Ewe Kokkot mi Napanap

Ekkei meinisin ra nom non an kokkot mi pin, popun pwe epwe etufichi noun Kot kewe repwe seikita me winiti usun chok I. Non ekkewe pukefel a apasa pwe ewe “kokkotun pwapwa,” “ewe kokkotun ngaseno,” me ewe “kokkotun amanau” (Alma 42:8, 11, 5), ei kokkot—a pwarata ren ewe Niwinsefan—a poputa ren eu Mwich non Nang. Ne ngunuch, sia fokun mochen sipwe angei ewe manau ese much usun chok semach me inach non nang. Non ena atun sia fen angei fefeitan non aukukun nge ese mo or ach tufichin angei ewe inis me manau won ei fonufan. Pwe sipwe angei ena sokkun manau, Kot ewe Sam a mochen forata fonufan. Non ewe kokkotun fonufan, sipwe nimengau ren tipis attun sia kuna sossot mi namwot ngeni sipwe fefeita non ngunuch. Sipwe pwan tongeni mano non ewe inis. Pwe epwe amanaua kich seni mano me tipis, an Semach won Nang kokkot a awora emon Chon Amanau. An Manausefan epwe amanaua kich seni mano, me An asoren afor epwe moni aukukkun tipisich nge epwe pwan anongonong won ach achocho ne fefeita. Ei Aforen Jises Kraist a nom nukanapen an Semach kokkot.

Non ewe Mwich non Nang, meinisin ekkewe noun Kot ngun ra kaeo an ewe Sam kokkot, fiti niwinin tipis me ekkewe sossot repwe kuna, pwan aninisin nang, me ningan nenian mi achupor. Sia kuna nesoponon seni ewe nepoputan. Ekkewe chommongen aramas ra uputiw won ei fonufan ra fini an Semach we kokkot me ra fiu fan itan non nang. Chommong me neich sa pwonei ngeni Semach we ren met sipwe fori non ei manau. Non och napanap esemo fatano, ach foffor non nang a ammonakich ren nonnomuch won fonufan.

Iei upwe ne awewei auchean ekkewe nongonongen an Semach kokkot me ifausun ar anisikich non ei sain manauen fonufan me non ewe nenien ngun epwe feito.

Ewe popun ei manauen fonufan me ach sopweno ne kaeo mwirin sia mano pwe ekkewe noun Kot repwe winiti usun I. Iei an Semach won Nang mochen ren noun kewe. Ach sipwe weri ei pwapwan neni, annukun nang a ngeni kich pwe sipwe nimeti kich ren ewe Achasefan an Jises Kraist pwe sipwe nom fan mesen ewe Samon me ewe Nau me weri manau ese much. Usun mi mak non ewe Puken Mormon, A pesei “pwe repwe feito ngeni i me feioch seni an kirekiroch; iwe ese amam emon epwe feito ngeni i, chochon me pwechepwech, chon fotek me chon ngaseno, mwan me fefin; me a chechemeni ekkewe chon nukun namanam; me meinisin ra nonno fengeni ngeni Kot” (2 Nephi 26:33; nengeni Alma 5:49).

Ewe mwirinon kokkot fan asengesin kich pwe sipwe winiti usun chok i a anongonong won ach finata sipwe sapeseni ekkewe mi ngau mi omochukich ne ponueni an Kot kewe annuk me An kokkot. A pwan fori met sipwe kuna pwan ekkoch weiresin ei fonufan, usun ach riaffou ren tipisin ekkoch ika seni ekkoch semwen seni ach uputiw. Fan ekkoch ewe fefeita mi namwot a fis me non ach riaffou me weires napseni ren ach kinamwe me asoso. Me esap or namotan ekkei foforun fonufan a fis ren ach sipwe angei ewe popun mi ning ika a wor an nang eppeti senikich ekkewe niwinin foffor non ei fonufan.

Ewe kokkot a pwarata ach nenien winipos non nang, ewe popun me uwan ach sasai non fonufan, me ewe nangin aninis sipwe tongeni angei. An Kot kewe annuk ra esinesin ngenikich ach sisap rikino non aanen mi afeiengau. Ekkewe afanafan seni souemwen mi kefinita ra emwenikich me affata ach sia nom non ewe aan ngeni manau ese much.

An Kot kokkot fan itach a ngenikich ruanu pwon ne anisikich non manauen fonufan. Meinisin sa angei pokiten ewe Achasefan an Jises Kraist, ewe foun nongonongen ewe kokkot. Ewe aewin a pwarata ngeni kich pwe non An riaffou fan iten ekkewe tipis sa aier seni, sia tongeni nimoch seni ekkana tipis. Iwe ewe chenin nesoponon kapung epwe “ oturano esap chiwen chechemeni” (Doctrine and Covenants 58:42).

Oruan, eu kinikinin an ewe Chon Amanau ewe Achasefan, I a mwarei won inisin ekkewe pwan unusan apwangapwangen chon fonufan. Ei a etufichikich pwe sipwe kuna aninisin nang me ewe pochokkunan nikiitu ach mwarei choun ei fonufan, ren pwisin ach tipis me esenifinifin, usun maun me samaun fonu. Ewe Puken Mormon a aweweochu ren wokisin mi fat ren ei auchean manamanen ewe Achasefan. Ewe Chon Amanau a mwarei won I “ewe unusen mettek me ewe unusen semen [me unusen apwangapwang] ren noun aramas. … I epwe wata won inisin ar apwangapwang, pwe nenukan epwe tongeni ureno ren umoumoch, anongonong won ewe pekin aion, pwe i epwe tongeni sinei anongonong won ewe pekin aion ifa usun an epwe anisi noun kewe aramas anongonong won ar apwangapwang” (Alma 7:11-12).

Aunungatin, ewe Chon Amanau, non an Achesefan ese or kaukun, a siwini ewe mano me a mwut ngeni kich sipwe tongeni manausefan. Ewe Puken Mormon a aitikich, “Ewe Manausefan ewe epwe fis ngeni meinisin, serafo me chinnap, fotek me ngaseno, mwan me fefin, kewe mi tipis me wenechar; me metin mekurach kewe epwe ne wor esapw chiwen mworono; mettoch meinisin epwene unus.” (Alma 11:44).

Sia efisi pwapwan ewe ennet ren ewe Manausefan non ei atun Easter. A mwut ngenikich ach wewe me tufich ne pochokun ngeni ne nikitu non sossot mi tapwei kich me pwan ekkewe sia tonger, usun ekkewe mettoch ren apangapangan inisich, mokurach, ika nepwakingawan ekkiek sia angei attun ach uputiw ika sokkopwaten osukosun non ei manau. Pokiten ewe Manausefan, sia sinei pwe ekkei nepwakingauen fonufan ir mi mochomoch!

Ewe kapas allim mi niwinsefan a esinei ngenikich pwe ewe Manausefan mi tongeni aora ach nom fengen ngeni ach famini-punuach, nouch me inach me semach. Iei eu watten feioch ngeni kich ika sipwe apwonueta wisach non famili won fonufan. A anisikich sippe nomfengen non tong non ei manau me ekieki usun pwapwan fansoun epwe fis non ach chusefan non ewe manau epwe feito.

Uruanuan me saingonon, pwarata non ei fansoun a aitikich pwe ach fefeita ese chok kouno ika sia mano. Ese chommong ren met kich mi sinei usun ei pwon mi auchea. Ra erenikich pwe ei manau a ei fansoun ammonata sipwe churi Kot me sisap ammangano ach aier (nengeni Alma 34:32-33). Ewe, sia kaeo pwe non ewe nenien ngun ewe kapas allim a katou ngeni “ekkewe mi tipis me anneasonap o amam ewe ennet” (Annuk me Pwon 138:29) me ekkewe ra kaeo ikewe ra tongeni aier mwen ewe Kapungun Nesoponon (nengeni wokisin 31-34, 57-59).

Iei pwan ekkoch nongonongen an Semach won Nang kokkot:

Ewe kapas allim an Jises Kraist a mwut ngenikich ach weweiti ekkewe itenapen nimenimoch, pupunu, me nounou semirit. A aitikich pwe pupunu non an Kot napanap mi namwot ika sipwe apwonueta an Kot kokkot, pwe sipwe awora an Kot mochen ren nonnomen semirit, me ammonata chon ewe famili ren manau ese much. “Pupunu mi epinipin meren Kot ngeni aramas,” anon ewe Samon, “… pwe ewe fonufan epwe ponueni popun an forata” (Doctrine and Covenants 49:15). Non ei, An kokkot, ennet, a sokono seni met ewe fonufan a mochen ren annuk me oreni.

Ewe manamanen nounou semirit ina eu manaman mi pin o Kot a ngeni noun kewe meinisin. Ach aea ei manaman a nom non ewe aewin annuk ngeni Atam me If, nge pwan eu annuk a pwan fiti sipwe aeaochu me sisap urumwotei. Nukun ewe apupunu, meinisin nounoun aramas a na ngeni ew sokkun nikinik ika tipis mi turunufasei me aeangauen eu manamanen aramas mi ennetin pin. Auchean ewe annukun nimenimoch me non ewe kapas allim ina ewe popun ach tufichin nounou semirit a apwonueta an Kot kokkot.

Non ei ruepuku ier seni ewe Aewin Nemasepwi, ewe a poputani ewe Niwinsefanito, sia sinei an ewe Samon kokkot me sia pochokkun ren ekkewe feiochun An Mwichifen mi niwinsefan. Non ei ier 2020, mi wor met ekkewe tokter ra aita 20 me 20 ren ach kuna ekkewe mettoch a fen fis.

Atun sia neno fansoun mwach, nge, ach kuna ese chok fat. Sia sinei pwe ruepuku ier mwirin ewe Niwinsefanito, ewe nenien ngun a pwan fiti chommong aramas ra fen nom non ei fonufan pwe repwe afanafana ewe kapas allim ikewe ie. Sia pwan sinei pwe mi chommong tempel pwe sipwe fori ekkewe efeioch ese much ren ekkewe ra aier me etiwa an ewe Samon kapas annim non ewe nenien ngunun mano. Ekkei meinisin a afetanei an Semach won Nang kokkot. An Kot tong mi fakkun watte, nukun chok ekkewe ekkoch ra finita ewe rochopwak, I a ammonata eu neni mi uren ning fan iten meinisin Noun kewe (nengeni Doctrine and Covenants 76:43).

Sia sinei pwe ewe Chon Amanau epwe niwinsefan me epwe awora engoru ierin kinamwe epwe nemeni pwe epwe ina nesoponon manauen fonufan non an Kot kokkot. Sia pwan sinei pwe epwe wor manausefan mi sokkofesen, ekkewe mi pung me ekkewe rese pung, me ewe kapungun nesoponon ren iteiten aramas epwe tapweno mwirin ar manausefan.

Sipwe kapung anongonong won ach foffor, mochenin netipach, me met sokkun aramas sia winiti. Ei kapung epwe emweni iteiten noun Kot ngeni ar pwisin nenien ning ewe a fich ngeni ar pwisin anneasochis me ikewe ia repwe asoso. Ewe soukopung ina ach Chon Amanau, Jises Kraist (nengeni John 5:22; 2 Nifai 9:41). An unusen tipachem a ngeni an sineiochu meinisin ach foffor me mochen, ir me ruu ekkewe sise aier seni ika sise siwini me ekkewe sia aier seni ika siwini. Ina minne, mwirin An kapung meinisin sipwe pwarata “pwe an kapung mi wenechar” (Mosaia 16:1).

Nesoponon, ua pwarata pwan ai nukuchar ua kuna non ekkewe taropwe mi mak ngeniei me ai nengeni ekkewe tingor pwe repwe niwin ngeni ewe Mwichifen mwirin ar katou ika kapung. Chommong nouch memper rese unusen weweiti ei kokkotun manau ese much, ina ewe ponuen kapas eis ren ekkewe nongonong me annukun ei Mwichifen mi niwinsefan. Kich ekkei sia sinei an Kot kokkot me sia pwonei ach achocho me a fat ngenikich wisach sipwe afanafana ekkei ennet me fori met sia tongeni pwe repwe efeioch aramas me kich pwisin non ei manau. Ua pwarata usun Jises Kraist, ach Chon Amanau, ewe a etufichikich meinisin, non iten Jises Kraist, amen.