Ekkewe Iotekin Nuku

Ewe iotek seni Elter Maynes nepoputan ei aewin kinikinin mwichenapen mwichefen a ponu. Memef seni nang ra feito rech seni porous mi amwarar me kon mi murino. Ewe pwon an Preseten Russell M. Nelson pwe sisap monnukano ei mwichenap a fen poputan ne pwonueta.

Preseten Nelson a finata ei ier pwe epwe “ew fansoun apwapwan achechemen 200 ier seni ewe fansoun Kot ewe Sam me Noun Achengicheng, Jises Kraist, ra pwato ngeni Joseph Smith non ew nemasepwi.” Preseten Nelson a tingorei kich pwe sipwe fori pwisin ew kokkot ach sipwe monneta ngeni ei mwichenap mi auchea, minne achecheman a apasa pwe epwe “ew ekkesiwin me non uruon ewe Mwichefen, me ami kinikin mi namot.”¹

Usui chok, menin oua fen rongorong an porous me pwisin eis, “Non met sokkun napanap ai kinikin mi namot?” Menin ka anneani me iotek usun mwokutukutun ewe Niwinsefanito. Menin, nap seni akkom, ka anneani uruon ekkewe ekkoch fansoun nupwen Kot ewe Sam a pwarata Noun we Achengicheng. Menin ka anneani usun ekkewe fansoun nupwen ewe Chon Amanau a kapas ngeni ekkewe semirit noun Samach won Nang. Ngang mi sinei ua fori ekkena mettoch meinisin pwan och.

Ua kuna uwokisin non ai annea mi wewengeni ewe pristut an Kot me ewe sukun kinikinin fansoun. Ua tipetekison nupwen ua apareni pwe ai monneta ngeni ei mwichenap a ew ekkesiwin non pwisin ai uruo. Ua mefi ekkesiwin non netipei. Ua mefi minafon kinisou. Ua mefi uren pwapwa ren ewe tufichin ai ketiw ne fiti ei apwapwan ewe Niwinsefanito mi soposopono.

Pokiten ar tumunoch ne monneta, ua ekieki pwe ekkoch ra mefi watten pwapwa, watten apinukunuk, me watten tiniken ar repwe angang non met mi auchea me ren ewe Samon.

Ekkewe mettoch ra fis mi echipwer sia asamonur ir nepoputan ewe amwuchunon kinikinin fansoun mi nom non osini, non minne ewe Samon a ammonata An Mwichefen me Noun aramas, ekkewe mi uwei itan, ar repwe etiwa I. Ren kinikinin ach ammoneta ngeni An wareto, I epwe chunata emon me emon kich pwe sipwe tongeni ungeni ekkewe osukosuken pekin ngun me tufich sise kukuna me non uruon ei fonufan.

Non Septemper 1840, ewe Soufos Joseph Smth me noun chon aninis non ewe Aewin Presetensi ra pwarano ekei metoch: “Ewe angang an ewe Samol non ekei ranin sopwonon, ina ew watten me arapakan epwe nuseni ewe ekiekin nonmwuch. Ningan a weires ach sipwe anapanapa, me ese wor mettoch epwe nap seni ningan. Ina ewe itenap minne a amwasanga netipen soufos me mwan tupwon seni ewe forutan fonufan feitiw non ew me ew tappin fansoun tori ei fansoun iei; me ina ennetin ewe kinikinin unusochun fansoun, nupwen mettoch meinisin non Kraist Jises, ika non nang are won fonufan, repwe achufengen non I, me nupwen mettoch meinisin repwe niwinsefan, usun mi affat me ren soufos mi pin meinisin seni nepoputan fonufan; pun me non epwe fis amwararen pwonutan ekkewe pwon mi for ngeni ekkewe sam, nupwen pwanon ewe manamanen ewe mi Fokkun Tekia epwe fokkun watte, ning, me napanap.

Iwe ra apasa: “Auwa mefi chengen ne feinno me achufengeni ach pochokun fan iten keutan ewe Muu, me forata ewe Pristut non unusochur me ninger. Ewe angang minne epwe wesino non ekkewe ranin soponon ew mi fokkun watte auchean, me epwe auchea ewe pochokun, sinenap, me angangoch, me tufich an ekkewe Souneng, pun epwe soposopono fiti ena ning me pochokun mi aweweitiw me ren ewe soufos [Daniel] [nengeni Daniel 2:34–35, 44–45]; me epwe auchea an ekkewe Souneng nikitu ne ekiek, ar repwe awesi ekkei angang mi auchea me ning.”²

Chommong tichikin met sipwe fori me inet sipwe fori non fefeitan ewe Niwinsefanito resamo pwano. Nge ewe Aewin Presetensi pwan mwo non ranin nom ir mi sinei ukukun me anonnonun ewe angang ewe Samon a fen forata me mwach. Ikkei ekkoch awewe usun met kich mi sinei repwe fis:

Seni noun Souneng, ewe Samon epwe fang ewe niffangen An kapas allim “ngeni muu meinisin, einang, sokopaten kapas, me aramas.”³ Technology me manaman repwe soposopono ne wor wiser—usun emon me emon “chon attawa aramas”⁴ ewe mi iamwir ren manaman me napenon nuku.

Kich ew aramas sipwe kon atipeew non fansoun wattenon osukosuk. Sipwe chufengen non pekin ngun ren pochokunen mwicheich me famini mi uren ewe saramen ewe kapas allim.

Pwan mwo ew fonufan ewe nuku epwe esinna Ewe Mwichefenin Jises Kraist ren Aramas mi Pin non Fansoun Soponon me esinna ewe manamanen Kot me won. Chon kuno mi nukuchar me pwaracho resap nuokus, repwe tekison, me pwarano ne mwarei itan Christ non manauer iteiten ran.

Iwe, ifa usun, emon me emon kich mi tongeni aninis non ei sokkun angang mi auchea me ning? Preseten Nelson a aitikich ifa usun sipwe mamarita non pochokunen ngunuch. Nupwen sia etiwa aier ew tufich mi pwapwa pokiten ach nuku a marino pwe Jises i ewe Kraist, nupwen sia weweiti me nuku pwe Samach won Nang mi ausening ngeni ach iotek meinisin, nupwen sia achocho ne anneasochisi me manaueni ekkewe annuk, sia marita non ach manaman ne angei soposoponon pwarata. Ewe Ngun mi Fel mi tongeni epwe winiti chiechiach fansoun meinisin. Ew memefin saram a nom rech pwan mwo nupwen ewe fonufan mi rokopwanikicheno a rochono.

Joseph Smith I ew neenien appirun ifa usun sipwe marino non ena sokkun manamanen ngun. A pwar ngeni kich pwe iotekin nuku ina ewe kiien pwarata seni Kot. A iotek non nuku, ren an nuku pwe Kot ewe Sam epwe ponuweni an iotek. A iotek non nuku, ren an nuku pwe non chok Jises Kraist a tongeni ngaseno seni ewe niemam a mefi ren an tipis. Me a iotek non nuku, ren an nuku pwe mi auchea pwe epwe kutta ewe ennetin Mwichefenin Jises Kraist an epwe angei ena omusomusen tipis.

Non unusen an angangen soufos, Joseph Smith a aea iotekin nuku an epwe angei soposoponon pwarata. Nupwen sia ungeni osukosuken ikenai me ekkewe repwe feito, mi auchea sipwe pwan fori ena mwokutukut. Preseten Brigham Young a apasa, “Use pwan sinei ew aan ngeni ekkewe Aramas mi Pin non Fansoun Soponon nap seni ar repwe chok sopweno ne iotek ngeni Kot an epwe emweni me ourora noun aramas.”⁵

Ekkei kapas seni ewe iotekin sacramen repwe awewe napanapen manauach iteiten ran: “Chechemeni I fansoun meinisin.” “I,” a wewe ngeni Jises Kraist. Ekkewe kapas mwirin, “me fori an kewe annuk,” a ngeni kich met wewen ach sipwe chechemeni I.⁶ Ren ach chechemeni Jises Kraist fansoun meinisin, eni sipwe eis non iotek mosonoson, “Met I a mochen upwe fori?”

Ena sokkun iotek, a fis non nuku non Jises Kraist, a emwenato ei amuchunon kinikinin fansoun. Me epwe ina ewe auchean kinikin emon me emon kich sipwe fori non ei fefeita mi soposopono. Ua fen kuna, usun ka kuna, awewen sokkun iotek mi amwarar.

Aewin Joseph Smith. A tingor non napanapen an semirit nuku met ewe Samon a mochen i epwe fori. Ponuwan an iotek a siwini uruon fonufan.

Me rei, ew nesen mi auchea a feito seni an Joseph penuweni an Setan fiu ngeni nupwen Joseph a fotopuku ne iotek.

Ua sinei seni piwisin ai kaeo pwe Setan me noun chon angang ra sotuni ne fori ach sipwe mefi pwe sisap iotek. Nupwen Joseph Smith a amwuchu an pochokun ne iotek ngeni Kot an epwe angasa i seni ewe pochokun a sotuni ne foti i, an we iotekin ngaseno a ponu me Samach won Nang me Jises Kraist ra pwato.

An Setan sossot ne eppeti poputan ewe Niwinsefanito a nap pokiten an Joseph iotek a fokkun auchea. En me nang epwe wor wisach mi kukkun ach sipwe fori non ei Niwinsefanito mi soposopono. Nge ewe chon koum ngeni ewe Niwinsefanito epwe sotuni ne akouno kich seni ach sipwe iotek. Eu awewen an Joseph nuku me an tiniken mi tongeni apochokuna kich non ach achocho. Iei ew me nein chommong popun ai iotek mi pachenong kinisou ngeni Samach won Nang pokiten ewe Soufos Joseph.

Enos non ewe Puken Mormon pwan i emon neenien appiru ren ai iotekin nuku nupwen ua achocho ne fori wisei non ewe Niwinsefanito mi soposopono. Met chok oupwe wiseni, ami mi tongeni pwan fori pwe i epwe noumi chon ourour.

Usun Joseph, Enos a iotek non nuku. A awewei met a fis ngeni non ei napanap:

“Iwe nguni a echik; iwe ua fotopukutiw me mwen ai Chon For, iwe ua sio ngeni i non iotek mi pochokun me tingor ren tipetekison fan iten pwisin nguni; iwe unusen ewe ran ua sio ngeni i; ewer, iwe nupwen nepwin a feito ngang mi chok atekiata mongungui iwe a tori ekkewe nang.

“Iwe a feito ew mongungu ngeniei, a apasa: Enos, om kewe tipis a museno senuk, iwe kopwe feioch.

“Iwe ngang, Enos, ua sinei pwe Kot esap tongeni chofona; ina minne, ai tipis a tottonuno.

“Iwe ua apasa: Samon, ifa usun a fis?”

“Iwe a apasa ngeniei: Pokiten om nuku non Kraist, ewe kesamo rongorong usun akkom are kuna. Iwe chommong ier epwe no me mwen an epwe pwarano inisin non pekin aion; ina minne, feino, om nuku a enimenimochukeno.”⁷

Ewe nesen a fen efeiochuei a nom non ekkei kapas: “Pokiten om nuku non Kraist, ewe kesamo rongorongo usun akkom are kuna.”

A wor an Joseph nuku non Kraist an epwe no nein ekkewe ira me pwan an epwe iotek an epwe ngaseno seni pochokunen Setan. I esamo kuna ewe Sam me ewe Nau, nge a iotek non nuku fiti unusen pochokunen netipan.

Met a fis ngeni Enos a aitiei ewe pwan chok nesen mi auchea. Nupwen ua iotek fiti nuku, ai we Chon Amanau i chon peniei fiti ewe Sam me ua tongeni mefi pwe ai iotek ra tori nang. Ponuwan ra feito. Feioch ra ketiw. Mi wor kinamwe me pwapwa pwan mwo non fansoun weires.

Ua chechemeni nupwen, ai we keran emon minafo chon ewe Mwichen ekkewe Engon me Ruemon Aposel, ua fotopuku non iotek ren Elter David B. Haight. Ierin we a usun ieri ikenai, ren weires iei ua pwisin weri. Ua chechemeni neuwan nupwen a iotek. Use suki mesei ai upwe kuna, nge me rei ngingin usun ita mi emenimen. A kapas ngeni Samach won Nang ren pwapwa non neuwan.

Ua tongeni rong non ai ekiek usun an pwapwa nupwen a apasa, “Non iten Jises Kraist.” Me rei usun ita Elter Haight a mefi ewe Chon Amanau a affata non ena fansoun ewe porous i a ioteki ngeni ewe Sam. Me ua ennetin sinei epwe ketiw ren ew emenimen.

Ach tufichin fori ach aninis mi auchea ngeni ewe amwararen Niwinsefanito mi soposopono epwe napeno nupwen sia marita non ach nuku non Jises Kraist pwe I ach Chon Amanau me Samach won Nang pwe I Samach mi tong. Nupwen sia iotek non nuku, sipwe ew auchean pekin an ewe Samon angang nupwen A ammonata ewe fonufan ngeni an Noun we Aruwen Wareto. Ua iotek pwe kich meinisin sipwe kuna pwapwa non ach fori ewe angang I a tingor emon me emon kich sipwe fori.

Ua pwarata pwe Jises kraist mi manau. Iei An Mwichefen me muu won fonufan. Joseph Smith I ewe soufosun ewe Niwinsefanito. Preseten Russell M. Nelson I noun ewe Samon soufos won fonufan ikenai. I a amwochu ekkewe kiien ewe pristut meinisin non Ewe Mwichefenin Jises Kraist ren Aramas mi Pin non Fansoun Soponon. Non iten Jises Kraist, amen.