Ekieki usun ewe Kirekiroch me Ningen Kot

Me non fansoun meinisin,usun me akaewin fansoun riafou, ekkewe soufos ra aitikich ach sipwe chechemeni ewe ningen Kot me ekieki met A fori fan itach ren emon me emon, ren pekin famini, me ngeni aramas meinisin.² Ei auraur a nom me non unusen ekkewe pukefel nge a kon itefouno me non ewe Puken Mormon. Ewe peiichen itenap a awewei pwe eu ekkewe popun ren ewe Puken Mormon pwe “epwe pwar ngeni ekkewe mwirimwirin chon ewe imwen Israel ekkewe mettoch mi napanap ewe Samon a fori ngeni semer kewe.”³ Ewe Puken Mormon a asopwano ren an Moronai tingor: “Nengeni, ua mochen pesei kemi pwe nupwen oupwe anneani ekkei mettoch … pwe oupwe chechemeni ifa usun umoumochun ewe Samon a fen ngeni ekkewe aramas, … me ekipwichi non netipemi.”⁴

Ewe ekesisiwin ren tingor seni ekkewe soufos pwe sipwe ekipwichi won ewe kirekirochun Kot a men amwarar. ⁵ Semach won Nang a mochen pwe sipwe chechemeni kirekirochun I me Noun we At mi Achengicheng, esap faniten pwisin Ar eningano ir nge fan iten ewe achecheman aninis mi tori ngenikich. Non ach ekieki ren Ar ochupor, ach nonongeni me weweiti a watteno. Ren ach chechemeni Ar tong, sipwe fefeita non pekin tipetekison, uren iotek, me pochokun.

Eu fansoun mi aweires a fiis ren emon ua tumunu me noom a pwari ifa usun kinisoun fangeno me tong a tongeni ekkesiwini kich. Non 1987, uwa chieneni Thomas Nielson, emon mwan mi amafen me a mochen epwe angei eu feun ngasangas minafo. A 63 ierin me a nom non Logan, Utah, non Merika. Mwirin an angangen sounfiu non World War II, I a punuweni Donna Wilkes non ewe Logan Utah Temple. A winiti emon chon for simen mi pochokun me feifeita non angang. Non ekkewe ier a no a fokun sani an angang fengen ngeni emon tettenin noun at watte, Jonathan, atun asoson sukkun. Ir me ruemon ra men chiechieoch fengen, pokitan Tom a men kuna pwisin I non Jonathan.

Tom a sinei pwe witiwit ren efou foun ngasangas emon epwe fang ngeni mi aweires. I emon ese kan sani an epwe witiwit. Fansoun meinisin a tongeni fori me apwonueta met a mochen ren an angangoch me achocho ngeni. An apwangapwangen ngasangas, me manauwan mi mochomochono, Tom a eisini ei fan ekkoch met uwa fori an epwe mwitiri ewe angang. Non an urumot, a ereni ei ekkoch mettoch uwa tongeni fori minne epwe amwitiri an epwe angei ewe feun ngasangas emon epwe fang ngeni.

Eu ran mi och nge pwan aweires, emon chon fang ewe ngasangas mi nonofengen a or fan iten Tom. Ewe sais me ewe cha a nonnofengen, me ewe chon niffang a emon sarafo, a chok 16 ierin. Ewe niffang ngasangas a eto seni Jonathan, tettenin noun Tom we at mi achegnicheng. Me mwen non na ran, Jonathan a mano nupwen efoch train a purei ewe taxi minne a nom non.

Nupwen uwa churi Tom me Donna non ewe pioing, ra men netipechou. A weires sipwe weiweiti met sakun osukosuk ra tonong non, ra sinei pwe ra tongeni attamano manauen Tom ika ra ngeni foun ngasangasen tettenin nour ewe at. Akkom, rese mochen ekieki usun repwe angei ewe ngasangas seni semen me inen Jonanthan mi netipeta, nour we nengin me punuwan. Tom me Donna ra sinei, ikamo, pwe tupuwan mokuran Jonathan a fen mano, me ra poputa ne weweiti pwe ar kewe iotek fan iten eu nifangen ngasangas fan iten Tom esap ewe popun ewe osukosuk a fis ngeni Jonathan. Apw, feun ngasengasen Jonathan a eu niffang minne a tongeni efeiochu Tom non an fansoun apwapwang. Ra esinna pwe mi tufich eu mettoch mi och a tongeni feitto seni ei mettoch mi weires me ra fini repwe sopweno.

Ewe ekesiwinin feun ngasangas a fis a fisioch. Mwririn, Tom a emon mwan mi sokkono. Ewe siwin a nap seni pocohokunen inisin me noom ika fen kinisoun. A ereniei pwe iteitan nesosor a ekieki usun Jonathan, me noun nengin me punuwan, won ewe niffang a angei, me won met ena niffang a awewen. Ina mwo an kewe nikinikin atakirikir mi chok sin won me an achocho, uwa kuna pwe Tom a watteno non an tipetekison, ekiekoch, me kirekiroch.

Tom a manau kapacheta 13 ier mwirin ewe ekesiwinin ngasangas, ekkewe ier minne esap tongeni manau ika ese fis. Ewe poraus mi mak usun an mano a era pwe ekkei ier a atufichi an epwe efeiochu manauen an kewe famini me ekkoch ren an umoumouch me tong. I emon mi ammona an anisi aramas me emon chon nenien appiru ren pwapwa me achocho.

Usun chok Tom, emon me emon kich sia fen angei niffang minne sise tongeni angei pwisinkich, niffang seni Semach won Nang me Noun we At mi Achengicheng, tori pwan nimenimoch sefan me ren ewe achasefanin Jises Kraist.⁶ Sia angei manauach won ei fonufan; sipwap angei ennetin manau non ewe manau mwirin ei, me pwapwa esemuch me manau ese muuch—ika sia fini—meinisin pokiten Semach won Nang me Jises Kraist.

Iteitan fansoun sia aea, feioch seni, ika pwan ekieki usun ekkei niffang, ururun sipwe ekieki usun ewe asoren, umoumouchun, me tong an ekkewe chon fangeno. Sufon fan iten ekkewe chon fangeno a tongeni efisi met napseni ach kinisou chok. Ach ekieki won ar kewe niffang mi tongeni me ururun epwe ekesiwini kich.

Eu watte siwin mi amwarar ena met a fis ren Alma ewe Nau. Nupwen Alma a “fein fetan ne ungeni Kot,”⁷emon chon nang a pwa. Ren “ew mongungun chopunap,”⁸ewe chon nang a afonu Alma ren an esita ewe Mwichefen me “sonano netipen ekkewe aramas.”⁹ Ewe chon nang a pwan apasa ekkei kapasen pesepes, “Feinno, me chechemeni ewe fotek ren semom kewe … me chechemeni met auchean mettoch [Kot] a fen fori fan iter.”¹⁰ Ren mettoch meinisin a tongeni apasa, ena met ewe chon nang a afata.

Alma a aier me a chechemeni. Mwirni Alma a aporausa an ewe chon nang kapasen pesepes ngeni noun we anuon Ilaman. Alma a pesepes, “Ua mochen pwe kopwe fori usun met ua fen fori, ne chechemeni fotekin semach kewe; pun ra nom non fotek, me ese wor emon a tongeni angasereno tiwenon chok pwe ewe Koten Abraham, … Isaac, me … Jacob; iwe i a ennetin angasereno me non ar kewe riaffou.¹¹ Alma a apasa, “Ua wanong ai apinukunuk non i.”¹² Alma a weweiti pwe ren an chechemeni an aramas ngaseno seni fotek me aninis non ar “sossot me osukosuk seni sokopaten nikinik,” sia kaeo usun Kot me ennetin An kewe pwon.¹³

Met a fis ngeni Alma ese fis ngeni chommong me neich, nge ach ekesiwin mi tongeni nonno auchean. Ewe Chon Amanau a pwon me non::

“Upwe ngeni kemi eu minafon ngasangas me eu minafon ngun upwe wanong non en: me upwe angei seni kemi netip mi uren fau … , me upwe ngeni kemi eu ngasangas non futuk.

“Me upwe wanong Nguni non en. …

“… Me oupwe nei aramas, me ngang upwe noumi Kot.”¹⁴

Ewe Chon Amanau mi manausefan a ereni ekkewe chon Nifai ifa usun ewe ekkesiwin a poputa. A pwarano eu kinikinin an Semach won Nang kokkot mi auchea nupwen A apasa:

“Iwe Semei a tinieito pwe upwe irapengesino won ewe irapenges; iwe mwirin ai uwa fen irapengesino won ewe irapenges, pwe upwe tongeni amarato aramas meinisin ngeniei. …

“Iwe ren ei popun uwa fen irapengesino; iei minne, anongonong won manamanen ewe Sam upwe amaratoaramas meinisin ngeniei.”¹⁵

Met epwe tongeni fiis pwe kopwe tongeni arap ngeni ewe Chon Amanau? Ekieki usun an Jises Kraist fori mochenin Seman, An winneni mano, An angei won pwisin I omw kewe tipis me mwan, An angei ewe manamanen ewe Sam ne wanong an tingor fanitom, me An ewe waten angangen chen fan itom.¹⁶ Ekkei mettoch ese nafouch om kosap arap ngeni I? Ina usun fan itei. Jises Kraist “a uta ren poun kewe mi sukuno, a mochen echikara, omusano, nimeti, apochokuna, eningano, me epinano [en me ngang].” ¹⁷

Ururun ekkei mettoch mi ennet epwe ngenikich eu minafon netip me esenipangn3ei kich ach sipwe fini ne tapweno mwirin Semach won Nang me Jises Kraist. Nge ren mwo minafon netip mi pwan tongeni “fetanin mwanecheno, … fetanin no seni ewe Kot [sia] tongei.”¹⁸ Ne fiu ngeni ekkei napanap, mi namwot sipwe ekieki iteitan ran usun ekkewe niffang sia angei me met ra wewen. King Benjamin pesepes, “Ua mochen pwe oupwe chechemeni, me fansoun meinisin oupwe chechemeni, ewe ningen Kot … me an kirekireoch me an engino ngenikemi.”¹⁹ Ika pwe sia fori ekkei, sipwe fokkun unusen feioch ren ekkewe feiochun nang.

Ach ekieki sefan ren kirikirochun Kot me an chen a anisikich ne awatteno ach tufichin achifouwa ren pekin ngun. Me pwan, wattenon ach tufichin achifouwa ren pekin ngun a atufichikich pwe sipwe kaeo ewe ennet ren mettoch meinisin me ren ewe manamanen ewe Ngun mi Fel.²⁰ Ekkei a pwan fiti eu kapasen pwarata usun ewe ennetin ewe Puken Mormon, sinei pwe Jises i ewe Kraist, ach pwisin Chon Amanau me Chon Angaseno, me sinei pwe An kapas allim a fen aniwinato non ekkei ranin soponon.²¹

Nupwen sia chechemeni ewe ningen Semach won Nang me Jises Kraist me met Ra fen fori fan itach, sisap tunano ne kinisou ngenir, usun chok Tom ese tunano an kinisou ren ewe feun ngasangas seni Jonathan. Non eu napanap mi pwapwa me masonoson, Tom a chechemeni iteitan ran ewe weiresin fansoun minne a efisii tamen manauan. Non ach pwapwano ren ach sinei pwe kich mi tongeni manau ren me fefeita, mi namwot sipwe chechemeni pwe manau esemuch me manau fefeita a tufich me ren ewe watten niwin.²² Kich mi tongeni pwapwa fiti mosonoson ren ach esinna pwe ika esap pokiten Jises Kraist sipwe poutmwanino nge ren I, sia tongeni angei ewe niffang mi napanap minne Semach won Nang a tongeni ngenikich.²³ Ennetin, ei masonoson a atufichikich pwe sipwe tongeni pwapwa non ewe pwon “ren manau ese much non ei manau” me non fansoun ach angei “manau ese muuch … iwe pwan ning ese much” non ewe manau epwene feitto.²⁴

Nupwen sia ekieki usun ewe kirikirochun Semach won Nang me Jises Kraist, ach apinukunuk non Ir a watteno. Ach kewe iotek ra siwin pun sia sinei pwe Kot i Semach me kich Noun semirit. Sisap kutta ne siwini An mochen nge sipwe achocho ne awenewena ach mochen ren An me angei fan itach ekkewe feioch minne A mochen ngenikich, anongonong won ach tingor fan iter.²⁵ Sia mochen pwe sipwe anapeno ach tipetekison, nimenimoch, nukuchar, me napanapen Kraist.²⁶ Ekkei siwin ra pwan atufichikich ren pwan ekkoch feioch seni nang.

Ren ach esinna pwe mettoch meinisin mi och a feitto seni Jises Kraist, sipwe anapano ach pwari ach nuku ngeni ekkoch.²⁷ Sipwe poracho ngeni nupwen weires me mettoch minne sise nuku mi tufich sipwe fori ra tori kich.²⁸ Sipwe apochokuna ach finioch ne apwonueta ekkewe pwon mi pin sia fen fori ren ewe Chon Amanau.²⁹ Sipwe uren ewe tongen Kot, mochen ne anisi ekkewe mi osupwang nge ausap esiter, tongei nouch kewe semirit me tumunur ren foforoch, me angei fansoun meinisin omusomusen ach kewe tipis, me pwapwa fansoun meinisin.³⁰ Iei ekkewe foun ira mi amwarar seni chechemenien an Kot kirekiroch me chen.

Me non ewe och pekin, ewe Samon a esinesin, “Me ese pwan wor met aramas repwe föri ne asonga Kot, ika Kot esap song ren emon, chinon chok ekkewe ir rese pwäratä poun ewe non mettoch meinisin.”³¹ Use ekieki pwe Kot a netipechou nupwen sia nemanano I. Nge, uwa ekieki pwe I a ennetin nonninenasini kich. A sinei pwe sia epetikich pwisin seni ewe tufichin ne arap ngeni I ren ach chechemeni I me An kirekiroch. Sia pwan fangeta An arap ngenikich me ekkewe tichikin feioch minne A pwonei.³²

Ngang uwa tungor ngonuk kopwe chechemeni iteitan ran ewe ningen Semach won Nang me Jises Kraist me met Ra fori fan itom. Ren omw ekieki usun Ar kirekiroch ngonuk kopwe fofo ren wenecharen netipomw ngenir.³³ Ekipwichi Ar tongeuk, me ka tongeni feioch ren napenon ewe pekin ngun me kopwe winiti emon noun Kraist. Ekieki usun Ar umumouch epwe anisuk“komwochunuk non om nukunuk tori nesoponon,” tori om “tonong non nang” ne “nom ren Kot non eu napanapan pwapwa ese- much.”³⁴

Semach won Nang, kokori Noun we At mi Achengicheng, a apasa, “Ausening ngeni I!”³⁵ Ren om anganga won ekkana kapas me ausening ngeni I, chechemeni, ren pwapwa me tipetekison, pwe ewe Chon Amanau a fori non tong ne forsefani met ouse tongeni forsefani; A fori non tong an epwe echikara metek ouse tongeni echikara; A fori non tong an epwe forsefani met a unusen tano;³⁶A monni mettoch meinisin mwan a fiis ngonuk;³⁷me a fori non tong An epwe epinasaouchueno netip mi tatakis.³⁸

Ran ai uwa ekieki usun ekkewe niffang seni Semach won Nang me Jises Kraist, uwa kaeo usun Ar tong ese much me Ar tongei noun Semach won Nang semirit meinisin sisap tongeni weweiti.³⁹ Ei mirit a ekesiwini manauei, me epwe pwan ekesiwinuk. Non iten Jises Kraist, amen.