Klengeltengat lokiu a Melemolem el Chedaol Ocholt el mo er a Reprofet me a Chedaol Ocholt el mo er a Dersta el Chad Lomekrael a Klengar Kid
A melemolem el chedaol locholt a mla mei e mei lokiu a teletael el Rubak a mla kudmeklii.
Chelechal sils ak mo mengedecheduch el kirel a melemolem chedaol ocholt el mo er a reprofet me a melemolem el chedaol ocholt el mo er a dersta el chad el mo omekrael a klengar kid.
Bebil er a taem e kede ngmai chedaol ocholt el diak dodengelii a moktek er a Rubak. Telkib el taem ruriul er a lemokedong a Elder Jeffrey R. Holland el mo Apostol er sera June er a 1994, e ak ngiluu a klebokel chedaol ocholt el kmo ngii a mo mokedong. A kuk mla er a tara ngerachel meng dimlak kudengei el kmo ngera uchul me a kulemdasu el uaisei. Eng di aki dilak loureor el ngeasek el misionari er a beluu er a England er a uchelel a 1960, e kmal mle dmolech a beltikereng er ngak el kirel. A kumes er tial teletael el kmal medechel er a renguk. Aikal mereko el rak, e ak mla melchedech el kmo a Rubak a mlengedmokl er ngak el mo oureor lobengkel Chelechad er a Teruich me a terung lobengkel a chad el ngii a mle kldemek er a ki mngeasek el misionari.1 Bebil er a taem e a kumeklatk er a rengeasek el misionari el mo bekokeuii el mo er tirkel dirk siliseb leng diak lodengei el kmo a tara klebesei e te mo oungerachel er tir.
A kuba mesisiich el klaumerang el kmo tial mla moluut el Ikelesia a ulekrael er a Osobel, el Jesus Kristo. Ngii a medengei el kmo ng techang a lokodongii el mo Apostol er Ngii e uangera blechebechel a lomekedong er tir. Ng dirrek el meduch el mengedmokl er a remeketeketa el Apostol er Ngii el mo profet e Merredel er a Ikelesia.
Kede ngeltengat er a tutau el rirngesii a betik er a rengud el profet, el President Russell M. Nelson, el ulechotii er a beluulechad a chetengakl el chisel a erul dart el rekil Olutel a cherrungel el ebangkelio er a Jesus Kristo.2 Tial klou a ultutelel chais lokiu a President Nelson a mla meketeklii el kmo a Ikelesia er a Jesus Kristo a urrekodel er a uchelel, me a chelechang, me a omerollel a ngarmedad lokiu osisechakl er a melemolem el chedaol ocholt. A beches el chais ochotii a cheldecheduch er a delongelel a Chedam el mo er a Rengelekel.
Sera uchelel, e a President Spencer W. Kimball a silodii sel ngii a kumelchesiu er ngii er chelechal sils. Ng dilu el kmo: “Aikel rokui el tekoi, el bo … doureng a saul el [kirel] a kmo a babeluades a dirk keblok e a mla moluut el ikelesia er a Jesus Kristo a dechor er a dodai er a chedaol ocholt. A melemolem el chedaol ocholt a ngii a meral telil a ebangkelio er a ngar el Rubak el Osobel, el Jesus Kristo.”3
A profet el Enoch a milsa tial sils el dekiei er ngii er chelechal taem. A Rubak a uluuchais er a Enoch er a klou el mekngit el mo duubech e ulemlaoch el kriel a “meklou el kerior” lemo duubech. Eng di, a Rubak a mle yaksok el kmo, “a rechedak a mo selbechakl.”4 “A llemalt er a babeluades a bo kutengelii; me a klemerang a mo oberk er a beluulechad, el mo ouchais el kirel a Chimol Ngelekek.”5
A President Ezra Taft Benson a mle mesisiich lolisechakl el kmo a Babier er a Mormon, el dodai er a klechelid er kid, a tilobed er a chutem el mo kudmokl a tekingel a Rubak el mo er a Enoch. A Chedam me a Ngalek me a reanghel me a reprofet el mlo duum er a Profet Joseph Smith a mle “moderuchel er a babeluades el mo oluut aikel meklou a belkul klisiich er a rengedel a Dios.”6
A Profet Joseph Smith a ngilai a betok el chedaol locholt. A bebil a mla medung er tia klou el ongdibel. Betok el chedaol locholt lengilai a Profet Joseph a mle kldmokl el medechel el kired er a chelsel a Doctrine and Covenants. Aikel rokui el chedaol llechukl er a Ikelesia a olab a uldesuel me a moktek er a Rubak el kired er chelechal lulebongel taem.7
Ongingil aika el meklou a belkul chedaol llechukl, e kede ngeltengat er a melemolem el chedaol locholt er a reprofet. A reprofet a “oderchelel a Rubak, e oba deruchall el mengedecheduch lomtechei er Ngii.”8
Bebil er a chedaol locholt a kmal meklou a belkul, e a bebil a choisois e dochel a klemedengei er kid el kirel a chedaol klemerang e meskid a ulekrael er chelechal sils.9
Kede meral mereng a saul er a chedaol locholt el mlo er a President Spencer W. Kimball el mlo sebechel a priesthood me a klengeltengat er a templo el mo er a rokui el klikiid el sechal chedal a Ikelesia er sera June 1978.10
Ak mla mesiou lobengterir a rebetok el chedal a Teruich me a terung el tir a mla risei el sils er a lemengai tial chedaol locholt. A dersta er tir, lokiu a cheldecheduch, a ulterkeklii a mesisiich el uldak el chedaol ulekrael el President Kimball me a tir a milchesuar. Betok er tir a dilu el kmo ng kmal mesisiich el chedaol locholt el bla lenguu ruchei a lechub uriul er sel taem.11
Kemam el ngara chelechad er a Teruich me a terung el Apostol er chelechal taem a kmal ngeltengat er chelechal taem el meklou a belkul chedaol locholt a mla mei lokiu a reprofet er chelechal taem.12 A President Russell M. Nelson a mla modurch er a Rubak tokuni ikel chedaol locholt lolngeseu a telungalek el toketek a klaumerang er a rekeblirir, mengideb er a berriid el Israel er a ikal eru el beluu, e omekngeltengat er a rechedal a ikelesia er a chedaol ruoll me a ureor er a chelsel a templo.
Aikel meklou a belkul ngeldechel a rekeblid er a lemuchais er sera October 2018 el klou el ongdibel, e a kuluuchais el kmo “uriul er a letobed a tekingel a Chelechad er a First Presidency me a Chelechad er a Teruich me a terung el Apostol er a templo, … e uriul er a profet a lolengit er a Rubak el kirel chedaol locholt … , e a mesisiich loterkeklel a mlengai er kemam el rokui.”13
Tiaikid el taem, e a bebil er a chedaol locholt el melutk el kirel a chedaol ruoll er a templo a mlengai eng dimlak el muchais a lechub el mutaut.14 Aikal ulekrael a ulemuchel lokiu chedaol ulochel a President Russell M. Nelson e a mesisiich loterkeklel a mlo er tirkel loungerachel loltaut. A President Nelson a dirrek el dilung el mo er a rodos loungerachel a chelechad er a Relief Society, Young Women, me a Primary. Sel ulebongel lulekrael tekoi, er a chelsel a templo, el mo er a First Presidency me a Chelechad er a Teruich me a terung el Apostol a kmal mle tokubets el mesisiich. Dersta er kemam a mlo medengei el kmo aki mla ngmai a uldesuel, soal, me a tekingel a Rubak.15
A kuba klemerang e ouchais el kmo a melemolem el chedaol locholt a mla mei e melemolem el mei lokiu a teletael el Rubak a mla kudmeklii. A kuuchais el kmo a beches el tekoi el President Nelson a uluuchais er chelechal tutau a chedaol locholt el mo omekngeltengat er a rokui el chad.
Aki Odersii Ongit el mo er a Rokui el Chad el Mei er a Mur er a Rubak
Aki dirrek lochotii sel kmal ngara rengmam el mo kaukledem lobengterir tirkel ngara ringel el kirel a klaumera er tir, rediak el mesisiich el chedal a ikelesia, a lechub a ngklir a mla mesuld er a rekord er a Ikelesia. Ng somam el mo teloi er kemiu er tial mur, “er a tekingel a Kristo,” er a tebelel a Rubak, e desuub aikel tekoi el kired el mo meruul rokui.16 Aki ousbech er kemiu! A Ikelesia ousbech er kemiu! A Rubak ousbech er kemiu! A nglungucham er a rengmam a kmo bom teloi er kemam el ngara omengull el mo er a Osobelel a beluulechad. Aki medengei el kmo a rebebil er kemiu a locha telord a rengrir, mes a diak lungil lomeruul, a lechub a bebil er a blekeradel el diak el blekerdelel a Kristo. Aki dirrek el medengei el kmo a rebebil a mla ngara ringel el kirel a klaumera er tir el diak a chad el mes, ka lodengei, a lechub el semechokl.
A rebebil er a kmal mesisiich e blak a rengrir el chedal a ikelesia a mla ngara ringel el kirel a klaumera er tir el telkib el kemanget el taem. Ng kmal soak a meral cheldechedechal a W. W. Phelps, el mlo ikrii a Ikelesia e ultutakl el kirel a Profet Joseph Smith er a blil a kerkeriil er a Missouri. Uriul er a ouchel reng, eng milluches el mo er a Joseph el kmo, “Ak medengelii ak seluk er a chelsel teletael, e a Dios meng medengelii, e soak el mo suobel omko resechelik a ngosukak.”17 A Joseph a ulsubes er ngii, e liluut el nguu el mo oureor, e milluches el kmo, “A resechelei er a uchelel a di sechelei el mo er a ulebongel.”18
Rodam me a rodos, ng diak el iior er a teletael el mngara chelsel, a kulengit me bo modengei el kmo a Ikelesia me a rechedal a kmal di mengemedaol er kemiu!
Chedaol Locholt el mo Omekrael a Klengar Kid
A chedaol locholt a ngarngii el mo er tirkel rokui el loba ngariou reng e osiik a ulekrael er a Rubak. Ng kmal klou a bekul el uaia ocholt er a ulaoch. A chedaol locholt, er a dersta el chad lokiu Chedaol Reng a ngarngii er a remiliol el mla metecholb el chad e moterekokl el chedal a Ikelesia er a Jesus Kristo er a Uriul-klebesei el Santo.
A chedaol locholt a ngaruchei el klengeltengat el mengai ruriul er a techolbechelid el kid a mla “mekikiid lokiu odbechel Chedaol Reng.”19 Ak dobedebekii a chedaol locholt el kngiluu er sera leteruich me a eim a rekik. A obekuk a ulsiik a ulekrael er a Rubak el kirel a nger ngii el mo er a demam, el dimlak el soal ngkal obekuk a lebo er a mision. Ak miluluuch el meral ngara renguk el mo nguu chedaol lolcholt el kirel a klemerang er a ebangkelio.
Ngerchelel a Chedaol Reng
A chedaol locholt a ultuil er a chedaol klemerang el mengai lokiu Chedaol Reng.20 A Chedaol Reng a ngii olecholt e ouchais el kirel a rokui el klemrang, tokuni a Osobeled. A lak a Chedaol Reng, eng diak el sebeched el meral mo medengei el kmo a Jesus a Kristo. Sel kmal ngerchelel a mo sioning el kirel a Chedam me a Ngalek me a Deruchellir me a Klebkellir.
A Chedaol Reng a sebechel sobecheklii a chad er a chelsel a mesisiich el teletael.21 Tial odbechel a diak di el blechoel ngara chad a lsekum eng diak bol metecholb e lenguu a sengk er a Chedaol Reng. A Chedaol Reng a mengikiid er a chelsel a teletael er a ouchel reng me a klausubes.
A Chedaol Reng a oureor er a chelsel a meang el teletael. A Rubak a ulusbech er tiakid el klebokel lomesodel el kmo:
“Ngii a mo ouchais er kid er a uldesued me a rengud lokiu a Chedaol Reng, el ngii e mei er kid e kiei er a chelsel a rengud.
“Chelecha, tiakid, a reng er a chedaol locholt.”22
Ng uaisei el odbechel a sebechel kmal mo mesisiich, eng di ng blechoel mei el chelellakl, e kekerei el ngor.23 A chedaol llechukl a uldimukl er ngii okesiu el kmo ng mekera Chedaol Reng a lemei er a uldesued, luldimukl a kellechakl el cheldecheduch er a uldesued,24 el sokedii a uldesued,25 e meklemesii a uldesued,26 e dirrek el ngor el ngar uldesued.27
A bebil er a osisechakl el kudmeklid el mo ngmai chedaol lolcholt a uldmukl er ngii a:
-
Meluluuch el kirel chedaol ulekrael. Ng kired el mo kellechakl e oba ngariou el reng e osiik e olengit28 e mo klou a rengud e bekongesenges.29
-
Mengetmokl el kirel a ulekrael. Tia kired el mo ultuil er a osischeklel a Rubak e oltirakl a Llechul.
-
Klikiid el melai er a sakrament. Sel bodeuaisei, e kede sioning e soiseb er a telbiil lobengkel a Dios el kmo kede mo oba ngklel a Ngelekel Sechal e mo melbedebek er Ngii e oltirakl a Llechul.
Aika el osisechakl a kudmeklid el mo nguu, mtebengar, e oltirakl er a odbechel me a ulekrael er a Chedaol Reng. Tia uldimukl er ngii “aikal tekoi er a budech … el ngii a meskid a deureng [me a] … diak a ulebengelel klengar.”30
A kedmekled el kirel chedaol tekoi a kmal mo klou sel deblechoel mesuub chedaol llechukl me a klemerang er a ebangkelio e dolbedebek er a uldesued a ulekrael dosiik. Eng di molatk el mo klou a rengum e moumerang er a temel a Rubak. A ulekrael a mei lokiu a mellomes a rengul Rubak sel sekum e Ngii a “soal lolisechakl er kid.”31
Chedaol Locholt er a Ngercheled me a Urered
A Chedaol Reng a dirrek el meskid chedaol locholt er a ngercheled me a urered. Aikel mla duubech el mei er ngak, e a klou chedaol lulekrael a blechoel mei sel dolasm lomekngeltengat er a rebebil el meruul a ngercheled.
Ak dobedebekii a taem el blek ngeasek el bisob e knguu okedong er a dengua er a robekel ruchei er a kngasech er a skoki el kirel a ngerchelek er a ureor. Ak mla ngara ongit el mo er a Rubak ruchei er a lemei me bo kudengei el uase ng mekera kulngeseu er tir. Ng mlocholt er ngak a teletelel tial mondai el mo medengei el uase ng mekera kuureor el kirel. Tial chedaol locholt a ngilsukak el mo kudmokl a chedaol ngerchelek er a urerek el bisob el diak el iior er a klungel a taem. A rebisob er a beluulechad el rokir a olab osisiu el teletael el uai ngak. Ngak el merredel er a stake, a diak di kngai a meklou a belkul chedaol locholt ak dirrek el ngmai a ocholt el mesmechokl aikel meklou a belkul tekoi el mo kudmeklii a moktek er a Rubak.
A kmal subedemiu el kmo a ulekrael er a chedaol locholt a sebechel mo er a dersta er kid sel doba ngariou el reng e doureor er a sersel a Rubak. Oumsingd er a ulekrael dengai a mei lokiu Chedaol Reng. Bebil er a taem er a kuk ngodech el moktek, eng melemalt el mei el ngara Rubak. A kuuchais el kmo tiang a kmal klemerang. A ulekrael el kirel, a cherrengelel a Ikelesia, a mo er a Merredel e profet er a Ikelesia.
Kemam, el Apostol er chelchal taem, a mla ngarngii a techellam loureor e omais a beluu lobengkel ngkal profet er kid er a, President Nelson. Ak di kodebengii a tekingel a Wilford Woodruff el millekoi el kirel a Profet Joseph Smith; e meral klemerang el mo er a President Nelson. Ak mla mes a “urerel a Chedaol Reng er a Dios er ngii, me a chedaol locholt er a Jesus Kristo el kirel otutel aika el chedaol locholt.”32
A ongtik er chelechal sils a kmo a dersta er kid bo losiik a melemolm el chedaol locholt el mo omekrael a klengar kid e doltirakl er a Chedaol Reng sel dongull er a Dios el Chedam el ngara ngklel a Osobel, el Jesus Kristo, el ngii ak sioning el kirel el ngara ngklel a Jesus Kristo, amen.