A Feino Mwach

Pwi me fefinei achengicheng, Ua kinisou ren ai nonnom remi non ei mwichenapen mwichefen ren Ewe Mwichefenin Jises Kraist ren Aramas mi Pin Non Fansoun Soponon. Non an tingor pwe sipwe ekiek usun ewe Niwinsefaniton An ewe Samon Mwichefen non ei kinikinin fansoun a efeiochu kich me atongeach kewe, Preseten Russell M. Nelson a pwonei pwe met kewe sia fen sinei epwe chok mecheres ach chechemeni nge ese tongeni monukuno.

Met a fen fis ngeniei ua chok chechemeni, usun ngang mi nuku pwe ami mi pwan ina usun. Nge ika sipwe monnukano a anongonong won emon me emon kich. Mi auchea ngeniei pokiten met mi fis ngeniei ren ai monneta ngeni ei mwichenap a siwiniei non ew napanap ua mochen epwe soposopono. Mut ngeniei upwe awewei.

Ai monneta a esenipato ai upwe anneani ewe uruo non ew mettoch a fis me non ewe Niwinsefanito. Ua fen anneani fan chommong, nge me rei a chok ew repotun ew mwich mi auchea mi apachanong Joseph Smith, ewe soufosun ewe Niwinsefanito. Nge non ei fansoun ua kuna non ewe uruo ifa usun ewe Samon a emweni kich, Noun chon kuno, non An Mwichefen. Ua kuna met wewen ren kich aramas ach sipwe emwen me ren ewe Chon Amanauen ewe fonufan, ewe Chon Fori—ewe mi sinei mettoch meinisin, fansoun nom, fansoun iei, me fansoun mwach. A aiti kich ekis me ekis me emweni kich, esap tongeni echimwakich.

Ewe mwich ua anapanapa a ew fansoun mi auchea me non ewe Niwinsefanito. A ew ranin mwichen Sabbath a fis non April 3, 1836, non ewe Kirtland Tempel non Ohio, fisu ran mwirin a epinipinino. Joseph Smith a awewei ei fansoun mi napana me non uruon ewe fonufan non ew nikinik mi mecheres. Napngeni an we uruo a makketiw me non Doctrine and Covenants kinikin 110:

Non ewe nekunion, ua anisi ekkewe pwan ekkoch Preseten ne eineti ewe Sakrament ngeni ewe Mwichefen, aua angei seni ekkewe Engon me Ruemon, ekkewe ra aani ewe tufich ne nemenem ren ewe chepen mi pin non ei ran. Mwirin ai fori ei angang ngeni pwi kewe, ua niwin ngeni ewe rong, ekkewe tit mangaku ra apungutiw, me ua chappetiw, fiti Oliver Cowdery, non ennetin me mosonosonen Iotek. Mwirin am uta seni iotek, ei nemasepwi a sukkuno ngeni kem me ruemon.”¹

“Ewe mangakun eppet a no seni am ekiek, me mesen am ekiek ra sukkuno.

Aua kuna ewe Samon a uta asetan ewe rong, me mwem; me fan pechen ew simen mi pwonuno ren gold, anuwan mi oneon.

Mesan mi usun ngetengetin ekkei; metan mokuran a usun pwechepwechen snow mi nimenimoch; mesemesan a saram nap seni saramen ewe akkar; me neuwan a usun ngingin ewe pupun watten konik, pwan mwo neuwan Siowa a apasa:

“Ngang ewe aewin me ewe amuchunon; Ngang ewe mi manau, Ngang ewe a ninnio; Ngang chon ppeni kemi ngeni ewe Sam.

Ewe Samon a ureni Joseph Smith me Oliver Cowdery pwe tipisir a musono me ra nimenimoch me mwan, iwe pokiten ena repwe awenata mokurer me pwapwa.

Ewe Samon a urenir pwe netipen pwir kewe repwe pwapwa, me mut ngeni netipen nei kewe aramas meinisin repwe pwapwa ekkewe a wor rer, fiti ar pochokun repwe aueta imwan we.

Pun nengeni, I a etiwa ewe tempel, me itan epwe nom ikewe, me epwe pwarano inisin me non ewe tempel ngeni noun aramas non an umoumoch.

Ewer, epwe pwato ngeni noun chon angang, me kapas ngenir ren mongungun, ika noun aramas repwe apwonueta an annuk, me resap animengawa ei imw mi pin.

Ewer netipen ngorou me engon ngerou repwe pwapwa pokiten ekkewe feioch repwe kawor, me ewe endowment ren minne noun chon angang repwe feioch ren me non ewe tempel.

Me itefounon ewe imw epwe paras ngeni non ekkewe fonuen ekis, me epwe ina poputan ewe feioch minne epwe tou won mokuren noun aramas. Iwe ina. Amen.

Mwirin an ei nemasepwi a kesipeno, ekkewe nang ra pwan suk sefan ngenikem; me Moses a pwato me mwem me a ngenir ekkewe kiien ewe achufengenin Israel seni ekkewe ruanu kinikinin ewe fonufan, me emwenin ekkewe engon einang seni ewe fonuen ennefen.

Mwirin ei, Elias a pwato me ngenir ewe kinikinin fansoun ewe kapas allimen Abraham, a apasa pwe non ir me mwirimwirir meinisin tappin aramas mwirir repwe feioch.

Mwirin an ei nemasepwi a kesipino, pwan ew nemasepwi mi nap me ning a sukkuno asetar, pun Elijah ewe soufos, ewe ese mano nge a nofoch ngeni nang, a uta me mwer, me a apasa:

Nengeni, ewe fansoun a unusen feito, minne a affat me ren Malachi—a pwarata pwe I [Elijah] epwe wareto, me mwen ewe ran mi napanap o enuokus epwe feito ewe ranin ewe Samon—

An epwe akunnu netipen ekkewe sam ngeni ekkewe semirit, me ekkewe semirit ngeni ekkewe sam, ika esap ina unusen fonufan epwe anumamau—

Ina minne, ekkewe kiien ei kinikinin fansoun ra kawor ngeni ne pour, me ren ei repwe sinei pwe ewe ran mi napanap o enuwokus ranin ewe Samon a arapeto, pwan mwo pen ewe asam.”²

Iei, ua fen anneani ena uruo fan chommong. Ewe Ngun mi Fel a apungano ngeniei pwe ewe uruo mi ennet. Nge nupwen ua kaeo me iotek ai pwe monneta ngeni ei mwichenap, ua weweochuti ewe manamanen ewe Samon ai upwe tichik ne emweni Noun chon kuno non An ei angang.

Fisu ier mwen an Moses ngeni Joseph ekkewe kiien ewe achufengenin Israel non ewe Kirtland Tempel, “Joseph a sinei seni ewe peichin itenapen ekkewe Puken Mormon pwe popun epwe ‘pwar ngeni ekkewe mwirimwirin chon Israel … pwe repwe sinei ekkewe pwon mi pin an ewe Samon, pwe resap poutuno feinfeino chok.’ Non 1831, ewe Samon a ureni Joseph pwe ewe achufengenin Israel epwe poputa non Kirtland, ‘ Me seni ikewe [Kirtland], ion chok uwa mochen upwe tinano no nein muu meinisin … pun Israel upwe amanawa, me upwe emwenir.’”³

Ina mwo angangen misineri a auchea an epwe achufengeni Isreal, ewe Samon a aiti ekkewe Engon me Ruemon, ekkewe ra winiti ekkewe akkomwen misineri, “Chechemenei ousap no ngeni ekkoch muu, tori atun oupwe angei ami endowment.”⁴

Usun ita ewe Kirtland Tempel a auchea me non an ewe Samon ekis me ekis kokkot ren ru popun: Aewin, Moses a witi tori an ewe tempel epwe wesino an epwe eniwini ekkewe kiien achufengenin Israel. Me aruwan, Preseten Joseph Fielding Smith a aitikich pwe “ewe Samon a annuku ngeni ekkewe Souneng ar repwe aueta ew tempel [ewe Kirtland Tempel] me non I epwe pwarano ekkewe kiien mumuta me ikewe ekkewe aposel repwe efeioch me non me mwoneta ne fichi an we atake ren ewe amuchunon fansoun.”⁵ Ina mwo ewe endowment on tempel kich mi sinei usun ikenai ese fis non ewe Kirtland Tempel, an epwe pwonueta osini, amonetan angangepin non tempel ra poputa ne kawor ikewe, fiti fengen me chommongun pwaratan ngun minne a ammonata ekkewe ra kokko ngeni misin fiti ewe pwonen endowment ren “manaman seni won tekia”⁶ ewe a emwen ngeni ew watten achufengen seni angangen misineri.

Mwirin an ekkewe kiien ewe achufengenin Israel ra kawor ngeni Joseph, ewe Samon a ouroura ewe Soufos an epwe tinano chochon ekkewe Engon me Ruemon won misin. Nupwen ua kaeo, a fat ngeniei pwe we Samon a amonnata non tichikin ewe aan fan iten ekkewe Engon me Ruemon ar repwe no won misin ekis ikewe aramas ra fen monneta ar repwe nuku me etiwer. Non fansoun, ngerou repwe tonong non an ewe Samon Mwichefen mi niwinsefanito, pokiter.

Porausan non nouch taropwen mak, anean pwe ina epwe arap ngeni nefinen 7,500 me 8,000 ir mi papatais fansoun ekkewe ru misin an ekkewe Engon me Ruemon ngeni ekkewe fonuen Britain. Ra fotukatiw ewe nongonongun an misineri angang non Europe. Ei a forata ewe nongonongen angangen misineri non Europe, me nesoponon ewe engon me tiuwen kinikinin ipuku ier ekkoch 90,000 ra achufengen ngeni Merika, napengenir ra feito seni ekkewe fonuen Britain me Scandinavia.⁷ Ewe Samon a emweni Joseph me ekkewe misineri mi tupwen ekkewe ra feinno angang ar repwe angei uwan ar angang ewe usun mi nap seni ar tufich non ena fansoun. Nge ewe Samon, ren An unusen tongeni osini me monneta, a fori an epwe tufich.

Ami mi chemeni ekkewe foun kapas usun ita mi mecheres me ngioch seni 110 kinikin non ewe Doctrine and Covenants:

Nengeni, ewe fansoun a unusen feito, minne a affat me ren Malachi—a pwarata pwe I [Elijah] epwe wareto, me mwen ewe ran mi napanap o enuokus epwe feito ewe ranin ewe Samon—

An epwe akunnu netipen ekkewe sam ngeni ekkewe semirit, me ekkewe semirit ngeni ekkewe sam, ika esap ina unusen fonufan epwe anumamau—

Ina minne, ekkewe kiien ei kinikinin fansoun ra kawor ngeni ne pour, me ren ei repwe sinei pwe ewe ran mi napanap o enuokus ranin ewe Samon a arapeto, pwan mwo pen ewe asam.”⁸

Ua pwarata pwe ewe Samon a kuna towawenon ekan ran mwach me ifa usun I epwe emweni kich ach sipwe anisi I ne apwonueta an kewe popun non ekkewe ranin soponon.

Nupwen ua angang non ewe wisen chon Nemeni ewe Mwichen Pisop chommong ier a no, ua angei ew wis ai upwe etetteni ewe kokkoten me forun mwich ewe a fori met sia eita ngeni FamilySearch. Ngang mi tumunoch ne apasa pwe ua “etetteni” forun nap seni ai apasa pwe ua “emweni.” Chommong aramas mi tipachem ra suseni ekkoch ar angang me feito forata met ewe Samon a mochen.

Ewe Aewin Presetensi a forata ew mettoch repwe achocho ngeni ar repwe ekisano esap epini ewe angangepin a fen wes. Ar resap sinei ika an emon aramas angangepin a fen akkom wes ina ar watten aurek. Non chommong ier—ika met mi fen usun chommong ier—ewe Aewin Presetensi a eisiniei, “Inet kopwe awesi?”

Ren iotek, achocho, me ewe pwisin fangeno an aramas mi watte ar tufich, ewe angang a wesino. A feito ekis me ekis. Ewe aewin angang ina ar repwe fori FamilySearch epwe mecheres ngeni ekkewe rese sinei nounoun kampiuter. Mi chommong siwin a fis, me ua sinei pwe repwe soposopono ne fis, pun inet chok aua sopweno ne awesi ew osukosuk mi taweno ren ourour, aua monneta ngeni pwan ekkoch pwarata fan iten mettoch mi nap mi pwan auchea nge sisamo kuna. Pwan mwo ikenai, FamilySearch a winiti met ewe Samon a mochen ren pekin An Niwinsefanito—nge esap chok ren ach sipwe auku an esap epini ewe angangepin a fen wes.

Ewe Samon a mut ngeni kich sipwe fori mettoch epwe murinono an epwe anisi aramas repwe angei memefin sineiochu me tongei ar kewe neuwo me ar repwe awesi ar angangepinin tempel. Iei, usun ewe Samon mi ennetin sinei pwe epwe fis, anuwon me fopun ra winiti chon sinei kampiuter ngeni semer me iner me chon ar wart. Meinisin ra kuna watten pwapwa non ei angang.

Ewe ngunun Elijah a siwini netipen ekkewe kukkun me watte, semirit me sam me in, noun nour semirit me inan me semer ekkewe In me Sam. Ekkewe tempel repwe pwapwa ne akkota fansoun papatais me ekkoch angangepin. Ewe mochenin angang ngeni ach kewe neuwo me ewe apochokunen nefinen sam me in me semirit ra marino.

Ewe Samon mi kuna pwe meinisin epwe fis. A akkota fan, ekis me ekis, usun A fen fori ngeni ekkoch siwin non An Mwichefen. A fen amarata me amonnata aramas nukuchar ekkewe ra finata repwe fori mettoch mi weires epwe murinono. Mi chok tipepos iteiten fansoun non an anisikich sipwe kaeo “kinikinin kapas won kinikinin kapas, annuk won annuk, iei ekis me pwan inan ekis.”⁹ I mi nukuchar non kokkoten An mochen, nge I mi tumunuochu pwe fangeno a kan soun wato feioch sise esuku.

Ua esipano ren ai apasa ai kinisou ngeni ewe Samon—I ewe a ouroura Preseten Nelson an epwe tingoreiei ai upwe fori ew fangeno ai upwe amwoneta ngeni ei mwichenap. Iteitan awa me iteiten iotek fansoun ai amwoneta a wato ew feioch.

Ua tingorei ir ekkewe repwe ausening ei porous ika anneani ekkei kapas pwe repwe nuku pwe ewe Samon mi emweni Niwinsefaniton An kapas allim me An Mwichefen. A feinno mwach. I mi sineiochu fansoun mwach. A kokri kemi ngeni ewe angang. A fiti kemi non. A wor ren ew kokkot fan iten om angang. Me pwan mo nupwen oupwe fangeno, oupwe mefi pwapwa nupwen oupwe anisi ekkoch repwe mwoneta ngeni An wareto.

Ua pwarata ngeni ami pwe Kot ewe Sam mi manau. Jises ii ewe Kraist. Iei An Mwichefen. A sinei me a tongek. A emweni kemi. A amonata ewe an fan itom. Non iten Jises Kraist mi pin, amen.