Kmal Tokubets el Chetengakl el Okedong

Ng dmeu a renguk el omdalem er a tengami er ngak el kirel a melemolem el ngerchelir a redil er a Oltel. Ng bleketakl er a chelsel a reksi el redil a mla ngmai a keltukl el kingellir er a uldesuel a Chedam er Babeluades. A President Russell M. Nelson a olisechakl, “Ng mo diak a rolel el domasech a tekoi … el redil a mla kudmokl, el diak el di el telungalek ng dirrek el Ikelesia er a Rubak, el buch, chedil, me a dirrek el delrir a rengelekir a rengelekir; odos e anti; sensei me a dirrek el merreder; e lmuut el okesiul e blak a rengrir el mesebechakl er a klaumerang.” ¹

Sera dirk lomuchel a Cheldebechel er a Rolngeseu er a Nauvoo, er a dart ma okeuid me a eai el rak er a mla memong, a Profet Joseph Smith a milellach er a rodos el mo “kiei [el kirel a] lemeltir.” ² A okesiul a teletelir a olisechakl er kid er chelechal sils. Te dilak el oltirakl er a ngerel a profet e mle kiei el diak el mesim a klaumerang er tir er a Jesus Kristo e olengeseu el meleketek er a dodai el kid a dechor er ngii. Rodos, chelechang e ng kuk temed. Ngar er ngii a chedaol el ngercheled el mlara Rubak, e a klaumerang er kid, me a diak a mo uai ngii el omerelled a klou a ultutelel.

A President Spencer W. Kimball a silodii el kmo: “Sel bo demelemalt el redil er tial beluulechad, er a uchei er a ongerung el lemei Osobel, a kmal chetengakl el okedong. Sel meral klisichel a redil me a omelodech er chelecha el team a sebechel muut el kmal mo klou er a bechecheaches el taem.” ³

A President Nelson a dirrek el mla olengit e milekoi: “Ak olengit er a rodos er ngak [er a] Ikelesia … el omakes el bedul uchei! Mnguu se el melemalt e usbechall el basio er a blim, basio el om kiei er ngii, me a chelsel a rengedel a Dios—el muut el klou er a obla mrelii er a cheliseb.” ⁴

Diak el meketekek, e ng mla er ngii a techellek, el obengkel a cheldebechel el rengalek er a Primary, el mo mesa President Russell M. Nelson er a di milruul el okesiul a teletelel a blil a telungalek er a Smith er a Palmyra, New York. Morrenges er a profet er kid el olisechakl er tirka el rengalek el kmo ngera te sebechirel remuul el mo omakes el bedul uchei.

Sister Jones: “Ng kora soak el mo medengei a lsekum ngarngii a somiu el oker er ngii el mo er a President Nelson. Kemiu a dengchokl er tiang el obengkel a profet. Ngarngii a ngidil el somiu el oker er a profet? Kabong, e Pearl.”

Pearl: “Ng meringel sel omprofet? Kau, ke meral, el ulis el di mechesang?”

President Nelson: “Ochoi ngmeringel. Ngidil teletael el doruul el mouai a Osobel a meringel. El ua ia, sera Dios el soal el omesang a ikel Teruich el Llach el mo er a Moses, e Ngii dilung er a Moses el kmo ngmo er ker e ngmai? Mo er sel bebul a rois, sel bebul a Mount Sinai. Me a Moses a merolang el mo er bebul sel rois el mo melai a ikal Teruich el Llach. Me chelechang, ea Chedam er a Babeluades a mle sebechel dmung el uasei, ‘Moses, kau a omuchel er sei, e Ngak a omuchel er tiang, e kau ma Ngak a mo kebetech er a belngel.’ Ng dimlak, a Rubak a soal a omelasem, ele omelasem a di ta el uchul eng mo er ngii a nguked. El uai tia el okesiu, kemiu ko mla mesuub el ousekool a orunga?”

Rengalek: “Yes.”

Pearl: “Ngak a mesuub a violin.”

President Nelson: “E kemiu ko mesuub el ousekool?”

Rengalek: “Ochoi.”

President Nelson: “Ngera duubech a lsekum e kemiu a diak mosuub el ousekool?”

Pearl: “Ke obes.”

President Nelson: “Ochoi, kemiu a mo diak bo morael el mo meduch, ng uaisei? Ma leuaisei ea nger a ochoi, e Pearl. Ngultuill er a omelasem, betok el ureor, me a betok el omesuub, e diak a ulebengelel. Ng ungil! Ng ungil, ele kid a kired el blechoel el di merael el mo ungil. Ng dirrek sel chelsel a tara klengar e kede melemolem el merael mo ungil.”

A nger er a President Nelson el mo er tirka el kmal mekreos el rengalek a modars el mera derta er kid. A Rubak a soal a omelasem, e a omelasem a mo uchul a nguked. Ke de melemolem el melasem. Kid a blechoel el merael el mo ungil se el sekum e kede blak a rengud el olitrakl er a Rubak. ⁵ Ngii a diak el ongerchir er a cherrungel er chelechang. Ke de melemolem el melemiakl er a Mount Sinai er kid. E a cherengel a taem, ea omerolled meng melemolem el uaisei e mnguu a omelasem, meringel el oureor, me a omesuub, engdi a lmuut el klou a ultutelel sel blakelreng el melemolem el mo uchul a diak a ulebengelel el nguked. ⁶

Ngera ngodech el sebeched el suebii er a Profet Joseph Smith me a Kot el Ues el kirel a omelasem, meringel el ureor, me a omesuub? A Kot el Ues a omekrael er kid er a diak a mo uaingii, e melemolem el ngercheled. Sel de redil er a klaumerang, eng sebeched el ngmai a klemerang el osisechakl el mla er a teletael el Profet Joseph a mlo chemau el ouchais a osisechakl el mo ngmai a ocholt el merkid. El uaia:

• Kid a oureor er a ringel.

• Ke de mo chemau a chedaol llechukl el mo ngmai a llomes e mo meruul.

• Ke de olecholt er a klaumerang e oumerang er a Dios.

• Kede outekangel el obang a klisiich el olengit er a Dios mel ngosukid el mo cheroid er a mekngit el teletelel a cheraro.

• Ke de oldars aikel soal a rengud el mo er a Dios.

• Ke de uldalem a uldesued er a Llemesel el mo omekrael aike el tekoi el dolilt er a klengar er kid e obengked el di merekmo sel de luut el mo er Ngii.

• Ke de mo melechesuar el kmo Ngii a medengelii a dersta er kid er a ngkled me a keltukl el ngercheled el kired el mo kudmokl. ⁷

Me a ta er ngii, a Joseph Smith a ulutii a klemedengei el kmo kid a ngar er ngii a chedaol el ulteklled me a diak a ulebengelel el ultuteled. El uchul a deleuill er kid me a Chedam er a Babeluades, ak oumerang el kmo Ngii a olsingcher kid el mo nguu a ocholt el mla er Ngii.

A Rubak a milngedereder er a Emma Smith el mo “nguu a Chedaol Reng,” e mesuub a betok, “e ngmai el ocheuekl a tekoi er a beluulechad, … e mo osiik a ungil tekoi” e mo “e mo tang [el obengkel] a telbilel” el obengkel a Dios. ⁸ A omesuub a klou a ultutelel el mo uchul a okerruul, el muut el klou a ultutelel el melemolem el chelmengel a Chedaol Reng el olisechakl er kid el kmo ngera usbechall el mo er a tang er kid el mo ocheuekl—el belkul a kmo ngii a mo mengesang er kid me a lechub e ng omekioud er a ukuruled.

A President Nelson a millekoi, “Ak olengit er kemiu el mo menglou er a chedaol el techelliu el mo nguu a ocholt.” ⁹ A tekingel a profet er kid a melemolem el obengkek sel kulbedebek er a redil me a duch er tir el omakes el bedul uchei. Ngii a olengit er kid, el olechotel a orechudel. Ng olisechakl er kid el kmo ng mekera a desobel er a chedaol er a chelsel a smecher er a klengit el beluulechad el melai e meruul er a ocholt. ¹⁰ El de uaisei, el doldanges e kiei er a llechul a Rubak, e ke de yaksok, el osisiu el ua Emma Smith, “a korone er a llemalt.” ¹¹ A Profet Joseph a ulsisechakl el klou a ultutelel a sel dodengelii el kmo a rael el dorael er ngii er a chelsel a klengar er kid a bla el kengei er ngii a Dios. Me a lak tia el klemedengei, e kid a “mo mesaul [a] uldesued, e taorer.” ¹²

Chelsel tia el ongdibel, e kede mo remenges a klemerang el ngii a mo omekllomes er kid el mo melodech er kid, e mo melasem el meruul el mo ungil, e omekbeches a klengar er kid. Ng okiu a olecholt er a tang, e ng sebeched el olekebai er se el omekedong er ngii a rebebil el kmo “berraod er a klou el ongdibel”—sel de tobed e de rullii er a rengud a mo meruul el rokui er chelechang. A redil a betok a ulkungir, e ng di ng diak a rolel, e diak a ultutelel, el di ta moulekou er rokui. A Chedaol Reng a ngosukid el mo medengei el kmo ngera el ureor a kired el omdalem er ngii er a chelechal sils. ¹³

A omerellel a beltkil a rengul a Rubak el okiu a Chedaol Reng a ngosukid el mo medengelii Sel orechudel el kirel a okerreuid. A otireklel a ocholt er a tang a uldelid el mo er a ukerroul el mo er a tang. ¹⁴ Ke de orrenges e meruul. ¹⁵ A Rubak a melekoi el kmo molengit ra Chedam lobang ngklek el ngara klaumerang, el oumerang el kmo ko mo nguu, e a Chedaol Reng a mo obengkemiu, el ngii olecholt a rokui el tekoi el mora rengelekel a chad. ¹⁶ A ngercheled a melemolem el mo melai a melemolem el ocholt.

Me se el denguu sel kot el ngarbab el dauch er a duch, e ng sebeched el ngmai a muut el betok el klisiich er a di ngerecheled el mo olisechakl e kudmokl a ureor er a mo suobel—el meral el mo ocheuekl a tekoi er a beluulechad, e mo osiik a muut el ungil el tekoi. ¹⁷ E seikid e kid a mo ungil lomekllomes er tia el telcheroll el mo meruul a osisiu.

Rodam me a rodos, kid el rokui el osiik er a klisichel a Dios er a chelsel a klengar er kid. ¹⁸ Ngar er ngii a klebokel el klausisbech er a delongelir a resechal me a redil el kudmeklii a urerel a Dios er chelecha el taem. Kid a ngmai a klisichel a priesthood el okiu a telbiil, el kot el meruul el okiu a ralm er a techolbechelid e mora chelsel a chedaol el templo. ¹⁹ A President Nelson a olisechakl er kid, “A re bek el redil ma resechal el kutmokl a telbilir lobengkel a Dios e urrekodel er a ikel telbiil, e meruul e klikiid er a ikel chedaol lureor ra priesthood, a bleketakl a llemeltir el morsel klisichel a Dios.” ²⁰

Ak ouchais er se el mla er a udesuek el kmo ele ngak a redil eng dimlak blechoel el omtab er a uchelel a klengar er ngak, el kmo ngaka mle sebechek el nguu a klisichel a priesthood, el okiu a telbilek. ²¹ Rodos, ak meluluuch me bo dodengelii e doutkeu er a klisichel a priesthood sel de urrekodel [a] telbiled,” ²² e dekengei a klemerang el ngara chedaol llechukl, e dorrenges a tekingel a ngar el profet er kid.

Bo el bekeu a rengud el ouchais el kmo kede oltirakl er a Chedam er a Babeluades me a Osobeled, “el obang a mesisiich el klaumerang el mo er ngii, meng di mlo ultuil re ngii el ngarngii a klisichel lolsobel.” ²³ Bo dolemolem el ungil a rengud el ngar tial omerael el mo er sel kot el ngarbab el chedaol el klisiched e dolngeseu er tirkel meliuekl er kid el mo meruul er a osisiu el okiu a beltkil el reng, omesiou, omerreder, me a klechubechub.

A Elder James E. Talmage a mekekokil el omeklatk er kid, “A kot el mesisiich er a ongaisichai er a beluulechad er a redil me a kleredil a Jesus el Kristo.” ²⁴ Ngara kot el ulebongel el omesubel a melemolem el ngerchelir a redil er a Oltel, me a kid el rokui, ngera el ngerachel sel mal klou a ultutelel? Ak ouchais er a klaumerang er ngak el kmo bo morrenges er Ngii, ²⁵ e mo oltirakl er Ngii, ²⁶ e mo oumerang er Ngii, ²⁷ e mo odersel a Beltkil a Rengul. ²⁸ Ak medengei el kmo ng Ngar. ²⁹ El ngara chedaol ngklel a Jesus Kristo, bo le uaisei.