E Kaminata ta Kontinuá!

Shen setenta aña pasa, Brigham Young a wak e Vaye di Lago Salado pa e promé bia i deklará, “Esaki ta e lugá korekto!”¹ E tabata sa pasobra Señor a revelá esaki na dje.

Pa 1869, mas di 70,000 Santunan a hasi e kaminata similar. Maske nan diferensia den idioma, kultura, i nashonalidat, nan a kompartí e testimonio di e Tata, e Yu, i e Espíritu Santu, e Restourashon di e evangelio di JesuCristo, i e deseo di konstruí Sion - un lugá di pas, alegria, i bunitesa den preparashon pa e Segunda Binida di e Salbador.

Imagen

Jane Manning James

Entre e promé Santunan ku a yega Utah, tabata Jane Manning James - e yu di un esklabo liberá, un konverso na e Iglesia restourá, i un disípulo hopi remarkabel ku a enfrentá desafionan difísil. Hermana James a keda un fiel Santu di Delaster dia te na su morto na 1908.

E la skibi: “Mi ke bisa akinan, ku mi fe den e evangelio di JesuCristo manera siña dor di e Iglesia di JesuCristo di e Santunan di Delaster dia, ta mesun fuerte awe, no, si ta posibel mas fuerte ku e dia ku mi a boutisá. Mi ta paga mi diesmo i ofrenda, tene e palabra di sabiduria, i bai kama trempan i lanta trempan, mi ta purba den mi manera humilde di duna un bon ehèmpel na tur.”²

Hermana James, manera hopi otro Santu di Delaster dia, no solamente a konstruí Sion ku sanger, sodó, i lágrima pero tambe a buska Señor su bendishonnan pa medio di biba e prinsipionan di evangelio mas mihó ku e ta por miéntras wantando duru ku fe den JesuCristo - e gran Sanador di tur ku ta busk’É sinseramente.

E promé Santunan no tabata perfekto, pero nan a establesé un fundeshi riba kua no ta konstruyendo famianan i un sosiedat ku ta stima i warda Convenios, kua ta e wòrdu suprayá den vários historianan di notisia rònt mundu pasobra nos kompromiso na JesuCristo i nos esfuersonan voluntario pa yuda esnan serka òf esnan leu.³

Presidente Eyring mi por agregá mi apresio na e míles i míles di e angelnan di T-shirtnan hel sirbiendo na Texas, Mexico, i otro lugánan na bo tributo.

Mi tin un konvikshon profundo ku si nos pèrdè e konekshon ku esnan ku a bai promé ku nos, inkluyendo nos antepasadonan pionero, nos lo pèrdè un tesoro presioso. Mi a papia tokante “Fe Den Kada Paso” den pasado i lo kontinuá den futuro pasobra mi sa ku e generashonnan kresiente mester tin e mesun tipo di fe ku e promé Santunan tabata tin den Señor JesuCristo i Su evangelio restourá.⁴

Mi propio antepasadonan pionero tabata entre e pioneronan fiel ku a hala garoshi di man, kore den wagònnan, i kana bai Utah. Nan, manera Hermana Jane Manning James, tabata tin fe profundo den kada un di nan pasonan ku nan a dal den nan propio kaminata.

Nan diarionan ta yena ku deskripshon di difikultatnan, hamber, i malesa i tambe testimonio di nan fe den Dios i e evangelio restourá di JesuCristo.

Nan tabata tin tiki kosnan material pero tabata disfrutá di un abundansia di bendishon for di e hermandat ku nan a haña den e Iglesia di JesuCristo. Ora nan tabata por, nan tabata lanta esnan benta abou i bendishoná e enfermonan pa medio di servisio na un i otro i pa medio di e saserdosio di Dios.

E hermananan na Cache Valley, Utah a ministrá na e Santunan den e espíritu di Sosiedat di Sokoro pa “traha den union pa yuda esnan den nesesidat.”⁵ Mi bisa abuela Margaret McNeil Ballard a sirbi banda di su kasa, Henry, miéntras e tabata presidí komo obispu na e di dos bario di Logan pa 40 aña. Margaret tabata presidente di Sosiedat di Sokoro di e bario pa 30 di e añanan ei. E la hinka den su kas esnan pober, esnan malu, e viudanan i huérfanonan, e la hasta bisti e mortonan den pañanan limpi di tèmpel.

Ounke ta apropiá i importante pa kòrda e kaminata históriko Mormon di siglo 19, nos tin ku kòrda ku e “kaminata den nos bida ta kontinuá!” pa kada un di nos ora nos ta demostrá nos “fe den kada paso.”

Imagen

Miembronan reuní den nan propio kongregashon lokal

Konversonan nobo no ta reuní mas na establesimentunan di pionero den wèst di Merka. Na su lugá, nan ta reuní den nan kongregashonnan lokal, kaminda Santunan ta adorá nos Tata Selestial den nòmber di JesuCristo. Ku mas di 30,000 kongregashon establesé rònt mundu, tur ta reuní den nan propio Sion. Manera e skrituranan ta bisa, “Pasobra esaki ta Sion - e puru di kurason.”⁶

Miéntras nos ta kana den e kaminda di bida, nos ta wòrdu di tèst pa wak si nos ta “opservá na hasi tur kos loke [Señor a] manda hasi.”⁷

Hopi di nos ta riba biahe di deskubrimentu impreshonante - hibando na kumplimentu personal i lus spiritual. Algun di nos, sinembargo, ta riba e kaminata ku ta hiba na doló, pika, angustia, i desesperashon.

Den e konteksto aki, por fabor puntra bo mes: Kiko ta bo destinashon final? Na unda bo pasonan ta hiba bo? I bo biahe ta hiba bon a e “multiplisidat di bendishonnan” manera Salbador a primintí?⁸

E kaminata bek pa nos Tata Selestial ta e kaminata mas importante di nos bida, i e ta kontinuá kada dia, kada siman, kada luna, i kada aña miéntras nos ta oumentá nos fe den djE i den su Yu Stima, JesuCristo.

Nos mester tene kuidou ku kaminda nos pasonan den bida ta hiba nos. Nos mester ta konsiente i skucha e konsehonan di Hesus i Su disípulonan ora E ta kontesta e preguntanan aki: “Konta nos, ki dia e kosnan aki lo sosodé? I kua lo ta e señal di bo binida, i e fin di e mundu?

“I Hesus a kontesta i bisa na nan, Tene kuida pa ningun hende hòmber [i mi ta agregá hende muhé] gaña bo.”⁹

Awe mi ta ripití konsehonan di pasado di lidernan di Iglesia.

• Rumannan, mantené e doktrina di Kristu puru i no laga nan gaña bo dor di esnan ku ta manipulá ku e doktrina. E evangelio di e Tata i e Yu a wòrdu restourá pa medio di Jose Smith, e profeta di e lastu dispensashon aki.

• No skucha esnan ku no a wòrdu ordená i/òf apartá pa nan yamamentu den Iglesia i ku a wòrdu rekonosé pa komun akuerdo dor di e miembronan di Iglesia.¹⁰

• Tene kuidou ku organisashonnan, gruponan, òf individuonan ku ta pretendé di tin kontestanan sekreto na preguntanan di doktrina ku nan ta bisa ku apòstelnan i profetanan no tin òf no ta komprondé.

• No skucha nan esnan ku ta tènt abo ku nan skema di bira riku. Nos miembronan a pèrdè muchu hopi sèn kaba, pues tene kuidou.

Den algun lugá, hopi di nos hendenan ta wak mas aleu ku e marka i buska konosementu sekretu den práktikanan karu i kuestionabel pa proveé sanashon i apoyo.

Un deklarashon ofisial di Iglesia, publiká un aña pasa, ta bisa: “Nos ta urgi miembronan di Iglesia pa tene kuidou ku práktikanan di kualke grupo ku ta primintí - a kambio di sèn - sanashon milagroso òf ku ta pretendé di tin métodonan spesial di akseso na podernan sanador pafó di e poseedornan di saserdosio ordená.”¹¹

E Church Manual di Iglesia ta konsehá: “Miembronan no mester usa práktikanan médiko òf salú ku no ta étiko òf legalmente kuestionabel. Lidernan lokal mester konsehá miembronan ku tin problemanan di salú pa konsulta ku profeshonalnan den medisina kompetente ku tin lisensia den e pais kaminda nan ta praktiká.”¹²

Rumannan, ta sabio i kouteloso ku tipo di práktikanan ku por ta atraktivo emoshonalmente pero ku por bin prueba di ta dañino tantu spiritualmente komo físikamente.

Pa nos antepasadonan pionero, independensia i outo sufisiente tabata vital, pero nan sentido di komunidat tabata mesun importante. Nan a traha huntu i yuda otro surpasá e desafionan físiko i emoshonal di nan tempu. Pa e hòmbernan, tabata tin e quorum di saserdosio, i pa e muhénan nan a sirbi den e Sosiedat di Sokoro. E resultadonan aki no a kambia den nos tempu.

E Sosiedat di Sokoro i e quorum di saserdosio ta proveé pa e bienestar spiritual i temporal di nos miembronan.

Keda den e kaminda di evangelio dor di tin “fe den kada paso” p’asina bo por regresá bek den presensia di Tata Selestial i Señor JesuCristo. Señor ta nos Salbador presioso. E ta e Redentor di e mundu. Nos mester honra Su nòmber sagrado i no malusá den ningun manera, semper purba na warda Su mandamentunan. Si nos hasi esaki, E lo bendishoná nos i guia nos bek serka Tata Selestial.

Mi ta invitá tur hende ku ta skucha mi bos pa yama bon bini i brasa kada ken ku ta hasiendo su kaminata awe, sin importá unda nan ta den nan biahe.

No tin ningun bendishon ku por wòrdu kompartí ku ta mas grandi ku e mensahe di Restourashon, kual ora wòrdu risibí i biba, ta primintí goso i pas duradero - hasta bida eterno. Laga nos usa nos energia, forsa, i testimonio den asistí nos misioneronan pa haña, siña i boutiso Dios su yunan pa nan tambe por tin e poder di e doktrina di evangelio guiando nan den nan bida diario.

Nos tin ku brasa Dios su yunan ku kompashon i eliminá kualke prehuisio, inkluyendo, rasismo, seksismo, i nashonalismo. Laga e wòrdu bisa ku nos a kere di bèrdat e bendishonnan di e evangelio restourá di JesuCristo ta pa kada yu di Dios.

Mi ta testifiká ku “e kaminda ta kontinuá,” i mi ta invitá bo pa keda riba e kaminda di e evangelio ora bo ta sigui pusha pa dilanti dor di saka man pa tur Dios su yunan ku amor i kompashon pa huntu nos por hasi nos kurasonnan puru i nos mannan limpi pa risibí e “multiplisidat di bendishon” ku ta spera tur ku berdaderamente ta stima nos Tata Selestial i Su Yu Stima, di kua ta mi orashon den nòmber di JesuCristo, amèn.