nan no ta tin duda ku E ta vela riba nan, nan a bira sin miedu. Nan a ignorá nan propio pruebanan pa bai yuda otronan. I nan ta hasié di amor pa Señor, sin pidi rekompensa.

Por ehèmpel, dia e Dam di Tenton a kibra, un pareha Santu di Delaster Dia tabata biahando míles di mia for di nan hogar. Asina nan a tende e notisia na radio, nan a kore bai bek Rexburg. En bes di bai nan propio kas pa wak si e la wòrdu destruí, nan a bai buska nan obispu. E tabata den un edifisio ku tabata wòrdu usa komo un sentro di rekuperashon. E tabata yudando pa dirigí e míles di voluntarionan ku tabata yega den e bùsnan hel di skol.

E pareha a yega serka e obispu i bisa, “No a kaba di bin bek. Obispu, unda nos por bai pa yuda?” E la duna nan nòmbernan di un famia. E pareha a keda saka lodo i awa for di un hogar pa otro. Nan a traha di mainta te anochi durante dianan largu. Porfin nan a deskansá pa bai wak konta ku nan propio kas. E la disparsé den e inundashon lagando nada pa limpia. Pues nan a bira bek lihé atrobe i bai serka nan obispu. Nan a puntra, “Obispu, bo tin otro hende pa nos yuda?”

E milager di kurashi silensioso i karidat - e amor puru di Kristu - a wòrdu ripití durante añanan i rònt mundu. E ta pasa den dianan di persekushon i pruebanan teribel durante e tempu di e Profeta Jose Smith na Missouri. E la pasa ora Brigham Young a guia e éksodo for di Nauvoo i despues yama e Santunan na lugánan desierto rònt e parti wèst di Merka, pa yuda otro krea Sion pa Señor.

Si bo lesa e diarionan di e pioneronan ei, bo ta mira e milager di fe kitando duda i temor. I bo ta lesa di Santunan bandonando nan propio interes pa yuda otro hende pa Señor, promé nan bai bek na nan propio karnénan òf nan propio vèltnan sin ku a wòrdu trata.

Mi a mira e mesun milager algun dia pasa den e dianan despues di Orkan Irma na Puerto Rico, Sint Thomas, i Florida, kaminda Santunan di Delaster Dia a uni ku otro iglesianan, gruponan den komunidat lokal, i organisashonnan nashonal pa kuminsá esfuersonan di limpiesa.

Manera mi amigunan na Rexburg, un pareha no miembro na Florida a enfoká riba yuda e komunidat en bes di traha den nan propio propiedat. Ora algun bisiña miembro di Iglesia a ofresé yudansa ku dos palu grandi ku tabata blòkia su entrada di kas, e pareha a splika ku wòrdu abrumá i nan a bira yuda otronan, teniendo fe ku Señor lo proveé e yudansa ku nan tin mester pa nan propio kas. E hòmber a kompartí ku promé ku miembronan di Iglesia a yega ku oferta di yudansa, e pareha tabata hasi orashon. Nan a risibí un kontesta ku yudansa ta na kaminda. E la bin tambe den algun ora ku nan a risibí e kontesta.

Mi a skucha di un reportahe ku tin ku a kuminsá yama e Santunan di Delaster dia ku ta bisti e T-shirt hel di Mannan ku ta Yuda “E Angelnan Hel”. Un Santu di Delaster dia a hiba su outo drecha, i e hòmber ku a yud’é a deskribí e “eksperensia spiritual” ku e tabata tin ora e T-shirtnan hel a kita palunan for di su kura i despues, e la bisa, nan “a kanta un kantika pa mi tokante ta un yu di Dios.”

Un otro residente di Florida - tambe no miembro - a relatá ku Santunan di Delaster Dia a bin na su kas ora e tabata traha den su kurá distruí i sintiendo abrumá, ya kansa i serka di yora. E voluntarionan a krea, den su palabranan, “un milager puru.” No solamente nan a sirbi ku diligensia pero tambe ku alegria i sonrisa, akseptando nada a kambio.

Mi a mira e diligensia i skucha nan hari ora, lat riba un djadumingu, mi a bishita un grupo di Santunan di Delaster dianan Florida. E voluntarionan a stòp nan labor di limpiesa sufisiente pa laga mi duna algun di nan man. Nan a bisa ku 60 miembro di nan estaka di Georgia a krea un plan pa uni den e reskate na Florida e anochi promé.

Nan a sali fo’i Georgia 4’or di mainta, kore pa oranan, traha durante e dia i bai den anochi, i plania e labor atrobe pa siguiente dia.

Nan a deskribié na mi ku sonrisa i bon humor. E úniko stress ku ma sinti ta ku nan no ker a wòrdu gradisí tantu asina pa nan por sigui traha. E presidente di estaka a start e zag di mashin atrobe i tabata traha riba un palu ku a kai i e Obispu tabata move un pidanan di palu ora nos a drenta nos outo pa sigui pa e siguiente grupo di reskate.

Mas trempan e dia ei, miéntras nos tabata bayendo pa otro sitio, un hòmber a yega serka na nos outo,  kita su pèchi, i gradisí nos pa e voluntarionan. E la bisa, “Mi no ta miembro di bo iglesia. Mi no por kere kiko boso a hasi pa nos. Dios bendishoná boso.” E voluntarionan di Iglesia para banda di dje ku sonrisa i ku man na su skouder, manera ku nan no meresé ningun elogio.

Miéntras otro voluntarionan di Georgia a bin pa yuda e hòmber aki ku no por a kere, masha hopi Santunan di Delaster dia di e mesun parti distruí di Florida a bai sentenar di kilometer na un otro parti di Florida kaminda nan a tende ku e hendenan a sufri mas daño.

E dia ei, mi a kòrda, i komprondé mihó, e palabranan profétiko di e Profeta Jose Smith: “Un hòmber yena ku e amor di Dios, no ta kontentu ku bendishoná su famia solamente, pero ta bai rònt mundu, ansioso pa bendishoná hinter e rasa humano”.(Enseñansanan di Profetanan di Iglesia: Jose Smith [2007], 426).

Nos ta mira asina tantu amor den e bida di e Santunan di Delaster dia tur kaminda. Kada bia ku tin un evento trágiko, Santunan di Delaster Dia ta hasi donashon i ta hasi trabou di voluntario na e esfuersonan humanitario di Iglesia. No tin mester di hasi masha un yamada. De echo, den algun okashon, nos tin ku pidi esnan ku ta traha komo voluntario pa warda kua biahe na e sitio di rekuperashon te ora esnan ku ta dirigí e obra ta prepará pa risibí nan.

E deseo ei di bendishoná ta e fruta di hendenan risibiendo un testimonio di JesuCristo, Su evangelio, Su Iglesia restourá, i Su profeta. Ta p’esei Señor su hendenan no ta duda no tin miedu. P’esei misioneronan ta hasi trabou boluntario di servisio den kada skina di mundu. Ta p’esei mayornan ta hasi orashon ku nan yunan pa otronan. Ta p’esei lidernan ta desafiá e hubentut pa tuma Presidente Monson su petishon pa sumergí nan mes den e Buki di Mormon ku nan kurason. E fruta ta bini no paso nos ta wòrdu urgi dor di nos lidernan pero dor ku e hubentut i miembronan ta aktua riba nan fe. E fe pone den akshon - ku ta rekerí un sakrifisio desinteresá - ta trese kambio di kurason ku ta permití nan sinti e amor di Dios.

Nos kurasonnan, sinembargo, ta keda kambia solamente si nos kontinuá na sigui e konseho di e profeta. Si nos stòp di purba despues di un intento di esfuerso, e kambio lo desaparesé.

Santunan di Delaster Dia fiel a inkriminá nan fe den e Señor JesuCristo, den e Buki di Mormon komo e palabra di Dios, i den e restourashon di e yabinan di saserdosio den Su Iglesia berdadero. E testimonio ku a krese aki ta duna nos mas kurashi i mas kariño pa otro yunan di Dios. Pero e desafio i oportunidatnan nos dilanti ta rekerí ainda mas.

Nos no por mira e detayenan adelantá, pero nos sa e imágen mas grandi. Nos sa ku den e último dianan, e mundu lo ta den konmoshon. Nos sa ku entre kualke problema ku bini, Señor lo guia su Santunan di Delaster dia fiel pa hiba e evangelio di JesuCristo na tur nashon, famia, lenga, i hende. I nos sa ku Señor su berdadero disípulonan lo ta digno i prepará pa risibí E ora E bin bek. Nos no mester tin temor.

Pues, pa mas ku nos a konstruí nos fe i kurashi kaba den nos kurason, Señor ta spera for di nos - i for di e generashonnan despues di nos. Nan lo mester ta mas fuerte i ku mas kurashi pasobra nan lo tin kosnan mas grandi i mas duru ku nos tabata tin. I nan lo enfrentá mas oposishon for di e enemigu di nos alma.

E kaminda pa optimismo ora nos ta bai dilanti a wòrdu duna dor di Señor: “Wak mi den kada pensamentu; no duda, no teme” (D&C 6:36). Presidente Monson a bisa nos kon pa hasi esaki. Nos mester skrudiñá i apliká e Buki di Mormon i e palabranan di e profetanan. Semper hasi orashon. Ta kreyente. Sirbi Señor ku tur bo kurason, forsa, mente i poder. Nos mester hasi orashon ku tur e energia di nos kurason pa e don di karidat, e amor puru di Kristu (wak Moroni 7:47–48). I mas ku tur kos, nos mester ta konsistente i insistente den sigui e konsehonan profétiko.

Ora e kaminda ta difísil, nos por konta riba e promesa di Señor - e promesa ku Presidente Monson a rekordá nos di dje ora vários bia e la sita e palabranan di e Salbador: “Es ku risibí bo, einan Mi tambe lo ta, pasobra lo mi bai bo dilanti. Lo mi ta na bo man drechi i na bo banda robes i mi Espíritu lo ta den bo kurason, i mi angelnan lo rondoná bo, pa karga bo” (D&C 84:88).

Mi ta testifiká ku Señor ta bai nos dilanti kada bia ku bo ta den Su obra. Tin biaha lo bo ta e angel ku Señor ta manda pa karga bo. Tin bia abo lo ta esun rondoná di angel pa karga bo. Pero semper lo bo tin Su Espíritu den bo kurason, manera a wòrdu primintí na bo den kada servisio sakramental. Solamente bo tin ku warda SU mandamentunan.

E mihó dianan ta dilanti pa e reino di Dios aki na mundu. Oposishon lo fortalesé nos fe den JesuCristo, manera e la hasi for di e dianan di e Profeta Jose Smith. Fe semper ta vense temor. Pará huntu ta produsí union. I nos orashonnan pa esnan den nesesidat ta wòrdu skucha i kontesta pa un Dios amoroso. E no ta kabishá ni tampoko E no ta drumi.

Mi ta duna mi testimonio ku Dios e Tata ta bibu i ku e ke pa nos bin kas serka djE. Esaki ta e Iglesia berdadero di Señor JesuCristo. E konosé bo, E stima bo, i e ta kuida bo. El a ekspiá pa bo pikanan i e pikanan di tur e yunan di nos Tata Selestial. Siguiendo E den bo bida, i den bo servisio na otronan ta e úniko manera pa yega bida eterno.

Esei mi ta testifiká i mi ta laga bo ku mi bendishon i mi amor. Den nòmber di JesuCristo, amèn.