Emon Chon Pwarata mi Manaw ren ewe Kraist mi Manaw

Ew ran mei saram non 2017, ewe sukun imw ren ewe tempel an Paris France a fis nupwen emon mwan mi mesen noninen a kinengeni emon kewe chon emwen. A apasa pwe a nomw nukun ewe tempel me a fangeta pwe ii chon ungeni ewe angangen pekin keun imw. A apasa pwe ew ran a neu me non asamwachon imwan ewe, a katon ew watten krein a ekisetiw ewe niosun Jises seni nang me a anifatiw unukun ewe tempel. Ewe mwan a pwarano pwe met a fis a unusen ekesiwini an memef ngeni ewe Mwichefen. A sineni pwe am chon tapweno mwirin Jises Kraist me a tungor aupwe omwusano tipisin ren met a fori akomw ra efisata.

Sasing

Nios a nomw won ewe tempel Paris France

Ewe niosun ewe Kiristus, ewe a eninga unukun ewe tempel non Paris me pwan ekoch nenien Mwichefen, a pwarano ach tongei ewe Chon Amanau. Ewe akaewin nios mi for seni marbel ina an ewe Danish artist Bertel Thorvaldsen, ewe a fori non 1820—pwan ewe ier ren ewe Aewin Nemwasepwi. Ewe nios a keuta non unusech usun ew euchean pekin chunga mei kawor non ena fansoun, ewe a watte awewen ngeni an Kraist riafou won ewe irapenges. An Thorvaldsen angang a wewe ngeni ewe Kraist mi manaw, ewe a poracho ngeni mano me, ren peun mei suuk, a tungorei kich meinisin sipwe feito ren. Kewe chok nemomon pwangen chufen non peun kewe me ewe kinasen nepekin a pwarata ewe riafou ese wor sokkun a nomw non an epwe tumunu meinisin tapin aramas.

Sasing

Poun ewe Chon Amanau a pwano non ewe Christus

Ew popun kich chon ewe Mwichefenin Jises Kraist ren Aramas mi Pin non Fansoun Sopwonon sia tongei ei nios ren an achema ngeni kich ewe tichikin a ngeni kich non ewe Pukel Mormon fan iten ewe Chon Amanau won kewe fonuen Merika:

Sasing

Jises Kraist a tori Merika

“Iwe nengeni, ra kuna emon Mwan a feitiw seni nang; iwe a ufouf echo uf mi pwech; iwe a feitiw me uta nukanaper. …

“Iwe non ewe fansoun pwe a eitieu poun me kapas ngeni ekkewe aramas, a apasa:

“Nengeni, ngang Jises Kraist, …

“… Me ua fen un seni ewe kap mi kipwin minne ewe Sam a fen ngeniei, me ua fen eningano ewe Sam non ai wata woi tipisin ewe fonufan.”¹

Iwe a tungorei emon me emon kewe mwan, fefin, me semirit ar repwe feito me wata peur won nepekin me mefi nemomon kewe chufon non peun me pechen, iwe repwe pwisin kuna pwe ii ewe mesaia.²

Ei fansoun mi auchea mi ew amwarar ren ewe Puken Mormon. Ewe unusen “auchean poraus” ren ewe kapas allim a wor niosun ewe chon Amanau a eitau “poun umoumoch”³an epwe tungorei emon me emon repwe feito ren me repwe angei feiechun An Achasefan.

Ewe popun poraus seni ewe Puken Mormon an epwe awora sefani ewe sinei mei ennet ren ewe wis mi namwot ren Jises Kraist ren manauan me fefeitan aramas meinisin. Ekei itenap ra neuemong seni kewe peichen awewe tori kewe saingon kapas non ewe saingon sopun. Non chomong ierin ese chiwen wor nuku me umwesimwesin ngun, anononun wewen met Kraist a fori non Gethsemane me won Golgotha ra poutuno ika ngawono. Epwe ifa ukukun an Joseph Smith pwapwa nupwen, an a awewei 1 Nifai, a kuna ei amwararen pwon: “Ekkei amuchunon uruo [ewe Puken Mormon], … repwe apungano ewe ennetin ekkewe aewin uruo [ewe Paipen] … iwe repwe pwarano ekkewe mettoch mi fatafatoch me fokkun auchea minne ra fen angeiano senir; iwe repwe pwarano ngeni meinisin einang, sokopaten kapas, me aramas, pwe ewe Namen Kot i Noun ewe Sam Esemuch, me ewe Chon Amanauen ewe fonufan; iwe pwe mi auchea aramas meinisin repwe feito ngeni i, are esap ina resap tongeni manau.”⁴

Ekkewe nongonong mi ennet me auchea fan iten an ewe Chon Amanau Achasefan a nouemong non ususen ewe Puken Mormon. Ren ai uwa atetenatiw kei nongonong mi ennet, uwa tungorei kemi ami oupwe ekieki ifa usun ra fen ekesiwini ika repwe ekesiwini manauom.

1. Ewe Achesafan an Jises Kraist ew nifang ese kamo a nifang ngeni meinisin ekewe rafen nomw, ekewe iir mei nomw, me ekewe repwe nomw won fonufan.⁵

2. Pwan kapach ngeni an eki choun ach tipis, ewe Kraist a angei won winikapan ach netipechow, nipwakingaw, riafou, semwen, me meinisin kewe weires rafen fisita ren nonomwun aramas. Ese wor riafou, metek, ika netipeta ese mwo fen ani weiresin ren fan itach.⁶

3. Ewe achasefanin an ewe Chon Amanau riaffou a mwut ngeni kich ach sipwe tou seni ekkewe ngawen turutiwen Adam, kapachonong manon inis. Pwokiten Kraist, noun Kot meinisin ra upwutiw won ei fonufan, ese nifinifin ar nuku, repwe kuna chufengenin inisir me ngunur non pochokunen ewe Manau Sefan⁷me niwin ngeni Ii pwe “epwe kapung anongonong won [ar] angang.”⁸

4. Ren awewe, ach angei unusen feiechun an ewe Chon Amanau Achasefan a anongonong won ach achocho⁹ ren ach manaueni ewe “nongonong mi ennet an Kraist,.”¹⁰ Non an tan, Liai a kuna ewe “aan mi aukukkun me chokisikis”¹¹ ewe a emwen ngeni ewe iran manau. Foun kewe, ra wewe ngeni ewe tongen Kot a pwano non kewe feiochun an Kraist Achasefan, “a fokkun auchea me unusen murino seni meinisin …[me] ina ewe unusen auchean me nein ekkewe niffangen Kot.“¹² Ren ach sipwe togeni angei ei foun ira, sipwe anganga ach nuku non Jises Kraist, aier, “aneasochis ngeni ewe kapasen Kot,”¹³ angei ekewe fofor mi pin mei namwot, me aponuweta ekkewe pwon mi pin tori nesopwonon manauach.¹⁴

5. Non An Achasefan, Jises Kraist ese chok nimetano ach kewe tipis, nge a pwan awora manamanen tufich ren usun noun kewe chon kaeo repwe “[nikitatiw] ewe inisin aramas,”¹⁵echunon “ekis me pwan ina ekis”¹⁶ me awateno non mi pin¹⁷ pwe non ew ran repwe tongeni winiti ochun inis non ewe napanapen Kraist,¹⁸ ar repwe tongeni manau safan ren Kot¹⁹ me repwe angei meinisin feiochun ewe muun nang.²⁰

Pwan ew nonomwechun ennet a nomw non ewe Puken Mormon, ina mwo ese wor keukun me ese nifinifin nonomwun, an ewe Samon Achesafan a unusen echipwer fan itach me ningechun niffang, a sais ngeni emon me emon kich.²¹ Usun chok Jises a tungorei emon me emon noun kewe chon kaeo ir chon Nifai ar repwe atapa kinasan kewe, A mano fan itach, won winikapach, usun nge ita kich chok kewe aramas won fonufan. A ngeni kich ew tungor ach sipwe feito ren me tonong non ewe feiechun an Achesafan mei echipwor.²²

Ewe nonomwechun an Kraist Achesafan a fen unusech ren ach sia anomwu ekei awewe mei unusech ren kewe mwan me fefin non ewe Puken Mormon. Neir a nomw Enos, Alma, Zeesrom, King Lamonai me pwunuwan, me kewe aramasen King Benjamin. Pworousen ar ekesiwin me pwarata ra aworato ewe manawen pwarata ifa usun ngasangasach epwe ekesiwin me manauach epwe siwin non an ewe Samon ning me tong ese much.²³

Ewe soufos Alma a eiseni noun kewe aramas ei kapas eis. Ewe Soufos Alma a eisini noun kewe aramas ei kapas eis: “ika oua fen mefi pwe oupwe konu ewe konun tongen ngaseno, upwe eis, ami mi tongeni mefi iei²⁴Ei kapas eis a men auchea ikanai, pwokiten kich noun ewe Samon chon kaeo, an pochokun mei pwano epwe emwenikich, epochokunakich, me ekesiwinikich iteiten ran.

An Alma kapas eis apwan tongeni ekesiwin an epwe eis: inet ewe saingon fansoun kafen mefi ewe etipetip seni ewe Achasefan an ewe Chon Amanau non manawom? Ei a fis nupwen ka mefi pwapwa “a kon wachemuk me ngarangar”²⁵ a toruk ewe a pwarata ngeni ngunumw pwe omw tipis rafen pichino; ika nupwen sosot mei aweires ra pwas omw kopwe eki; ika nupwen manauom a pweteteno me ka tongeni epichano emon a emetekuk. Ika epwe iteiten ka kuna pwe omw tongeni omw kopwe tongei me anisi ekoch a wateno, ika ewe foforun epinano a fori omw kopwe emon aramas mei sokono, foforun mwirin an ewe chon Amanau awewe.²⁶

Uwa pwarata pwe meinisin ekiei fofor mei ennet me ra pisekin pwarata pwe manau epwe tongeni ekesiwin ren nuku non Jises Kraist me An Achasefan. Ewe Puken Mormon a aweweochu me awateno ach sinei usun ei nifangen nang. Ren omw ka kaeo ei puk, kopwe rongorong mengungun ewe Kraist mi manau a tungor omw kopwe feito ren. Uwa pwon pwe ika ka angei ekei tungor me fori non manauom mwirin an kei awewe, an pochokunen ngasono epwe tori non manauom. Ren ewe manamanen ewe Ngun mi Fel, ewe Chon Amanau epwe ekesiwinuk ran mwirin ran tori ewe ran mi unusoch²⁷ nupwen kopwe, usun A fen apwarano, “kuna mesei me sinei pwe ngang iei.”²⁷ Non iten Jises Kraist, amen.