Ren Kochufengenin Memef Sia Angei Manaman Ren Kot
Nupwen sia kuta ochufengenin memmef, sipwe fori ewe manamanen Kot epwe fori an epwe unusono ach angang weires.
Inen Gordon ewe a ureni pwe ika a awesi an kewe angang, iwe epwe fori och anan pie. An asa ena sokun Fan itan chok. Gordon a no fori an kewe angang ar repwe tawe, iwe inan ewe a wau ewe pie. Fefinan ewe watte Kathy a eto non ewe imw fiti emon chienan. A kuna ewe pie me a tingor ika ir mi tongeni ani och me chienan ewe.
“Apw,” Gordon a apasa, “Enei na pie. Mama a peikini fan itei, niwinin ai angang.”
Kathy a mesengaw ngeni mongean ewe kukun Atewe a chok mochen epwe i chok won mettoch me kichingaw. Ifa ussun an epwene chok ani meinisin?
Ekkoch awa mwirin nupwen Kathy a suki asamen ewe taraku an epwene eniwinano chienan ewe ngeni imwan, won ewe nenien mot ruu napkin a tukutukochuno, ruofoch fok aser, me ru kinikiin pie won kewe sepi. Kathy a aporousa ei porous atun nemanon Gordon ewe an epwe pwarano ifa ussun an atewe mochen ekesiwin me pwari kirekiroch ngeni ekewe esap ururun repwe angei.
Non 1842, ekewe Souneng ra angang weires ne oueta ew Nauvoo Tempel. Mwirin an ewe a pwa ewe mwichen Fin Anisi non March, ewe Soufos Joseph a kan ekketo fiti ar kewe mwich an epwe amonereta ren ekkewe angang mi pin mi chok nonno arapakan chok repwe fori non ewe tempel.
On June 9, ewe Soufos a apasa “I epwe afanafan ussun umoumoch[.] Ururun pwe Jises Kraist me [ekkewe] chon nang resap tipeew ngeni kich won mettoch ese namot, met sipwene winiti? Sipwe umoumoch me nennenoi kewe kukkun mettoch.” Presetent Smith a sopweno, “A enetipengawaei pwe ese wor unusochun chiechi—ika emon chon ewe Mwichefen a riaffou meinisin repwe pwan mefi—ren kochufengenin memef sia angei manaman ren Kot.” 1
Ewe mochomochen kapas e merefitiei ussun en merefin paach. Ren Kochufengenin memef sia angei manaman ren Kot. Esap iei met u mochen ei fonufan epwe ussun. Mei chommong mettoch ua mochen ai upwe fori me emwirinono. Me enetin, mi watte mettochun u ngeni met uwa aneanei, me fan ekkoch ua mefi nipwakingaw. Ekkoch fansoun a no, ua pusin eisini ei ekkoch kapas eis ai upwe kuna ennetin pungun: Ifa ussun ai upwe tongeni weweochuti aramas mi nom unuki? Ifa ussun ai upwe forata ena “kochufengenin memef” nupwen ir meinisin mi sokofesen? Met manaman seni Kot upwe tongeni tikeri ika ngang mi ekis chungeni ekkoch? Seni ai mochen sinei porousen ekkoch, a wor unungat ai memef. Meni repwe pwan anisuk
Awora Umoumoch
Jacob 2:17 aneani, “Ekieki usun pwiumi kewe usun oua pwisin ekiekikemi, me oupwe chiechioch ngeni meinisin me oupwe fangafangoch pisekimi kewe, pwe repwe pisekisek usumi. Sipwene ekesiwini ewe fos pisek ngeni umoumoch—fangafangoch ami umoumoch pun repwe pwan pisekisek usumi.
Fan chommong sia kan ekieki pisek ren chowan mongo ika mwoni, nge met kich meinisin sia kon mochen non ach iamwir umoumoch.
Pusin nei ewe presetenin Fin Anisi a apasa; “Ewe mettoch ua … pwon … ngonuk pwe upwe tumunu itom esap feiengaw. … Upwe churuk ren pusin en me nonomum Usap tongeni apasa och porousom epwe ngaw esap oukota Ua tingor ngonuk om kopwe pwan fori ena ngeniei pun fan chommong ngang mi nuokus, ai upwe nikitukono.”
Joseph Smith a apasa ngeni ekkewe fefin won ena ranin June non 1842:
“Nupwen aramas ra pwarano kirekiroch me tong ngeniei, O met manaman a tonong non ekieki. …
“… Ew ach arapakan ngeni Samach non Nang, me ew napenon ach mochen ne nengeni fiti kirekiroch won ekkewe ra aani riaffoun non ngun—[sia mefi pwe sia mochen] sipwe mwarer won afarach me oturano ar kewe tipis nukunsokuruch. [Popun ai ei afanafan fan iten] meinisin kei neni—Ika pwe Kot epwe awora umoumoch ngonuk, awora umoumoch ngeni meinisin.” 2
Ei a kapas ourour akaewin ngeni ekkewe Fin Anisi. Sisap opungu ekkoch ika mut ngeni ach kapas epwe ametek. Sipwe tumunochu iteochun emon me emon me awora ewe nifangen umoumoch. 3
Fori wom na epwe Mokut
Non 1936, ew mwichen kitir won ussun kan wafotun rese pwan pwarireno seni ewe University of Washington ra sai ngeni Germany ar repwe fiti ekkewe urumoten Olimpik. Atun ewe anononun wachimuken sokopaten osukosuk. Ekkei at nge ir chon sukun chon nenier ewe ra aninis ren ekis mwoni ren ar repwe tongeni sai ngeni Berlin. Meinisin kokoten mokutukutun ewe okkuf ussun nge a chok anopota wor, nge och mettoch a fis non ei kitir. Non ewe fotunen fonufan, ra eita ngeni “mokut.” Rong ngeni ewe awewe a anongonong won ewe puk Kewe At won ewe Wa
Mi wor ew mettoch fan ekkoch mi fis a weires ach sipwe tori me weires ach sipwe awewei. A iteni “mokut.” A chok fis nupwen meinisin ra tipeew ne fotunopok esap mo ew mokutukut epwe sokono.
Chon fotun repwe nemenem non ar pochokun nge pwan ennet ngeni an emon me emon tongeni. Kitir rese win ren ekkoch mi chok foruta seni pisekin won inisin emon. Kumi mi och ir mi nofit chochon—emon epwe wisen emweni ewe sa, emon epwe wisen kamoch och mettoch ren aean mwirin, emon epwe wisen aani ewe fiu, emon epwe fori kinamwe. Ese wor emon chon fotun epwe kon auchea seni pwan emon, meinisin ir ra auchea ngeni ewe wa, nge ika ra angangoch fengen, repwe anonopoku ar mochen me tongeni ngeni ekewe ekoch—ew mochonon an ewe chon uou pisekin efeiengaw epwe ekis towaono, nge tamanon an ewe chon uou pisekin efeiengaw ekis kanenong.
Sokofesen a tongeni epwe winiti och nap seni och. Iwe mwirin ussun nge ewe wa a chok pusin omokut won an. Iwe mwirin weiresin inis a no ngeni manau fefeita. “Mokut” mi murino a ussun nge ew murinon porousen och mettoch. 4
Fiu ngeni met tekian mettoch epwe epeti aner, ei kumi a fokkun och ar omokut me ra win. Ewe kon ren ewe Olimpik a fokkun ameseik, nge ewe kochufengenin met ekkewe chon fotun ra fori non ena ran ew fansoun mi pin a chok nonnom rer non unusen manuer.
Emwitiri ne Nimetano ewe Ngaw pwe ewe Murinno Epwe Tongeni Mar
Non ewe amwararen porous non puken Jacob 5, ewe Samonun ewe atake a fotukatiw ira och non ewe pun mi och, nge a ngaweno non ekkewe fansoun me a wato ira ngaw. Ewe Samonun ewe atake a apasa fan wanu: “A enetipengawaei [an]epwe mano seniei ei ira.”
Ewe chon angang a apasa ngeni ewe Samonun ewe atake: “Witi ekiseno chok mo om kopwe atai [ewe ira]. Me ewe Samon a apasa: Ewer upwe witi ekiseno chok mwo.” 5
Iwe mwirin a etto ewe kapasen awewe ewe a tongeni fisingenikich meinisin achocho ne tu fetan ach sipwe kunokun ira och non ach ewe pusin kukkun atake: “Oupwe nimetano ekkewe mi ngaw pun ekkewe mi murinno repwe marita.” 6
Chufengen ese chok pusin fis ussun machik; pwe sipwe anganga. A men tarongaw, fan ekkoch ese ekinamwe, me a fifis nupwen sia mwitir nimetano ekkewe mi ngaw ren an kewe mi murinno repwe tongeni marita.
Sise fokkun akanamon chok non ach achocho ne forata chufengen. Jacob 5 a soposopono,“Ekkewe chon angang ra feinno o angang fiti ar pochokun; me ewe Samonun ewe atake a pwan fitir ne angang.” 7
Emon me emon kich epwene wor ach angangen anononun ametek, kewe mettoch ese fifis. Emon me emon kich sipwene pwan, nom non fansoun mi sokofesen, mut ngeni tipeforea me namanam tekian ekiek repwe angawano ekkewe ira sia mwarei. Nge Jises Kraist I ach Chon Amanau a nom non mettoch meinisin. An manaman a tori epichikin me epinukunuk fan itach nupwen sia kori I. Kich meinisin sia tingor umoumoch ren ach tipis me ach nipwakingaw. A fangeno nge ese kamo. Iwe a tingorekich ika kich mi tongeni pwan ngeni ena chok pwan umoumoch me wewe ngeni pwan ekkoch.
Jises a ennetin watiw: “Oupwe ew chok; nge ika ousap ew chok esap ami nei.” 8 Nge ika kich ew chok—ika sia tongeni awora ew kinikinin anach ewe pie ika amasa ach pusin nipwakoch pwe ewe wa epwe tongeni mokut non wesewesen mokutupokun—iwe kich Noun. Iwe I epwe aninis ne nimetano kewe mi ngaw pwe kewe mi murino repwe puk.
Ekkewe Pwonen Soufos
Meni sisap mo nom ian ururun sipwe nom ia, me sise nom iei ian sipwe nom ia. Ua nuku ewe ekesiwin sia kuta non kich me non ekewe kumi sia choni epwe kukununo ren ekkoch annuk me napano ren ach pochokun ne achocho iteiten ran ne wewe fengen nefinach. Pwata? Pokiten sia oueta Zion—ew mwichen aramas ren, “ew netip me ew ekiek.” 9
Ren kewe fefin mi pwon, mi wor ach angangen ekesiwin mi chouno Ena ekesiwin a fis non fansoun iteiten ran nupwen sia kaeo fiti emon chiechiach, omouru semirit non ar nenien mour, porous ngeni chiechiach nemot won ewe pas, fiti chienach ne angang ne amonata ew afanafan. Mi wor ach pochokun ach sipwe akouono osukosuk me forata chufengen.
Fin Anisi me Ekewe Fopun esap ir chok mwich. Ra pwan tongeni met ekkewe sia sinei ese tongeni nemeno ikewe fefin mi fokkun sokofesen sia tota won ewe chok efoch wa me sa fotun tori sia kuna ach mokut. Ua awora ei tingor: epwe chiechien ew mwichen aramas ewe ra siwinifochei ewe fonufan. Ach ewe angang sia koko ngeni ach sipwe iamwir ne komochuta ekkewe pau ra sapwinitiw ne wata won sokuruch kewe aramas mi tinisuk, ika non pouch ach sipwe mwarer. Ese weires ach sipwe sinei met sipwe fori, nge fan ekkoch a u ngeni ach mochen me sipwe sotuni. Ekkewe fefin non ei Mwichefen a wor ami tufich ese kauk ne ekesiwini kewe neni. Mi wor ai wachimuken nukunuk non pekin ngun pwe, nupwen sia kutta kochufengenin memmef, sipwe tingor ewe manmanen Kot an epwe fori ach kewe pochokun repwe unusochuno.
Nupwen ewe Mwichefen a achechema ewe 1978 pwaratan ewe pristut, President Russell M. Nelson a awora ew pochokunen efeioch seni soufos: “Iei ai iotek me efeioch pwe upwe watiw womi meinisin ion mi rongorong pwe sipwe ngas seni ekkewe chourekin sokopaten osukosuk me fetan wenechar ren Kot—me pwan ren emon me emon—non unusochun kinamwe me anonno fengen.” 10
Amo sipwe fitipach ngeni ei efeioch seni soufos me aea pusin ach pochokun ne anapano chufengen non ewe fonufan. Ua nikitatiw ai kapasen pwarata non an ewe Samon Jises Kraist kewe kapas tekisosonun iotek ese wor koukun: “Pwe meinisin repwe ew; en, Sam, non ngang, me ngang non en, pwe repwe pwan ir non kich.” 11 Non iten Jises Kraist, amen.