Mrengesii

Betik er a renguk el rodam me a rodos, ak kmal mereng a saul el okiu a tekoi er a technology e ng sebeched el mo kebetech el rokui e dmak el oldanges er tia el klebokel el tutau er a Sandei. Diak desal kmal ngeltengat el medengei el kmo a ebangkelio er a Jesus Kristo a mla moluut el mera beluulechad!

Aika el mla mo merek el tela el sandei, betok er kid a mla melechesuar a betok el tekoi el mengesadel a klengar er kid. Desiu, seseb, ieleb, rakt, me a ikel tekoi el duubech er ngii el ngii a mengesadel a blelekl el tekoi el doruul er a bek el sils me a olengesonges el kall, aike el meklou ultutelel tekoi el dousbech, me a kerkerenged.

Ngara chelsel aika el rokui, aki oldanges e oureng a suliu el melilt el mo orrenges a tekingel a Rubak er a chelsel aika el meringel el taem el dmak el obengkemam er tia el klou el ongdibel. A meleketek el ilkolk el obengkel a ongarm a rullii a llemesel a Jesus Kristo el muut el mengal mo medidiich. Ka di momdasu er a ungil el sebeched el meruul er a chelsel tia el taem er a kdekudel el omelodech el ngara beluulechad. A beltkil a rengum me a klaumerang er kau er a Osobel a kmal mo usbechall er a tang el mo metik er a Oluut er a cherrengelel a ebangkelio er a Jesus Kristo.

Aika el mla mo merek el eru el rak, ngak me a Sister Nelson a mla mo kebetech el obengkel a bekord el telael er kemiu el meliuekl er a beluulechad. Aki mla mengedecheduch er medemiu er a basio el ngar er rikl me a dirrek el chelsel a blil a miting er a hotel. Aike el bek el basio, e ak mla melechesuar el miltutk er a medal a Rubak e ngak a ulemes er a omengideb er a Israel el mekedmokl er medak.

Kede kiei er a taem el “demad er a ruchelel a mla mengiil e olsingch el kirel.”¹ Ngar er ngii a kingelled er medal el mo sioning er medad a ngera profet Nephi a miles er a di chelsel a ocholt, el kmo a klisichel a Sib er a Dios a mo metengel el mora rengara telbiil el chedal a Rubak, el tir a ulebriid er a beluulechad; e tir a uleba llemeltel me a klisichel a Dios el ngara klou el klebkall.²

Kau, el rodam me a rodos er ngak, a ngara obengterir tirke el sechal, redil, me a rengalek el Nephi a milsterir. Bo momdasu er rsei!

Ng diak el ior er a kmo ke kiei er ker me a ngera el tekoi om ngara chelsel, a Rubak el Jesus Kristo a ngii a Osebelem, e a profet er a Dios e a Joseph Smith, ngii a profet er kau. Ngii a milchedaol ruchei er a uchelel tia el beluulechad el mo profet er aika el uriul klebesei, er se el taem eng “e ng dimlak a ngerang el morreked”³ er a reSanto. Ocholt a melemolem el omaoch er a Rubak er tia el melemolem el taem er a telengtengil a oluut.

Ngera belkul mei er kau sel modengei el kmo a ebangkelio er a Jesus Kristo a mla moluut el mei er a beluuelchad?

Ng belkul a kmo kau me a telungalek er kau a sebechiu el mo dmak el merenged el mo cherechar! Ng belkul a kmo ng uchul e kau a mla metecholb er ngike el ngii a oba deruchall er a Jesus Kristo e mla moterekokl el chedal a Ikelesia er Ngii, e ng sebechem el ngara deureng el kirel a melemolem el kldemel a Chedaol Reng. Ngii a mo omekerael e mesebechakl er kau. Ng belkul a kmo kau a diak bom cheloit el diak a mengelaod er kau me a lechub eng diak el sebechem el mo nguu a klisichel a Dios el mo olengeseu er kau. Ng belkul a kmo a klisichel a priesthood a mo omekngeltengat er kau el kau a mo ngmai aike el meklou a ultutelel el chedaol ruoll e remuul a chedaol el telbiil el obengkel a Dios e mo oltirakl. Ngera a omak a rengud el mo er aika el klemerang, tokuni aika el taem el mesisiich el ses el eolt a mermang.

A Babier er a Mormon a llechukl er a chelsel a ngesechel me a rebetel a eru el kot el meklou el taem er a klechad. A reksi er tir a olecholt el kmo ng mekera el sal kmal mle beot er a roumesingd el rechad a ulebes er a Dios, kotouar a omellach er a reprofet er a Rubak, e bai osiik a klisiich, chetengakl, me a soal a reng.⁴ Ulemelekl, a re profet er a rechuodel a mla melekoi “meklou e mengasireng el tekoi el mo er a rechad, el tir a dimlak el oumerang.”⁵

Ng diak a klekakerous er ngii me a chelechal taem. Chelsel aika el rak, meklou me a mengasireng el tekoi a bla derenges er a re blak a rengrir el mengedecheduch er a beluulechad el meliuekl. E osisiu el betok el rechad a diak el otngakl aika el klemerang—el locha uchul e te diak lodengei el kmo te mo osiik er ker⁶ me a lechub e te orrenges er tirke el tir a diak el olab a mui el klemerang, me a dirrek el locha mla kotouar a klemerang el mo uchul a tekoi er a beluulechad.

A cherarou a kmal chad er a ongedechuul. Betok el telael el rak e ngii a mla meruul a ungil el mo uaia lemekngit me a mekngit el mo uaia lungil.⁷ A klemchel a blechoel el klou a ngerel, ansing, e chedongel.

E ng di, a klemchel a Demad er Babeluades a kmal kakerous. Ngii a di beot el mengedecheduch, bechecheaches, me a kmal bleketakl e mechelins el diak el sebeched el mo rrau a rengud er Ngii.⁸

Ua okesiu, sera Lochotii a Di Ta el Ngelekel Sechal el mora rechad er tia el beluulechad, e ng Milruul er ngii el ulab a kmal di mekesai el tekoi. Ngara Rois er a Omelodech el mora Petrus, Jakobus, me a Johanes, a Dios a millekoi, “Ngika a Di Ta el Ngelekek el Sechal: Mrengesii.”⁹ A tekingel el mora re Nephites er a Bountiful a mle “Mesang a Betik er a Renguk el Ngelekek, el ngii a ngak a kmal chemat er ngii, er ngii e ak mla mengebeokel er a ngklek—bom rengesii.”¹⁰ E mora Joseph Smith, er sel kmal klou el sbedel el mlo nguu a chesmerel a ollutel, a Dios a di mle beot el melekoi, “Ngika Betik er a Renguk el Ngelekek. Mrengesii!”¹¹

Chelechang, rodam me a rodos, molbedebek er a klemerang el kmo chelsel aika el edei el omeruul el mla medung, el uchei er a Chedam a ulechotii a Ngelekel, e a rechad el mla er a chelsel a mlara dakt, me a rebebil, a ouedikel a rengrir.

A re Apostol a mle medakt er a lesa Jesus Kristo el iliuekl er ngii a eabed er a Rois er a Omelodech.

A re Nephites a mle medakt e le te mlara chelsel a telemall me a ilkolk el tela el klebesei.

Joseph Smith a mlara chelsel a klou el ilkolk ruchei er a babeluades a ulebkais a chesmerel.

A Demad a medengei el kmo sel sekum e kid a iliuekl er a diak dodengei el tekoi me a dakt, ngera sel kmal mo ngosukid a mo rongesii a Ngelekel.

Le se el dosiik el mo orrenges—meral orrenges—er a Ngelekel, e kid a meral mo ulkrael el mo medengei el kmo ngera kired el meruul er a ngidi el tekoi el bo dechelbangel.

A kot el tekoi er a chelsel a Doctrine and Covenants a morrenges.¹² Ng belkul a kmo “ke orrenges el oba meral reng el mo oltirakl.”¹³ Mo orrenges a belkul a kmo “Mrengesii”—el mo remenges a ngera a Osobel a melekoi e mo oltirakl a Llechul. Aike el eru el tekoi—“Bo Mrengesii”—A Dios a meskid a belelekl el omeruul el kirel a klungiaol, deureng, me a diul a reng er tia el klengar. Kid a mo remenges a tekingel a Rubak, morrenges er tir, e moltirakl a ikel Ngii a mla melekoi er kid!

Kid el oltirakl er a Jesus Kristo, me a omelasem er kid el mo orrenges er Ngii a kired el kmal muut el mo blak a rengud. Ng ousbech a uldesued me a melemolem el omelasem er kid el mo omekeek er a klengar er kid el olab a Tekingel, Osisecheklel, me a Klemerang er Ngii.

Ng diak el sebeched el di ultuil er a tekoi el kid a ngmai er a social media. El biliol el tekoi el online me a ngara tekoi er a klekangkodang el okiu a technology el beluulechad a belchoel el klou a cherrodech er ngii, mekngit el omelasem er a cherarou, ngarker a sebeched el mo er ngii e Rongesii?

Ng sebeched el mo er a chedaol llechukl. Ng olisechakl er kid el kirel a Jesus Kristo me a ebangkelio er Ngii, me a klungel a Tngakireng er Ngii, me a klebokel el uldesuel a Chedam el kirel a deureng me a ngebetel a klengit. A omesubel a tekingel a Dios er a bek el sils a klou a ultutelel el kirel a olsobel a chedaol tekoi er a rengud tokubets er a chelsel aika el meringel el taem. Se el debekekid er a tekingel a Kristo er a bek el sils, a tekingel a Kristo a mo ouchais er kid el kmo ng mekera e kid a mo onger aika el ringel el kid a dimlak domdasu a mo chelbangel.

Ng dirrek el sebeched el mo Rongesii e r a chelsel a templo. A blil a Rubak a blai er a omesuub. Sei e a Rubak a olisechakl er kid er a Rolel. Sei e a chedaol ruoll a olisechakl el kirel a Osobel. Sei e kid mo smuub el kmo ng mekera a bo de omii a ika el eru el beluu e mo bleketakl el mengedecheduch er a babeluades. Sei e kid a mesuub el kmo mekera a bo dikrii a cherarou e mo melai er a klisichel a priesthood er a Rubak el mo melisiich er kid me a tirkel betik a rengud er tir. Ng kmal uangera el kired el kmal soad el mo osiik er a olsechall er ngii.

Sel ikakid el diak el meketeket el ngar er ngii el omerrob er a COVID-19 a mudars, kulengit mem ruul a temel a oldanges me a omesiou er a templo. A bek el bung er a ika el taem a mo omekngeltengat er kau me a telungalek er kau er a di ta el rolel el diak a ngodech el sebechel. Mngai a temem el mo melebedebek e kmo ngera ke remenges me a ngera molechesuar sel omngara chelsel. Molengit er a Rubak el mo olisechakl er kau el kmo ng mekera bom nguu a chesmerel a babeluades el mo omekngeltengat er a klengar er kau me a klengar er tirkel tir a moubeltik el reng me a mosiou er tir.

El oldanges er a templo er chelecha el taem a diak el sebechel meketmokl er chelechang, ak siotai er kau el mo menglou a temem el oureor el kirel a reksi er a telungalek, el uldimukl er ngii a skel a reksi er a telungalek e momechebech. Ak yaksok er kau el kmo sel bom chau a betok el temem er a templo me a urerel a reksi er a telungalek, e kau a mo menglou e meruul el mo ungil a techellem el mo Rongesii.

Kid a dirrek el mo bleketakl el Rongesii se el sekum e kede mengikiid a techelled el mo sebeched el melechesuar a ongelulau er a Chedaol Reng. Ng dirkak el sal kmal muut el mo klou a ultutelel el bo dodengei el kmo mekera e a Chedaol Reng a mengedecheduch er kau el merekmo chelecha el taem. Ngara Kledios, e a Chedaol Reng ngii a oderchelel. Ngii a mo meskau a uldasu er a chelsel a uldesuem el Dios me a Ngelekel a sorir obom ngai. Ngii e a Mengelaod. Ngii a mo meskau a omelechesuar er a budech er a rengum. Ngii a olecholt er a klaumerang e mo olterekokl a klemerang se el morrenges e monguiu a tekingel a Rubak.

Ak omekbeches er a ongtik el bo moruul a ngidi el tekoi el mo uchul a omenglou el chedaol el techellem el mo nguu a ocholt.

El moruul er tiang e ng mo ngosukau el mo melemolem er a klengar er kau, el kmo ngera ke mo meruul er a ika el meringel el taem, e mekera a bom ikrii e morrob a ongetikaik me a cheleblad er a cherarou.

Me a, sel mong meng ulebongel, kede mo Rongesii se el doltirakl a tekingir a reprofet, rechad er a ues, me a rechad er a ocholt. Mla Mechedaol el re Apostol er a Jesus Kristo a blechoel el mo olecholt a klaumerang er Ngii. Tir a melutk er a rael el dorael er a roled er tia el kmal kotai er a reng el cheliseksikd el rael er a klechad.

Ngera mo duubech alsekum e kau a mo meral ngar ngii a rengum e mo orrenges, omtab, e oltirakl aika el ngii a Osobel a mla melekoi e ngera Ngii a mla ouchais er chelechang el okiu a reprofet er Ngii? Ak yaksok er kau el kmo kemo mukngeltengat er a lmuut el bebil er a klisiich el mo chobangel a ongetikaik, ringel, me a chelitechut. Ak yaksok a mengasireng er a chelsel a chebechielem, delongelir a telungalek er kau, me a urerem er a bek el sils. Ak dirrek el yaksok el kmo a techellem el mo melechesuar a deureng a mo menglou dirrek el sekum e a ringel a mo betok er a chelsel a klengar er kau.

Chelcha el klou el ongdibel er a April 2020 e kede mo oldeu er a taem el ngii a ngildechii a beluulechad. Se er a demad el tmuil er tial eru el dart el rak er a Kot el Ues er a Joseph Smith, a First Presidency me a Chelechad er a Teruich me a terung el Apostol a ulmedasu el kmo ngerang aki bai mo ungil rulii el mo outkeu er tial teletael.

Tia el ocholt a mle uchelel a Oltel a cherrungel el ebangkelio er a Jesus Kristo e mle soiseb er tial cherrungel el uriul klebesei.

Aki ulmedasu a lsekum mo er ngii a delcherul a ngesechel a cherechar. Eng di se er a ki melebedebek er a reksi me a omerolel tia el mo er a rokir el beluulechad el kirel a Kot el Ues, aki mlo melechesuar er a llomes el mo rulii a ngesechel a cherechar el diak el granite malechub eng bad ng bai mo meruul er a tekoi—el tekoi er a omengull me a chedaol el chais— el melusech, el diak el blotk er a “taber el bad” ng melluches er a “rengrir” a rechad.¹⁴

Se ra Ikelesia er a le mechederoder, eng di eim el chais a mla tuobed, el sel mle ongingil a sel “Telungalek: Chais el mo er a Beluulechad,”el mlocholt lokiu a President Gordon B. Hinckley se ra 1995.

Chelecha sel ki momdasu er tial klou a ultutelel el taem er a reksi er a beluulechad me a Rubak el mo mengedibel er a Israel el mengedmokl el kirel a Ongeru Lemei a Jesus Kristo, e kemam, el First Presidency me a Chelechad er a Teruich me a terung el Apostol, a otebedii tia el chais. Mesa “ Oltel a cherrungel el ebangkelio er a Jesus Kristo:Ng Eru el Dart el Rak el Chais el mo er a Beluulechad.” Milluches el okiu a First Presidency me a Chelechad er a Teruich me a Terung el Apostol er a Ikelesia er a Jesus Kristo er a Uriul-klebesei el Santo. Sel sils er a April 2020. Omengedmeklel el kirel chelechal sils, e Ngak a mle rekord er tial Chais el ngara Chedaol Oreomel, el basio el Joseph Smith a mle kot el mesang a Chedam me a Ngalek.

“Ai kuoll ouchais el kmo a Dios a betik a rengul er a Rengelekel el ngara bek el beluu er a beluulechad. A Dios el Chedam a mla meskid a chedaol cheroll, diak el omengaisisiu klengar, me a klou a ulebengelel tenget er a Betik er a Rengul Ngelekel Sechal, el Jesus Kristo. Ng okiu a klisichel a Chedam, e a Jesus a liluut el mekiis e mlo mesisiich er a kodall. Ngii a Osobeled, e Ngii okesiu el merkid.

“Erul dart el rak ra mla memong, el klebokel el tutau ra Spring er a 1820, a ngeasek el Joseph Smith, a ulsiik el kmo ngerang el ikelesia a bo el chad er ngii, meng mlo er a chelsel a oreomel el ngara bita er a blil el ngara New York, USA el mo meluluuch. Ng mla er ngii a keril el kirel a olsebelel e ulmerang el kmo a Dios a mo omekrael er ngii.

“Ng obang a ngariou el reng, e kemam a smodii el kmo sel nger er a nglunguchel, ea Dios el chedam me a Ngelekel Sechal, el Jesus Kristo, a mlo chemolt el mo er a Joseph e childolir a ‘olutel a rokui el tekoi’ (Rellir 3:21) el mla medung er a chelsel a Biblia. Chelsel tia el ues, eng mlo medengei el kmo a uriul er a kodellir tirkel mle kot el re apostol, e sel Ikelesia er a Kristo er a Beches el Renged a mlo dibus er tia el beluulechad. A Joseph a mo sel donguu el mo uchul tial oluut.

“Ai kmal kongei el kmo ngara chederdellel a Chedam me a Ngelekel Sechal, a rechad er a oderuchel er a babeluades a mlei e ulsisecheklii a Joseph e liluut el toketekii a Ikelesia er a Jesus Kristo. A mlokiis er a kodall el Johanes el Chad er a Techolb a mle olutii a klisiich el mo metecholb el moduleb er a chelsel a ralm el kirel a ngebetel a klengit. A tedei er tirkel mle kot el teruich me a terung el re Apostol—el Petrus, Jakobus, me a Johanes—a ulutii a ngerachel er a re apostol me a kisel a klisichel a deruchellel a priesthood. A rebebil a mlei el dirrek, el uldimukl er a Elijah, el mle olutii a klisiich el mo merenged er a retelungalek el dmak el mo cherechar el ngara diak a ulebengelel el deluill el mo er a ikrel a kodall.

“Aki lmuut el dochel a sioning er kemam el kmo a Joseph Smith a ngiluu sel sengk me a klisichel a Dios el mo oliuid a cheuodel el rekord: el Babier er a Mormon—Tiang a Dirrek el Ouchais El Kirel A Jesus Kristo. A ikal llel tial chedaol llechukl a uldimukl a cheldechedechal a urerel a Jesus Kristo er a delongelir a rechad el ngara beluu el mle bedul Ngebard er a Beluulechad er a uriul er a Okisel er a Kodall. Ng olsisechak er a moktek er a klengar e smodii a osisecheklel a Kristo, el ngii a chedul tia el moktek. Me sel kldemel a chedaol llechukl el mo er a Biblia, ea Babier er a Mormon a ouchais a klaumerang el kmo a rokui el rechad a ngelekel a betik er a rengud el Chedam er a Babeluades el sechal me a redil, e Ngii a ngarngii a chedaol moktek er a klengar er kid, e a Ngelekel Sechal, el Jesus Kristo, a mengedecheduch el merkid er a chelechal sils el di uai a sils er a chuodel.

“Aki ouchais el kmo a Ikelesia er a Jesus Kristo er a Uriul-klebesei el Santo, el ulemuchel se ra April 6, 1830, a Ikelesia er a Kristo er a Beches el Renged e mla moluut. Tia el Ikelesia a omak er a cherrungel el klengar er ngkel mesisiich el bad lorreked el rokir, a Jesus Kristo, me a sel Klou el Tngakireng er Ngii me a Okiis er a Kodall. A Jesus a mla lmuut el omekedong er a re Apostol e mla mesterir a klisichel a priesthood. Ngii a olengit er kid er rokui el mo er Ngii me a Ikelesia er Ngii, e mo nguu a Chedaol Reng, chedaol ruoll er a mo suobel, e mo nguu a deurreng.

“Ng mla mo merek a erul dart el rak sel tial Oltel a dilubech lokiu a Dios el Chedam me a Betik er a Rengul Ngelekel Sechal, el Jesus Kristo. Re milion el meliuekl er a beluulechad a mla kongei a klemedengei er a ikal teletael el mla mocholt.

“Aki dmeu a rengmam e ouchais el kmo sel yaksok er a Oltel a melemolem merael mo ruchei el okiu a omelemolem el ocholt. A beluulechad a diak el luut el mo osisiu, le Dios a mo ‘oldak ikel rokui el mle duubech el ngara eanged Kristus’ (Efesus 1:10).

“Lobang a omengull me a omereng el saul, e kemam el re Apostol er Ngii a olengit er kemiu me bo modengei—el uai kemam—el kmo a babeluades a mla obok. Aki mesisiich el ouchais el kmo a Dios a olecholt er a moktek er Ngii el kirel a rebetik er a rengul Rengelekel sechal me a redil. Aki ouchais el kmo tirkel mo ngara nglunguuch e mesuub er a klemechel Oluut e ultuil er a klaumerang a mo ngeltengat el mo nguu a sioning er tir el kirel a chedaol moktek er ngii el kirel a kedmeklel a beluulechad er sel telib Longeru Lemei a Rubak e Osobeled, el Jesus Kristo.”¹⁵

Rodam me a rodos, tiang sel erul dart el rak el chais el mo er a beluulechad el kirel a Oltel a ebangkelio er a Jesus Kristo el cherrungel. Ng mla moiuid el mo er a teruich me a teblong el tekoi. A bebil er a oidel a tekoi a mo okiu uriul. Ng di mo mereched el mo er ngii er sel website er a Ikelesia, meng sebechiu el nguu a llecheklel. Mosuub er ngii el kuk di kau e dirrek el obengterir a rechedal a telungalek me a resechelimiu. Momtab aikal klemerang e momdasu a rellel a ikal klemerang el mo er a klengar er kemiu a lsekum e ko orrenges, e morrenges er tir , e moltirakl a llechul a Dios me a telbiil el ngii a obengkel.

Ak medengei el kmo a Joseph Smith ngike a milchedaol ruchei el profet el Dios a mla tutkii el mo nguu a chesmerel aika el uriul klebesei. Ng okiu ngii e a Ikelesia er a Rubak a mloluut el mei er a beluulechad. A Joseph a milrenged er a olechotel a klaumerang er ngii el olab a rsechel. Ng kmal betik a renguk e oldanges er ngii!

A Dios a ngar! A Jesus a Kristo! A Ikelesia er a ngii a mla moluut! Ngii me a Demal, Demad er Babeluades, a mengkar er kid. Ak dirrek el olecholt er a klaumerang er ngak loba ngklel a Jesus Kristo, boluaisei.