Ew Nongonongoch fanasengesin ewe Fansoun epwe Wareto

Sipwe niwin sefaniti ew neonowas mi pwichikar non July 24, 1847, arap ngeni kunok 2:00 nekunion. Mwirin ew 111-ranin sai mi apekus fiti 148 chon ewe Mwichefen ra forata ewe aewin mwich repwe no notou, Brigham Young, I presetenin ewe Mwichen Engon me Ruemon Aposel, a semwen me apwangapwang seni paiking, ra tikeri Nemonun Chukun Salt Lake.

Ru ran mwirin, nupwen mi chiwen akachocho seni an semwen, Brigham Young a emweni ekkoch chon ewe Mwichen ewe Engon me Ruemon Aposel me pwan ekkoch won ew sai ne katon ewe neni. William Clayton a rokotini: “Ina epwe ekis ngeni ew mwain ennefenin ewe camp, aua tori ew neni mi ning, sonosonoch me panochutiw ngeni notou.”¹

Sasing

Nemonun ewe Brigham Young tempel

Sasing

Brigham Young a esisina nenien ewe tempel

Sasing

Esisina nenien ewe tempel

Nupwen Ii me an we mwich ra attonaochu ewe neni, Brigham Young a mwitir kouno me puretiw wokun we non ewe puun, me apasa, “Ikei epwe uta ewe Tempel an Kot.” Emon me nein chienan kewe I Elter Wilford Woodruff, ewe a apasa, “a pwereni [I] usun inefi,” me a fotukatiw efoch panen ira non ewe puun pwe epwe esisina ewe neni a fis me ren wokun Preseten Young we. Faik ukukun watten fonu ra finnita fan iten ewe tempel, me a kapunguno pwe ewe sopw epwe foruno an epwe “weneno ngeni Ennefen &Eor, otiw &notou” me ewe tempel epwe nom nukanapan.²

Atun mwichenapen mwichefen non April 1851, chon ewe Mwichefen ra utut monomon ar repwe etiwa ew ourour ne aueta ewe tempel “ngeni iten ewe Samon.”³ Ru ier mwirin, non February 14, 1853, ewe neni a epinipinino me ren Heber C. Kimball non ew apwapwa fite ngerou Souneng mi fiti, me ewe puun a kata ren nongonongen ewe Salt Lake Tempel. Ekkoch maram mwirin, non April 6, ekkewe watten foun nongonongen ewe tempel ra forutiw me epinipinino fiti apwapwa mi tettenoch mi pachenong sou mas me mwichen kon me ew maas me emwen me ren souemwenin Mwichefen seni ewe tabernacle minen nom ngeni ewe nenien tempel, ikewe afanafan me Iotek ra fis ren ew me ew ekkewe ruanu foun nongonong.⁴

Sasing

Nongonongen ewe Salt Lake Tempel

Sasing

Brigham Young

Ren ewe apwapwan kaatan ewe puun, Preseten Young a achema pwe a kuna ew nemasepwi nupwen an keran ipwetiw won ewe puun fansoun ar attonaochu ewe nemonun chuk, a apasa, “Ua sinei [non ena atun], usun chok ua sinei iei, pwe iei ewe puun minne epwe for ew tempel won—a fis me mwei.”⁵

Engon ier mwirin, Brigham Young a apasa an kapasen osini non mwichenapen mwichefen non October 1863: “Ua mochen kuna [ewe] tempel epwe foruta non ew napanap an epwe nukuchar non unusen ewe minenium. Esap iei chok ewe tempel sipwe aueta; epwe fite puku repwe kauta me epinipinino ngeni ewe Samon. Ei tempel epwe affateno pwe ina ewe aewin tempel a kauta won ekkewe chuk me ren Aramas mi Pin non Fansoun Soponon. … Ua mochen ena tempel … epwe uta pwe ew achechemen nuku kich mi sikaseni, tinikeni me angangen ekkewe sounengin Kot non ekkewe chuk.”⁶

Sasing

Forun ewe Salt Lake Tempel

Sasing

Forun ewe Salt Lake Tempel

Ai attona sefani ei kukkun uruo, ua mwar ren Brigham Young ren an osini—aewin, a tumunuochu pwe, ren an epwe tufich me, aea pisekin kau mi kawor non ena fansoun me neni, ewe Salt Lake Tempel epwe kauta non ew napanap an epwe nukuchar non unusen ewe Minenium me, aruwan, an osini usun napenon chommong tempel non fonufan, epwe fen tori fite puku.

Usun Brigham Young, nouch kewe soufos ikenai ra tumunu ewe Salt Lake Tempel me pwan ekkewe ekkoch non tumunoch. Non ekkewe ier, ewe Aewin Presetensi a fen—soun fofori—ar ouroura ewe Mwichen Pisop ar repwe tumunu pwe ewe nongonongen ewe Salt Lake Tempel mi pochokun. Nupwen ua angang non ewe Mwichen Pisop, ren an ewe Aewin Presetensi tingor, aua chekiochu unusen ewe Salt Lake Tempel, mi pachenong ew checkin an epwe foroch kokkotun me napanapen kautan seni chechen fonu.

Iei ekkoch nein ewe chekiochu mi pwarata ngeni ewe Aewin presetensi non ena fansoun: “Non ewe kokkot me kautan ewe Salt Lake Tempel, ekkewe pekin kau mi murino, sinenap non angang, pisekin kau, offoutan me me ekkoch pisek mi wor non ena fansoun ra aea. Seni fansoun an we epinipinino non 1893, ewe tempel a uta pochokun me a ew saramen nuku [me] apinukunuk me ew saram ngeni ekkewe aramas. Tumunochun a fen fis an epwe anganga, nimeti, me fori ewe tempel an epwe nonnomoch. Ewe fauun nukun me uran simenin kewe non me uran asan ir mi chiwen nonnomoch. Stati ra keran fis ra apungano pwe nenian we tempel Brigham Young a finata a men och puunun me mi echipwer ngutun ewe puun.”⁷

Chekin ewe tempel a apungano pwe mi auchea forsefanin me aochuenon pwe epwe minafo sefan ewe tempel, mi pachenong ekkewe teek non me nukun kewe, ekkewe senin fifi rese chiwen och, ewe nenien papatais. Nge, a pwan wor ekiekin, pwan ew unusen siwin epwe for an epwe ochuno eppetin chechin fonu epwe poputan seni nongonongen ewe tempel feita asan.

Ika oupwe chemeni, Preseten Brigham Young pwisin mi fitiochu kautan ewe aewin nongonongen ewe tempel, minne a och ngeni ewe tempel seni wesinon we 127 ier a no. Ewe minafon siwin an epwe ochuno eppetin chechin fonu fan iten ewe tempel epwe atufichi ew mwokutukut an epwe eimueno nongonongun we, minne ese tufich ar repwe ekiekieta non fansoun kautan we. Ei a affat pwe ina ewe minafon angangen eppetin chechin fonu mi kon murino.

Sasing

Kokotun forsefanin tempel

Sasing

Kokotun forsefanin tempel

Ei technology, a keran chok fis, a poputa ren nongonongun ewe tempel, a awora ew eppet mi pochokun takisin chechin fonu. Ren auchean, forun a apochokuna ewe tempel an epwe uta nukuchar, pwan nupwen fonufan me ewe neni unukun a tori fansoun chechin fonu.

Ewe forsefanin ewe tempel epwe aea ei technology a affat me ren ewe Aewin Presetensi non ewe ier a no. Fan emwenien ewe Mwichen Pisop, angangen kauuta a poputa non ekkewe maram a no, non January 2020. A aukuk pwe epwe wesino non ruanu ier.

Nupwen ua ekiek usun ekkei ruanu ierin ei Salt Lake Tempel mi ning, sufon, tekia, me amwarar, ua aneanei pwe ew fansoun minafo sefan nap seni ew fansoun kesip! Usun chok ena, sipwe eisini kich pwisin, “Ifa usun ei watten forsefanin ewe Salt Lake Tempel a tongeni ouroura kich ach sipwe pwisin weri ach forsefan, kauusefan, upusefan, manausefan, ika niwinsefanito non pekin ngun?”

Ach attonaochu epwe pwarano pwe kich pwan me ach famini sipwe tufich seni angangen tumun me forsefan, pwan mwo ew forun eppetin chechin fonu! Menin sipwe poputani ena tetten ren ach eis:

“Ifa usun nikinikin ai nongonong?”

“Met a forata ekkewe tit mi manun, nukuchar, pochokun ren ekkewe foun nongonong ir kinikinin ai nongonong, minne ai kapasen pwarata a foruta won?”

“Met pekin nongonongen nguni me napanapen ai memef epwe mut ngeniei me ai famini aupwe pochokun me tipepos, pwe aupwe ungeni fansoun chechin fonu me chopunap ekkewe repwe ennetin fis non manauach?”

Ekkei mettoch, usun chechin fonu ra weires ach sipwe sinei inet repwe fis me ra wareto non sokopaten kinikin pochokuner—riaffou ren kapaseis ika tipemwaramwar, weri riaffou ika osukosuk, achocho ne awesi tipengaw ren souemwenin Mwichefen, chon mwichefen, nongonong, ika annuk. Ewe eppet mi murino ne ungeni ekkei a nom non nongonongen ngunuch.

Epwe met ewe foun nongonongen ngunun manauach me manauen ach famini? Meni epwe fen manauen nongonongen ewe kapas allim mi mecheres, fatafatoch, me auchea—iotekin famini; kaeo pukefel pwan ewe Puken Mormon; fiti tempel; me kaeo ewe kapas allim seni Feito, Tapweto Mwiri me pwinin famini. Ekkoch pwan pisekin aninis epwe apochokuna ami nongonongen ngun epwe pachenong Ekkewe Nongonongen Achifoua, ewe an famini Esinesin, me “Ewe Kraist mi Manau.”

Me rei, ekkewe nongonong mi pachenong ekkewe kapaseis kich mi porous usun pwe pekin ach angei echo toropwen mumutan non tempel repwe fis pwe ew popun nongonongen ngun—akkaewin ekkewe akkom ruanu kapaseis. Ua kuner pwe ir foun nongonongen ngun.

Kich, ennetin, mi sineochu ekkei kapaseis, pokiten Preseten Russell M. Nelson a anneani ngeni kich ew me ew non ewe mwichenapen mwichefen a no.

1. A wor om nuku non me a wor om kapasen pwäratä usun Kot ewe Sam mi Napanap; Noun we At, Jises Kraist; me ewe Ngun mi Fel?

   Sasing

   Unumon Chon Kot

2. A wor om kapasen pwäratä usun ewe Achasefan an Jises Kraist me usun Wisan pwe I ach Chon Amanau me Chon Angasano?

   Sasing

   Ewe Achasefan an Jises Kraist

3. A wor om kapasen pwäratä usun ewe Niwinsefaniton ewe kapas allimen Jises Kraist?

   Sasing

   Ewe Aniwinsefanito

4. En mi etiwa ewe Presetenin Ewe Mwichefenin Jises Kraist ren Aramas mi Pin non Fansoun Soponon pwe i ewe soufos, chon osini, me chon pwäratä me i ewe emon chok aramas won fonufan a mwumwuta ne anganga meinisin ekkewe kien pristut?⁸

   Sasing

   soufos

En mi tongeni kuna ifa usun kopwe ekieki ekkei kapaseis pwe ir mi auchea non om pwisin nongonong ar repwe anisuk ne aueta me apochokuna? Paul a aiti ekkewe chon Ephesus usun ew mwichefen minne a kouta won ewe nongonongen ekkewe aposel me soufos, Jises Kraist pwisin I ewe foun nongonong; I ewe a amwochu fengeni unusen ewe imw epwe marino non ew tempel mi pin non ewe Samon.”⁹

Sasing

Ewe nongonongen ewe tempel mi pochokun

Ew ekkewe watte pwapwa non manauei ina ai chiechi ngeni me ourour me ren chon ewe Mwichefen non unusen ewe fonufan ekkewe ir mi manau ren ar neenien appiru non Jises Kraist me An kapas allim. Mi wor ar nongonong mi pochokun ewe a mut ngenir ar repwe ungeni fansoun chech ren ar weweiti, inamwo pwe ra netipengau me metek.

Ai upwe affataochu an epwe wewe ngenikich, ua keran kapas atun soman emon fefin, mi pupunu me iin mi nioch, me pochokun (pwan emon chienen am famini). I emon chon pnei non ew tekian kinikinin saker nupwen a churi me punuweni noun we tokterin ngi. Ra feioch ren emon nengin mi nioch, me auchea. A nikitu ne fiu ngeni sokopaten cancer non wonu weiresin ier. Inamo ika mi chok wor weiresin memef me inis I mi chok memefi, I a nuku non an Seman won Nang me aramas ra soun apasa an kapas mi itefouno mi apasa: “Kot mi nom non tichikin.”

Won an we social media, a makkei pwe emon a eisini, “Ifa usun mi chiwen wor om nuku nupwen netipechou a pwennukeno?” A pochokun ne ponuweni ren ekkei kapas:: “Pokiten nuku ina met a anisiei non ekkei fansoun rochopwak. An wor ai nuku esap wewen pwe esap wor mettoch mi ngaw epwe fis. An wor ai nuku a mut ngeniei ne nuku pwe epwe pwan wor saram sefan. Me ena saram epwe fen tinemwong pokiten ua fen fetan non ewe rochopwak. Inamo ua fen kuna chommong rochopwak ua fen kuna non ekkewe ier, a fen nap saram ua kuna. Ua fen kuna manaman. Ua fen mefi chon nang. Ua fen sinei pwe Semei won Nang a ekiei. Usap mefi ew me nein ekkei mettoch ika manau mi mecheres. Non ranin mwach esap fatoch, nge ai nuku mi fatoch. Ika ua fini pwe esap wor ai nuku iwe ua nuku pwe upwe chok fetan non rochopwak. Pokiten ika esap wor nuku, rochopwak ina chok met a wor.”¹⁰

An kapasen pwarata usun nuku mi nukuchar non ewe Samon Jises Kraist—non an kapas me non an foffor—a ew amemef ngeni ekkoch. Inamo ika inisin a apwangapwang, a chunata ekkoch ar repwe pochokun.

Usun ei sister, Ua ekieki chommong ekkoch chon ewe Mwichefen, chon fiu usun I, ewe a fetan iteiten ran non nuku, achocho an epwe ennet me pwaracho chon kunon ach Chon Amanau, Jises Kraist. Ra kaeo usun Kraist. Ra afanafan usun Kraist. Ra achocho ne apiru I. Ika ranin manauer a mecheres ika weires, ir mi sinei pwe ar nongonong mi pochokun me esap mwokut.

Ikkei ir ekkewe mi tupwen ra weweiti auchean wewen ewe uwekisin kon “Mi pochokun ewe nongonong, a kawor ren ami nuku” me “ekkewe chon sunong fan tumunun Jises.”¹¹ Ua unusen nap ai kinisiou ai fetan nein ekkewe ra amonnata ew nongonongen ngun mi fich ngeni ewe it Sounengme ekkewe ir mi pochokun me mi naf tumunur ar repwe engino ngeni chommong weiresin manau.

Use nuku pwe kich mi tongeni kapas chommong usun auchean ena sokkun nongonong mi pochokun non pwisin manauach. Pwan mwo nekukunur, nouch semiriten Kinter ra kaeo nupwen ra konu ei pwan chok ennet:

Pukefel ra apochokuna ei nongonongen ennet. Ewe Chon Amanau a aiti ekkewe aramasen Merika:

“Iwe ika oupwe fori ekkei mettoch fansoun meinisin oupwe feioch, pun oua kauuta won ai we nongonong.

“Nge ion neimi epwe anapano are ekisano seni ekkei rese kauuta won ai we nongonong,nge ra kauuta won ew nongonongen pi; iwe nupwen ewe pungun ran a pungutiw, me ekkewe konik ra puu, me ekkewe asepwan ra enien, me wichir, repwe turutiw.”¹³

Iei ewe anean mi ennet an souemwenin Mwichefen pwe sokonon forsefanin ewe Salt Lake Tempel epwe aninis ngeni pwonutan an Brigham Young mochen kuna “ewe tempel epwe foruta non ew napanap an epwe nukuchar non unusen ewe minenium.” Ekkei ier repwe feito, amo sipwe fori ekkei foroch sefan sia fori ngeni ewe Salt Lake Tempel epwe pesei me ouroura kich, meinisin me famini, pwe kich pwan—non ena wewe—sipwe “kauta non ew napanap an epwe nukuchar non unusen ewe minenium.”

Sipwe fori nupwen sia apwonueta ewe tingor an ewe Aposel Paul ne “[iseis] ew mettoch mi fakkun auchea fan [itach] ew nongonong mi pochokun fanasengesin ewe fansoun epwe wareto, pwe [sipwe] manaueni ewe manau esemuch.”¹⁴ Ina ai ennetin iotek pwe ach nongonongen ngun epwe pochokun me esap mokut, pwe ach kapasen pwarata usun ewe Achasefanin Jises Kraist me usun Wisan pwe ach Chon Amanau me Chon Angasano repwe winiti ach pwisin foun nongonong mi nap, ren ewe ua pwarata non Itan, usun Jises Christ, amen