Ultuil er a Klaumerang el Nglunguuch

A nglunguchel a Elder Maynes er a uchelel tia el kot el ongdibel a mla monger. Kede mla ngmai llomes me a ulekrael lokiu a klebokel el klumech me a chelitakl. A yaksok el dilii a President Russell M. Nelson el kirel tial ongdibel el kmo kmal mo klebokel a mocha tmaut.

A President Nelson a mla oterkeklii chelechal rak el kmo “ng erul telael el rak el rekil sel taem er a Dios el Chedam me a Betik er a Rengul Ngelekel, el Jesus Kristo, a dilum er a Joseph Smith.” A President Nelson a siotai er kid el mo kudmeklii a moktek er kid er tial mocha er a reksi el klou el ongdibel, el ngii el ongdibel a mo “mo medechel er a reksi er a Ikelesia, ea ngerchelem a kmal klou a ultutelel.”¹

Kom locha uai ngak, el mla rongesii a klemechel e di kemiu loker kemiu el kmo, “Ngera krulii el klou a ultutelel?” Kom locha mla menguiu e meluluuch el kirel a Oluut. Kom locha, el muut el betok el obla, dirrek el mla menguiu a cheldecheduch el kirel aikel taem el Dios el Chedam a ulechotii a Betik er a Rengul Ngelekel. Kom locha dirrek el mla chemuiu sera Osobel a longedecheduch el mora rengelekel a Chedam er a Babeluades. Ak medengei el mla remuul aika el rokui el tekoi me a lemuut el bebil.

Sera kunguiu e ak miltik a bades el kirel a priesthood er a Dios me a uchelel teletael er a uchelel chelechal taem. Ak mlo mtebengar el kmo a kedmeklek el kirel tial klou el ongdibel a mle klou a ultutelel el kirel a reksi er ngak. Ak mlo omelchesiu el mengodech a renguk. Ak mlo melchesuar a beches lomereng el saul. Ak mlo omlechesiu el mui er a deureng el blel siotai er ngak el mo tebedechel tial melemolem el teletael er a Oluut.

Ak dirrek el medengei el kmo a rebebil omelchesiu el uaisei, le ngultuil er a ungil kedmekliu, deureng, mesisiich luldasou, me a lmuut el blakereng el mo mesiou er a ikel techall lusbechall er a Rubak.

A meang el teletael dilubech el kid a mengull er ngii a mle uchelel a dimla mulaoch el ulebongel el taem, el Rubak a mengedmokl er a Ikelesia er Ngii me a Rechedal, tirkel tir oba Ngklel, e mo er Ngii. Meng tebedechel a kedmekled el kirel a luut er Ngii, e Ngii a mo sobecheklid me kede mo mesisiich er a ikel chedaol olibesongel me a techall el dirkak a tal meues er a chelsel a reksi er a beluulechad.

Sera September er a rak er a 1840, e a Profet Joseph Smith me a re counselor er a First Presidency a uluuchais aika el beldukl: “A urerel a Rubak er aika el uriul klebesei, a tara kmal klou a klungel el muut el chengelakl er a di klemedengei er kid er tia el klechad. A klebkellel a diak a smodii, me a klungel a diak a mtebengar. Ng dodai el di bla lobang a reprofet me a remelemalt el chad er a uchelel a beluulechad el mo lmuut er a bek el telcheroll el mei er chelechal taem; e meral taem er a cherrengelel a rokui el tekoi, el rokui el tekoi er a Kristo, a lengara eanged me a chutem, a mo mechudel el Kirel, e a rokui el tekoi a mo moluut, el ngii a mla medung er a rebek el chedaol profet er a uchelel a beluulechad; le tiaikid a mo uchul aikel yaksok el mla medung el mo er a ruchelir, e a olchotel a klisichel ngike el Kot el Ngarbab a mo meisiich, chetengakl, e ngarbab.”

Te millemolem el melekoi el kmo: “Ke de omelchesiu el mesisiich lomakes el bedul uchei e mo kaukledem el meleketek er a Rengedel, e meleketek er a Priesthood el mo er sel cherrengelel me a klebkellel. A ureor el kirel mo mekedmokl er a uriul klebesei a kmal klou a ultutelel, e mo ultuil er a klisichir, duch, er a Resanto, me bo loberk er sel klebkellel me a klisichel el profet el [Daniel] a millekoi el kirel [mesa Daniel 2:34–35, 44–45]; e kmal mo ultuil er a blakereng er a Resanto, el mo kudmkelii tial mesisiich e meang e klou el ureor.”²

Betok el telengtengil aikel kired el mo meruul me a temel bo doruul el kirel Oluut a dirkak el mocholt. Eng di a First Presidency me tirkel luleak kuchei er tir a mle medengelii a klungel me a delchel a ureor el Rubak a mla meskid er medad. A ikakid a bebil er a tekoi el ngii a dodengei el kmo ng mo duubech:

Ngokiu a Resanto er Ngii, e a Rubak a mo odersii a sengk er a ebangkelio er Ngii el “mo er a rokui el beluu, kebliil, omelekoi, me a rechad.”³ A technology me a ongasireng el teletael a mo melemolem el usbechall—me a dersta el chad me te “moumenged er a rechad”⁴ el mo oldingel loba klisiich me a klou el klaumerang.

Kid a rechad a kmal mo kaukledem er a chelsel a di meleketek el cheliseksikd el beluulechad. Ke de mo kldibel loba chedaol klisiich er a chelsel a chelechad me a telungalek loba llomes er a ebangkelio.

Nguldimukl er tirkel diak loumerang a dirrek el mo mtebengar a Ikelesia er a Jesus Kristo er a Uriul-klebesei el Santo e mo mesa klisichel a Dios lobang. A remesisiich er a klaumerang e diak el medakt loltirakl a mo bekeu, e oba ngariou el reng, e blekebek el nguu a ngklel a Kristo er a klengar tir er a bek el sils.

A leuaisei, eng mekera, dersta er kid e mo teloi er tial klou e meang el ureor? A President Nelson a mla olisechakl el kmo ng mekera a demukeroul er a chedaol klisiich. Sel denguu ouchel reng el uaia letechall er a deureng leng klaumera er kid er a Jesus Kristo el merael mo mesisiich a uchul, sel bo dodengei e doumerang el kmo a Chedam er a Babeluades a remenges a bek el nglunguched, me sel dolasm lolngesenges e doltirakl a llach, e kid a mukeroul el mo ngmai a chedaol ocholt. A Chedaol Reng a subechel el melemolem el kldemed. A omelechesuar el llomes a melmolem lobengked luldimukl alsekum a beluulechad a di merael mo milkolk.

A Joseph Smith a okesiu el kirel a mukeroul er a chedaol klisiich. Ngii a ulechotii er kid el kmo a nglunguuch lultuil er a klaumerang a ngii a kiis el kirel chedaol ocholt er a Dios. Ng miluluuch loba klaumerang, e uluumerang el kmo a Dios el Chedam a mo onger a nglunguuch. Ng miluluuch lultuil er a klaumerang, e ulumerang el kmo ngokiu a Jesus Kristo e ngii a mo klikiid er a klengit lulmelchesiu. Sola meng miluluuch loba klaumerang, loumerang el kmo ng kirel mo metik er a meral Ikelesia er a Jesus Kristo me bo lenguu a klausubes.

Ngokiu a ngerchelel profet, e a Joseph Smith a uluusbech er a nglunguuch lultuil er a klaumerang e ngilai chedaol ocholt. Me chelechal sils el dechelbangel a ringel me a ikel merael mei ruriul, e kid a dirrek el mo oltirakl er a osisiu el teletael. A President Brigham Young a dilu el kmo, “Ng diak kudengelii a ngodech el rael el kirir a Ruriul-klebesei el Santo ng kmal di sel rael er a nglunguuch el mo er a Dios el mo omekrael e omtebechel er a rechedal.”⁵

Aika el tekoi el ngara sel nglunguuch er a sakrament a kirel mo sodel a klengar kid er a bek el sils: “Blechoel melbedebek er ngii.” “Ngii” a dodengelii el melutk el kirel a Jesus Kristo. E sel ongingil tekoi el, “oltirakl a llechul,” a meketeklii a belkul sel dolbedebek er Ngii.⁶ Sel dolbedebek er a Jesus Kristo, eng sebeched loker lokiu a nglunguuch, “Ngera Soal a bo kuruul?”

Tiaikid el nglunguuch, el medung lokiu a klaumerang er a Jesus Kristo, a milchelii tial ulebongel el taem. E kmal di mo ultuil er a dersta er kid el mo melemolem er a urerel tial ureor. Ak uai kemiu, el mla metik, er a ungil okesiul tial nglunguuch.

A kot a Joseph Smith. Nguleker loba klaumerang er a kekerei el ngalek aikel soal a Rubak a bo loruul. E a nger lengiluu a ngildechii a reksi er a beluulechad.

A denguu er ngak, e sel klou a ultutelel suobel a sel nger er a Joseph er a odelcheklel a Diablong er sera loutubaruach e loluluuch.

A kmal ungil medengei el kmo a Diablong me a rechedal a melasm el meruul er kid meng diak doluluuch. Sera le sal blak a rengul a Joseph Smith el meluluuch el mo er a Dios mel sebecheklii er sel mesisiich el klisiich milasm el merrob er ngii, e a nglunguchel a mlunger el Chedam er a Babeluades me a Jesus Kristo a dilum.

A blakereng er a Diablong el merrob er a uchelel Oluut a kmal mle mesisiich le nglunguchel a Jospeh a mle klou a ultutelel. Kemiu me a ngak a mo kekerei a ngercheled er a melemolem el teketekel Oluut. Eng di a cherarou el merrob er a Oluut a melasm el merrob er kid er a nglunguuch. A okesiul a klaumerang me a blakereng er a Joseph a sebechel smisichid sel dosebechakl a tekoi. Tiaikid a ta er a betok el uchul e a nglunguchek a uldimukl er ngii omereng el saul el mo er a Chedam er a Babeluades el kirel a Profet Joseph.

A Enos er a chelsel a Babier er a Mormon a tara okesiu er a nglunguchek lultuil er a klaumerang er a ngerchelek er a chelsel tial melemolem lureor er a Oluut. Ngii di el ngerchelem, eng sebechem el nguu meng okesiu leko er kau.

Meng uaia Joseph, e a Enos meng miluluuch lultuil er a klaumerang. Ng smodii tial teletael el ua tiang:

“A bedengek a mlo nguibes; e mlo outubaruach er medal a Ulemeob er ngak, e lilangel el mesisiich el mo er ngii lokiu a nglunguuch el kirel a klengar ngak; el tal sils el kululuuch el mo er ngii; oi, el mo klebesei e ngak a millmeolem el meluluuch el mo er a babeluades.

“E sola rirngesii a ngor el dilu er ngak, el kmo: Enos, a kngtim a bla kuusubes, e kau a mo ngeltengat.

“E ngak, el Enos, a medengei el kmo a Dios a diak loumulak; me a berredel a kngtik a mlo dibus.

“Mak dilung: Rubak, ng mekerang e mo uaisei?

“E ngii a dilu er ngak el kmo: Ng kalumera er kau er a Kristo a uchul, el dirkak a tal mrengesii me a dirkak a tal mesang. E betok el rak ruriul e kemiu a mo mesang a bedengel; a leuaisei, e morael, a klaumerang er kau a mla osebelau.”⁷

A suobel el mla omekngeltengat er ngak a ikakid el tekoi: “Klaumerang er kau er a Kristo a uchul, el dirkak a tal mrengesii me a dirkak a tal mesang.”

A Joseph a mlarngii a klaumera er ngii er a Kristo el mo er a oreomel e dirrek el meluluuch mel mengubet er a klisichel a Diablong. Ng dirkak lesa Chedam me a Ngelekel, eng di ng miluluuch loba klisichel a rengul.

A teletael el mo er a Enos a mla osischeklak a osisiu el meklou a belkul suobel. Sel kululuuch lultuil er a klaumerang, e a Osobel a mengesebechakl er ngak er medal a Chedam e ngak omelchesiu el nglunguchek a morenges er a babeluades. A nger a mei. Me a klengeltengat a mengai. Ngarngii a budech me a deureng er a chelsel aikel meringel el taem.

Ak dobedebekii a taem, el blek beches el chedal a Chelechad er a Teruich me a terung el Apostol, eak mlara nglunguuch lobengkel a Elder David B. Haight. Ng mle kmeed el ua rekik er chelechang, me a olibesongel el kchelbangel er chelechang. Ak dirk dobedebekii otto er a ngerel er a loluluuch. Ng dimlak kumok a medak lomes, eng di kulerrenges er ngii el ua le klikmechur. Ng milngedecheduch er a Chedam er a Babeluades el mle ungil a rengul.

Ng ua di kurrenges er a uldesuek sel deureng er ngii el kmo, “Ngara ngklel a Jesus Kristo.” Ng uaia kumelchesiu el Elder Haight a milchesuar a Osobel el smisichii a belkul er iseikid el taem a tekingel el bla loluluuch el kirel. E mle medengei el kmo ng mle ungil a rengul a lenguu.

A ngercheled el mo telengtengil tial meang e melemolem lureor er a Oluut a mo choisisii a klaumera er kid er a Jesus Kristo el Osobeled me a Demad er a Babeluades el ngii a oubeltik el reng el Demad. Me sel doluluuch lultuil er a klaumerang, e kid a mo klou el tebedechel a urerel a Rubak sel Longedmokl el kirel Ongeru Lemei. Nglunguchek me bo debetik er a deureng sel doruul er a ureor el Ngii a mla siotai er kid el mo meruul.

A kuuchais el kmo a Jesus Kristo a ngar. Tiang a Ikelesia er Ngii e rengedel el ngara beluulecahd. A Joseph Smith a profet er a Oluut. A President Russell M. Nelson a profet er a Rubak el ngara beluulechad er chelechal sils. Ngii olab a rokui el kiis er a priesthood er a chelsel a Ikelesia er a Jesus Kristo er a Uriul-klebesei el Santo. El ngara a ngklel a Jesus Kristo, amen.