E Bèrdat di Tur Kos

Nos a bini awe nochi ku e speransa i fe ku den kualkier manera, nos lo bai fortifiká i bendishoná pa e Spiritu Santu, ku ta siña bèrdat.¹ Ta tokante di nos búskeda individual di e bèrdat mi ke papia di dje.

Komo un hòmber yòn, mi tabatin hopi pregunta tokante Iglesia. Algun di mi preguntanan tabata sinsero. Otronan no tabata i tabata reflehá duda di otronan.

Regularmente mi tabata diskutí mi preguntanan ku mi mama. Mi ta sigur ku e por a sinti ku hopi di mi preguntanan tabata sinsero i for di mi kurason. Mi ta kere ku e tabata un tiki desapuntá den e preguntanan nan ku no tabata sinsero i mas un argumento. Sinembargo, e no laga mi kai pasombra mi tabatin pregunta. E tabata skucha i purba na kontestanan. Ora ku e sinti ku el a bisa tur lo kual e por i ku ainda mi tabatin pregunta, e lo a bisa algu asina aki: “David, esei ta un bon pregunta. Miéntras ku bo ta buska i lesa i hasi orashon pa bo por haña kontesta, dikon bo no ta hasi e kosnan bo sa ku bo tin ku hasi i no hasi e kosnan ku bo sa ku bo no tin ku hasi? ” Esaki a bira mi patronchi en buska di bèrdat. Dor estudio, orashon, i warda e mandamentunan, mi a haña sa ku tin kontesta pa tur mi preguntanan importante. Mi a komprondé tambe ku pa sierto preguntanan, fe kontinuo, pasenshi, i revelashon ta nesesario.²

Mama a pone e responsabilidat riba ami pa desaroyo di mi fe i pa haña kontestanan. E tabata sa ku kontestanan importante ta bini pa medio di mi búskeda di e bèrdat di manera ku Tata Selestial a preskribí. E tabata sa ku ami tabatin e nesesidat pa haña e bèrdat. E tabata sa ku mi mester tabata sinsero den mi preguntanan i tabata dispuesto pa aktua riba lokual mi tabata sa di ta bèrdat. E tabata sa ku mi tabatin mester di studia i hasi orashon i ku mi mester a desaroyá mas pasenshi miéntras ku mi ta buska kontesta for di Señor. Dispuesto pa tin pasenshi ta parti di nos búskeda di e bèrdat i parti di e patronchi di Señor pa revelá bèrdat.³

Ku tempu, mi a komprondé ku mi mama tabata siña mi e patronchi di Tata Selestial pa buska bèrdat. Fe a krese, kontestanan a kuminsá drenta, i mi a akseptá un yamamentu pa mishon.

Tabata tin un momentu, trempan den mi mishon, ku mi tabata sa ku mi mester a sa ku e Iglesia tabata berdadero i ku José Smith tabata un profeta di Dios. Mi a sinti lokual Presidente Thomas S. Monson a ekspresá asina kla den e konferensia anterior: “Si bo no tin un testimonio firme di e kosnan aki, hasi lo nesesario pa bo optené unu. Ta esensial pa bo por tin bo propio testimonio den e tempunan difísil aki, pasombra e testimonionan di otronan lo hiba bo te asina leu.”⁴ Mi tabata sa kiko tabata nesesario. Mi ta tin ku lesa e buki di Mormon ku un kurason sinsero, ku intenshon berdadero, i puntra Dios ku e ta bèrdat.

Skucha e promesa remarkabel ku nos Tata Selestial a duna pa medio e profeta Moroni: “I ora boso risibí e kosnan aki, mi lo amonestá boso pa boso puntra Dios, e Tata Eterno, den e nòmber di Cristu, si e kosnan aki no ta bèrdat; i si boso pidi ku un kurason sinsero, ku berdadero intenshon, ku fe den Cristu, e lo manifestá e bèrdat di dje na boso, pa e poder di Spiritu Santu.⁵

Pa risibí lokual ta den e Buki di Mormon, mi tabatin ku les’é. Mi a kuminsá na e kuminsamentu di e buki i a lesa tur dia. Algun ta risibí un testimonio masha lihé. Pa otronan, e ta tuma mas tempu i mas orashon i lo inkluí pa lesa e buki vários bia. Mi mester a lesa hinter e buki promé ku mi a risibí e testimonio primintí. Sinembargo, Dios a manifestá e bèrdat di dje na mi pa medio di e poder di e Spiritu Santu.

Den mi diario mishonal, mi a deskribí mi goso di sa e bèrdat i tambe mi ekspreshon personal di kompromiso i berdadero intenshon pa aktua riba e bèrdat ku mi a risibí. Mi a skirbi: “Mi a prometé na mi Tata den Shelu i na mi mes ku mi lo hasi mi mehor esfuerso, pa duna 100 porshento e pa restu di mi bida, lokual mi wòrdu pidi, mi lo hasi, pero pa awor aki mi tin restu di mi mishon i mi ta bai hasié un gran mishon, un ku lo mi no bai sinti mi malu di dje, pero no pa mi, pa Señor. Mi stima Señor, i mi stima e obra, i mi ta djis pidi den orashon pa e sintimentu ei lo no bandoná mi nunka.”

Mi a yega na komprondé ku nutrishon konstante i esfuerso kontinuo pa arepentí i warda e mandamentunan ta nesesario pa nunka sintimentu ei no bai. Presidente Monson a bisa, “Un testimonio tin wòrdu mantené vital i bibu dor di obedesé e mandamentunan di Dios kontinuamente i dor di orashon diario i estudio di skritura.”⁶

Durante di añanan, mi a puntra mishoneronan i hende yòn rònt mundu kon nan a kuminsá den nan esfuerso personal pa buska e bèrdat i risibí un testimonio. Kasi sin eksepshon, nan a respondé ku nan mes esfuerso pa optené un testimonio personal a kuminsá ku un desishon personal pa lesa e Buki di Mormon for di kuminsamentu i puntra Dios ku e ta bèrdat. Hasiendo e esaki, nan a skohe pa “aktua” enbes di wòrdu “aktua riba”⁷ dor di e dudanan di otronan.

Pa konosé e bèrdat, nos tin ku biba e evangelio⁸ i “eksperimentá”⁹ na e palabra. Nos a wòrdu atvertí pa no resistí e Spiritu di Señor.¹⁰ Arepentí, huntu ku un determinashon pa warda e mandamentunan, ta un parti importante di kada búskeda individual pa bèrdat.¹¹ En realidat, nos por tin nesesidat di ta dispuesto pa “bandoná tur” nos pikanan pa por konosé e bèrdat.¹²

Nos ta wòrdu manda pa “buska enseñansa, asta pa estudio i tambe medio di fe” i pa “buska den e mehor bukinan palabranan di sabiduria. ¹³ Nos búskeda pa bèrdat mester ta enfoká riba “e mehor bukinan” i di e mihó fuentenan. Entre e mehornan ta e skrituranan i e palabranan di profetanan bibiente.

Presidente Monson a puntra kada un di nos pa “hasi tur lokual ku ta nesesario” pa optené i mantené un testimonio fuerte.¹⁴ Kiko ta nesesario pa profundisá i fortalesé boso testimonio? Nos tur tin un responsabilidat personal pa hasi lokual ta nesesario pa optené i mantené un testimonio fuerte.

Ku pasenshi nos ta warda nos kombenionan miéntras nos “ta hasi [loke] ta nesesario” pa risibí kontesta for di Señor ta parti di Dios su patronchi pa siña bèrdat. “Spesialmente ora kos ta difísil, nos por wòrdu pidí pa someté ku alegria i pasenshi na tur Señor su boluntat.”¹⁵ Mantené kombenio ku pasenshi ta oumentá nos humildat, profundisá nos deseo pa konosé bèrdat, i permití e Spiritu Santu pa guia [nos] den kamindanan di sabiduria pa [nos] por wòrdu bendishoná, prosperá i perseverá.¹⁶

Mi kasá, Mary, i ami tin un hende ku nos ta stima mashá ku a lucha hopi den su bida ku sierto aspektonan di Iglesia. E ta stima e evangelio, i ta stima Iglesia pero e tin pregunta ainda. E ta seyá den tèmpel, ta aktivo den Iglesia, ta kumpli ku su yamamentunan, i e ta un mama i esposa maravioso. Durante añanan, el a purba di hasi lokual ku e sa ta bon i a kontené su mes di hasi lokual ku e sa ta robes. El a mantené su kombenionan i sigui buska. Tin bia e tabata agradesido pa sostené na e fe di otronan.

No muchu tempu pasá su obispu a pidi e pa papia ku n’e i su esposo. El a puntra nanpa aseptá aseptá un asignashon di tèmpel pa aktua komo remplasante pa esnan ku tin mester di ordenansanan di tèmpel. E yamamentu aki a sorprendé nan, pero nan a akseptá i kuminsá sirbi den e kas di Señor. Nan yu hòmber teenager a partisipá resientemente den buská famia den historia familiar i a haña nòmber di famia ku no risibí ordenansanan di tèmpel. Segun tempu a pasa nan a traha komo remplasantenan i a hasi ordenansanan di tèmpel pa e persona aki i su famia. Na momentu ku nan a hinka rudia na altar i e ordenansanan di seyamentu tabata wòrdu hasí, e muher maravioso aki ku a buska ku pasenshi asina tantu tempu a haña un eksperensia spiritual privá dor di kual el a bin sa ku e tèmpel i e ordenansanan ku ta wòrdu hasí ayaden ta berdadero i real. El a yama su mama i kont’é di su eksperensia i bis’é ku miéntras e tabatin algun pregunta ainda, e sa ku tèmpel ta berdadero, ku e ordenansanan di amoroso,ku pasenshi di i pa un yu muher ku ta sigui buska ku pasenshi.

Warda e kombenionan ku pasenshi ta trese bendishonnan di shelu den nos bida.¹⁷

Mi a haña gran konsuelo den Señor su promesa ku “pa e poder di e Spiritu Santu boso lo por sa e bèrdat di tur kos.”¹⁸ Sin sa tur kos, nos por sa e bèrdat. Nos por sa ku e Buki di Mormon ta berdadero. En realidat, manera Presidente Russell M. Nelson a bisa awe tardi aki, “nos por sinti den profundidat di nos kurason” [wak Alma 13:27], ku e Buki di Mormon ta sin kibokashon ta e palabra di Dios. I nos por sintié asina profundo ku nos lo no ke biba hasta niun dia sin dje.¹⁹

Nos por sa ku Dios ta nos Tata, ku ta stima nos; i ku Su Yu, Jesucristu, ta nos Salbador i Redentor. Nos por sa ku miembresia den Su Iglesia tin ku wòrdu kuida i ku partisipá na e santa sena semanalmente lo yuda i protegé nos i nos famia. Nos por sa ku pa medio di ordenansanan di tèmpel, famianan realmente por tu huntu pa semper. Nos por sa ku e Ekspiashon di Jesucristu i e bendishonnan di arepentimentu i pordon ta berdadero i real. Nos por sa ku nos profeta stimá, Presidente Thomas S. Monson, ta e profeta di Dios i ku su konseheronan i e miembronan di e Quorum di e Diesdos ta Apòstelnan, profetanan, videntenan, i reveladónan.

Tur e kosnan aki mi sa ku nan ta bèrdat i mi ta duna mi testimonio den nòmber di Jesucristu, amèn.