Kaukledem el Kudmeklii a Urerel a Dios
Sel kmal kiter el rolel el bo de kudmokl a chedaol el sebeched a mo dmak el oureor, mukngeltengat er a klisichel me a lemeltel a derderel a priesthood.
Alii e klebokel el odam me a rodos, ng kmal dmeu a renguk el obengkemiu. Ngara ngidi el basio el om ngar er ngii, ak odars a ulechull el mora rodos er ngak e oreked a chimorir a rodam er ngak. Kid a dmak el meruul a urerel a Dios.
Sel domtab er a Adam me a Eva, e kede blechoel kot el omdasu er sel ungil klengar tir er a Sers er a Eden. A kumdasu eng locha di mle blechoel lungil—a eanged diak sal mekeald me a ka el mekelekolt—me a betok el ungil rodech me a yasai el di delalm er bita er tir me te di menga er sel sorir el taem. Tial mle beches el beluulechad er tir a uchul, eng mle betok a loruul, le bek el sils er tir a di ungil le te teloi er a bek el bedengel a charm me a tial klebokel el basio lengarngii. Te dirrek el ngilai a llach el kirir loltirakl e mle kakerous a teletael lolab el mo oltirakl aika llach, el dirrek el mlo uchul a sebekreng me a rraureng.1 Eng di a lullilt el meruul a di mle mereko el ngodechii a klengar tir, me te milsuub el mo dmak loureor e mlo kaukledem e kudmeklii a moktek er a Dios el kirir—me a rokiu el Ngelekel.
Chelecha e ka momtab er tirka losisiu lobekel er a beluulechad. Ng kirir el moureor el kirel omengelir, ea bebil er a charm a ulesbech ertir el kelir, e mlarngii a ongarm el kirir lotekangel a bo lungil chadecheduch el kirel el dak el ngara nglunguuch. A ko er a di omdasu el kmo nglocha mlarngii a taem el blel kakerous a uldesuir el kirel a smecheklel aika longarm. Eng di, ngokiu a Rebet, e te mlo medengei el kmo ng klou a ultutelel le kaukledem e ngar beltikereng. Ngokiu chedaol ngesou lengilai, e te mlosisechakl el kirel a uldasu er a mo suobel me a osischeklel ebangkelio er a Jesus Kristo el rulii tial uldasu meng mo oureor. Tir el mlomedengei el kmo a moktek er tir er a beluulechad a diosisiu ngii me a diak a ulebengelel moktek er tir a uchul, e te mlo metik a klungiaol sel dak el loureor el ngara beltikereng me a llemalt.
Sera bocha lomechell er a rengalek, e a Adam me a Eva ulsisechakl er a telungalek er tir aikel bla lsuub er a roderuchel er babeluades. Ng mle blak a rengrir lolngeseu er a rengelkir el dirrek el momedengei a mo urrekodel osisechakl el rulterir el mo metik er a deureng er a klengar tir, e dirrek el kudmekelterir lmuut el mora roungalek er tir er babeluades ruriul er a lengai a duch er tir e lochotii a blekongesenges er tir el mo er a Dios. Osisiu el taem, e a Adam me a Eva a milsuub el mo mereng a saul er a kakerous el klisichir me a ngelseuil a ta me a tang er a chelsel a klou a belkul urerir.2
A rak me a rak el mlocheuekl, e a bleketakl lulekrael klaingeseu er a sechal me a redil a mledekedek er a cheleuid el tekoi me a diak el meral mui el klemedengei. Chelsel a delongelel sel meang el taem er a uchelel a Sers er a Eden me chelechang, e a cherarou a ko er a kmal mla mo mesisiich er a moktek er ngii lomii er a sechal me a redil e melasm el mengesuseu er kid. A Diablong a medengei el kmo omko ng tomelii sel kltalreng loba sechal me a redil, omko ng sebechel rullid el mo oumededenger er a chedaol blebeled me a ngercheled er a telbiled, eng mo mesisiich el toruud a telungalek, el ngii a kmal klou a ultutelel tebechedel a diak a ulebengelel klengar.
A Diablong ousbech er a omengaisisiu el dongu el rullid el mo omelchesiu el kmo ng techa ngarbab me a techa ngariou el chad, e omart er sel klemera el osisechakl el kmo a klekakerous er a sechal me a redil a mla er a Dios e di diul meklou a ultutelel. Ng mla melasm el loltuub aikel loruul a redil el mo er a telungalek me a buai, el mengkekerei a techellir el meruul a betok el ungil. A moktek er ngii a dimla melasm el meruul er a rechad el mo kaiberober a klisiich e bai diak loldeu osisiu lomeruul er a sechal me a redil lochotii a klaingeseu me a kltalreng er a delongelir.
Me a, cherengel a rak er a beluulechad el rokir, ea mui el klemedengei el kirel chedaol klaingeseu me a dirrek el kakerous el ngerchelel a sechal me a redil a mla remiid. A redil er a chelsel a betok el beluu a mla mo rullel a sechal e bai dikea lengara bita er ngii, me a loruul tekoi a dimerael ngomedang. A chedaol ulekeroul a di kekerei kung er a chelsel a meringel taem; e meral tekoi, ng kmal kekerei a chedaol llomes el ngara uldesuir me a rengrir el tir el seluk er a chelsel a uldelid el teletael er a omengedereder.
E sola llomes er a mloluut el ebangkelio a dumiang “er bebul a dichel a sils”3 el Dios el Chedam me a Ngelekel, er a Jesus Kristo, a dilum er a buik el Joseph Smith er a uchelel a 1820 er sel er sel chereomel er a beluu er a New York. Tial teletael a milchelii obdois el chedaol locholt er a babeluades. A tara mle kot el tekoi el moluut er a chelsel a Ikelesia er a Kristo a ngerachel er a priesthood er a Dios. A Oluut er a lolemolem el merael mei, e a sechal me a redil a mlo medengelii a klou el ultutelel a ledak el kaukledem e loureor, lorrurt e omtebechel er tial chedaol lureor lokiu Ngii.
Sera 1842, e tirkel redil er tial dirk dilubech el Ikelesia a mle sorir el mekdebechii a chelechad el mo olngeseu er tial ureor, me a President Joseph Smith a mlukrael el mo toketekii tial chelchad el ngara “loeak a priesthood loltirakl er a teletelel a priesthood.”4 Ng millekoi el kmo, “chelecha e a kuidir a kiis leko er kemiu el ngara ngklel a Dios …—e a tia uchelel a klebokel sils el merael mei.”5 Seikid el me er chelechang er a lemoluut tial kiis, e a omesuub, tekoi er a balatiks, me a techall er a kerruul kirir a redil a mla oberk er a beluulechad el rokir.6
Tial beches el chelechad er a redil er a Ikelesia, el mlokedongall el Relief Society, e dimlak el ua ikel bebil er a chelechad er a redil le ngii el mleketeket lokiu a profet luleba ngerachel er a priesthood el mesterir a redil a klisiich, chedaol ngerachel, me a deruchellir er a teketekel a Ikelesia, ng diak lileakl er ngii.7
Meng sera taem er a Profet Joseph Smith el me er chelechang, e a melemolem lolutel a rokui el tekoi a mla meskid a llomes el kirel a klou el ultutelel a ngerachel me a klisiich er a priesthood longeseu er a rsechal me a redil el kudmokl a chedaol ngerchelir. Kede dirk mlosisechakl el kmo a redil el moterekokl lokiu a chad loba kiis er a priesthood a oureor lultuil er a ngerachel er a priesthood er a ikel ngerchelir.8
Sera October 2019, e a President Russell M. Nelson a ulsisechakl el kmo a redil el mla mo er a templo a oba klisiich er a priesthood er a klengar tir me a rekeblirir sel sekum ete oltirakl a chedaol telbiil el bla ruul lobengkel a Dios.9 Ng silodii el kmo “ a babeluades a dirrek el kmal blok el bedul a redil el tir a mla nguu a klisiich er a Dios lokiu a telbiil er a priesthood el di uaia sechal loba priesthood. E milngelechel er a bek lodos el mo “ultuil er a klisichel Osobel el mo olngeseu a telungalek er kemiu be a rebetik er a rengmiu el chad.”10
Tia ngera belkul mo er kau me a ngak? Ng mekera klemedengei er a ngerachel me a klisichel a priesthood e ngodechii a klengar kid? A tara tekoi el bododengei a kmo sel sekum a redil me a sechal a dmak loureor eng klou a dekedmeklii er a bai di el kid el ta loureor.11 A ngercheled a tabesul e diak dekausichai. Ng uaisei el redil a diak lemoterekokl er a obis er a priesthood eng di uaia ikel mla medung ruchei, a redil a ngeltengat er a klisichel a priesthood sel loltirakl a telbilir, e oureor loba ngerachel er a priesthood sel lemoterekokl er a ngerchelir.
Ng mle tara sils er a Ongeai el Buil, eng mle techellek el dengchokl lobengkel a President Russell M. Nelson er sel luut lomekedechor ngii el mle blil a Joseph me a Emma Smith el ngara Harmony, Pennsylvania, el kmeed er sel basio el Aaronic Priesthood a mloluut er chelechal uriul klebesei. Sera ki mchadecheduch, e a President Nelson a milsaod el kirel a klou el ngechelir a redil er tial Oluut.
President Nelson: “A tara kot el klou a belkul tekoi el kmuklatk er ngii sel kmei er tial basio el Priesthood a Mloluut er ngii a sel klou el ngerchelir a redil er a chelsel Oluut.
“A Joseph er a lomuchel loleiuid er a Babier er a Mormon, eng techa mle melchesel? Oi, ng mle telkib el meluches, eng di dimlak el kemanget. A Emma mlo melchesel.
“Me ak mo omdasu er a Joseph er a le bo el oluluuch er a oreomel el kmeed er a blirir er a Palmyra, New York. Ng mlo er ker? Ng mlo er a Chedaol Oreomel. Ng mlo mekerang? Le tiaikid sel leborngii a Chedil sel soal meluluuch.
“Tirkaikid a teru el redil el mle klou a ngerchelir er a olutel a priesthood me a Olutel a Ikelesia. Ng klemerang, el sebeched el kmo a rebechid a kmal meklou a ultutelir er chelechang el di uai sel taem. Ng meral tekoi te meral uasiei.”
Me kede uaia Emma me a Lucy me a Joseph, el kmal mo ungil er a ngercheled sel blak a rengud el kasisechakl e dekaukledem er a moktek er kid el mo oltirakl er a Jesus Kristo e ngosuterir a rebebil er tial lomerael.
Kede mla mosisechakl el kmo a “a priesthood omekngeltengat a klengar er a rengelekel a Dios er a chelsel a betok el teletael. … A okedong er a [Ikelesia], chedaol ruoll er a templo, deleuill er a telungalek, me a dirrek, el odingel er a rechad, e a redil me a rsechal er a Uriul-klebesei el Santo a omakes el mo ruchei loba ngerachel me a klisiich er a priesthood. Tia el klausisbech er a sechal me a redil el mo mengedmokl er a urerel a Dios el okiu a Klisichel sei a kmal rengul a ebangkelio er a Jesus Kristo el mloluut el okiu a Profet Joseph Smith.”12
A kltalreng a klou a ultutelel er tial chedaol ureor el kid a mla mokedong el mo er ngii, eng di diak di lekiul duubech. Ngultuil er a blakereng me a taem el dedak loureor—e kaiuerenges, e kongei er a uldesuel a ta me a tang, e kauchais er a delongeled—e ng di tial teletael a ultuil er a chedaol uldasu. A doruul a ngercheled er a blid a lechub eng Ikelesia, e sel kot el bedochel el rael er sel chedaol blebeled a sel dedak loureor, e demukngeltengat er a klisichel a priesthood er Ngii er a klekakerous er a uldasu eng di ng ta rengud e meruul a ngercheled.
Tial tekoi er a kltalreng nguangera teletelel er a klengar er a redil er chelechal sils? Msall e kuchais er a okesiul.
A Alison me a John a mle kaukledem er a tokubets el teletael. Te dilak el ngara mekedeb me a mekemanget el klausichai er a rrat. Sel mo rokir tial klausichai, eng mle kirir el ta rengrir e dmak loureor. Ng kirel ta uldesuir er a osisiu el taem. Ng diak el sebechel a tang el mo mengedereder er a tang, eng di kirir el mo ungil chadecheduch er a kirel ngerchelir. A kabitei, el ngara mederir, a oked el kmo ng oingera e te burek e oingera e te mo dechor. Ngkel, ngaruriul, a kirel mo kerekikl lomes e kirel kldmokl el mo merengul melolk a lsekum e te ko er a mo ruriul a lechub eng mo telkib el soro a lsekum ete kuk kmal mo kmeed er a rebebil er a rechad. Ng kmal kirir el kaingeseu el mo ruchei e kudmeklii a moktek er tir.
A Alison a millekoi el kmo: “Sera kot, e ngkel kabitei sel du el kmo ‘Bom Dechor’ eng kiram el mo dechor e sel du el kmo ‘Burek’ eng kiram el stob el melolk. Di mle telkib el taem, ngkel chad loeak kuriul a mlo medengei a temel a kabitei sel du el kmo bom dechor a lechub e mburek, meng mlo diak a belkul lolekoi. Aki mlo meduch el lomes er a ta me a tang e mlo meduch lomes el kmo a tara chad ng mesikang me [ngkal] chimong a kuk mo blak a rengul. Ng kmal ultuil er a klaumerang me a dmak loureor.”13
A John me a Alison a dimlak di le kaukledem er a lololk a rrat er tir, te dirrek el mle kaukledem er a chebechielir. Te di diul losiik er a mo ungil er a tang e diak losiik er a mo ungil er tir; te di diul mesa klungiolel a tang e oureor lolcheuekl aikel ko er a diak el sal ungil er a ta me a tang. Te kausisbech lomekrael e kausisbech er a klaingeseu sel sekum a tang a ngara ringel. Te omes a klungiolel a loruul a tang e osiik a ungil nger er a ringel el tir a chelbangel sel lodekdak a duch er tir me a ikel ngarngii er tir. Te meral rrengodel er a ta me a tang lokiu a blekerdelel a Kristo er a beltikereng.
A mo mui lultuil er a chedaol teletael er a dmak loureor a klou a belkul er chelechal sils er a “ngak a kot” el tekoi el di iliuekl ku er kid. A redil a meral loba ngodech, el chedaol sengk14 e olab a tokubets el ngerachel, eng di aikang a diak el betok—a lechub el kesai—er a ikel meklou a belkul sengk me a ngerachel lolab a rsechal. Ng rokui mla mekedmokl e usbechall el mo mengedmokl er a chedaol urerel a Chedam er a Babeluades el mo mesterir a Rengelekel a kot el ungil techall el mo er sel chedaol el blebelel.
Chelechal sils, “e kid ousbech er a redil el tir a diak el medakt e sel osengel a Delad er a Eva”15 el mo dmak lobengterir a rodam e melai er a rechad el mo er a Kristo.16 A rsechal a kirir el meral mo kldemir e bai diak lomdasu el kmo ng kuk ileakl a ngerchelir a lechub e te kuk di “meruul a tekoi” e a redil loruul a betok el ureor. A redil a kirir el mo blak a rengir “lomakes el bedul uchei [e] nguu [sel] meral usbechellir er a ngerchelir”17 el kaukledem a bai diak lomdasu el kmo ng kmal kirir el di tir el tang loureor a lechub e te mengiil er sel mokedong el mo meruul.18
A osenged er a redil el meklou a ultutelir a diak di dolecholt er a klaisisiu ng bai klemedengei er kid er a klemerang el osisechakl. Ng bai diak di doruul a prokuram el kirel, kede bai mo blak a rengud el mengreos er a redil el uaia Dios: el meklou a ultutelir er tial ureor lolsobel me a kiei el mo cherechar.
Kede kldmokl? Me kede mo melasm locheuekl a diak el tabesul siukang e bai mo urrekodel a chedaol teletael me a omeruul lulsirs er a dodai er a osisechakl? A President Russell M. Nelson a siotai er kid el mo “kaiuereked chim er tial chedaol ureor … [el] mo kudmeklii a beluulechad el kirel Ongeru Lemei a Rubak.”19 Sel bo deuaisei, e kid a mesuub el mo mengull aike loruul a tang mea tang e choisisii a ungil teletael el mo kudmokl a chedaol ngecheled. Kede kmal mo melchesuar a klou el deureng.
A dersta er kid bodolilt el mo kaukledem er sel ulekrael teletelel a Rubak lolngeseu er a Urerel lomakes el bedul uchei. El ngara ngklel a betik er a rengud el Osobeled, el Jesus Kristo, amen.