Morael mo Ruchei el ngara Klaumerang

Betik er a renguk el rodam me a rodos, me sel de bora ulebengelel tial reksi el ongdibel, e ke de oureng a sulel a Rubak. A chelitak a kmal mle klebokel me a ungil a klemechel.

Ngar tia el ongdibel, e kede mla mo chemau a betok el ungil omeruul. Chelecha el doutkeu er a erul dart el rak, ea ki mla mchisii el mo er a beluulechad a klemrang el kirel Oluut er a ebangkelio er a Jesus Kristo er sel cherrengelel.

E kede mo outkeu er a Oltel el mo dulii sel tekoi el Hosanna.

Ke de mo ochotii a beches el olangch el mo olengchelel a klaumerang er kid er a Jesus Kristo me a oterkeklel a ues el kirel a tekoi er a Ikelesia me a klalou el ousbech.

Ke de mla omekedong er a rokir el beluulechad el mo olsengerenger e ngara nglunguuch, me tial bekuiuiuul secher bol chelelakl, me a rechad lomekerreu bo lemucheliu, me a kerruul bol mesisiich, me a klengar luut er a smechel. Tial sils er a olsengerenger a mo er ngii er sel Ungil el Ongeim el Ureor, April 10. E tiang a kmal mo ungil el Ongeim el ureor!

Sel mei el Sandei a sils er a Baskua, el kid a lmuut el mo outkeu er a Tngakireng me a Okisel a Kodellel a Rubak el Jesus Kristo. Eleng sel Tngakireng er Ngii, e sel Sengkel er a okiis a mo er a rokui el tir a mla kiei. Me a Sengkel er a diak a ulebengelel klengar a mo er tirkel el tir a sebecherir el ngmai e leng kldung el klaumerang er a chedaol ruoll me a telbiil el riruul er a chelsel a chedaol templo er Ngii.

Me a ikal betok el mellomes el uldasu er tial klou el ongdibel er tial Ongeua el Buil er a 2020—me tial el chedaol el sandei el domechelang er ngii—a sebechel kodebengii a omsodel lobang a teblong el chedaol el tekoi: “Morrenges er Ngii.” ¹ Aki meluluuch me a uldesuiu dil bedul a Chedam er a Babeluades, el milekoi aikel tekoi, me a Betik er a Rengul Ngelekel Sechal, el Jesus Kristo, bo el mui er a uldesuiu el kirel aikel mla duubech. Aki meluluuch mekemiu bo momuchel el beches e bo meral lorrenges, e momtab, e mo oltirakl a tekingel a Osobel. ² Ak yaksok er kemiu el kmo a sebekreng a mo merael mo diak ea klaumerang a mo merael el mo klou.

Kom mesulang er a dechal a rengmiu el meruul a blimiu el meral blil a klaumernag, el Chedaol Reng er a Rubak a kiei er ngii. Sel osisecheklel a omesubel a ebangkelio el, Mei, e Moltirakl er Ngak, a mo melemolem el omekngeltengat a klengar er kemiu. A blak er reng er kemiu er tial ureor—el ngarngii a taem e ko melchesuar el kmo ngdiak el kora ungil merael el kirem—a mo ngodechii a klengar er kemiu, telungalek er kemiu, me a dirrek el beluulechad. Kede mo mesisiich sel bo el bekeu a rengud el mesiungel a Rubak, el mo mengesebechakl e mengedecheduch el Kirel, a de ngara ngidil basio.

Me a chelechang, e bo dosaod el kirel a templo. Ngarngii a dart me a okeuid me a eai el templo el mla moterekokl el meliuekl er a beluulechad. A bebil a dirk cheldechuul a okedecherul me a teketekel. Me sel mocholt a uldasu el mo omekdechor er a beches el templo, eng mo dechelel a chedaol el reksi.

Ng locha ko er a ngodech a bo douchais el kirel a beches el templo sel rokui el templo a chelsimer el telkib el taem.

Ng betok er a dart el rak er a mla memong, ea President Wilford Woodruff a milsang a omeruul el di uai tial kired, el llechukl er sel nglunguchel se er a loterkeklii a Salt Lake Templo, er a 1893. A bebil er kemiu a locha mla mesang a tebedechel tial llechukl el nglunguuch el ngara social media.

Ka mrenges a mesisiich el lengelel a profet er a Dios: “Me sel Rechedam a diaka techelir el mo soiseb er tial chedaol blai … e le te ngara ongarm me a telemall , e iliuekl er a ringel … me te mo chemau er tial chedaol el Blim e olengit er kau el mo oldoseb, e olngeseu er tir, me a Klisichem el bo el modars el kirir, aki meral olengit er Kau, me momes el meriou sel Kau a ngara chedaol delengcheklem er a klechubechub … e mrenges a lengellir. Malechub a rengelekir a Rechedam, el ngara ikal mei el rak, a mo kebii, el okiu a ngidil ngeral duubech, er tial basio, … mete mo lemangel el mo er Kau el ngara ringel me a klengit el reng el mo oldars a ngeseu e oldobes er tir, a ki mo obang ngariou el reng e olengit er Kau … el mo orrenges a lengellir, e besterir a klengeltengat el tir a olengit.” ³

Rodam me a rodos, a ikel taem el kid ngara ringel sel chelsimera templo, eng kmal dirk sebechemiu el mo chemau a klisichel a telbiliu er a templo me a klengeltengat sel moltirakl a telbiliu. Kulengit mousbech er tial taem sel ikal templo a chelsimer e bo molemolem el kiei el klikiid-el templo er a klengar malechub e bom klikiid el mo er a templo.

Mosaod el kirel a templo el mo er a telungalek er kemiu me a resechelimiu. E le Jesus Kristo a chedul a rokui el tekoi el doruul er a chelsel a templo, me sel omblechoel lomadsu el kirel a templo e ke mo blechoel el omdasu er Ngii. Mosuub e moluluuch el lmuut el mesuub el kirel a klisiich me a klemedengei el kau a mla ngmai ele ke mla soiseb er a chelsel a templo—malechub e ke locha mochu soiseb er a templo.

Chelechal sils eng dmeu a rengmam louchais okedecherul a kleai el beches el templo er a ikakid el basio: Bahía Blanca, Argentina; Tallahassee, Florida; Lubumbashi, Democratic Republic of the Congo; Pittsburgh, Pennsylvania; Benin City, Nigeria; Syracuse, Utah; Dubai, United Arab Emirates; me a Shanghai, People’s Republic of China.

Aika el kleai el basio, e a rechad er a Ikelesia lomekedechor a templo a oueor lobengterir a rechad er a ikal beluu me a ikal templo bol dehcelel a klebekelel a beluu.

A uldasou lomekedechor er a tmeplo er a Dubai a mlei lokiu ongterir, me kede kilengei er ngii.

A okedecherul a templo er a Shanghai a kmal klou a ultutelel. Ng kmeed el lluich el rak, el rechedal a iklelesia el ngara People’s Republic of China a mo er a templo el ngara Hong Kong. Ng di sera Ongeuid el buil er a 2019, e tial templo milchesimer leng ml ekirel mo merael a ureor lomekbeches er ngii.

A kuk Shanghai, e a betok a usbechellel omekedecheraol a milsterir a techall a rechad er a Sina el melmolem el merull chedaol ruoll—er a People’s Republic of China—el kirir me a rebeldekir. ⁴

Chelsel a bek el beluu, e a rechedal tial Ikelesia a mosisechakl el mo mengull, oltirakl, e mesebechakl a llechul a beluu. ⁵ Kede olisechakl er a klou el ultutelel a telungalek, me a ungil klaungalek e ungil okesiu el chad er a beluu. Kid lolngesenges a llechul me a orretel a beluu er a People’s Republic of China a uchul, e a Ikelesia a diak loldurokl er a remisionari el mong; e diak dolatk el mo meruul er ngii er chelechang.

A re mla modik me a rechad er a Sina a melemolem el kakeakl. A teletelel a Ikelesia risei a melemolem el diak el mengodech. Sel ketenel odingel el mong, a di mo ultuil er tirkel ngarngii a oiter tir el mong. A blil a Rubak el mo dechor er a Shanghai a diak bo losiolir a re dime oldingel el chad er a bebil er a beluu.

Aikal eai el beches el templo a mo omekngeltengat a klengar er a rebetok el chad el ngar tial beluulechad me a beluu er a redeleb. A templo a kot el ngarbab el telengtengil a Oltel a cherrungel el ebangkelio er a Jesus Kristo. A Dios a ungil a rengul e bekerurau, Ngii a omesterir a klengeltengat er a templo el mo er a Rengelekel el ngara ngidil basio.

Me sel lolemolem Oluut, e ngak a medengei el kmo a Dios a mo melemolem el ouchais a betok e meklou a ultutelel el tekoi el kirel a Rengedel el ngar tial beluulechad. ⁶ Tial renged a Ikelesia er a Jesus Kristo er a Uriul-klebesei el Santo.

Rodam me a rodos, a kuchotii a beltkil a renguk el mo er kemiu. Chelechal taem er a ringel me a rau el reng, e ak monguu tial klisiich el kubang, e soak el mo meskemiu a klengeltengat.

A ku mekngeltengat er kemiu lobang a budech me a klou el klaumerang er a Rubak. ⁷

A ku mekngeltengat er kemiu me bol ngarngii a rengmiu el mo ouchel e mokokemiu el mo uai Ngii er a bek el sils. ⁸

A ku mekngeltengat er kemiu me bo modengei el kmo a Profet Joseph Smith a profet er a Oltel a ebangkelio er a Jesus Kristo er a cherrengelel.

A le ngarngii a secher er a delongeliu malechub eng tirkel betik er a rengmiu, e ak meskemiu a klengeltengat er a omekungil, el osisiu ngii mesel moktek er a Rubak.

A ku mekngeltengat er kemiu, e lmuut el dochelir a beltkil a renguk el mo er a ta me a tang er kemiu, el ngara chedaol ngklel a Jesus Kristo, boluaisei.