Ewe Manamanen ewe Puken Mormon ren Ekesiwin

Mwirin ai katon echo repotun ai chek ren nei tokter, ua kaeo pwe mi namwot ai upwe siwini ekkoch mettoch non manauei. Ren an epwe anisiei, nei toktor a ngeniei eu kokotun mongo me taiso, minne, ika ua aponuweta, epwe siwiniei ngeni emon aramas mi pochokun.

Ika sia angei chek non pekin ngun, met sipwe kaeo usuch? Met nouch tokter non pekin ngun epwe mochen sipwe siwini? Ren ach sipwe winiti met mi namwot, mi namwot ach sipwe sinei met sipwe fori me sipwe fori met sia sinei.

Jises Kraist I ewe Tokter mi Angoch.¹ Ren An Achasefan, A finiti ach kewe kinas, A wata won inisin ach apwangapwang, me A aururu ach netipeta.² Ren An chen ach apwangapwang epwe pochokun.³ A tingorei kich ach sipwe tapweno mwirin I⁴ ren ach kaeo usun I, ausening ngeni An kapas, me fetan non tipetekisonun Ngunun.⁵ A pwon An epwe anisikich⁶ non ei angangen ekesiwin non unusen manauach, minne a siwinikich me a esenipato pwapwa ese much.⁷

Ewe Chon Amanau a ngenikich ewe Puken Mormon pwe eu pisekin angang mi pochokun an epwe anisikich ren ach ekesiwin. Ewe Puken Mormon a ngeni kich mongo non pekin ngun, a ngeni kich eu kokkot, me a ochufengenikich ren ewe Ngun mi Fel. A mak fanitach,⁸ a masoweni ewe kapasen Kot mi fatafatoch⁹ me a aitikich ion kich, ach popun, me met sipwe winiti.¹⁰ Ren ewe Paipen, ewe Puken Mormon a pwarata usun Jises Kraist¹¹ me a aitikich ifa usun sipwe sinei ennet me winiti usun chok I.

Sasing

Brother Saw Polo

Brother Saw Polo a 58 ierin nupwen a kaeo usun ewe kapas allimen Jises Kraist. Nupwen ua churi i, a fen wiseni wisen presetenin pranch ren chommong ier, nge ua kaeo pwe ese mwo anneani ewe Puken Mormon pokiten ese mwo chiaku non kapasen Burmese. Nupwen ua eis ifa usun a sinei pwe ewe puk mi ennet ika ese mwo anneani, a ponuweni pwe a fen katton ewe puken sasing ren ekkewe Tutunapen ewe Puken Mormon iteitan ran, me a aea eu puken awewe an epwe weweiti ekkewe kapasen Merika, me a makei met a kaeo. A awewei, “Iteiten fansoun ua anneani, ua iotek usun met ua kaeo, me ua mefi kinamwe me pwapwa, ai ekiek mi fat, me netipei mi pwetete. Ua mefi ewe Ngun mi Fel a pwar ngeniei pwe mi ennet. Ua sinei pwe ewe Puken Mormon mi ewe kapasen Kot.”

Usun Brother Saw Polo, kich mi tongeni kaeo ewe Puken Mormon anongonong won nonnomuch. Nupwen sia mochen nuku me ekieki asukunan non netipach, sia tongeni tingorei Kot non nuku ika ekkewe asukun mi ennet.¹² Ika sia ennet non ach mochen sinei me mochen foffor, I epwe ponuweni kich me non netipach me ren ewe Ngun mi Fel. Iwe me ren manamanen ewe Ngun mi Fel oupwe sinei ennetin mettoch meinisin.¹³ Nupwen sia angei ennetin pwarata usun ewe Puken Mormon, sipwe pwan sinei seni ena manaman pwe Jises Kraist I ewe Chon Amanauen ewe fonufan, pwe Joseph Smith I Noun soufos, me ewe Mwichefenin Jises Kraist ren Aramas mi Pin non Fansoun Soponon An Mwichefen mi niwinsefan.¹⁴

Nekukuni nupwen ua poputani ai angangen misineri, ua fiti efoch sepenin ngeni Australia. Ua mefi anemon, nuokus, me pwe use naf nge ua fen pwon pwe upwe fori ei angang, mi namwot ai upwe angei pwarata pwe met ua nuku mi ennet. Ua iotek me ennetin anneani nei kewe pukfel, nge won ewe sepenin, ai tipemwaramwar a watteno me ua mefi apwangapwang. Mwirin ua riaffou ren fitu aua, emon chon angang won ewe sepenin a feito nein ekkewe sea me a kouno unukun ai we sea. A angei seniei ewe Puken Mormon ua anneani. A nenengeni ewe puk me a apasa, “Ena puk mi fokkun murrino!” iwe a aniwinato ewe puk me a feino seniei. Use kuna i sefan.

Nupwen ua chok ekieki usun an kapas, ua rong me mefi non ngasangasei, “Ngang iei, me ua sinei en ia. Fori ukukun met ka tongeni, pun upwe fori nusun.” Won ewe sepenin asan seni ewe Pacific Ocean, ua angei pwarata seni ai anneani ewe Puken Mormon me memef seni ewe Ngun mi Fel pwe ai Samon a sinei ian ua nomw ia me pwe ewe kapas allim mi ennet.

Elter David A. Bednar a afanafan: “Ach sinei pwe ewe kapas allim mi ennet ena ewe nongonongen ach kapasen pwarata. Ach tupwen ngeni ewe kapas allim ina ewe nongonongen ekkesiwin.”¹⁵ Ren ach sipwe ekesiwin mi namwot sisap “chok ausening ngeni an kapas, nge sipwe aponueta non ach foffor.”¹⁶ An ewe Samon kokkot fan itach—ewe nongonongen Kraist—mi fatafatoch non ewe Puken Mormon.¹⁷ Mi pachenong:

• Aewin, angangennuku non Jises Kraist ren ach nuku non I, aponuweta an kewe annuk, me sinei pwe Epwe anisikich.¹⁸

• Oruan, aieriteitan ran ren ami kewe nipwakingau me mefi pwapwa me kinamwei nupwen A omusano tipisich.¹⁹ Ren ach sipwe aier mi namwot sipwe omusa ekkoch²⁰me a anisikich ach sipwe soposopweno. Ewe Chon Amanau a fen pwon an epwe omusa kicheno nupwen sia aier.²¹

• Eunungatin, ach fori me aponuweta pwon mi pin ren Kot ren angang mi pin usun papatais. Ei epwe anisikich ach sipwe nonnom won ewe anen pwon mi emwenikich ngeni I.²²

• Aruwanun, angeiewe niffangen ewe Ngun mi Fel. Ei niffang a otufichikich ach sipwe chiechi ngeni ewe emon a epinano, aruru, me emwenikich.²³

• Enimuen, nikitutori nesoponon ren ach soposopweno ne kamatipiteiten ran won ewe kapasen Kraist.²⁴ Ach kamatip won ewe Puken Mormon me aponuweta met a aitikich, sia tongeni poracho ngeni ekkewe sossot me angei emwen me tumun unusen manauach.²⁵

Ren ach manaueni ekkewe nongonongen Kraist non manauach, sipwe poracho ngeni met a epetikich ach sipwe siwin me nuokus a akouno ach fori mettoch. Sipwe angei pwisin pwarata, ren ewe Ngun mi Fel “epwe pwarngenikich mettoch meinisin met oupwe fori,”²⁶ me “ekkewe kapasen Kraist repwe erenikemimettoch meinisin met oupwe fori.”²⁷

Ukukun 20 ier, Brother Huang Juncong a riaffou ren an sou angei sakau, supwa, me penei. Nupwen a kaeo usun Jises Kraist me An kapas allim mi niwinsefan, Brother Huang a mochen siwin fan iten noun famini mi kukun. A ennetin osukosuk ren supwa. A soun chok uun supwa, a achocho fan chommong an epwe kouno. Eu ran ekkei kapas seni ewe Puken Mormon a nonnom non mokuran: “ren ennetin netip, ren ennetin popun.”²⁸ Ina mwo pwe ese tongeni kouno me nom, a mefi pwe epwe tufichin siwin ren aninis seni Semach won Nang me Jises Kraist.

Ekkewe misineri ra chufengen ren ar nuku me fori ei kokot ne anisi i an epwe kouno, pwan fiti an ennetin iotek me anneani ewe kapasen Kot. Ren ennetin netip me ennetin popun, Brother Huang a angang ren an tiniken fiti nuku me a kaeo pwe nupwen a sou fori mettoch minafo minne a mochen poputa ne fori, usun an anneani ewe Puken Mormon, ese ekieki usun ekkewe mettoch a mochen kouno ne fori.

Ren an chechemeni met a fis ngeni i 15 ier me nom, a apasa, “Use chechemeni inet ua kouno ne uun supwa, nge nupwen ua ennetin achocho iteiten ran ai epwe fori mettoch ua sinei mi namwot ai upwe fori pwe Ngunun ewe Samon epwe nom non manauei me sopweno ne foriir, use chuwen mon supwa seni ena fansoun tori ikenai.” Ren an aponuweta ekkewe nongonongen ewe Puken Mormon, manauan Brother Huang a siwin, me a winiti emon sam me chon pupunu mi murrino.

Sasing

Huang Juncong me famini

President Russell M. Nelson a pwon: “Nupwen oua anneani ewe Puken Mormon fiti iotek iteitan ran,oupwe finata mettoch mi murrino—iteitan ran. Ua pwon pwe nupwen oua ekieki usun met oua kaeo, ekkewe asamen nang epwe suk, me oupwe angei ponuwen ami kapas eis me emwen fan iten manauemi. Ua pwon pwe nupwen oua anneani ewe Puken Mormon iteiten ran, oupwe tongeni angei pochokun seni ekkewe osukosuken ei fansoun, pwan mwo ewe feingauen sasing mi ngau me pwan ekkoch aramas mi sou angei mi ngau.”²⁹

Chienei mi acheingicheing, ewe Puken Mormon ena ewe kapasen Kot, me sipwe arap ngeni I ika sipwe anneani.³⁰ Nupwen sipwe sotuni kapasan,³⁰sipwe angei pwarata pwe mi ennet. Nupwen sia manaueni met a aitikich, sisap chuwen “mochen fori mettoch mi ngau.”³² Netipach, mesach, me napanapach epwe siwin pwe epwe winiti usun ewe Chon Amanau.³³ Ua pwarata ai kapasen pwarata pwe Jises i ewe Kraist, ach Chon Amanau, Chon Angasano, me Chienach. Non iten Jises Kraist, amen.