Kmal Chedaol Tekoi el ngara Uldasu
A le ngarngii a ringel el dechau a lechub eng omerolel a beluulechad el diak a klisiched er ngii a mengilekolk er a omeroled, e a ikel chedaol teletael mla duubech er a klengar kid a uaia letuich el meklemesii a roled.
Teruich me a eai el rak ruriul er a Kot el Ues, e a Profet Joseph Smith a lilchesii a kemanget el cheldecheduch el kirel a teletael dilubech el kirel. Ng mla obangel a ultok, odechelakl, mekngit lomeruul, ulektakt, me a mekngit lodechelakl.1 Eng di millemolem el bekeu a rengul el ouchais el kirel a Kot el Ues er ngii: “Ak milsa llomes, e a chelsel tia llomes e ak milsterir a reteru el chad, e tir a meral milngedecheduch el mei er ngak, meng uaisei el bo louketui er ngak ak du el kmo ak milsa ues, eng di ng klemerang. … Ak medengelii el klemerang, e medengei el kmo a Dios a medengelii, meng diak el sebechek el kotouar ngii.2
Sel meringel el taem, e a uldesuel a Joseph a millatk er sel taem er a kmeed el lluich el rak ruchei el kirel a beltikereng er a Dios el kirel me a teletael el dilubech el kirel a mla mocholt Loluut. Ng ulemtab er a chedaol klengar ngii, e a Joseph a millekoi el kmo ng diak el mekngit a uldesuel kirel a ngii di el chad el diak loumerang er a cheldechedechal. Omko ng dimlak siseb er tial tekoi, eng locha diak kumerang er ngii.3
Ng di teletael dilubech a mle merang, e ngii a dimlak lobes a lechub el kotouar el kirel, e milkekokil melisiich er a klaumera er ngii mo el muut er a lebo er a Carthage. Ng uaia kngelekel a sib el mocha er a kodall, ng millekoi, eng di a kmal kellechakl el uaia tutau; e diak a mekngit luldesuek el kirel a Dios, me a ngii di el chad.4
Kmal Chedaol Tekoi el Kau a mla mo Chemau
Ngar ngii a suobel el kired er tial okesiul a Profet Joseph. A obengkel a kellechakl lulekrael dengai er a Chedaol Reng, er a cherengel a taem, e a Dios a mesisiich louchais er a dersta er kid el kmo Ngii a medengelkid e betik a rengul er kid e Ngii a mimokl e bleketakl lomekngeltengat er kid. Me a chelsel, aikel meringel el taem er kid, e a Osobel a meskid er a uldesued aikaikid el teletael.
Ka momtab er a klengar kemiu Chelsel a mereko el rak, e ak mla remenges a betok el chedaol teletael el mla duubech el mo er a Uriul-klebesei el Santo el meliuekl er a beluulechad, el meketeklii meng diak a rraureng er ngak el kmo a Dios a medengelkid e betik a rengul er kid e Ngii a semeriar lolecholt er Ngii er kid. Aika el teletael a locha mei er a meklou a belkul taem er a klengar kid a lechub e ngike el diak dolsingch el teletael duubech, eng di ng blechoel lobengkel a mesisiich el chedaol loterkeklel a beltikereng er a Dios.
Sel debedebek aika el chedaol teletael eng rullid el mo ngara nglunguuch, e melekoi el ua Profet Joseph el kmo dilubech el mei er ngak a mla er a babeluades. Ak medengelii, e medengei el kmo a Dios a medengei el kmo ak medengelii.5
Euang el Okesiu
Ka momtab aikel chedaol teletael mla duubech el mei er kau e bo kuuchais a bebil er a okesiu er a rebebil er a rechad.
Tela el rak er a memong, e a chuodel el patriarch er a stake el mle mekngit a teblo el baeb er a hart er ngii a ulelengit er a Dr. Russell M. Nelson me lengeseuir, el tiaikid el taem eng dimlak a kmal ngera relii a botk er sel ongeru el baeb el mle telemall. A Dr. Nelson a mocha kongei el mo rullii tia el botk. Aikakid a tekingel a President Nelson:
“Uriul er a ki mrelii sel kot el mle telemall el baeb, e a ko mocha otebedii sel longerung. A ki miltik er ngii el kmal ulseked e kmal blok el dikea el sebeched el mekera er ngii. Sera kumes er tial baeb, e a tekoi a mle mesisiich el siliseb er a uldesuek: mkekeringii aikel tkul el meliuekl. A kuluchais er tial tekoi el mo er a ngika lolngeseu er ngak. ‘A ngurd el ngara tial baeb a sebechel di mo ungil loureor a lsekum e kede kekeringii er sel meral klungel.’
“Eng di ke de mekerang? … Ak milsa bleketakl el teletelel er a uldesuek, ngmo uangera resmelel—el dour a telkib er tiang me sei. A kmal dirk medengelii tial siasing er a uldesuek—me a ikel ngurd el bo kumek er a ikel kirel ngarngii. Tial botk a mlomerek loltirakl er sel mlara uldesuek. A ki mlora chesemel aika el baeb e miltik el kmo a chemars a kmal kekerei. Ngkal lulngeseu er ngak el chad a dilu el kmo, “Ng mengasireng.’”6 Ngkal patriarch a kiliei el betok el rak.
A Dr. Nelson a mlukrael. E ngii a mle medengei el kmo a Dios a medengei el kmo ng medengei el mlukrael.
A Kathy me a ngak a mle kot el mo medengelii a Beatrice Magré er a France er a okedei el rak ra memong. A Beatrice a ulechais er ngak er a teletael dilubech el kmal ngildechii a chedaol klengar ngii ruriul er a lemetecholb er sera lengeasek. Aikakid a tekingel:
“A rengeasek er a branch er kemam a mirael lobengterir a remengeteklir el mo er a chelechol er a Lacanau, el tal sikang me a tedobech a cherridel er a Bordeaux.
“Uchei er a luut er tir, e a tara er tirkal mengeteklir a liluut el suchesokl e mengedub el di mle cheltiut a klas er ngii e ra medal. A bel dum, eng mla mo dibus aika el klas er ngii. … Ng mla remiid er a chelsel a daob.
“Aika el klas er ngii el mla remiid a rulii meng mo diak el sebechel lomekall er a mlil. Aki dikea el sebecham el mo remei.
“A tal mui er a klaumera el odos a dula el kmo ki moluluuch.
“Ak mlengeremrum el kmo a nglunguuch a kmal diak a ngera el relii er kemam, meng ko er a dimlak er a renguk e a ki mocha dechor er a chelsel a daob e meluluuch.
“Sera bol merek a nglunguuch, e ak ngilai chimak el mengisb a daob el melekimes er a rechad. Sera kulab a daob el melekims er a rechad, e a ikal klas a dilum er a chimak. A kmal mle mesisiich el reng a mlei er a chelsel a renguk el kmo a Dios a meral longer a nglunguched.”7
Okeua me a eim el rak ruriul, eng dirk medengelii tial teletael el uaia le dilubech er cheliseb. A Beatrice a mla mukngeltengat, e mlo medengei el kmo a Dios a mle medengei el kmo ngii a medengei el uase ngmla mukngeltengat.
A teletael el dilubech el mora President Nelson me a Sister Magré a kmal mle kakerous, eng di ngii el teblong, e sel diak dobes er ngii el chedaol beltikereng er a Dios el ngara uldesuir a mla selchedekl er a rengrir.
Aikaikid el teletael a blechoel mei sel dosuub el kirel a mla moluut el ebangkelio a lechub e ke de omerk er a ebangkelio el mo er a rebebil.
Tiakid el siasing a mlengai er a São Paulo, Brazil, er sera 2004. A Floripes Luzia Damasio er a Ipatinga Brazil Stake a mle dart me a teruich me a eua rekil. Ng mesaod el kire a beltel, e a Sister Damasio uluuchais er ngak el kmo a remisionari er a belual a milsang a klengeltengat er a priesthood a silecher el tolechoi el mengasireng leng mlo ungil. E kmal mle soal mo medengei a betok. Sera loluluuch el kirel a klemechir, e a diak el mesim el sioning er a Chedaol Reng a ulterkeklii er ngii el kmo a Joseph Smith a mle profet er a Dios. Me sera ledart me a edei a rekil, eng miltecholb, e a dart me a eua rekil, eng mlora templo. Uriul eng bek el rak, lengara bas el teruich me a eua el sikang el mo er a templo el tal sandei. A Sister Damasio a mla nguu oterekokl er a babeluades, e mle medengei el kmo a Dios a medengei el uase ng medengei el kmo a sioning el bla lenguu a klemerang.
Tiakid a chedaol teletael el ngara uldesuek er sera kot el mora mission er a France er a okeua me a eai el rak ra memong.
Sera ki morael lomais, e a kldemek me a ngak a milsang a Babier er a Mormon el mo er a tal klou el redil. Sera ki mluut el mo er a blil ngika el redil er a uriul er a tal sandei, eng milkengii a chesimer. Uchei er a ki mongedecheduch, e ak mlo omelchesiu er a bleketakl el chedaol klisiich. Tia el mesisiich el reng a millemolem se ra Madame Alice Audubert lesiotai er kemam el mo soiseb er a blai e louchais el kmo ngmla choiuii a Babier er a Mormon e medengei el kmo ng klemerang. Sera ki morolang er a blil er tiaikid el sils, e ak milluluuch, “Chedam er a Babeluades, a kulengit me mngusukak el diak bo kubes er tial kulmelchesiu er ngii.” Ng dirkak kubes er ngii.
Meng kuk di mle mitil a taem, er a chesimer el di uaia chesmerel a bek el blai, e ak milchesuar a klisichel babeluades. E ngak a mle medengei el kmo a Dios a medengei el uase ak medengei el kmo a chesmerel babeluades a mla obok.
Ng Di Tang e Meral Tekoi
Aikaikid el kmal chedaol taem a mei er a kakerous el taem me a kakerous el teletael, el mo er a dersta er kid.
Momdasu aikel lokesiu el ngara chedaol llechukl. Tirkel lorrenges er a Apostol Paulus a “mermerums a rengri[r].”8 Ng kel Lamanite el redil er a Abish a ulumerang er a “meang el ues lilsa demal.”9 Ea ngor a mlei er a chelsel a uldesuel a Enos.10
A sechelik er a Clayton Christensen a milsaod er a teletael er a taem el sal ngara nglunguuch e longuiu er a Babier er a Mormon er tiakid el teletael: “A klebokel, mekekeald, el reng … a ileueklak e silbechii er a renguk … el rirellak el mlo omelchesiu er a beltikereng el dimlak kudengei el kmo ng sebechek el melchesuar, [e a ikal kulmelchesiu a millemolem er a llomes me a klebesei].”11
Ngar ngii a taem e a chedaol tekoi domelchesiu a kmal subechii er a chelsel a rengud el uaia ngau, el kmeldii a rengud. A Joseph Smith a silodii el kmo kid a lebebil er a taem e ke de nguu “a mereched luldasu” el bebil eng klikiid el llomes el mei er kid.12
A President Dallin H. Oaks, er a longer er a chad el millekoi el kmo ng dirkak a ta me lomelchesiu el uaisei, eng dilu el kmo, “A nglunguchem a locha mla mo betok el monger, eng di ke mla ngmai a moktek er kau lotuill er a klou lolangch a lechub a ngor el kmal klou me komdasu el kmo ng diak a nger el bla mngai.”13 A Osobel a Ngii a millekoi el kirel a mesisiich el klaumerang er a “rechad el mle [ngeltengat] er a Chedaol Reng, [eng di] dimlak lodengelii.”14
Ke Mekera omorrenges er Ngii?
Kede dirk rirngesii a President Russell M. Nelson el melekoi el kmo: “Ak siotai er kemiu el kmal mo ungil e blechoel lomdasu el kirel tial klou a belkul ker: Ke mekera omo renges er Ngii? Ak dirrek el siotai er kemiu el mo ngara sel rael el mo ungil e blechoel lorrenges er Ngii.”15 Ngii a ulmelekl er tia el siotai er a chelechal tutau.
Ke de Rongesii er a nglunguched, rekeblid, chelsel chedaol llechukl, chelitakl, me sel deklikiid e dolai er a sacrament, sel dochotii a klaumera er kid, sel dosiou er a rebebil, e domais el ngara templo lobengterir a rebebil er a roumerang. A chedaol taem a mei sel dultuil er a nglunguuch e dorrenges a meklou el ongdibel e dungil loltirakl a llach. E kemiu a rengalek, aika el teletael a dirrek el mo er kemiu. Kom dobededekii, a Jesus a “ulisechakl e uleldingel er a rengalek … e a [rengalek] a mlo melekoi … a meklou e mechas a rengud er ngii el tekoi.”16 A Rubak a dilung el kmo:
Tial llomes a mengai er a Chedaol Reng er ngak leko er kemiu le lak lokiu a klisichek eng diak el sebechiu el nguu;
A leuaisei eng sebechiu louchais el kmo ko mla rongesii a ngerek, e medengei a tekingek.17
Ng sebeched el “Rongesii” el klengeltengat er a diak a mo uai ngii el Tngakireng er a Osobel a uchul.
Ng uaisei el diak dodengelii a temel aikaikid el meang el taem, eng di a President Henry B. Eyring a milskid tiakid el tekoi sel dongedmokl er kid: “Chelchal kesus, me a kebesengei er a klukuk, e bo moluluuch e molbedebek, e moker: A Dios nguldureklii a klumech el kuk kmal di kirek? Ak milsa Chimal er a klengar ngak a lechub a klengar er a [telungalek er ngak]?”18 Klaumerang, blekongesenges, ngariou el reng, me a blakereng a mok a tungelel babeluades.19
Llecheklel
Ng sebechiu lomdasou aikel chedaol tekoi el duubech er tiaikid el teletael. Ngokiu a blechebech el nglunguuch, me a blakereng el mo oltirakl a telbiled, me a sengk er a Chedaol Reng, e kid a melemotem er a roled er a klengar. A ringel er a klechad, rraureng, a lechub a moualech el reng a loiia iilkolk er a roled, a lechub a teletael er a beluulechad a mo diak el sebeched el metebechel e rullid el mo melchedech er a ngarmedad, e a ikel chedaol teletael mla duubech er a klengar kid a uaia letuich el meklemesii a roled, e sobecheklid el kmo a Dios a medengelkid, e betik a rengul er kid, e mla odureklii a Ngelekel, el Jesus Kristo, el mo ngosukid el muut el mo remei. E se el chad a mo ocheuekl aika el chedaol teletael e mo uriid e rrau a rengul, e kid a mo omult er tir el bedul Osobel sel douchais er a klaumerang me a ngara uldesued lobengterir, e ngosuterir el muut el metik aikaikid el mekreos el chedaol taem el mle tal lurrekodel.
A bebil er a teletael a kmal chedaol me kede di klekar er a chelsel a uldesued e diak douchais.20
A reanghel a mengedecheduch lokiu a klisichel Chedaol Reng; a leuaisei e te melekoi a tekingel a Kristo.21
:A reanghel a [dirkak] bo lak loldingel er a rengelekel a chad.
Le tir, loderchelel a Kristo, el mo oldingel er tir loltirakl a tekingel, lolecholt er tir el mo er tirkel meisiich a klaumera er tir e ulterekokl a uldesuir loba teletelel a kledios.22
E a Ongelaod, el ngii a Chedaol Reng a mo olisechakl er kemiu a rokui el tekoi, e mo omeklatk er kemiu a rokui el tekoi.23
Murrekodel chedaol uldesuem. Moumerang. Mluches. Mouchais el mo er a telungalek er kau. Moumerang el kmo ngmei lokiu a Demam er a Babeluades me a Betik er a Rengul Ngelekel.24 Bol beskau a kllouelreng el kirel a rraureng er kau me a klemedengei er a ringel el mchebangel.25 Ak yaksok er kemiu el kmo sel bol blak a rengmiu el kongei e mkerekikl el kireos aika el chedaol taem er a klengar kemiu, ea lmuut el betok a mei er kemiu. A Chedam er a Babeluades a medengelkemiu e betik a rengul er kemiu!
A Jesus a ngii a Kristo, a ebangkelio er Ngii a mla moluut, e sel dolemolem el ngara klaumerang, e ak sioning el kmo ke de mo Chedal mo er a ulebongel, el ngara ngklel a Jesus Kristo, amen.