Mwichenapen Mwichefen
Ewe Feiochun Soposoponon Pwarata ngeni Soufos me ach Pwisin Pwarata minne epwe Emweni Manauach
April 2020 mwichenapen mwichefen

Ewe Feiochun Soposoponon Pwarata ngeni Soufos me ach Pwisin Pwarata minne epwe Emweni Manauach

Seni Elter Quentin L. Cook

Seni ewe Mwichen Engon me Ruemon Aposel

Pwarata mi sopospono a kawor me a chiwen akangei me ren ekkewe napanap minne ewe Samon a awora.

Ikenai upwe kapas usun soposoponon pwarata ngeni soufos me soposoponon ach pwisin pwarata minne epwe emweni manauach.

Fan ekkoch sia angei pwarata nupwen mwo sise sinei an ewe Samon popun. Mwen chok Elter Jeffrey R. Holland epwe kokko ngeni an epwe emon Aposel non June 1994, ua angei ew pwarata pwe i epwene kokko ngeni ena wis. Ua emon chon tupuni kinikinin neni me use sinei popun pwata a kawor ngeniei ena mirit. Nge am companion nupwen am kukkun misineri non England non ekkewe ier 1960, me a watte ai tong fan itan. Ua ekieki met a fis pwe ew umoumoch ngeniei. Non ekkei ier, ua fen ekieki pwe ewe Samon a amonnaeita ai upwe kis non ewe Engon me Ruemon ngeni emon chienei misineri i ai companion mi kis nupwen am kukkun misineri.1 Fan ekkoch ua fonou kukkun misineri repwe kirekiroch ngeni ar kewe companion mi kis pokiten resap sinei inet repwe winiti ar companion mi nap.

Ai pwarata mi pochokun pwe ei Mwichefen mi niwinsefan mi emwen me ren Ach Chon Amanau, Jises Kraist. I a sinei ion epwe kokkori an epwe Noun Aposel me non met tettenin epwe korir. Mi pwan sinei ifa usun epwe amonnata Noun Aposel mi nap an epwe ewe soufos me Presetenin ewe Mwichefen.

Sia feioch nesosor ewe ach rongorongo ngeni nouch achengicheng soufos, Preseten Russell M. Nelson, a ngenikich ew esinesinen achechemen 200 ier ngeni ewe fonufan usun ewe Niwinsefaniton ewe unusochun ewe kapas allimen Jises Kraist.2 Ewe auchean esinesin me ren Preseten Nelson a affata pwe ewe Mwichefenin Jises Kraist a angei poputan, fisitan, me emwenin fansoun mwach seni ewe nongonongen soposoponon pwarata. Ewe minafon esinesin a tupuni emon Sam mi tong an kapas ngeni Noun semirit.

Non ew fansoun akkom Preseten Spencer W. Kimball awewei ewe memef ua mefi ikenai. A apasa: “Seni mettoch meinisin, ewe … sipwe kinisou [fan itan] in pwe ekkewe nang ir mi ennetin suk me ewe mwichefen mi niwinsefan an Jises Kraist a foruta won ewe foun pwarata. Soposoponon pwarata ina ennetin manaueni ewe kapas allimen ewe Samon mi manau me Chon Amanau, Jises Kraist.”3

Ewe soufos Enoch a osini ekkewe ran minne sia nom non. Ewe Samon a pwar ngeni Enoch ewe fofforungaw epwe watteno me osini usun ekkewe “watten riaffou” epwe fis. Inamo, ewe Samon a pwonei, “Nge nei aramas Upwe tumunur.”4 “Me wenechar Upwe tinatiw seni nang; me ewe ennet Upwe tinano seni ewe fonufan, pwe epwe pwarata usun Noun we Chon Anamon.”5

Preseten Ezra Taft Benson a asukun ren watten manaman pwe ewe Puken Mormon, ewe foun nongonongen ach namanam, a feito seni ewe puun an epwe apwonueta an ewe Samon esinesin ngeni Enoch. An ewe Sam me ewe Nau me chon nang me soufos pwato ren ewe Soufos Joseph Smith ra “emwen seni nang an epwe eniwini manaman mi auchea ngeni ewe muu.”6

Ewe Soufos Joseph Smith a angei chommong pwarata. Ekkoch a fen katou non ei mwichenap. Chommong pwarata Joseph Smith a angei ra ren tumun fan itach me non ewe Doctrine and Covenants. Meinisin ekkewe puken nongonongen ewe Mwichefen mi masouweni ekiekin me mochenin ewe Samon fan itach non ei amuchunon kinikinin fansoun.7

Kapach ngeni ekkei auchean pukefel, sia feioch ren soposoponon pwarata ngeni soufos mi manau. Soufos ra “ewis ne tupuni ewe Samon, ra mumuta ar repwe kapas fan itan.”8

Ekkoch pwarata ra watte auchear, me ekkoch ra awatteno ach weweiti usun auchean ennet me awora emwen fan iten ach fansoun.9

Sia ennetin kinisou ren ewe pwarata ngeni Preseten Spencer W. Kimball an atoura pristut me feiochun tempel ngeni meinisin chon ewe mwichefen mwan mi nimenimoch non ewe Mwichefen non June 1978.10

Ua fen angang ren chommong ekkewe Engon me Ruemon ekkewe mi nom me fiti nupwen ena auchean pwarata a fis. Emon me emon, non pwisin ar porous, ra apungano ewe pochokunen me achufengenin emwenin ngun Preseten Kimball me ir ra meffi. Chommong ra apasa pwe ina ewe pwarata ra angei a kon manaman mwan me mwirin ena fansoun.11

Kich ekkewe mi chiwen angang non ewe Mwichen Engon me Ruemon Aposel sia feioch non ach fansoun nupwen chommong pwarata ra feito ren ekkewe soufos.12 Preseten Russell M. Nelson a fen finita ne tupuni ewe Samon akkaewin ren pekin pwarata ne anisi famini ne aueta eppetin nuku non imwer, ionfengeni Israel mi toropas, ekkewe mi manau me mi mano, me efeiochu chon mwichefen ra angei endowment ren angangepinen tempel.

Nupwen siwin mi auchea epwe efeiochu imwach ra tou non ewe October 2018 mwichenapn mwichefen, ua pwarata “pwe non ewe mwichen Chon ouroruen ewe Aewin Presetensi me ewe Mwichen Engon me Ruemon Aposel non ewe tempel, … mwirin nouch achenicheng soufos a tingorei ewe Samon ren pwarata … , ew pochokunen punguno a torikemi meinisin.”13

Non ena fansoun, ekkoch pwarata mi wewe ngeni angangepinen tempel ra fen ketiw nge ause mwo esiner em poputanir.14 Ei emwen a poputa ren pwisin pwaratan soufos ngeni Preseten Russell M. Nelson me punguno non pwetete me manaman ngeni ekkewe mi fiti ei mwokutukut. Preseten Nelson a etiwa ekkewe sister mi nemeni Fin Anisi, ekkewe Fopun, me kinikinin Kinter. Ewe amuchunon emwen, non ewe tempel, ngeni ewe Aewin Presetensi me Mwichen Engon me Ruemon Aposel a ur ren ewe ngun me manaman. Meinisin am aua angei ewe ekiek, mochen, me mongungun ewe Samon.15

Ua affata ren ennet pwe aua fen angei soposoponon pwarata seni aanen porous ewe Samon a fen forata. Ua pwarata pwe ewe minafon esinesin Preseten Nelson a wau non ei sosoran ew pwarata epwe efeiochu aramas meinisin.

Aua wau ew Tingor ngeni Meinisin ne Kametip ren an ewe Samon Chepen

Aua pwan affata am ennetin mochen chusefan ngeni ekkewe ra fen weires ren ar kapasen pwarata, ra patapateno, ika tonau iter seni rekotun Mwichefen. Aua mochen kametip remi, “won ekkewe kapasen Kraist,” ren an ewe Samon chepen, ne kaeo ekkewe mettoch kich meinisin sipwe fori.16 Ami mi auchea ngenikem! Ami mi auchea ngeni ewe Mwichefen! Ami mi auchea ngeni ewe Samon! Am ennetin iotek pwe oupwe fitikem ne fen ngeni ewe Chon Amanauen ewe fonufan. Am mi sinei pwe ekkoch ami emon a asonga kemi, kiringaw, ika ekkoch mwokutukut ese napanapan Kraist. Am mi pwan sinei pwe ekkoch mi wor weires a tori ar nuku menin rese ennetin etiwa, weweiti, ika awesano.

Ekkoch nouch kewe memper mi tupwon me nukuchar ra engino ngeni ew weiresin ar nuku non och fansoun. Ua sani ewe ennetin uruon W. W. Phelps, ewe a nikitano ewe Mwichefen me ungeni ewe Soufos Joseph Smith non ew neenien kapung Missouri. Mwirin an aier, a mak ngeni Joseph, “Ngang mi sinei nonnomui, en mi sinei, me Kot mi sinei, me ua mochen ngaseno ika chienei kewe repwe anisiei.”17 Joseph a omusano i, aniwinanong non angang, me makkei non tong, “Chiechi akkom ra chiechi sefan.”18

Pwi, me fefinei, ese nifinifin nonnomum, ouse mochen oupwe sinei pwe ewe Mwichefen me chochon repwe etiwas sefanuk!

Ach pwisin Pwarata Epwe Emweni Manauach

Ach pwisin pwarata mi fich ngeni ir meinisin ekkewe ra tekison ne kutta emwen seni ewe Samon. Mi auchea usun chok an soufos pwarata. Ach pwisin pwarata seni ewe Ngun mi Fel a punguno ren minion ra angei ar kapasen pwarata mi auchea ar repwe papatais me epinano pwe chon Ewe Mwichefenin Jises Kraist ren Aramas mi Pin non Fansoun Soponon.

Ach pwisin pwarata ina ewe auchean feioch sia angei mwirin papatais nupwen sia “nimenimochuno ren ketiwen ewe Ngun mi Fel.”19 Ua tongeni chechemeni ew auchean pwaratan ngun nupwen ua 15 ieri. Pwi we auchea a kutta emwen seni ewe Samon ren ifa usun an epwe ponuweni semwem we achengicheng, ewe ese mochen pwi we epwe angangen misineri. Ua pwan iotek ren ennetin mochen me pwisin angei ai pwarata usun ennetin ewe kapas allim.

Ewe Wisen ewe Ngun mi Fel

Ach pwisin pwarata a anongonong won ennetin ngun seni ewe Ngun mi Fel.20 Ewe Ngun mi Fel I ewe chon echikar me chon pwarata usun ennet meinisin, akkaewin usun ewe Chon Amanau. Me nukun ewe Ngun mi Fel, sisap tongeni sinei pwe Jises I ewe Kraist. Wisan mi auchea ina an epwe pwarata usun ewe Sam me ewe Nau me Ar itenap me Ar ning.

Ewe Ngun mi Fel a tongeni amemefi meinisin non ew napanap mi pochokun.21 Ei memef esap fis fansoun meinisin tipwenon chok emon mi papatais me angei ewe niffangen ewe Ngun mi Fel. Ewe Ngun mi Fel a pwan fis pwe emon chon enimenim non ewe angangen aier me omusomus.

Ewe Ngun a porous non napanap mi amwarar. Ewe Samon a aea ei wewe mi ning:

“Upwe ne urenikemi non ami ekiek me non netipemi ren ewe Ngun mi Fel, minne epwe feito remi me epwe nom non netipemi.

“Iei minne, iei ewe ngunun pwarata.”22

Inamo pochokunan mi tongeni epwe nap, napengeni a feito non mongungu mi mosonoson me neukukun.23 Ekkewe pukefel mi pachenong chommong awewen ifa usun ewe Ngun epwe amemefi ach ekiek, mi pachenong an kapas kinamwe ngeni ekiek,24 ounusa ach ekiek,25 asarama ach ekiek,26 me pwan ew mongungu ngeni ach ekiek.27

Ekkoch nongonong mi emwenikich ne angei pwarata mi pachenong:

  • Iotek fan iten emwenin ngun. Non mosonoson me tekison mi auchea sipwe kutta me tingor28 me tipepos me fangoch.29

  • Ammonata ngeni ourour. Ei epwe auchea pwe sipwe etiwa an ewe Samon afanafan me tipeew ngeni An annuk.

  • Angei ewe Sakrament non nimenimoch. Nupwen sia fori ei, sia pwarata me pwon ngeni Kot pwe sipwe wata woch itan Noun we mi Pin me sipwe chechemeni I me aneasochisi An annuk.

Ekkei nongonong ra amonnakch ne angei, esinna, me tapweno mwirin ourouren me emwenin ewe Ngun mi Fel. Ei mi pachenong ekkewe “mettoch me ekinamwe … minne ra wato pwapwa [me] … manau esemuch.”30

Ach amonnetan ngun a napeno nupwen sia kaeo ekkewe pukefel iteiten fansoun me ennetin ewe kapas allim me echikpwichi non ach ekiek ewe emwen sia kutta. Nge chechemeni kopwe tipepos me nuku non an ewe Samon kokkoten fansoun. Emwen mi kawor ren ewe Samon mi sinei mettoch meinisin nupwen I “a finata epwe aitikich.”31

Pwarata non Kokkoch me Wisach

Ewe Ngun mi Fel epwe awora pwarata non kokkoch me wisach kewe. Non ai sinei, auchean emwenin ngun a feito nupwen sia achocho ne efeiochu ekkoch ren ach sipwe apwonueta wisach.

Ua chechemeni ai keran emon bisop ua ponuweni ew kokko seni ruemon mi pupunu ra sio me mwen chok upwe no fiti efoch sepenin ren pekin angang. Ua tingor ngeni ewe Samon me mwen ar wareto ai upwe sinei ifa usun upwe efeiochur. A pwato ngeniei usun ewe osukosuk me ponuwan upwe ngenir. Ewe emwen mi pwato a mut ngeniei ai upwe apwonueta monomonen wisei we ren pisop ina mwo ika ai fansoun a aukuk. Pisop non unusen ewe fonufan ra pwan aporousa ekkei sokkun memef ngeniei. Non wisei presetenin steik, use chok angei pwarata mi auchea nge ua pwan angei pwisin apungui mi auchea ren ai upwe awesi an ewe Samon popun.

Ua pwon ngenikemi pwe kich mi tongeni angei emwen mi pwato nupwen sia tekison ne angang non an ewe Samon atake. Napengeni ach emwen ra feito seni ewe Ngun mi Fel. Fan ekkoch me ren ekkoch popun, a feito wewewen seni ewe Samon. Ua pwisin pwarata pwe ei mi ennet. Emwen fan iten ewe Mwichefen, non unusen, a feito ngeni ewe Preseten me soufosun ewe Mwichefen.

Am, Aposel ikenai, a wor rem ewe tufich ne angang me fiti nouch we soufos, Preseten Nelson. Upwe apasa sefani met Wilford Woodruff a apasa usun ewe Soufos Joseph Smith; mi pwan wewe ennetin usun Preseten Nelson. Ua fen kuna “angangen ewe Ngunun Kot ren i, me ekkewe pwarata usun Jises Kraist ngeni me pwonutan ekkewe pwarata.”32

Ai tingor mi tekison ikenai pwe emon me emon kich sipwe kutta soposoponon pwarata minne epwe emweni manauach me tapweno mwirin ewe Ngun nupwen sia fen ngeni Kot ewe Sam non iten ach Chon Amanau, Jises Kraist, i ewe ua pwarata non iten Jises Kraist, amen.

Esinesin

  1. Non 1960 nupwen ierin misineri ren anuon epwe kisitiw seni 20 ngeni 19 ier, ua emon nein ekkewe saingonon 20 ier; Elter Jeffrey R. Holland i emon nein ekkewe akkomwen 19 ier.

  2. Nengeni “The Restoration of the Fulness of the Gospel of Jesus Christ: A Bicentennial Proclamation to the World,” in Russell M. Nelson, “Ausening ngeni I,” Liahona, May 2020, 91. Ei Esinesin mi chu ngeni nimu ekkoch ra fen kawor non ei kinikinin fansoun me ren ewe Aewin Presetensi me ewe Mwichen Engon me Ruemon Aposel.

  3. Teachings of Presidents of the Church: Spencer W. Kimball (2006), 243; see also Matthew 16:13–19.

  4. Moses 7:61.

  5. Moses 7:62. Ewe Samon a soposopono, “Me epwe efisi wenechar me ennet minne Upwe nimeti ewe fonufan usun noter pwe epwe ioni noun kewe mi finita seni ekkewe ruanu kinikinin fonufan ” (Moses 7:62; nengeni Konupin 85:11).

  6. Ezra Taft Benson, “The Gift of Modern Revelation,” Ensign, Nov. 1986, 80.

  7. Nengeni Ezra Taft Benson, “The Gift of Modern Revelation,” 80.

  8. Hugh B. Brown, “Joseph Smith among the Prophets” (Sixteenth Annual Joseph Smith Memorial Sermon, Logan Institute of Religion, Dec. 7, 1958), 7.

  9. Nengeni Hugh B. Brown, “Joseph Smith among the Prophets,” 7. Usun meinisin, ekkewe pwarata ir mi etipew ngeni ewe kapasen Kot mi kawor ngeni soufos akkom.

  10. Nengeni Official Declaration 2; pwan nengeni 2 Nifai 26:33. Ewe pwarata efisi nongonong mi kawor non ewe Puken Mormon pwe “meinisin ra nonno chok ngeni Kot,” mi pachenong “chon me pwechepwech, chon fotek me chon ngaseno, mwan me fefin” (2 Nifai 26:33). Ei pwarata mi amwarar a ketiw me kapunguno non ewe rumw monomon asan ewe Salt Lake Tempel me ren ewe Mwichen ewe Aewin Presetensi me Mwichen Engon me Ruemon Aposel.

  11. Chommong ekkewe Aposel ra affata pwe ewe pwarata a fokkun manaman me pin minne ai kapas ne awewei ese naf me, non ekkoch napanap, epwe ekisatiw anonnonun me manamanen ewe pwarata.

  12. Nengeni “The Family: A Proclamation to the World,” Liahona, May 2017, 145. Ei esinesin mi annea seni Preseten Gordon B. Hinckley me non ewe Mwichenapen Fin Anisi mi fis won September 23, 1995, non Salt Lake City, Utah. Nengeni pwan Thomas S. Monson, “Welcome to Conference,” Liahona, Nov. 2012, 4–5. Preseten Monson a esinei ew auchean ekukkunitiwen ierin misineri.

  13. Quentin L. Cook, “Deep and Lasting Conversion to Heavenly Father and the Lord Jesus Christ,” Liahona, Nov. 2018, 11.

  14. Ekkewe pwarata mi wewe ngeni angangepinen tempel ra fis non tempel meinisin poputan non January 1, 2019. Mi auchea ne weweiti pwe tichik usun angangepinen tempel sipwe chok porous usur non tempel. Nge, nongonong ra keit. Elter David A. Bednar a aiti non ning usun auchean ewe temple angangenepin me pwon mi pin me ifa usun me rer “ewe manamanen napanpen kot a tongeni ureno manauach” (“Let This House Be Built unto My Name,” Liahona, May 2020, 86).

  15. Ei mwokutukut me ekkewe mwich ra fis non ewe Salt Lake Tempe non January, February, March, me April 2018. Ewe amuchunon pwarata ngeni ewe Aewin Presetensi me ewe Mwichen Engon me Ruemon Aposel a fis non April 26, 2018.

  16. Nengeni 2 Nifai 32:3.

  17. Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 418.

  18. Saints, 1:418.

  19. 3 Nifai 27:20.

  20. Ewe Ngun mi Fel i chon ewe Unumon Kot (nengeni 1 John 5:7; Doctrine and Covenants 20:28). A wor inisin usun ngun non napanapen me nikinikin aramas (nengeni Doctrine and Covenants 130:22). An pochokun mi tongeni nom ekis meinisin. I mi tipechu non popun me Samach won Nang me Jises Kraist, ach Chon Amanau.

  21. Ren ennetin weweiti usun ewe Saramen Kraist me sokofesenin ewe Saramen Kraist me ewe Ngun mi Fel, nengeni 2 Nephi 32; Doctrine and Covenants 88:7, 11–13; “Light of Christ,” Bible Dictionary. Nengeni pwan Boyd K. Packer, “The Light of Christ,” Liahona, Apr. 2005, 8–14.

  22. Nengeni Doctrine and Covenants 8:2–3.

  23. Nengeni Ilaman 5:30Doctrine and Covenants 85:6.

  24. Nengeni Doctrine and Covenants 6:23.

  25. Nengeni Doctrine and Covenants 128:1.

  26. Nengeni Doctrine and Covenants 11:13.

  27. Nengeni Enos 1:10.

  28. Nengeni Matthew 7:7–8.

  29. Nengeni Mosaia 3:19.

  30. Nengeni Doctrine and Covenants 42:61.

  31. Neal A. Maxwell, All These Things Shall Give Thee Experience (2007), 31.

  32. Wilford Woodruff, in Teachings of Presidents of the Church: Joseph Smith (2007), 283.