Winiti usun I
Ren chok an ewe Chon Amanau aninis seni nang sia tongeni fefeita ngeni ach sipwe winiti usun I.
Ngeni pwan mwo ewe mi tumunoch chon sukunen ewe manau me angang an Jises Kraist, an ewe Chon Amanau fon ach sipwe “usun chok” 1 mi weires me usun esap tufich. Meni ka usui—en mi unusen sinei usun om mwan me apwangapwang, iwe meni kopwe kuna pwe om ekiek epwe kinamwe ne fetanei ew aan eseor pannetan me kukkun angangan. “Ennetin, ei kaeo esap tufich me mi napeno,” sia amwani nupwen sia finata ewe aan mi kis weiresin, ina minne a kis pekin apochokun ese wato watten siwin.
Nge ika ach winiti “usun chok [I]” esap chok kapas awewe, pwan mwo non nonnomun inisich iei? Met ika, ren ekkoch napanap, mi tufich non ei manau me, ennetin, ew mettoch auchea ren ach sipwe nom sefan ren I? Met ika “usun chok ngang” mi wesewesen me ennetin ina wewen me ren ewe Chon Amanau? Iwe met? Met kinikinin achocho sipwe mochen awora ne etiwa An manaman non manauach pwe sipwe tongeni siwini nonnomuch?
Elter Neal A. Maxwell a aitikich: “Nupwen sia ekipwichi ach annuk me ren Jises ne winiti usun I, sia kuna nonnomuch iei pwe ew minne ese ngaw, nge, mi fen, ew minne kich sise kon achocho me sise mwasangasang ren An popun—minne pwan ach, popun! Sia mwareiti nge sise kon akkappiru I.” 2 Emon sou afanafan esamo mwukono, Charles M. Sheldon, a apasa an memef mi wewe ngeni chok non ei napanap: “Ach namanamen Kraist a kon efichi mecheresin me kinamwein pwe sisap etiwa och mettoch mi weires me chou pwe ew irapenges.” 3
Ennetin, meinisin sia nom fan ewe emmwen pwe sipwe winiti usun I, usun chok Jises Kraist a winiti usun ewe Sam. 4 Nupwen sia fefeita, sia unusochuno, wesochuno, me ennetin fisiochuno. 5 Ena sokkun fon ese anongonong won an ew mwichefen annuk nge a feito wenewen seni ewe Masta pwisin. Epwe non ei sokkun nikinik pwe manau epwe ina usun, porous fengen epwe sufon, me nefin repwe tumun. Ennetin, ese pwan wor ew aanen echikaren ekkewe feiengawen tatakisin nefin are ew mwich mi ta nap seni an me emon kich epwe unusen eppiru ewe Prince en Kinamwe. 6
Sipwe ne nenengeni ifa usun ach poputani non ekiekich, mochenich, me ennetin fetanei ew fofforun tapweno mwirin I ren ach sipwe wesewesen angei napanapen Jises Kraist.
Apungano me Etiwa
Ekkoch ier a no, ngang me punuwei we aua uta nepoputan aanen ewe tekian chuk non Japan, Mount Fuji. Nupwen aua poputa ne tota aua neneta won towawan unungan we me ekieki ika aupwe tikeri.
Nupwen aua fefeita, apwangapwang, metekin futuk, me weiresin tekian we a torikem. Non am ekiek, a auchea ngenikem am aupwe ne chok anonga am ekiek won ewe eipeipw mwirin. Aua apasa, “Meni usap mwitir tori unungan we, nge ngang mi tongeni fori ewe eipeipw mwirin ei.” Non ekkoch fansoun ewe angang mi weires a winiti mi tufich—eipw me eipw.
Ewe aewin eipweipw won ei aan ach sipwe winiti usun Jises Kraist ina an epwe wor rech ewe mochen ne fori. Ach weweiti ewe ourour ach sipwe usun I mi och, nge ena wewe mi auchea epwe fiti ew mochenin siwini inisich, ekis me ekis, nap seni ewe apwangepwangen inisin aramas. 7 Ach sipwe efisi ei mochen, mi auchea sipwe sinei ion Jises Kraist. Mi auchea sipwe sinei och mettoch usun nikinikin, 8 me sipwe fokkun kutta Napanapan kewe non pukefel, mwichen fan, me ekkoch neni mi pin. Nupwen sia poputa ne sineiochu usun I, sipwe kuna Napanapan mi pwa me non ekkoch. Ei epwe pesei kich won ach pwisin kukuta, pun ika ekkoch repwe tikeri non ekkoch wewe Nikinikin kewe, kich mi pwan tongeni.
Ika sia pwisin wenechar ngenikich, ewe Saramen Kraist 9 non kich epwe mongunungun pwe mi wor towawan nefinen ikewe sia nom ie me ach nonongeni ewe mochenin nikinikin ewe Chon Amanau. 10 Ena sokkun wenechar mi auchea ika sipwe fefeita ne winiti usun I. Ennet, wenechar ina ew me nein Nikinikin kewe.
Iwe, kich ekkewe mi pwaracho sipwe ekieki ach sipwe eisini emon chon ach family kich mi nuku, punuwach, chienach, ika sou emwen non pekin ngun met ew nikinikin Jises Kraist a auchea ngeni kich—me sipwe engino ngeni ponuwan we! Fan ekkoch sia kuna kich pwisin ren ekkewe mese kinas non nenien uromot mi afitikoko unuunuch mi pwari pwe kich mi foukukumos ika kichuchu nap seni wesewesen ion kich.
Chiechiach me ach famini kich mi nuku non ir mi tongeni anisikich sipwe kuna fichi ion kich, nge pwan mwo ir, ina mwo ika ir mi uren tong me aninisoch usun ra mochen, ir mi tongeni kuna mettoch ese unusoch. Pungunon, mi auchea ach sipwe pwan eisini Samach won Nang mi tong met mi auchea ngeni kich me ian sipwe anonga ach achocho. An kuna kich mi unusoch me non tong epwe pwar ngeni kich ach apwangapwang. 11 Meni kopwe kaeo pwe mi auchea ngonuk watten tipepos, umoumoch, tong ennet, tong, epinukunuk, achocho, ika anneasochis, ach sipwe chok eitata ekkoch. 12
Esamo towaweno, a fis ngeniei ew mettoch minne a apochokuna nguni nupwen emon sou emwenin Mwichefen a kapas wenewen ne apasa pwe mi wor ew sokkun nikinik mi och ngeniei. Non tong a awanaei non met mi fitikoko. Non ena pwinin, ua ureni punuwei we usun met we a fis. A uren umoumoch ren tong nupwen a tipeew ngeni met ewe atewe a apasa. Ewe Ngun mi Fel a apungano ngeniei pwe ar ourour a feito seni emon Sam won Nang mi tong.
Epwe pwan anisikich ach wenechar ne awesi ewe taropwen kapaseis usun nikinikin Kraist non sopwun 6 non Preach My Gospel. 13
Nupwen ka wes ne fori non wenechar ekkewe ponuan kapaseis me apungano ne poputani ewe fetanta won ewe chuk, mi auchea kopwe aier. Non tong Preseten Russell M. Nelson a aitikich: “Nupwen sia finata ne aier, sia finata ne siwin! Sia mut ngeni ewe Chon Amanau ne ekkesiwinikich ngeni unusochuch. Sia finata ne mamarita non pekin ngun me weri pwapwa—ewe pwapwan ngaseno non I. Nupwen sia finata ne aier, sia finata ne winiti usun chok Jises Kraist.” 14
Ach sipwe winiti usun Jises Kraist mi auchea sipwe siwini netipach me ekiekich, ewer, ennetin nikinikich, me ach sipwe fori a chok tufich seni ewe chenin ngaseno an Jises Kraist. 15
Esinna me Fori
Iwe iei ka fen apungano pwe kopwe siwin me aier me ka fen kutta emwen seni iotek, wenechar ne ekieki, me meni ourour fengen, mi auchea kopwe fini ew nikinik epwe winiti ew mettoch kopwe anonga. Mi auchea kopwe pwonei ne amwuchu om tongeni. Ekkei nikinik resap feito mwitir me mecheres, nge seni An chen repwe nanapeno ne feito nupwen ach achocho.
Ekkewe nikinikin Kraist ir niffang seni emon Sam won Nang mi tong an epwe efeiochu kich me ekkewe mi nom unukuch. Usun chok, ach achocho ne angei ekkei nikinik epwe auchea ach ennetin sio fan iten An aninis seni nang. Ika sia kutta ekkei niffang an epwe aochueno ach anisi ekkoch, I epwe efeiochu kich non ach achocho. Ach kutta ew niffang seni Kot fan itach pwisin epwe mwuchuno non tipengaw me osukosuk.
Ren om ennetin anonga om ekiek won ew nikinik mi auchea ngonuk, me om fefeita ne angei ena nikinik, pwan ekkoch nikinik repwe poputa ne fis ngonuk. Met emon mi ennetin anonga an ekiek won tong ennet esap napeno non tong me tekison? Met emon mi ennetin anonga an ekiek won anneasochis esap angei watten nikitu me apinukunuk? Om watten achocho ne angei ew nikinik epwe winiti ewe ewut minne a ekieta mwota meinisin non ewe nomw.
Makkei me Tipeni
Mi auchea ngeniei ai achocho ne winiti usun I ai upwe makkei met a fis ngeniei me met ua kaeo. Nupwen ua kaeo ren ew me nein An kewe nikinik mi anonnon non ai ekiek, ekkewe pukefel ra minafo sefan nupwen ua kuna awewen ei nikinik non An afanafan, An angang, me Noun kewe chon kuno. Mesei ra pwan fatoch ne esinna ewe nikinik non ekkoch. Ua fen kuna aramas mi mwirino non me nukun ewe Mwichefen ekkewe mi wor rer ekkewe nikinik mi pwarano I. Ir ra chon appiru mi asaramano ifa usun an ekkena nikinik mi tongeni pwano non aramas seni An tong mi chen.
Ren om kopwe kuna ennetin fefeita, mi auchea kopwe awora om achocho. Usun chok tota won ew chuk a auchea om kopwe mwoneta akkom me nikitu me engino fansoun feita, iwe pwan ei sai mi auchea ennetin achocho me fangeno. Ennetin namanamen Kraist, non minne kich mi achocho ne winiti usun ach Masta, non fansoun meinisin mi auchea ach achocho. 16
Iwe iei ew mwochomwochen kapasen fon. Ewe annuk ach sipwe usun I ese fis an epwe fori met kich sipwe mefi tipingaw, sise fich ngeni, ika sise tong. Unusen manauach won fonufan a ren ach fefeita, achocho, tur, me fetanoch. Ren ukukun an punuwei we me ngang anean pwe aupwe chok ammouru mesem me uwei inisim ngeni unungen ewe chuk, esap ina met wewen manau.
En mi nafoch, en mi tong, nge esap wewen pwa ka unusoch. Mi chiwen wor angang epwe fis non ei manau me ewe manau mwirin. Ren chok An aninis seni nang sia tongeni fefeita ngeni ach sipwe winiti usun I.
Non ekkei fansoun, nupwen, “mettoch meinisin [usun ra] nom non osukosuk; me … nuokus [usun a] nom won aramas meinisin,” 17 ewe chok safeian, ewe chok echikaran, ina ach sipwe achocho ne winiti usun ewe Chon Amanau, 18 ewe Chon Angasano 19 aramas meinisin, ewe Saramen ewe Fonufan, 20 me kutta I ewe a apasa, “Ngang ewe An.” 21
Ngang mi sinei pwe ach winiti usun I seni an aninis mi pin me pochokun a tongeni tufich ipp me ipp. Ika esap ina, I esap ngeni kich ei annuk. 22 Ngang mi sinei ei—nap ngeni pokiten ua kuna napanapan I non chommong ami. Usun ekkei ua pwarata non iten Jises Kraist mi pin, amen.