Ng Mekera Priesthood e Omekngeltengat er a Rengeasek
Ngara ngii er a kid a techall el mo oldars a ngesu el ua anghel, el mo olisechakl er a ebangkelio el mora rokui el beluu er a beluulechad, el olngeseu er a rechad el lmuut el mora Kristo.
Rodam me a rodos, ng kot el ungil a renguk el mengedecheduch er a kemiu er a tia el kmal klou a belkul kebesengei el kirel a chedaol sengk er a priesthood ma meang el klisiich el obang el omekngeltengat er a ngeasek er a chelchal taem. Nglunguchek me lak el iior er a chelitechetuk, e a Chedaol Reng bo el ngosukak el osisechakl a klemerang.
A First Presidency a ulmeklatk er tirkel obang a Priesthood er a Aaron el kmo “kom kiei er a taem el klou a techall me a ongarm—el taem el mla moluut a priesthood. Kemiu a ngarngii a klisichiu el meruul chedaol ruoll er a Priesthood er a Aaron. Me sel mngara nglunguuch e mklikiid el ousbech er tial klisiich, e kom kmal mo omekngeltengat a klengar tirkel ngara bitar kemiu.”1 Se el omrengeasek el sechal er a Ikelesia, kede dirrek mle ulmeklatk el kmo kede “betik er a rengul ngelekel [sechal] a Dios, e a ngar ngii a ureor el ousbech er [kid] el mo meruul,”2 e kid a olngeseu er a Urerel el mo diak el luut el kodall me a diak a ulebengelel klengar el mora chad (mesaMoses 1:39).
A priesthood a deruchall el meruul a ruoll me a telbiil er a ebangkelio er a Osobel el mo er a tirkei el klikiid el nguu. Ngokiu aikal ruoll me a chedaol telbiil er a priesthood ng mei a rokui el klengeltengat er a Tngakireng er a Osobell el olngesu er a kid el mor sel chedaol basio el de bo er ngii.
A Joseph Smith a mle ngeasek el sechal el blel olker er ngii a Dios el mo olutii ebangkeliol er a Jesus Kristo, sei a uchul, ngiluu a priesthood el ousbech er ngii el omekngeltengat a rechad el rokiu. Chelsel a Doctrine and Covenants 135 a mesaod a betok el klengeltengat el Joseph a milisterir el mo er a rengeasek er a chelchal taem. Kede menguiu el kmo a: “Joseph Smith … a kot el klou al blal ruul, ng di tal Jesus, el mo olsobel er a rechad er a tia el beluulechad, er a ngidi el chad el mla kiei er ngii. … Ng mla nguu el mei a Babier er a Mormon … ; ng mla udoreklii a cherrengelel a diak a ulebengelel ebangkelio … el mora rokui el saus er a beluulechad; mla nguu el mei a ocholt ma llach el ngii [a] Doctrine and Covenants … ; mengideb er a betok el telael el Uriul-Klebesei el Santo, … e mlo medechel a ngakl ma chisel el diak el sebechel bo lak” (mesa Doctrine and Covenants 135:3).
A mo ungil mesiou el ua Joseph Smith, ng kired el mo klikiid el ousbech er a klisichel a priesthood er a Rubak. Sera loleluid er a Babier er a Mormon, e a Joseph Smith ma Oliver Cowdery a mlo sorir metecholb, ngdi dimlak loba klisiich. Sera May 15, 1829, te mle outubaruach er a nglunguuch e mlor tir a Johanes el Techolb, ngii a milisterir a kiis ma ngerachel er aPriesthood er a Aaron, el dilu, mora kemiu el remesiungel, el obang a ngklel a Mesaia ak meskemiu a Priesthood er a Aaron, el oreked er a kiis er a odngelir a reanghel, ma ebangkelio er a ouchel reng, ma techolb el mo modulb el kirel a ngbetel a klengit (mesa Doctrine and Covenants 13:1).
Ngara ngii er a kid a techall el mo oldars a ngesu el ua anghel, el mo olisechakl er a ebangkelio el mora rokui el beluu er a beluulechad, el olngeseu er a rechad el lmuut el mora Kristo. Tia el ngesou a ngoikid el mo kaukledem el oureor el obengkel a Johanes el Techolb, Moroni, Joseph Smith, President Nelson, ma rebebil er a remesiou er a Rubak.
A omesiou er a kid ma priesthood er Ngii a oldak er tirkei el meses el oltirakl e melmalt el okiu a osisechaklel a Rubak, e ak medengei el kmo ng sebechel mo meringel sel dosiueklii a ongarm er a ngeasek. Ngdi sel bode dak el obengkel tirka el mesiungel a Rubak e melemolem er a Urerel ng mo olngseu el melisiich er a kid er a ongetikaiklel me a blulak el tekoi er a cherreued. Ng sebechem el mo uchul a llomes el mo er a tirkei el omai er a rengrir. A llomes el mobang a mo melidiich a bek el chad el bom kaseues er tir a mo ngeltengat el obengkem. Ng sebechel mo meringel er a bebil a taem el mo dodengelii a rengud er a rengedel a chedaol keldemed, Ngdi kmal ungil a renguk el medengei el kmo a tara kmal omekses el priesthood quorum, el tir ak oureor el merael mo kmeed er a Kristo.
Ng obengekel a resechelid me a retulangek er kid, ea Chedaol Reng a kot el ungil e usbechall el keldemed. Ng di sel dolengit er sel blechoel el Keldemel, eng kired el ngar sel omeruul me a lechub eng basio el Ngii a soal el mo er ngii. Tia sebechel omuchel er a chelsel a blid, sel doureor el meruul er ngii el mo chedaol basio lokiu a omenguiu chedaol el llechukl er a bek el sils ma nglunguuch er a telungalek e, a kmal klou a ultutelel, sel dosuub a chedaol el llechukl e meluluuch el dersta el chad.
Uchelel tia el rak, ng mlei er a ngak a kmal ungil e techall el mo olngesu er a ochedak, er a Oceane, el melemolm er a telbiil el rael sel kongei er a siotai el metelcholb e kutmeklii a ta er a kmal kirel ngarngii el soiseb er a rengedel a celestial. Ng mle torebengii a techolbechelid er ngii el tal buil, ng di merekmo ak mechedaol el mo priest, e meskak a techall el kutmeklii chedaol ruoll e dirrek el mlo ngeltengat a ruchedak el mo oureor er a eungel a ngerachel a preisthood e dechor sioning. Me se er a ki mdechor er a bitang me a bitang er a blil a techolbechelid e keldmokl el mo soiseb er chelsel a ralm, e ak milsang el kmal mle ungil a rengul, el di uai ngak. E ak mlo melechesuar el mlo tang el obengkel, e ngii a milruul er a melemalt el telbiil. Tia el techal el ousbech a priesthood a ririllak el mo kerekikl e diak bok sal mesaul el oltirakl a ebangkelio. Meng sebechek el mo ungil keltmokl, ak mlo er a templo er a bek el sils er seikid el sandei, ng ulngeseu a delak, delak el mechas, me a ochedak el meruul a techolbechelid er a re mla mad.
Tia el mla duubech el tekoi a olsisechklak a betok el tekoi el kirel a priesthood me a uangera el bok klikiid el ousbech er ngii. Ak medengei el kmo a rokui el oba priesthood a sebechir omelchesiu aikel diosisiu el tekoi el blek omelchesiu alsekum kede oltirakl okesiul a Nephi el kmo “mong e meruul” (mesa 1 Nephi 3:7). Ng diak el sebeched el dengokl el chelelakl e mengiil el ouspech er kid er a kmal klou el urelel. Ng kmal diak el bodongiil er a tirkel ousbech a ngesu el mo osiik er a kid, ng ngerchelled el oba priesthood el okesiul e mo sioning er a Dios. Alsekum kede melilt aikel tekoi el mo mengesang er a kid er a ongesechekled el diak a ulebengelel, ng kired el mengodech er a chelchang. A Diablong a mo blak a rengul el melasm el orkedid er a chelsel a mekngit el teletael el osiik aikel soad. Ng di ak medengei el kmo alsekum kede melasm, sikii tirkel el melisiich er kid, e ouchel er a bek el sils, aikel klengeltengat a meral mo ungil e klengar er a kid a mengodech sel dolemolm er a rolel a telbiil.
Ak medengei el know tia a klemerang el Ikelesia er a Jesus Karisto, e ngii a Osobel e miliskii a kisel a preisthood el mora reapostol er ngii, te ousbech er ngii el omekrael er a kid, e kmal merang er aikal meringel sils, e mengetmokl er a beluulechad er a luut er a Ngii.
A kmedengei el kmo a Joseph Smith a mle profet er a Oluut e a President Nelson a ngar el profet er chelechal sils. Ak siotai er a kid el rokui el mo mesuub er a klengar er a tirka el oba priesthood e meruul a klengar er a kid el mo ungil er a bek el sils meng sebeched el mo kelkmokl el mesa Ulemeob er kid. Loba ngklel a Jesus Kristo, amen.