Ng Diak Bai Dolemolem Loba Klou el Moktek?

Ke kmal mesulang, e President, er a ungil cheldechedecham. Rodam me a rodos, erul dart me a teruich me a eim el rak er a memong, e a ngeasek el buik a lulchellii a Joseph me a Lucy Mack Smith er a Vermont el beluu er a New England el Beluu er a Merikel.

A Joseph me a Lucy Mack a ulumerang er a Jesus Kristo, e milsuub chedaol llechukl, e mle blak a rengrir el meluluuch, e mla er a klaumerang el mo er a Dios.

Te milengklii ngika el tolechoi ngelekir el sechal el Joseph Smith Jr.

A Brigham Young a millekoi, el kirel tial telungalek er a Smith el kmo: “A Rubak a ulemes er a [Joesph Smith], me a demal, me a demal a demal, me a ruchelir el mo el muut er a Abraham, e ngara Abraham el mo er sel taem er a iieleb, e ngara taem er a iieleb el mo er a Enoch e ngara Enoch el mo er a Adam. Ng mla omes er tial telungalek me a rasech el ngara chelsir er a uchelel el mo el muut er a cherellel ngika el chad. [A Joseph Smith] a mlechedaol e moterekokl er a uchelel mo er a ulebognel.”¹

Ng mla er a beltikereng er a telungalek er ngii, e a Joseph Jr. a kmal mle soal obekul er a Hyrum, el mle kmeed lelolem a rekil er a lemechell a Joseph.

Tial mlo merek longeteruich el buik, e ak dilengchokl er bebul a bad el mla er sel kekerei el blirir a re Smith er a Sharon, Vermont, el milechell er ngii a Joseph. A kulmelchesiu er a beltikereng er a Hyrum el mo er a Joseph e ulemdasou er ngii el lurrekodel er a chimal a tolechoi lochellel e olisechakl er ngii el merael.

A demerir me a derrir a re Smith a mle meringel a klengar tir, meng le betok el taem loleklukl a delengchokl el uriul eng kmal mlo diak el sebechir el ngara New England me te mocha melukl el mo er a ongos, er a beluu er a New York.

A klaukledem er tial telungalek a uchul, e te mlosebechakl er a ikel meringel el taem e dilak el meringel loureor lmuut el meleketek er a telungalek er tir er tial dart el acre a klungel basio (0.4 km²) er a beluu er a Manchester, el kmeed er a Palmyra, er a New York.

Ng diak kudengei el kmo te tela er kid a mtebengar sel ringel er a tech me a reng el tial telungalek er a Smith a uaia liluut lomuchel er a klengar tir—el melemotem er tial basio, e melalm a dellomel er a sers, omekedechor er a kerrekar el blai me a urerel a sers, e meringel loureor a lemellomes, e meruul oteruuul e olab el mo olterau er a beluu.

Sel taem er a lekerd tial telungalek er a ongos er a New York, e tial basio a mle klou a nglemuu er ngii er a tekoi er a klechelid lokedongall el kmo Ongeru el Klou el Okiis.

Chelsel tiaikid el taem er a nglemuu me a klaumondai er a kakerous el klechelid, e a Joseph a ngiluu a meang el ues, el chelechal sils eng okedongall el Kot el Ues. Kede ngeltengat lolab a kot el chisel tial ues el bo kusaod.²

A Joseph a milluches el kmo chelsel tial taem er a klou el nglemuu er a tekingel a klechelid, eng kmal mlo oberaod e ngodech a uldesuek, e mle blechoel lomelchesiu er a dmolech el rraureng, eng di ak di milngeroid er ngak er ngii el rokui, e mle dersta el ko er a mo duum er a ikel ongdibel er tir. … Ng di kmal mle klou a rraureng me a nglemuu er a ikal kakerous el klechelid, meng mle meringel er a ngeasek el chad el uai ngak, el dirkak a kmal ngera el bo kudengei el kirel a betok el tekoi, el mo sebechek el melilt el kmo ngera klemerang e ngera diak.³

A Joseph a ulebult el mo er a Biblia losiik a nger er a keril e milnguiu er a Jacobus 1:5: “A lengarngii er kemiu ousbech a llomes, e loker er a Dios, el mimokl el mesterir a rokui el chad, e diak a ngera longreos; me bo lenguu a nger.”⁴

A Joseph a millekoi el kmo ng dimlak a bades er a chedaol llechukl el kmal mle mesisiich a klisichel er a rengul el uai tiang. Ng kmal mle mesisiich el subechii er a renguk. A Joseph a millebedeb er tial bades.⁵

A Joseph a mlo mtebengar el kmo a Biblia dimlak lolab a rokui el nger er a ker er a klengar; ng bai, osischekelterir a rsechal me a redil el uase te mekerang e ngmai a nger er a ker lokiu omengedecheduch lobengkel a Dios lokiu a nglunguuch.

Ng millekoi el kmo a kultirakl er tiang, el renguk el mo oker er a Dios, eak mlo er a oreomel el mo melasm er tial teletael. Ng mle klebokel el tutau, lungil a eanged, er a rak er a tal telael me a eai el dart me a lluich.⁶

A Joseph a millekoi el kmo sera lemei er ngii tial llomes eng milsterir a teru el chad, el llemesir me a klebkellir a diak a ngii el ngerang el smodii, el dechor er a melaongel. A chimong er tir a milngedecheduch er ngak, el ulemekedong er a ngklek, e melutk er ngikal chimong e kmo—[Joseph,] Ngika Betik er a Renguk el Ngelekek el Sechal. Mrengesii!”⁷

A Osobel a milngedecheduch er a Joseph el kmo, Joseph, rungalek, a kngtim a bla kuusubes. Morael, e moltirakl a blekeklek, e moltirakl a llechuk. Ngak, a Rubak er a klebkall. Ngak a mlad el kirel a beluuelchad, me tirkel rokui loumerang er a ngklek a mo nguu a diak a ulebengelel klengar.⁸

A Joseph a milemolem el kmo ng di mle telkib eng mocha mesisiich a bedengek, el sebechek el mengedecheduch, me a kuleker tirkal Chad el dilchor bebuk, el kmo ngera er a ikal klechelid a klemerang.⁹

Ng millekoi el kmo Tir a dilu er ngak aika el rokui el klechelid a ulsisechakl a diak el merang el osisechakl, e diak a ta er ngii el Dios a kongei el uase ng ikelesia er ngii e rengedel. E osisiu el taem e ak ngiluu a yaksok el kmo a cherrengelel ebangkelio a mo mocholt er a tara taem el mei er ngak.¹⁰

A Joseph a dirrek el millekoi el kmo ng miles a betok el anghel er tial ues.¹¹

Uriul er tial meang el ues, e a Joseph a milluches el kmo a renguk a mlo mui er a beltikereng, meng mle betok el klebesei el ngara klou el deureng. A Rubak a ulebengkek.¹²

Ng tilobed er sel Chedaol Oreomel e ulemuchel er a kedmeklel el mo profet er a Dios.

A Joseph a dirrek el siliseb er a ikel teletael el reprofet er a recheuodel a mla er ngii—modik, ultok, me a odechelakl. A Joseph a uluchais aika leuiles me a rirenges el mo er a tara mengeteklel a klechelid el kmal mle meisiich el ngara chelsel tial nglemuu er a tekoi er a klechelid:

A Joseph a melkoi el kmo ng kmal mlo mechas a renguk er a teletelel, leng dimlak el sal lomtab aika el tekingek, e millekoi el kmo ng tekingel a diablong, le rua ues me a chedaol ocholt a mla mo diak er chelechal taem, e a rokui el tekoi a ngilemed er a taem er a reapostol, e diak el luut el mo er ngii a uaikaikid el tekoi.

Akmlo metik, el kmo, tial cheldechedechak a muchel a betok el mekngit luldasou el kirek er tirka el semmong er a tekoi er a klechelid, e mlo uchul a klou el odechelakl, el di mirrael mo klou; … er a delongelir a rechad er a bek el klechelid—tir el rokui el mlo dmak e oldechelakl er ngak.¹³

Edei el rak ruriul, er sera 1823, e a babeluades a liluut lobok el tebedechel Olutel ebangkelio er a Jesus Kristo er chelechal uriul klebesei. A Joseph a millekoi el kmo a anghel el Moroni a ngklel a dilum er ngii e dilu el kmo, a Dios a ngarngii a ureor el kirek el mo meruul e ngarngii a hong el delekull el llechukl er a kolt el sintsyu loba cherrengelel a diak a ulebengelel Ebangkelio el Osobel a milsterir a recheuodel el techel a miich er a Beluu er a Merikel.¹⁴

Uriul, e a Joseph a ngilai e uleliuiid e liluches aika el record el dodengelii er chelechal sils el Babier er a Mormon.

A obekul er a Hyrum, el kmal mle blechoel lolngeseu er ngii, tokuni sel meringel el taem er a 1813 le blo er a botk ochil, a tara mle sioning er a ikal kolt el sintsyu. Ng dirrek el mle ta er tirkel telolem el chedal a Ikelesia er a Jesus Kristo er a sera le mechederoder er a 1830.

Chelsel a klengar tir, e a Joseph me a Hyrum a mlo chelbangel er a remekngit el chad me a odechelakl. Okesiul tiang, te mla er a klou el ringel er a chelbirukl lomeruul er a lengara Liberty Jail er a Missouri leim el buil el taem er a kelekolt er sera 1838–39.

Sera April 1839. e a Joseph a milluches el mora bechil er a Emma el mesaod el kirel a teletael er a Liberty Jail el kmo a kuumerang el kmo ng mla mo eim el buil me a elolem el klebesei el kulengeng a mekngit losengel a chad el mengkar, a le klebesei me a llomes, el kseluk er a chelsel a di telenget er a deel, me a chami, me a olsesengchongch el deel chesimer, e milkolk e kikiongel el blil a kelebus. … Aki kmedung el melukl er tial basio, e kmal ungil a rengmam el tuobed er a chelsel. Diak kudengei el kmo ngera mo duubech, eng diak ki msiseb er almuut elm eringel er tiang. … Ng kmal diak omeletkam el kirel a kmo ngerang ruriul er a Liberty el ngara Clay County, Missouri. Ngungiang aikel ki blamsiseb er ngii.¹⁵

Chelsel tiaikid el taem er a odechelakl, e a Hyrum a chilolt a klaumera er ngii er a yaksok er a Rubak, luldimukl a techall el chemiis er a cherarou alsekum eng melilt el mo uaisei. Sel klengeltengat lengiluu a Hyrum er a 1835 er a chimal a Joseph Smith, e a Rubak a mle yaksok er ngii el kmo, ng morngii a klisichem el chemiis er a chimorir a rechereuem. A klengar kau a diak el bol chelelakl er a rechereuem, eng di ng mo sebechem el chemiis.. IA di lungil er a rengum, el soam, eng morngii a klisichem lodersii a klengar kau el mo kobkelii a Dios.¹⁶

Sera June 1844, e a Hyrum a mellilt el kmo ng mo kiei a lechub eng mo odersii a klengar ngii el mo kobkelii a Dios e mlochotii a klaumera er ngii lokiu a rsechel mlechoit er bita er a betik er a rengul lochellel er a Joseph.¹⁷

Tal sandei ruchei er a lorael el mo er a Carthage, el mlo kodall er a remekngit el chad el mla osbereber a mederir leng diak el sorir medangch, e a Joseph a millekoi er a obekul er a Hyrum me lenguu a telungalek er ngii e lorael ngara bilas el mo er a Cincinnati.

A kmal dirk mo oumekikngit el reng sel debedebek a tekingel a Hyrum el kmo, Joseph, Ng diak el sebechek mo cheroid er kau.’’¹⁸

Me a Joseph me a Hyrum a mlo er a Carthage, e mlo kodall el kirel a moktek me a ngklel a Kristo.

Sel meral tekoi el tilobed el kirel tial kodall a kmo: “A Joseph Smith, el Profet e chad er a Ues er a Rubak, … a mla odersii a Babier er a Mormon, el ngii a uleleuiid er ngii lokiu a sengk me a klisichel a Dios, e mla uchul a lecheklel er a eru el beluu; e mla ochotii a cherrengelel a diak a ulebengelel ebangkelio, el ngara chelsel, el mo er a ikel kleua el saus er a beluulechad; e mla ocholt a chedaol tekoi me a llach el ngii a tiakid el hong er a Doctrine and Covenants, me a lmuut el bebil er a betok el babier me a tekoi el uchul a klungiolir a rengelekel a chad; e mla mengidb er a retelael el Uriul-klebesei el Santo, e toketekii a klou el beluu, meng merael chisel me a ngklel el diak lengemed. … Meng uaia rebek el ngellitel er a Rubak er a rechuodel, e a [Joseph] a mla rukui a ngerchelel me a urerel lokiu a rsechel milchoit; me a dirrek lobekul er a Hyrum. IChelsel a klengar tir e te dimlak bol chacheroid, me a kodall me te diak bol kakeakl!”¹⁹

Uriul er a kodellir, e a bedengel a Joseph me a Hyrum a liluut el mo er a Nauvoo, e merisou, e bleiull me bol sebechel a telungalek er a Smith el mesterir tirka el betik er a rengrir. A derrir a millekoi el kmo: “Ng meketeketang el kulisiich er a renguk, e melisiich a bedengek, e omekedong er a Dios me lolisiich er ngak; eng di sera ksiseb er a delmerab, e kisterir a re mla mad el ngelekek er medak, e kurrenges a lengelir a rechedal a telungalek er ngak me a lengelir a rebecherir, rengelekir, rochellir, me a ruchederir, eng kmal mlo oberaod er ngak. Ak mlo dengchokl e lilangel el mo er a Rubak el meral loberaod a renguk, ‘Dios er Ngak! Dios er Ngak! Ngera me ke mla mo cheroid er tial telungalek?’”²⁰

Tiaikid el taem er a klengitereng me a ringel, eng ulerrenges er tir el kmo, “Chedil, lak mlangel el kiram; aki mla mo ikrii a beluulechad lokiu a beltikereng.”²¹

Te meral mla mo mesisiich er a beluulechad. A Joseph me a Hyrum Smith, a uai tirkel blak a rengrir el Santo el ngara chelsel a hong er a Ocholt, “el tilobed er a klou el ringel, e mla mo beches a bilir, el mla mo becheleleu er a rsechel a Ngelekel a Sib [e] … dechor medal a Dios, e mesiou er ngii a lelomes me a le kelbesei er a templo er ngii: e ngike el kiei e ra kingall a mo teloi er tir.

“Te mo diak lolsengerenger, me a ka bol meched a rengrir; me a sils a ka lo luiich er tir, malechub a kleald.

“Ele a Sib el ngara delongelir a mo omeka er tir, e momekrael er tii el mora ngar el madedok: ea Dios a mo smuld a chiuosech er a mederir.”²²

Chelechal doudkeu er tial ungil klebesei, el erul dart el rekil a Kot el Ues, eng kired el blechoel dobedebekii a ringel el Joseph me a Hyrum Smith a mla er ngii, me a dirrek el betok el blak a rengrir el sechal, me a redil, me a rengalk, el toketekii a Ikelesia me bol sebechel kau me a ngak el ngmai a klengeltengat me a mla mocholt el klemerang el dolab er chelechal sils. A blakereng er tir a diak el kired lobes er ngii.

Ak blechoel mla melbedebek el kmo ngera uchul me a Joseph me a Hyrum me a telungalek er tir a kmal mle udirekork a ringel le chelbangel. Ng locha sera bo lodengelii a Dios lokiu a ringel er a ngodech el teletael el mle sebechel diak el dubech el uaisei. Ngokiu aika el ringel, e te melbedebek er a Osobel er a lengara Gethsemane me a kerus. El uaia tekingel a Paulus el kmo, “Ko mo ngmai lokiu a Kristo, el diak di moumera er ngii, kom dirrek el mo ngara ringel el kirel.”²³

Uchei er a kodellel er a 1844, e a Joseph a lilchesii a babier el mo er a Resanto. Tia okedong el mo ngara omeruul, el melemolem er a chelsel a Ikelesia er chelechal sils:

“Rodam [me a rodos], ng diak el sal klou a moktek er kid? Morael bedu uchei e lak moubeteteluut. Bol meduch a rengmiu e rodam [me a rodos]; e molemolem, el melemolem el mo kats! …

“… A leuaisei, e kid, el ikelesia me a kid el chad, el Uriul-klebesei el Santo, bo dodars a uldersed el mo er a Rubak lokiu a llemalt.”²⁴

Me sel dorrenges er a Chedaol Reng er tial erul dart el rak el doudkeu, e molatk a uldersem el mo er a Rubak er a ikal merael mei el klebesei. Bo blekebek—e mouchais el kirel el mo er a chad el moumera er ngii, e sel kot el ngaruchei, e msiik a temem el mo meruul er ngii!

Akmedengei el kmo a Osobel a ungil a rengul sel dodersii er Ngii a meral melemalt e ngara reng lomelenget el uai Ngii el mlo ungil a rengul er a ikel mesisiich lurerir tirka el odam, el Joseph me a Hyrum Smith, me a rokui el blak a rengrir el Santo. A ika kmal kulekoi el ngara chedaol ngklel a Rubak el Jesus Kristo, amen.