Feito ren Kraist—Usun manauen Aramas mi Pin non Fansoun Soponon

Kinisou chapur, Elter Soares, ren om kapasen pwarata mi pochokun, usun ewe Puken Mormon. Kukuto chok, ua tufichin komoch echo uwekisin non ewe wesewesen Puken Mormon. Non ei peich, ren ewe aewin fansoun non ei kinikinin fansoun, ekkei kapas mi mesemwong an Nifai a makketiw: “Ngang upwe feino me fori ekkewe mettoch minne ewe Samon a annuku, pwe ngang mi sinei pwe ewe Samon esap awora ekkewe annuk ngeni kewe noun aramas, tiwenon chok ika a amonnata ew an ngenir ar repwe apwonueta ewe mettoch minne i a annuku ngenir.”¹

Sasing

Wesewesen Puken Mormon uwekisin peich

Nupwen ua komoch ei peich, Ua fokkun unusen mwar me kinisou ren an ewe 23-ier Joseph Smith achocho, ewe a chiakuni ewe Puken Mormon seni ewe “niffang me manamanen Kot.”² Ua pwan unusen kinisou ren ekkewe kapas an ewe anuon Nifai, ewe minne a kokko ngeni an epwe fori ewe angang mi weires an epwe angei ekkewe seleichen brass seni Laban.

Nifai a sinei pwe ika epwe sopweno an nikitu ngeni ewe Samon, I epwe tongeni tufichin aponueta met ewe Samon a annuku ngeni i. A sopweno an nikitu ngeni ewe Chon Amanau non unusen manauan ina mwo ika a mefi riaffoun sossot, weiresin aionan, me pwan ewe afangema seni ekkoch wesetan an we famini.

Nifai a fen sinei ion epwe ani apinukunuk.³ Mwirin chok an puchor, “O ngang emon aramas netipengaw! Ewer, netipei a uren netipengaw pokiten aionei,”⁴Nifai a apasa, “Ai Kot ai chon aninis; i a emweniei ai upwe tou seni ai kewe riaffou me non ewe fonu pon; me a amanaua ei won ekkewe konikin matau mi fokkun anonnon.”⁵

Kich chon tapweno mwirin Kraist, sisap tiweno seni sossot me riaffou non manauach. A auchea ngeni kich ach sipwe fori mettoch mi weires, minne ika sipwe anamon ngeni, epwe apekus ika esap fen tufich. Nupwen sia etiwa an ewe Chon Amanau we tingorun etiwetiw “feito rei,”⁶I epwe amonata anen aninis, angasano, me kinamwe mine mi tufich, usun chok A fori fan iten Nifai me Joseph. Pwan non ach kewe anononun sossot, sia tongeni mefi umoumochun An we tong ika sia nuku I me etiwa An mochen. Sia tongeni mefi ewe pwapwa mi moneta ngeni Noun kewe chon kuno mi nukuchar, pun Kraist I ewe pwapwa.”⁷

Non 2014, nupwen ua nom won ai missin, a fis ngeni ai we famini och mettoch mine ause ekieki epwe fis. Nupwen aua fitatiw efoch skeitport won ewe paan, noum we kukun at a turutiw me a efeiengawa tupuwan. Nupwen nonnomun a ngaweno, ekkewe sou safei ra emwitiri ngeni ewe nenien reirei.

Ai we famini aua fotopuku won ewe simenin ew rumwen ewe pioing mi poon, me aua fangeta netipem ngeni Kot. Non nukanapen ei fansoun mi osukosuk me ametek, am aua ur ren ewe tong me kinamwe an Semem won Nang.

Am ause sinei met epwe fis mwaan ika aupwe pwan kuna sefani noum we att. Aua sineifatochu pwe manauan a nom nepoun Kot me pungunon, ren ekiekin nang, epwe fisioch fan itan me fan item non kinamwe. Seni ewe niffangen ewe Ngun mi Fel, aua moneta ne etiwa met epwe fis.

Ese mecheres! Ewe akseten a esenipato am aua nomw non ewe pioing non ruu-maram nupwen aua nemeni ukukun 400 misineri. Noum we at a monukano an ekiek. An epwe pwak sefan mi pachenong angangen mokutun inis mi tam me weires, angangen kapas, me angangen rawa. Sosot mi fis, nge non ekkewe fansoun aua kuna eu manaman.

Aua wewechuti pwe esapw meinisin sosot sia weri sipwe angei ponuwan mine met sia aneanei. Nge, nupwen sia nikitu ngeni Kraist, sipwe mefi kinamwe me kuna manamanen Kot, met chok epwe fis, non An fansoun me An angang.

Epwe wor fansoun nupwen sisapw tongeni sinei ika met we mi fis non ewe fansoun epwe fisioch nesoponon me sipwe fen apasa, usun Nifai, “Netipei a uren netipengaw pokiten aionei.”⁷ Epwe wor fansoun pwe ewe chok eu apinukunuk a wor rech iei non Jises Kraist. Met ren ei feioch a wor ach epinukunuk me achifoua non I. Kraist ewe chok emon minne a aponueta An pwon. An kinamwe mi wor faniten meinisin minne mi feito ngeni I.⁸

Nouch souemwen ra ennetin mochen pwe kich meinisin sipwe mefi ewe kinamwe me ourur ewe a feito seni ach apinukunuku me nikitu ngeni ewe Chon Amanau Jises Kraist.

Nouch soufos mi manau, Preseten Russell M. Nelson, afen sinei met ewe Samon a mochen ren ewe fonufan me sounengin an Kraist we mwichefen: “Am porous ngeni ei fonufan mi mecheres me wenechar: sia tingor ngeni noun Kot semirit meinisin me ruepek ewe mangaku repwe feito ren ar we Chon Amanau, repwe angei ewe feioch seni ewe tempel mi pin, me pwapwa ese much, me angei manau ese much.”¹⁰

Ei tingorun etiwetiw “feito ren Kraist” a wor tichikinwewen ngeni Aramas mi Pin non Fansoun Soponon.¹⁰ Kich chochon an ewe Chon Amanau we Mwichefen, sia fori pwon mi pin ngeni I me sia winiti Noun ngun mi achengicheng at me nengin. ¹¹ Sia fen pwan angei ewe tufich ach sipwe fiti ewe Samon ne angang me etiwa ekkoch ar repwe feito ren I.

Nupwen sia angang ren Kraist, ach we angangen ennetin aneasosich epwe fis me non imwach kewe. Epwe wor fansoun nupwen chon non ach famini me chiechiach kewe repwe weri sosot. Ekkewe mongungun ewe fonufan, me enip epwe pwan met ra mochen, epwe uwei ngenir ar repwe tipemwaramwa ren ewe ennet. Sipwe fori mettoch meinisin ren ach tongeni pwe sipwe anisir ar repwe mefi me ruu an ewe Chon Amanau tong me ach tong. Ua chemeni eu wokisin ewe a winiti echo ach kon amen murino “Love One Another” a aiti kich, “Pwe aramas repwe sinei pwe ami nei chon kuno, ika pwe oupwe tong fengen.”¹²

Non ach tong ngeni ekkewe ra tipemwaramwar ren ewe ennet, ewe chon koput ren pwapwa meinisin epwe sotuni ne amefi ngeni ach sipwe ekieki pwe sia oputa ekkewe sia tonger ika siasopweno ne manaueni ewe kapas allim mi unusoch me asukuna ewe ennet.

Ach nipwakoch ne anisi ekkoch ar repwe feito ren Kraist me niwiti Kraist epwe anongonong won ach nenien appiru ren ach pusin ach nikitu me nomwetiw won ewe aanen pwon.

Ika ach ennetin mochen pwe sipwe angasa ekkewe sia tonger, kich sipwe nikitu ngeni Kraist ren ach etiwa An Mwichefen me An we Kapas allim mi unusoch.

Ach sipwe niwiniti porousen Nifai we, sia sinei pwe an Nifai we nukunuk non ewe Samon a feito seni an inan me saman mochen nuku non ewe Samon ren ar aponueta ar kewe pwon nenien apiru. Ei mi aweweoch me non an Liai nemwasepin ewe iran manau. Mwirin an ochei ewe foun ira amen ngarangar me apwapwa, Liai “[a] nenefetanei [mesan], ren ita [an] epwe tongeni pwan kuna [an] we famini.”¹³ A kuna Saraia, Sam, me Nifai ra uta “ra uta nge usun ita rese sinei ian repwe feino ie.”¹⁴ Liai a pwan apasa, “Ua akkanipor; iwe ua pwan apasa ngenir ren eu neuwomongun mongungu pwe repwe feito rei, me ochoch seni ewe foun ira.”¹⁵ Kose sinei pwe Liai ese suseni ewe iran manau. A nomwetiw ren ewe Samon non ngun me a etiwa an we famini pwe repwe feino ikewe ie a nomw ia pwe repwe ochoch ewe foun ira.

Ewe chon koum epwe sotuni ekkoch ar repwe nikitano ewe pwapwan ewe kapas allim ren ar eimufeseni an Kraist kapas seni An Mwichefen. Epwe mochen sipwe nuku pwe sipwe tongeni nikitu won ewe anen pwon won pusin ach, seni pusin ach manauen souneng, won winikapach seni An Mwichefen.

Non ekkei fansoun soponon, An Kraist Mwichefen a niwinsefanito faniten an epwe anisi noun Kraist kewe semiritin pwon ar repwe nomw won An we anen pwon.

Non ewe Doctrine and Covenant sia anea, Nengeni iei ai annuk—ion ir mi aier me feito rei,usun chok aiwe mwichefen.”¹⁶

Pokiten an Kraist we Mwichefen, sia pochokun pokiten met a fis ngeni kich non ach mwicheichen Souneng. Sia rong Nouwan seni Noun kewe soufos, sou osini, me chon pwarata. Akauchean, seni An we Mwichefen sia angei ekkewe feioch meinisin An Kraist we Achasefan ewe sia chok tongeni mefi ika sia achocho ne fori ach kewe pwon mi pin.

Ewe Mwichefenin Jises Kraist ren Aramas mi Pin non Fansoun Soponon iei An Kraist we mwichefen won fonufan, a niwinsefanito non ei fansoun soponon faniten noun Kot semirit.

Ua pwarata pwe ika pwe sia “feito ren Kraist” me manau usun Aramas mi Pin non Fansoun Soponon, sipwe fokkun feioch ren An we tong, An pwapwa, me An kinamwe. Usun Nifai, sia tongeni fori mettoch mi weires me anisi ekkoch ar repwe pwan fori, pokiten kich mi sinei ion sipwe epinukunuk non i.¹⁷ Kraist i ach saram, manauach, me ach chon amanau.¹⁸ Non iten Jises Kraist, amen.