Kutta Kraist non Ekiek Meinisin

Non an memef non konun mwareiti, ewe Chon Mak koon a afata:

“O Samon, ka fen kuna ei, o sineochu manauei.

“Ka sinei metoch meinisin ua fori, seni towaw ka fen sinei ekiekin netipei.

“Ka rokopwani ei non ai fetan me asoso, ka sinei ai kewe fofor meinisin.”¹

Non awewen makken non ei kapas, ewe Chon Mak koon a mwareiti an ewe Samon angang murino ren an sinei mettoch meinisin pokiten I a ennetin sineiochu ngunuch.² Non an sinei ussun minne a auchea ngeni kich non ei manau, ewe Chon Amanau a tingorekich ach sipwe kutta I non ach ekiek me sipwe tapweno murin I ren unusen netipach.³ Ei a ngenikich ewe pwon pwe sia tongeni fetan non An Saram me pwe An emwen a eppeti kich seni angangen rochopwak non manauach.⁴

Kutta Kraist non ach ekiek me tapweno mwirin I ren unusen netipach a murinno pwe sipwe awena fengeni ach ekiek me mochen ren I.⁵ Ekkewe wokisin ra porous ussun ei awenewen ussun “chufengen non ewe Samon.” ⁶ Ei mokutun foffor a pwari pwe sia sopweno mwokutun manauach non kinamwein ewe kapas allimen Kriast me awena ach ekiek won mettoch meinisin mi murinno.⁷ Iwe murin sipwe angei “an Kot we kinamwe, ewe sise tongeni weweti” me ewe epwe “tumunu [ach] netip me ekiek non Jises Kraist.”⁸ Pusin ewe Chon Amanau a auroura ekkewe elter non ewe Mwichefen non February 1831, “Annomu ekkei mettoch meinisin non netipemi, me mut ngeni ekkewe auchean feinfeino repwe nonnom non ami ekiek.”⁹

Inamo ach achocho ne kutta ewe Samon, ekiek ese och mi tongeni pwereni ach ekiek. Nupwen ekkena sokkun ekiek ra mumuta me ketiw ne nom, ra tongeni anapanapa mochenin netipach me emweni kich ngeni met sipwe winiti non ei manau me nesoponon ngeni met sipwe angei feinfeino.¹⁰ Elder Neal A. Maxwell a fen afata ei nongonong ren an apasa, “Mochenin tipach … epwe apungano met pungunon, pachenong pwata ‘chommong ra kokko, nge chokukun chok ra kefinita.’”¹¹

Nouch soufosun nom me ikenai ra soun achema kich ne ungeni sossot pwe esap turuno ach kamwochun ngun me winiti mi osukosuk, fitikoko, me tipengaw non manau.

Kapasen arere, fangeta ngeni sossot a ussun nge sia fein ngeni ew chisaku fiti och mecha. Pochokunen ewe chisaku ese pwa epwe weiti ewe mecha me kamwochunukuno. Ewe chisaku epwe chok turuno seni an ewe pochokun ika ewe mecha a chok nom towaw seni. Ina minne, usun chok ewe chisaku ese tongeni aea an ewe pochokun won och macha mi towaweno, ussun pwan ach sipwe fiu ngeni sossot, repwe morono me poutuno ar pochokun seni ach ekiek me netipach me, pwan, seni ach foffor.

Ei awewe a achema ngeniei ew mettoch uwa sinei usun emon chon ei Mwichefen mi nikitu a aporousa ngeniei. Ei chon mwichefen a ureniei pwe nupwen a neno non ew sosoran, ew ngawen ekiek ese pwan fifisngeni me mwan a tonong non ekiekin. Ina mo pwe mi eniuokusu neminewe, nge ese fanengeni met ewe a fis non chok ew seken, a ureni pusin inisin me ena ekiek, “Apw!” me siwini ngeni mettoch mi och an epwe siwini an ekiek seni ewe ekiek ese ketiw. A ureniei pwe nupwen a aea an pungun finata non wenechar, ewe ngawen me osukosuken ekiek a mwitir morono.

Nupwen Moronai a kori ekkewe aramas pwe repwe nuku non Kraist me repwe aier, a pese ngenir ar repwe etto ren ewe Chon Amanau ren unusen netiper, etiseni inisir mi nimengaw meinisin. Soposoponon, Moronai a pesei ar repwe tingor ngeni Kot, fiti nukucharen popun, pwe resap turutiw non sosot.¹² Aea ekkei nongonong non manauach a tufich an epwe nap seni ach sipwe chok siner; nge ach siwini ach ekiek me netipach ngeni kei nongonong. Ekkei ekkesiwin a tufich epwe wor pwisin achocho iteitan ran me ach achocho, mi pachengeni ach anongonong won ewe Chon Amanau, pokiten ach oreni resap chok morono won pusin ar. Fiu ngeni sossot epwe fis ren unusen manauen ach achcho me nukuchar. Nge ouse mochen oupwe sinei pwe we Samon mi monneta ne aninis non ach pwisin nikitu me a pwonei feioch mi amwarar ika sipwe nikitu tori nesoponon.

Atun ew fansoun mi weires nupwen Joseph Smith me chienan chon kanapus non Liberty Jail ese wor ar ngaseno non och mettoch nge ar chok ekiek, ewe Samon a awora ourour me ew pwon ngenir mi pwan fich ngeni kich:

Mut ngeni nenukemi repwe pwan uren tong ngeni mwan meinisin me fefin me ngeni ewe imwen nuku, me mut ngeni nimenimoch esap kouno ne enninga ami ekiek; iwe ami apinukunuk epwe pochokun me mwen Kot; …

Ewe Ngun mi Fel epwe chiechiom fansoun meinisin, me om wokun king epwe efoch wokun king esap siwin ren wenechar me ennet.¹³

Ach fori, ekiek mi pin epwe soposopono ne enninga ach ekiek me mochen mi nimenimoch epwe emweni kich neni foffor mi wenechar.

Moronai a pwan achema ngeni noun kewe aramas pwe resap amasowa ekiekir ren mocheniangaw.¹⁴ Ewe kapas mochenian inis a wewe ngeni ew pochokunen anean me mochenin mettoch ese och.¹⁵ A pwenieno ekiek mi rochopwak ika mochenia ngaw a efisata an emon epwe anonga an mokutukut won an pusin ika mettochun fonufan nap seni an fori mi och, kirekiroch, me aponueta ekkewe annukun Kot. A soun pwano non memefin mochenian ewe ngun. Ewe Aposel Paul a affata ekkoch ekkei memef, “usun nimengaw, mocheisou, koput, … song, … fiu, nonowo, … me ekkoch usur.”¹⁶ Me nukun ekkei mettoch mi enieput ren mochenian inis, sise tongeni nemenono pwe ewe chon koum a aea an pisekin fiu mi monomonono me otupotup nupwen a otupukich pwe sipwe fori mettoch mi mwan.

Pwi me fefinei achengicheng, ua pwarata pwe nupwen sipwe anongonong won ewe foun amanau, ewe Chon Amanauen ngunuch, me tapweno mwirin an Moronai ourour, ach tufichin oukatiw ach ekiek epwe napeno. Ua wenechar ngenikemi pwe ach marita non pekin ngun epwe napeno non chok ew eipweip, ekesiwinin netipach, a fori ach sipwe ussun chok Jises Kraist. Pwan, pesepesen ewe Ngun mi Fen epwe pochokunono me soposopono non manauach. An ewe chon koum sosot, ekis me ekis, epwe poutuno ewe pochokun won kich, pokiten ei epwe pwano non ew manau mi pwapwa me nimenimoch me pinino.

Ngeni ir ekkewe, ren met chok popun, ra tur non sossot me ra nom non foffor ese pung, ua affata ngeni kemi pwe mi wor ew aanesefan, pwe mi wor apinukunuk non Kraist. Ekkoch ier a no, Uwa tongeni ne churi emon chiechiem achengicheng non ewe Mwichefenin Jises Kraist ewe a fokkun weires och fansoun manauan mwirin an fori ew watten atai annuk. Nupwen ai keran kuna i, ua tongeni kuna netipengaw non mesan, fiti ew saramen epinukunuk won mesemesan. Napanapen mesan a engunuwa ew netip mi tekison me siwin. A fen nikitu ne nuku Kraist me a fen fokkun feioch me ren ewe Samon. Nge, a mut ngeni ew chok ekiek mi ngaw epwe tonong non an ekiek, minne a emwen ngeni ekkoch. Nupwen a sopweno ne soun mutata ekkei ekiek, mwitir ra pochokununo non an ekiek me poputa ne marita non netipan. Nesoponon a fori ekkei mochen rese nimenimoch, minne a emweni i ngeni an epwe u ngeni mettoch meinisin a kon auchea ngeni manauan. A ureniei pwe ika ese poputa ne awora nenien ei umwesin ekiek, esap winiti emon a mecheresin me ponueta ngeni ewe sossotun ewe chon koum—sossot a watto watten netipengaw non manauan, ren chok ew fansoun.

Feiochun, usun ewe at mi monucheno non ewe kapas monomon mi itefouno non ewe kapas allimen Luke, “atewe a siwin” me suseni ena osukosuk.¹⁷ A forsefani an nuku non ewe Samon me mefi ennetin niemam me a wor an mochen niwino ngeni nein noun ewe Samon kewe siip. Non ena ran am me ruemon aua mefi an ewe Chon Amanau ngasenon tong ngenikich. Nesoponon am we chufengen, am aua uren memef, me tori ei ran, ua chechemeni ewe watten pwapwa won mesemesan nupwen a no seni ai ofes.

Chienei achengicheng, nupwen sia ungeni kukkun sossot, minne sise mwon ngeni ar tonong non manauach, sipwe pochokun ne epinengaw ngeni enneti tipis. Ussun President Spencer W. Kimball a apasa: “Epwe kis fansoun emon a tonong non anononun tipis ika ese akom fangetani ekkewe mi kukkun, minne a suki ewe asam ngeni ekkewe watte. … Ew masies mi nimoch [ese] chok mwitir [winiti] fetin.”¹⁸

Nupwen a amonata an epwe awesano An misin won fonufan, ewe Chon Amanau Jises Kraist a pwarano auchean ach nikitu ne ungeni mettoch meinisin minne epwe pesei kich seni ach sipwe esinna ach popun ese much. Mwirin ekkoch efeiengaw ese fisioch seni ewe chon koum, an sotuni ne atoka I seni an ewe misin, ewe Chon Amanau a osuono seni an a apasa: “Kopwe suno, Setan. … Iwe ewe setan a suseni I, me, nengeni, ekkewe chon nang ra feitto o ra eteneki Jises.”¹⁹

Ami mi tongeni anchangei, pwii me fefinei, met epwe fis ika si angei ach pochokun me pesepes seni ewe Chon Amanau me apasa, “Apw” me “Kopwe suno” ngeni ekiek mi nimengaw nupwen a keran tonong non ach ekiek? Epwe met pochokunan won mochenin netipach? Ifa usun pungun ach foffor epwe akkana kich ngeni ewe Chon Amanau me mut pesepesen ewe Ngun mi Fel epwe soposopono non manauach? Ngang mi sinei pwe ren ach tapweno mwirin an Jises nenien appiru, sipwe atowawa chommong osukosuk me nikinik ese och minne epwe efisata osukosuken famini me tipefesen, ngawen ekiek me tokono, foforungaw me niningaw, fotek ren eriaffoun oruni mi enieput, me pwan met epwe u ngeni annukun ewe Samon.

Non an ewe uruo me porous mi ku netip seni April ei ier, Presetent Russell M. Nelson, a fori ew pwon pwe meinisin ekkewe ra chengen ne “rongorong ngeni I”—rong ngeni Jises Kraist— me anneasosichi An kewe annuk “repwe feioch ren manaman mi kapacheta ar repwe atawei ren sosot, weires, me apwangapwang.” me ach tufichin mefi pwapwa epwe napeno, pwan non ei fansoun fitikoko.²⁰

Ua pwarata ngeni kemi pwe ekkewe pwon an nouch achengicheng soufos ir pwon ewe Chon Amanau. Ua tingor ngeni kemi oupwe “rongorong ngeni I” non meinisin ekiek me tapweno mwirin I ren unusen netipach pwe sipwe angei ewe pochokun me pworacho ne apasa, “Apw” me “Suseni Ei” ngeni ekkewe mettoch meinisin repwe wato netipengaw non manauach. Ika sia fori, Ua pwon pwe ewe Samon epwe tinato keukun Ngunun ewe Ngunipin an epwe apochokuna me oururu kich me sa tongeni winiti emon me emon aramas mwirin pusin netipen ewe Samon.²¹

Ua pwarata ai kapasen pwarata pwe Jises Kraist mi manau me non I, sa tongeni akkufu mwokutukutun ewe chon koum me tufich ngeni ach sipwe nonnom ren ewe Samon me nomw ren Samach achengicheng non Nang. Ua pwarata ekkei ennet fiti unusen ai tong ngeni kemi me ngeni ach ewe Samon mi unusen echipor minne itan ua ngeni ning, asufon me ingeiti feinfeino chok. Ua apasa ekkei mettoch non itan Jises Kraist mi pin, amen.