Ouchais a Klmechel a Oltel me a Okiis er a Kodall

Chelsel tia el klou el ongdibel e ke de mla melekoi e mengitakl el obang a deureng el kirel a ues er a ngara mong el mla tmaut el “bo le mukbeches a rokui el tekoi,”¹e mo oldak “a ikel rokui el ngara Kristo,”² el kirel a cherrungel el ebangkeklio el lmuut el mei, me a priesthood, me a Ikelesia er a Jesus Kristo el mei er a beluulechad, el ngii a llechukl el “Oltel.”

A Oltel a diak el di el bo er tirkel el oldeu a rengrir er ngii er a chelechal taem. Sel ocholt er a Kot el Ues a diak el di bo er a Joseph Smith ngbai modars el mo llomes e klemerang el mora ngidil chad el “olngesonges er a llomeserreng.”³ A Babier er a Mormon a kloklir a rechad. A chedaol ruoll er a mo suobel me a ngarbab el klengeltengat a milkedmokl el mo er a redersta el chad, el uldimukl er tirkel mla mo diak el ngar tial beluulechad. A Ikelesia er a Jesus Kristo er a Uriul-klebesei el Santo me a ikel klengeltengat er ngii a mo er tirkel tir a sorir el melai. A sengk er a Chedaol Reng a kirel el mo er a rokui el chad. Tial Oluut a kloklel a beluulechad, e sel cheldechedal a klou a ututelel er a chelechang.

“Misei a uchul meng mera el klou a ultutelel bo lodengei ika el tekoi a rechad er a beluulechad er rokir, e bo lodengei el kmo ng diak a tech el sebechel mo er medal a Dios, el diak lultuil er a omerellel, me a kle chelbechub er ngii, me a ngesuil a Chedaol Messiah, el mo tongetengii a klengar er ngii er a tech, e liluut el nguu loba klisichel a Reng, meng mo sebechel mo er ngii okiis er a kodall.”⁴

Me sel sils ea ochellel a Profet, el Samuel Smith a milkekii a til er a kmal dirk tilobed el Babier er a Mormon e milrael el mo ouchais er tia el beches el chedaol llechukl, el re Santo a mle meringel el oureor kirel “me a ikal el tekoi bo el mocholt el mo er a rechad er a beluulechad.”

Se er a 1920, el–Elder David O. McKay a mle ngara Chelechad er a Teruich me a terung el Apostol, a ulemuchel er a mo ta el rak el mo oldingel a ikel mision er a Ikelesia. Se er a May 1921, eng mle dechor er a kekerei el olkull el ngara Fagali’i, Samoa, el ungil kldmokl el debelir a retedei el mekekerei el rengalek, el ngalek el redil me a reteru el ngalek el sechal el ngelekir a Thomas me a Sarah Hilton. Tireka el mekerei el ngalek—el kot el klou a mle cheru a rekil—a mlad sera Thomas me a Sarah a mle mesiou el ngeasek el obekl el misionari er a 1800.

A uchei er a letobed er a Utah, ea Elder McKay a mle yaksok er a Sarah, el mla mo melakl el dil, el kmo ngmo oldingel a debelir a rengelekel er a Samoa eleng ngii a mle diak el sebechel el muut el mong. A Elder McKay a milluches el mo er ngii, “Tirka el tedei el mekekerei el rengelekem, e Sister Hilton, el ngara kelechakl … a meruul er a chetengakll el urelem er a mision el ulemuchel er a bekord el okedei el rak er a mla memong.” Ngii a dilechel a tekingel:

Tia el cheldecheduch a chimong er a chelsel a telael, dart el telael, el mesaod er a taem, el kmal mekreos er a rengud, me a klengar el mlo er a ringel er a ikal mla mlo merek el erul dart el rak el mo ouchais er a klemechel a Oltel. Se el urungulam el mo er a bek el beluu, rekauchad, tekoi, me a rechad a diak el boldibus e leng sioning er a rebetok er a 68,000 el rengeasek el sechal, me a redil, me a robekel el mesiou el cherrungel el misionari er a chelechal taem, me a rechedal a Ikelesia el omelekl er sel ongtil a Philip el mei e mesang, ⁶me a betok el miliol el udoud el mechoit el mo olngeseu er tia el ureor el meliuekl er a beluulechad.

Meng locha a ikal ongtid a diak el lorrim, e kede oureng me a rechad el bo el omelchesiu el mo omult a reng. Me tiang a mo, Ak kumerang a keldei el tekoi el ngii a usbechal: kot, beltik el reng er kau; ongerung, okesiu er kau; me a ongedei, usbechelem er a Babier er a Mormon.

Sel ongtid a diak el kirel ikel soal a rengul a chad; ng bai, kirel a olechotel a beltik el reng, el beltik el reng el “oriid a rokui el dakt.”⁷ Tiang el beltik el reng, el dodengelii el charity, el bliochel el beltkil a rengul a Kristo, a bo denguu sel dolengit er ngii. Kid a ongtiall, e mla medung el mo “meluluuch el mo er a Chedam lolab a rokui el klisichel a rengud, me [kid] bo demui er tia el beltik er reng.”⁸

Ousbech er tia el okesiu, e ak mo ouchais er a teletael el kirel a Sister Lanett Ho Ching, el mesiou el obengkel a bechil, er a President Francis Ho Ching, el oungerachel er a Samoa Apia Mision. A Sister Ho Ching a uluuchais:

“Ng betok el rak er a mla memong, ea kekerei el telungalek er kemam a millukl el mo kiei er a kekerei el blai el ngara Laie, Hawaii. Sel blil a mlai er a blimam a ki ble mrulii el mo kekerei el apartment, el sechal el ngklel a Jonathan a kiliei er ngii. A Jonathan a mle tonari er kemam er a tara basio. Ng uai a Rubak a ngilkemam el mo dmak, e aki mocha tibir el mo ouchais aikel kim moruul er ngii me a chedal a Ikelesia. A Jonathan a kmal mle soal tial klsechelei e mle soal obengterir a telungalek er kemam. Ng mle soal mesuub er a ebangkelio, eng di dimlak el soal el mo chad er a Ikelesia.

“Chelsel a taem, ea Jonathan a mlo er ngii a delibech el ngklel el ‘Okdemellam er a Jonathan’ el mlara rengelekam. Me sera telungalek er kemam lorael el mo klou, me a Jonathan a mlo semeriar el ngara ikel tekoi el ki moruul er a klengar er kemam. A ikel ongit er kemam el kirel a omilil, tansiobi, tekoi er a skuul, me a omilil er a Ikelesia el melemolm el mo er a ongdibel er a telungalek me a techolbechelid er a rengelekam.

“A tara klebesei e ak ngiluu a okedong er a dengua el mlara Jonathan. Nguluusbech a ngesou. Ng mle smecher el sukal e mlo er ngii a baiking er a ochil meng kirel mo metuk a ochil. A telungalek er kemam me a rebebil er a rechedal a ward a ulbengkel er tial taem el ngara ringel. Aki mle kaititechei el ngara osbitar, e milsang a klengeltengat er a priesthood. Me sera Jonathan a le ngara omekungil, ea rodos er a Relief Society a ngilsukemam el kudmeklii a blil. A rodam er a priesthood a rirelii a ramp el mora medal a tuangel er a blil me a okerdelel a chim er a olchelubel er ngii. Sera Jonathan er a le taiing el belrei, eng kmal mlo imis el ungil a rengul.

“A Jonathan a mocha omechelang el melai a osisechakl er a re misionari. Sel sandei er a uchei er a Beches el Rak, eng nguluu dengua el merngak e oker, ‘Komo mekerang er a sils el uchei er a Beches el Rak?’ Ak kulmeklatk er ngii el kirel sel omilil er kemam er a bek el rak. Eng ba, ngii a ulenger, ’Ng soak kemiu a omei e ra techolbechelid er ngak! Ng soak el omuchel er tial beches el rak el ungil.’ A uriul er a lluich el rak er a ’mei e mesang,’ ‘mei e molngeseu,’me a ’mei e mkiei,’ engika el ungil chad a mlo keldmokl el mo metecholb.”

Se er a 2018, er a ki mokedong el merredel er a mision e dmak el obekel el mo er a Samoa, ea Jonathan a merolang el mo mechitechut a bedengel. Aki ulengit er ngii me el di el mesisiich a rengul el di merkong sel luut er kemam. Ng di mle mesisiich el bekord el ta el rak, engdi a Rubak a milngedmokl er ngii el lmuut el mo remei. Ngii a mlad er sera April 2019. A rengelekek el redil a mlo er a kemeldilel a ‘Okdemelir er a Jonathan’ e milngitakl er sel osisiu el chelitakl el ki mulngitakl er ngii se el sils er a lemetecholb.”

Ak ochotii a ongerung el tekoi el ngii a mo sebechel ngosukii el ouchais a klemechel a Oltel el obang tia el ker: ngera sel rullii a ongtim el mo ungil mengesuseu el mo er a chad? Ng diak el kau, el okesiul a klengar er kau? Ng betok a mle rongesii e nguu a klmechel a Oltel a mle ngarngii a lesang er a chad er a ikelesia malechub a rechedal a Ikelesia er a Jesus Kristo. Ng locha sera ble lungil el mo er a rebebil, er a tekoi el mildung malechub eng dimlak el medung, e mle chemolt el chellelakl a le ngara metarchebesul el tekoi, malechub ea mederir a ungil.¹⁰

Ng locha ngidil ngerang, eng diak el sebeched el chemiis a klemerang el kmo ng kired el mo medengei e kiei el olab a osisecheklel a oltel a ebangkelio el mo er a bkul rebab el sebeched me a ongtid bo el ungil mengai. Tiang sel chelechal taem e kede medengelii el kmo sel kmal merang. A lsekum e kede obang a betlkil a rengul a Kristo, ea rebebil a mo medengei el kmo a beltkil a rengud el mo er tir a merang. Alsekum a llomes er a Chedaol el Deleb a ngera chelsed, ngii a mo mekerdii a Llomes er a Kirsto er a chelsir.¹¹ Kemiu a uchul a merang el ongit el mei e omelchesiu a deureng er a cherrungel el ebangkelio er a Jesus Kristo.

Se el ongedei el teletael el bo kuchotii a sel usbechel a dongu el mo omult el kmo a moktek er a Rubak el mer tial uriul klebesei er a ebangkelio, el Babier er a Mormon. Tiang sel mesisiich el olechotel sel okedongel a Joseph Smith e mesisiich el olechotel sel chedolel me a Okisel a Kodellel a Jesus Kristo. Sel omesodel er a moktek er a Chedam er a Babeluades el kirel a ngebetel a klengit a mesisiich el diak a mo uai ngii. Sel mouchais el kirel a Babier er a Mormon, e ke ouchais el kirel a Oltel.

Sera Jason Olsen a mle ngeasek el buik, e a rechedal a telungalek er ngii a mengelechel er ngii me a rebebil el omtok er tial el mo Kristiano. Ng mla er ngii a terung el kmal ungil sechelil, el mle chedal a Ikelesia er a Jesus Kristo er a Uriul-klebesei el Santo, me te mle blechoel mesaod a klechelid. A resechelil, er a Shea me a Dave, a mle ungil mesaod a mondai el rebebil a ulmetok er a Jason el kirel a klaumerang er a Jesus Kristo. Ma leuasiei, e te milsang a Babier er a Mormon, e milekoi el kmo, “Tiang el babier a mo onger a kerim. Aki olengit me bo monguiu er ngii.” Ng dimlak el sal soal engdi ngiluu tia el babier e otungii er a chelsel a til, e di mle ngara chelsel el mo melai a buil. Ng dimlak el soal mecherei er a blil ele telungalek er ngii a mo el mesang, e dimlak el soal rulii a rengul a Shea me a Dave el mo mekngit a lolutii. Ma leuaisei, eng tilbir el mo sosebii tia el babier.

A tara klebesei, eng beldoil er a laita ea tara chimal a beldoil er a Babier er a Mormon, ng mochu omtaut er ngau er tial babier e rirngesii a ngor e mlei er a uldesuel el kmo, “Lak msesebii tia el babilngek.” Ng kilbetiekl, meng mlo chelellakl. Meng, ngulmedasu el kmo tia kora di uldesuel el rongesii tial ngor, meng liluut el melasm el mo omkard er tial laita. Meng lmuut, el tia el ngor a mlei er a uldesuel: “Bo er a delmerab er kau e mchiuii tial babilngek.” A Jason a milcherei tia el laita, e milrael el mo er a delmerab er ngii, e mekengii a Babier er a Mormon, e mocha menguiu er ngii. Ng melemolem er a bek el sils, el mo mechututau. Me sera Jason el mei er a ulebongel eng miluluuch, ng milluches, “A bebul a bteluk el mo er a resel a ochik a mle mui er a Chedaol Reng. … Ak ulmelchesuar el mui er a llomes. … Tiang a meral kot ungil deureng el milruul el mera klengar er ngak.” Ng mlo metecholb ea uriul eng mlo misionari.

Meng locha sebechel medung el kmo a merang el beltik el reng me a bliochel el reng, a le betok, malechub eng telkib el betok, ea ongtid el mo ouchais er a klemchel a Oltel a sebechel el kotouar er ngii. Eng di bo mletkii tiang: a rokui el chad a sebecherir el nguu tia el ongit—“el rokui a di osisiu el mo er a Dios”;¹³a Rubak a oldeu er a rengul sel de blak a rengud, e diak ior er a mo duubech er uriul; sel diak el kengei er a ongit a diak el uchul a ulebengelel a deluill; e a lak el semeriar er a chelechal taem eng sechel mo ousemeriar er a ngarmedad el taem. Meng uaisei, ea beltkil a rengud a melemolem el osisiu.

me lak ede obes er a Oluut a mlo ngara ngii er a smiich el omeruul ma melenget. Tiang a mo tekoi er a ta er a klebesei. Ke de oldeu a rengud er a chelechang er a rechedel tial Oluut, ta er akot el klou el klaumedengei el kirel sel klisiich a lemuut el mo rongedeii a beluulechad me a babeluades.¹³ A President Gordon b. Hinckley a silodi tiang er rak er a mla memong, “Alsekum ng diak a ngera el mo tuobed er a klengit el reng me a ringel me ringelel a olutel sel rengedel a klisichel a chedaol el priesthood el mo rongedii a telungalek el mo er a ulebengelel, ng mle klou a utulel er sel ngii a rirelii.”¹⁴

Sel klou el yaksok er a Oltel a ngebetel a klengit a okiu a Jesus Kristo. A Okisel a Kodellel a Jesus Kristo a ungil meketeklii el kmo Ngii, e klemerang, a obang a klisiich el mo olsobel er tirkel tir a mei er Ngii—el mo olsobel er tir er a klengit el reng, diak el tabesul llemalt, ouchel el reng, klengit, me a kodall. Chelechal sils eng Palm Sandei, ea chelsel a ta el sandei eng Baskua. Kid a melatk, kid a blechoel el melatk, sera Kristo a lengara ringel me a kodall el mo melngakireng a kengtid, e kid a mo oldeu er sel kot el ungil el Sandei, el sils er a Rubak, el Ngii a milkiis er a kodall. Eleng uchul a Okisel a Kodellel a Jesus Kristo, ea Oltel a ngarngii a belkul, a klengar er kid a ngarngii a belkul, e sel mong ea klechad er kid a ngii a ngarngii a belkul.

A Joseph Smith, el kot el ngarbab el profet er a Oltel, a odersii a klaumerang el merkid el kirel a okisel a kodellel a Kirsto: “El ngii a ngar! El kid a milsang, dirrek el ngara klisichel a chimal a Dios.”¹⁵ Ak obang a ngariou el reng e mo dochelii a sioning el mo er a Joseph me a rokui el re apostol me a re profet er a uchei er ngii me a re apostol me a re profet el uliak kullel, el kmo a Jesus er a Nazareth a yaksok el Mesaia, el Ditang el Ngelekel a Dios el Sechal, e mlo mekiis er a kodall el Osobel el mo er a rokui el chad.

“Aki ouchais el kmo tirkel mo ngara nglunguuch e mesuub er a klemechel a Oltel e ultuil er a klaumerang a mo ngeltengat el mo nguu a sioning er tir el kirel a chedaol moktek er ngii el kirel a kedmeklel a beluulechad er sel telib Longeru Lemei a Rubak e Osobeled, el Jesus Kristo.”¹⁵ A Okisel a kodellel a Kristo a rulii a yaksok er Ngii el mo tmaut. El ngara a ngklel a Jesus Kristo, bol uaisei.