Cheldecheduch el mo Nguu a Chesmerel
Kid a osiik, a rokui el rolel, el sebeched, el mo rongesii a Jesus Kristo, el ngii a mengedecheduch er kid el okiu a klisichel me a osisecheklel a Chedaol Reng.
Betik er a renguk el rodam me a rodos, aki mengemedaol er kemiu el me er tial mo er a reksi el Klou el Ongdibel er a Ongeua el Buil er a rak er a 2020 er a Ikelesia er a Jesus Kristo er a Uriul-klebesei el Santo, el kemiu a medengei el kmo, ak dechor er tia el bechachau el auditorium!
Meng dimlak kudengei, er sera kyaksok er kemiu er a dirk mlo merek el Klou el Ongdibel er a Ongeteruich el Buil el kmo tia el ongdibel er a Ongeua el Buil a mo “blechoel dodengelii” me a “diak dobes er ngii,” el kungedecheduch er a mederir a di mekesai er a teruich el chad a mo rullii tia el ongdibel el mo blechoel el kudengelii e diak kubes er ngii a denguu er ngak! E ng di sel klaumedengei el kmo kom teloi el okiu a seng er a melidiul, me a rechad er a chelitakl el mla mengitakl er a klebokel el “It Is Well with My Soul,” a chemolodii a renguk.
Ko medengei, a seked er tia el klou el ongdibel a kmal di kltukl a rechad el sebechir el me er ngii lolchotel a omelasem er kid el mo ungil el chad er a buai e meruul aikel rokui el sebeched el mo ngosengesii a bekeiuiuul rakt el COVID-19. Tia el secher a kmal klou a bla el temelii er a beluulechad el rokir. Ng dirrek el mla ngmodech a temel a ongdibel er a Ikelesia er kid, ureor er a misionari, me a dirrek el ureor er a templo el telkib el taem.
Ng uaisei el teletael er chelecha el sils el uchul tia el kmal kengaol el secher, a ringel er a klengar a lmuut el chengelakl er tia el rakt. A ongarm er a ngar medad el taem a sebechel duubech er a kerior, chelebuul er a beluu, me a lechub e ng kuk di ringelel a bdelul a tang.
Ng mekera e sebeched lotekangel a cheuaika el ringel? A Rubak a mla melekoi er kid el kmo “a lsekum e ke kldmokl e ng diak el kirem el medakt.”1 Ng uaisei, ng sebeched el mengereomel a kall, ralm, me a kerkernged. E ng di ng dirrek el osisiu el kired el omkeek a blil chedaol tekoi er a rengud el oba klaumerang, klemerang, me a olechotel a klaumerang.
Sel kmal moktek er a klengar er kid a mengedmokl er kid el mo mesa Ulemeob er Kid. Ng sebeched el meruul er tiang el melasem el mo uaia Osobel, Jesus Kristo.2 E kede meruul er ngii se el douchel a rengud er a kngtid er a Omekbeches el Chimal, omekungil, me a melisiich el klisichel er a bek el sils. Sei e kid a mo sebeched el mo melechesuar a diak a ulebengelel el budech me a deureng, dirrek er a chelsel a meringel el taem. Tia meral uchul ea Rubak a mla melekoi er kid el mo dechor er a chedaol basio e “diak demesim.”3
Chelecha el rak, e kede oudkeu er a mong meng erul dart el rekil a ta er a kmal klou a ultutelel el dilubech er a reksi er a beluulechad—el ngii, a dmiel a Chedam el Dios me a Betik er a Rengul Di Ta el Ngelekel Sechal, Jesus Kristo, el mo er a Joseph Smith. Chelsel tia el di chimol ues, a Chedam el Dios a tiletkii a Jesus Kristo e kmo: “Ngika Ngelekek el Sechal. Mrengesii!”4
Sel tekoi el mlora Joseph Smith a osisiu el merkid. Kid a osiik, a rokui el rolel, el sebeched, el mo rongesii a Jesus Kristo, el ngii a mengedecheduch er kid el okiu a klisichel me a osisecheklel a Chedaol Reng.
A moktek er tiang me a rokui el klou el ongdibel a mo ngosukid el mo Rongesii. Aki mla meluluuch, e olengit er kemiu el mo meluluuch, el kmo Chedaol Reng er a Rubak bo el mui el obengked mel sebechiu el remenges a tekingel a Osobel el ngii a melemalt el kirem—klumech el ngii a mo meskau a budech er a chelsel a rengum. Klumech el ngii a mo omekungil a telemall el rengmiu. Klumech el ngii a mo omekllomes a uldesuiu. Klumech el ngii a mo ngosukau el mo medengei el kmo ngera bo moruul el molemolem er a chelsel a taem er a ongarm me a ringel.
Aki meluluuch me tia el ongdibel bo de blechoel el melebedebek er ngii e lak dobes er ngii el uchul aike el klumech el kau a mo remenges, me a diak a mo uaingii el subed el mo tuobed, me a omeruul el mo olengit er kau el mo meruul.
Okesiul tiang, sel orokiolel a ongdibel er a tutau er a Sandei, kede mo dmak el rokui el meliuekl er a beluulechad el kldibel e ngak a mo oked er kemiu er a chedaol el Diul a Hosanna. Aki meluluuch el kmo me tia bo el olechotel a chedaol el mo er kau el kid a mo olecholt er a udekial a beluulechad a omereng el saul el mora Dios el Chedam me a Betik er a Rengul el Ngelekel Sechal el doldanges er Tir er tia el kuk ta er a bedengel a teletael.
Tia el chedaol el omeruul, e kede ousbech a klikiid el becheleleu el mamed. E ng di a lsekum e ng diak er kau, e ng sebechem el di odersii a chimam. A uriul er a Diul a Hosanna, e a seked a mo dmak el obengkel a rechad er a chelitakl el mengitakl er a “The Spirit of God.”5
Betik er a renguk el rodam me a rodos, tia el ongdibel a kmal mo klebokel. Tia el rak a kmal mo tokubets el kid a di melbedebek er ngii er a rengud me a uldesued el kirel a Osobel me a Oltel a ebangkelio er Ngii. Sel mong meng ulebongel el klou a belkul tekoi el mo ngara reksi er tial ongdibel a rengud el mo obult el kid a mo omuchel el melemolem er a klengar er kid el mo Rongesii.
Ak mengemedaol er kemiu el mera Klou el Ongdibel er a Ongeua el Buil 2020! Ak medengei el kmo a Dios, el Demad er a Babeluades me a Ngelekel Sechal, Jesus Kristo, a melatk el kired. Te mo obengked er a ika el telengtengil a eru el kmal klebokel el sils el dosiik el mo kmeed er Tir e mengull er Tir. El ngara chedaol ngklel a Jesus Kristo, amen.