Sende Bo Lus
E profetanan ta yama na nos, mi rumannan muhé. Lo bo ta hustu? Lo bo artikulá bo fe? Lo bo sende bo lus?
Por ta bo no sa esaki, pero Presidente Monson i ami ta ohochi. Riba e mesun dia ku ami a nase – na e mesun ora- na California nòrt, e Thomas S. Monson di trinta i seis aña a wòrdu sostené komo e Apòstel di mas nobo. Mi ta stima mi lenk speshal, personal ku e profeta di Dios, Presidente Monson,
E profetanan ta papia di muhénan. 1 Lo bo tende algun di nan palabranan den e reunion aki. Pa mi teksto mi ta bai bèk kasi kuarenta aña na un profesia remarkabel skibí dor di Presidente Spencer W. Kimball. Sèptèmber di 1979 tabata solamente e di dos biaha ku e muhénan di e Iglesia mundial a reuní den nan mes reunion general. Presidente Kimball a prepará su diskurso, pero ora e da di e konferensha a yega, e tabata den hòspital. Asina ta ku el a puntra su kasá, Camilla Eyring Kimball, pa lesa su remarkenan na su lugá.2
Ruman muhé Kimball a lesa e profeta su palabranan, kual a enfatisá e influensha di muhénan Santu di Delaster dianan riba e bon muhénan di mundu promé ku e Segundo Binida di e Salbador. Kasi na final, tabatin un kargo elektrifikante pa e muhénan di Iglesia ku nos a sigui papia di dje for di e dia ei.
Laga mi sita un tiki di loke Presidente Kimball a bisa:
“Finalmente, mi rumannan muhé stimá, mi por sugerí algu ku no a wòrdu bisá anteriormente òf por lo ménos no eksaktamente na e manera aki. Hopi di e kresementu grandi ku ta bai bini den e Iglesia den e delaster dianan, lo bini dor ku diferente di e bon muhénan di mundu.... lo wòrdu atraé na e Iglesia ku numbernan grandi. Esaki lo pasa na e grado ku e muhénan di Iglesia ta reflehá rektitut i elokuensha den nan bida i na grado ku e muhénan di Iglesia lo wòrdu mirá komo distinto i diferente –na maneranan felis—for di e muhénan di mundu.
“Entre e muhénan heroiko real den mundu ku lo drenta den Iglesia tin muhénan ku ta mas preokupá ku ta hustu ku pa ta egoista. E héroenan femenino real aki tin humildat berdadero, kual ta pone un balor mas haltu riba integridat ku riba visibilidat. …
“ .... Lo ta … ehemplarnan femenino di Iglesia [ku] lo ta un fòrsa signifikanteden ámbos e kresementu numériko i esun spiritual di e Iglesia den e lastu dianan.”3
Kon u deklarashon profétiko esei ta. Djis pa rekapitulá:
-
Lo ta e bon relashonnan di muhénan, ku lo detoná hopi di e kresementu grandi ku ta biniendo den Iglesia den e añanan ku ta bini.
-
E amistatnan ku e muhénan di Sosiedat di Sokoro, Mujeres Jovenes, mucha muhénan di Primaria ta traha ku muhénan i muchanan muhé sinsero, fiel i devoto di otro fe i kerensia lo ta un fòrsa signifikante den kon Iglesia lo krese den e delaster dianan.
-
Presidente Kimball ta yama e muhénan aki di otro fondo “ muhénan heroiko” ku lo ta mas preokupá pa ta rekto ku pa ta egoista; ku lo mustra nos ku integridat tin mas balor ku visibilidat.
Mi a enkontrá asina tantu di e bon muhénan aki sigun mi ta hasi mi trabou rònt di mundu. Nan amistat ta presioso pa mi. Bo tambe konosé nan entre bo amigunan i bisiñanan. Nan por òf no por ta miembro di Iglesia awor aki, pero nos ta konektá den amistat ku ta hopi importante. Kon nos ta hasi nos parti? Kiko lo nos mester hasi? Presidente Kimball ta referí na sinku kos:
E promé ta pa ta hustu. Ta rekto no ta nifiká ta perfekto òf nunka no hasi fout. E ta nifiká desaroyá un konekshon interior ku Dios, arepentíendo di nos pikánan i faltanan; i yudando otro libremente.
Muhénan ku a kombertí ta kambia e kurso di historia. Mi tin un amiga ku tabata den un aksidente di outo tempu ku e tabata yòn i bira adikto na medisina kontra di doló. Despues, su mayornan a divorsiá. El a bin sali na estado for di un relashon breve, i su adikshon a kontinuá. Pero un anochi, el a mira e káos i porkeria ku su bida ta i a pensa, “Basta”. I el a sklama na e Salbador JesuCristu pa yud’é. El a bisa ku e la siña ku JesuCristu tabata mas fuerte ku hasta su sirkunstansha teribel i ku e por a konfia riba Su poder sigun e tabata kana e kaminda di arepentimentu.
Dor di bini bèk serka Señor i Su manera, el a kambia e kurso di su historia i su yu hòmber chikí su historia i esun di su kasá nobo. E ta rekto; i e tin asina un kurason habrí pa otro ku a hasi fayonan i ku ke kambia. I manera nos tur, e no ta perfekto, pero e sa kon pa repentí i keda purba.
E di dos ta pa ta elokuente. Ta elokuente ker men pa ekspresá klaramentu kon abo ta sinti over di un kos i dikon. Mas promé den e aña aki, tabatin un pòst riba mi página di Facebook ku tabata brongosá kristiandat. Mi a lesa e i tabata un tiki iritá pero mi hisa mi skouder i no a hasi nada. Pero un konosí ku no ta miembro di nos kerensha a respondé ku un komentario di su mes. El a skibi: “[Esaki ta] eksaktamente kontrario di loke Jesus tabata para pe—e tabata … radikal [den] su tempu paso e .… la igualá mundu. … E [la papia] ku prostituta[nan], [kome] ku e kobradó[nan] di impuesto … ,, mustra amistat pa ku muhénan sin poder i muchanan … , [i] a duna nos e historia di e bon Samaritano. … E ta kontinuá ku … Kristiannan berdadero lo aspirá pa ta e hendenan MAS kariñoso den mundu.” Ora ku mi a lesa esei, mi a pensa den mi mes, “ Dikon ami no a skibi esei?”
Kada unu di nos tin ku ta mihó den artikulá e rason pa nos kerensha. Kon bo ta sinti tokante di JesuCristu? Dikon bo ta keda den Iglesia? Dikon bo ta kere ku e Buki di Mormon ta skritura? Unda bo ta haña bo pas? Dikon ta importá ku e profeta tin algu di bisa den 2017? Kon bo sa ku e ta un profeta real? Usa bo bòs i bo poder pa artikulá kiko bo ta sinti i sa — riba media sosial, den kòmbersashonnan ketu ku bo amigunan, den papiamentu ku bo ñetunan. Konta nan dikon bo ta kere, kon bo sa, kon e ta sinti, si nunka bo a duda, kon bo a pasa dor di dje, kiko JesuCristu ta nifiká pa bo. Manera e apòstel Pedro a bisa, “ No tin miedu …; pero santifiká Señor Dios den bo kurason: i semper ta kla pa duna un kontesta na tur hòmber ku puntra bo pa un rason di e speransa ku ta den bo.” 4
E di tres ta pa ta diferente. Laga mi konta bo un historia ku a pasa Yüli ku a pasa ei na Playa Panamá City na Florida5 Lat un atardi, Roberta Ursrey a mira su dos yunan hòmber gritando pa yuda for di un distansha di 90 mèter den oséano. Nan a keda pegá den un koriente fuerte i tabata wòrdu hibá den laman grandi. Un pareha ku tabata serka a trata di skapa e muchanan, i nan tambe a wòrdu gará den e koriente. Miembronan di e famia di Ursrey a bula den laman pa reskatá e landadónan ku tabata luchando, i lihé asina nuebe persona a keda pegá den e diluvio.
No tabata tin kabuya. No tabata tin salba bida. Polis a manda yama un boto salba bida, pero e hendenan den laman tabata luchando pa 20 minüt i nan tabata kansá i nan kabes tabata bayendo bou di awa. Entre di e mirónes na e playa tabata Jessica Mea Simmons. Su kasá tabatin e idea pa forma un kadena di hende. Nan a grita pa e hendenan na e playa yuda nan i desena di hendenan a lenk brasa ku otro i a drenta den laman. Jessica a skibi: “ Pa mira hende di diferente rasa i sekso bini den akshon pa yuda deskonosí [tabata] apsolutamente tremendo pa mira!!”6 Un kadena di 80 hende tabata ekstendé pa yega serka e landadónan. Mira e potrèt di e momentu inkreibel ei.
Tur hende na e playa ei solamente por a pensa riba solushonnan tradishonal, i nan tabata paralisá. Pero un pareha, den un momento, a pensa riba un otro solushon. Inovashon i kreashon ta donnan spiritual. Ora nos mantené nos kombenionan, e por hasi nos diferente for di otronan den nos kultura i sosiedat, pero e ta duna nos akseso na inspirashon asina ku nos por pensa di otro solushonnan, diferente seramentunan, diferente aplikashonnan. Nos no ta semper pas den mundu, pero ta diferente den maneranan positivo por ta un liña pa otronan ku ta luchando.
E di kuater ta pa ta distinto.Distinto ta nifiká pa ta identifikabel na un manera definibel. Laga mi bai bèk na e historia di Jessica Mae Simmons na e playa. E momentu ku e kadena di hende ei tabata ekstendé pa yega e landadónan, e tabata sa ku e por yuda. Jessica Mea a bisa, “ Mi por tene mi rosea bou di awa … i landa rònt den un pisina Olímpiko masha fásil mes! [ Mi sa kon pa sali for di un diluvio.] Mi tabata sa ku mi por yuda [kada landadó] pa yega na e kadena humano.”7 E i su kasá a kue boogie boards i landa banda di e kadena te ora ku nos a yega serka e landadónan i a guia nan un pa un yega bèk na e kadena, ku a pasa nan pa yega seguridat di e playa. Jessica tabata tin un kompetensia distinto: e tabata sa kon pa landa kontra di un diluvio.
E evangelio restourá ta identifikabel na un manera definibel. Pero nos tin ku ta distinto kon nos ta sigui e. Manera Jessica tabata praktiká landa, nos mester di praktiká biba e evangelio promé ku e emergensia asina ku, sin miedu, nos lo ta sufisientemente fuerte pa yuda ora ku otronan ta wòrdu hibá dor di e koriente.
I finalmente, e di sinku ta pa hasi un te ku kuater na maneranan felis. Ta felis no ta nifiká pa plak un smail di plèstik riba bo kara no opstante loke ta pasando. Pero e ta nifiká tene e leinan di Dios i fortifiká i lanta otro.8 Ora nos traha, ora nos hisa e peso for di otro, e ta bendishoná nos bida na maneranan ku nos kontratempunan no por kita. Mi tin un sita di Presidente Gordon B. Hinckley poné kaminda mi ta mir’é tur dia. El a bisa: “ Bo no ta. … traha for di pesimismo i sinismo. Bo ta mira ku optimismo, traha ku fe, i kosnan ta pasa.” 9
Komo un ehèmpel di e spiritu felis i optimista ei, mi konosé un mucha muhé di 13 aña ku yama Elsa di ken su fama ta bai muda pa Baton Rouge, Louisiana, 2900 km leu for di su amigunan. No ta hopi fásil ora ku bo ta 13 pa muda bai na un lugá nobo. Elsa tabata komprendiblemente insigur over di e mudansa, asina ta ku su tata a dun’é un bendishon. Na mes un momentu di e bendishon, e mama su telefòn ta zona ku un mensahe ku a drenta. E Mujeres Jovenes ku ta biba den e Bario na Louisiana a manda e potrèt aki huntu ku e suptituto “Por fabor muda bini den nos Bario!”10
E muhénan Hóben aki tabata optimista ku nan lo gusta ku Elisa sin sikiera enkontrá ku n’e. Nan entusiasmo a krea optimismo den Elsa over di e mudansa ku tabata bini i a kontestá su orashon tokante si tur kos lo bai bon.
Tin un energia ku ta bini di felisidat i optimismo ku no solamente ta bendishoná nos mes—e ta edifiká tur hende rònt di nos. Kualke kos chikí ku bo hasi pa sende felisidat real den otro ta mustra ku kaba bo ta kargando e flambeu ku Presidente Kimball a sende.
Mi tabata 15 aña di edat na e momentu ku Presidente Kimball su diskurso a wòrdu duná. Nos ku ta mas bieu ku 40 ta kargando e kargo aki di Presidente Kimball for di e dia ei. Awor mi ta wak esnan di 8 aña, 15 aña, 20 aña, i 35 aña, i mi ta bai pasa e flambeu aki na bo. Boso ta e lidernan di futuro den e Iglesia aki, i ta kai riba boso skouder pa karga e lus aki bai dilanti i ta e realisashon di e profesia aki. Nos ku ta mas bieu ku 40 ta lenk nos brasanan dor di boso i sinti boso fòrsa i energia. Nos mester di boso.
Skucha e skritura ku bo ta haña den Doktrina y Convenios 49:26–28. E por a wòrdu skibí bou di diferente sirkunstanshanan, pero awe nochi dor di e Spiritu Santu, mi ta spera ku lo bo tuma e komo bo yamamentu personal pa ku e obra sagrado aki.
“Mira, mi ta bisa na bo, bai dilanti manera mi a manda bo; repentí di tur bo pikánan; puntra i lo bo risibí; bati i lo wòrdu habrí pa bo.
“Mira, lo mi bai dilanti di bo i lo ta bo patras; i lo mi ta meimei di bo, i lo bo no wòrdu konfundí.
“Mira, Ami ta JesuCristu, i mi ta bini lihé.”11
Mi ta apelá serka kada un di boso pa pone bo mes den un lugá kaminda bo por sinti e amor generoso ku Dios tin pa bo. Bo no por pone bo mes mas leu di e alkanse di e amor ei. Ora bo sinti Su amor, ora bo stima E, bo lo repentí i tene su mandamentunan. Ora bo tene su mandamentunan, E por usa nos den Su obra. Su obra i gloria ta e eksaltashon i bida eterno di muhénan i hòmbernan.
E profetanan ta yama na nos, mi rumannan muhé. Lo bo ta hustu? Lo bo artikulá bo fe? Bo por soportá pa ta distinto i diferente? Lo bo felisidat apesar di bo tribulashonnan atraé otronan ku ta bon i noble i ku mester di bo amistat? Lo bo sende bo lus? Mi ta testifiká ku Señor JesuCristu lo bai dilanti nos i ta meimei di nos.
Mi ta konkluí ku e palabranan di nos profeta bon stimá, Thomas S. Monson: “ Mi rumannan muhé stimá, esaki ta bo dia, esaki ta bo tempu.”12 Den e nòmber di JesuCristu, amèn.