Isoni ewe Siwin
Me ren Jises Kraist sia angei ewe pechekun mi namwot ne fori ekkei siwin fenfeinno. Nupwen sia etekisonekich ne kun ngeni I, I epwe anapano ach tufichin siwin.
Pwi achengicheng, ua men fokkun pwapwa ai nonnom remi!
Ekieki ussun emon a feinno ngeni ew market an epwe moni och mettoch. Ika a ngeni ewe chon angei niwinin pisen mi nuseni niwinin ewe mettoch, ewe chon angei niwinin pisek epwe ngeni neminewe nusun.
King Benjamin a aiti noun kewe aramas non Merika me nom usun ekkewe watten feioch sia angei seni ach Chon Amanau, Jises Kraist. A forata ekkewe nang me fonufan me ekkewe ningoch meinisin sia pwapwaiti.1 Me ren An Achasefan mi tong, A awora eu minen tufich ach sipwe ngaseno seni tipis me mano.2 Nupwen sia pwari ach kinisou ngeni I ren ach achocho ne manaueni An annuk, I a mwitir efeiochu kich, ngenikich an memefin kinisou fansoun meinisin.
A ngenikich chommong, chommong nap seni ukukun met sia tongeni aniwinsefan ngeni I. Iwe, met sia tongeni ngeni I, ewe a moni auchean niwinin ach tipis? Sia tongeni ngeni I siwin. Sia tongeni ngeni I ach siwin. Menin epwe ew siwinin ekiek, ew siwin non oreni, ika ew siwin non ewe an sia feino ia Siwinin An niwin ese kamo fan iten emon me emon kich, ewe Samon a tingorei kich pwe sipwe siwini netipach. Ewe siwin A tingoreikich esap ren feioch fan iten I, nge fan itach. Iwe, esap usun ewe chon kamo non ewe sitowa ewe epwe angei sefani nusun ewe sipwe ngeni, ach Chon Amanau mi kirekiroch a ereni kich pwe sipwe isoni ewe nusun.
Mwirin ar rong ekkewe kapas seni King Benjamin, noun kewe aramas ra puchor, me affata pwe netiper a siwin, ra apasa, “Pokiten ewe Ngunun ewe Samon mi Uren Manaman, minne a fis ew siwin watte wom, … ese chiwen wor am mochen fori mi ngaw, nge am aupwe sopweno ne for mi och.”3 Ekkewe pukefel rese apasa pwe ra mwitir winiti mi unusoch, nge, ar mochenin siwin a peser ar repwe fori foforun. Ar siwinin netiper wewen otur senir ewe chon u ngeni Kot me eitwa ewe Ngun non ar achocho ne winiti usun Jises Kraist.
Preseten Henry B. Eyring a aitikich: “Ennetin ekesiwin a anongonong won ach ngaseno ne kutta non nuku, fiti achocho me ekis metek. Iwe mwirin ewe Samon epwe tongeni awora … ewe manamanen enimenim me siwin.”4 Ach achufengeni ach achocho ngeni an ewe Chon Amanau tufichin siwini kich, sia winiti aramas minafo.
Nekukunui we, ua pusin anapanapa non ai ekiek ai fetan ne fitata efoch aan mi weneta ngeni ai mochen ren manau esemuch. Iteiten fansoun ua fori ika apasa och mettoch mi muan, ua mefi ai fasetiw me won ewe aan, iwe ua pwan poputa sefani ai we sai. A usun ach sotiw won ewe kinikin mi napen pwor non noun semirit we game Chute and Ladders ewe epwe afasakotiw seni asan ewe game ngeni nepoputan we. A ew epinukunukungaw! Nge nupwen ua poputa ne weweiti ewe annukun Kraist5 me ifa usun ai upwe aea iteiten non manauei, ua kuna epinukunuk.
Jises Kraist a fen ngenikich ew soposoponon napanapen siwin. A tingorekich ach sipwe anganga nuku non I, minne a amwasanga kich ach sipwe aier—“minne nuku me aier a wato ew ekkesiwinin netip.”6 Nupwen sia aier me okunnu netipach ngeni I, ach mochenin fori me apwonueta pwon mi pin a watteno. Sia nikitu tori nesoponon ren ach sipwe sopweno ne fori ekkei mettoch non unusen manauach me etiwa ewe Samon an epwe ekesiwini kich. Nikitu ngeni nesoponon wewen siwin tori nesoponon. Iei ua weweiti pwe usap poputa sefan iteiten ua tur, nge ren ew me ew sossot, ua sopweno ai angangen siwin.
Mi wor ekkoch kapas non ewe itenapen Young Women ewe a apasa, “Ua echeni ewe niffangen aier me kutta ai upwe ochuno ew me ew ran.”7 Ua iotek pwe sipwe echeni ei niffang mi ning me sipwe kutta siwin ren ennetin netipach. Fan ekkoch ekkewe siwin ra auchea ach sipwe fori mi chu ngeni watten tipis. Nge napengeni, sia achocho ne nimeti ach napanap ne awena manauach ngeni napanapen Jises Kraist. Ach kewe finata iteiten ran epwe anisi kich ika eppeti ach fefeita. Kukkun nge nukuchar, siwin ren popun epwe anisikich ne ochuno. Kosap tipemwaramwar. Siwin ew angang non unusen manauach. Ua men kinisou pwe non ach weires ne siwin, ewe Samon mi tipepos ngeni kich.
Me ren Jises Kraist sia angei ewe pechekun mi namwot ne fori ekkei siwin fenfeinno. Nupwen sia tipetekison ne kun ngeni I, I epwe anapano ach tufichin siwin.
Pwan pachengeni ewe manamanen siwin an ach Chon Amanau Achasefan, ewe Ngun mi Fel epwe anisi me emweni kich nupwen sia aunusa ach achocho. I mi tongeni pwan anisi kich ach sipwe sinei met ekkewe siwin mi auchea sipwe fori. Sia tongeni pwan kuna aninis me pesepes seni feiochun pristut, iotek, echikipin, me no ngeni ewe tempel.
Usun chok, chon ach famini kich mi nuku, sou emwen, me chiechiach ir mi tongeni aninis non ach achocho ne siwin. Nupwen ai wanu ier, mwongei we watte, Lee, me ngang aua soun nom ren chienem kewe ne kukunou won kewe panen iran non teninimwem kewe Aua sani ne nom fengen non am chiechi ngeni chienem kewe non chunon ena ira. Non ew ran, Lee a turutiw me won ewe ira me poun a kup. Ren an a kup poun a weires ngeni an epwe tota won ewe ira won winikapan. Nge kukunou won ewe ira ese chiwen nonno an ese nom ikewe. Iwe, ekkoch me neim aua anisata me nukunupan nupwen ekkoch ra weitata poun, me ese pwan nap am achocho ngeni, Lee a nom sefan won ewe ira. Poun mi chiwen kup, nge a nom rem sefan an pwapwaiti am chiechi nupwen epwe chikar.
Ua kan soun ekieki usun met a fis ngeniei ai kunou won ewe ira pwe ew awewen mettoch non ewe kapas allimen Jises Kraist. Non chunon panen ewe kapas allim, sia pwapwaiti chommong feioch mi chu ngeni ach pwon mi pin. Menin ekkoch ra fen turutiw seni tumunun ar kewe pwon mi pin me a auchea ach aninis ne anisir ne tosefanita non tumunun panen ewe kapas allim. Mi tongeni epwe weires ngenir ar repwe niwin sefan won winikaper. Sia tongeni apwetetei ne ekis weitireto ikei me ekis weitireta ikenan ne anisir repwe chikar nupwen ra pwapwaiti ach chiechifengen?
Ika ka riaffou ren ew feiengawen turutiw, kose mochen mut ngeni ekkoch repwe anisuk ne niwin ngeni om pwon mi pin me ekkewe feioch repwe awora. Ewe Chon Amanau a tongeni anisuk pwe kepwe chikar me siwin nupwen ekkewe ra tongek ra rongekono.
Ua soun churi chienei ekkewe use chiwen kukuner ren chommong ier. Fan ekkoch ra apasa, “Kose mwo nge siwin!” Iteiten ua rong ena, ua ekis nur, pokiten ua anean pwe ua fen siwin non ekkewe ier. Ua anean pwe uwa siwin seni nanew! Ua anean pwe ua ekis kirekirochuno, kisino ai apungu ekkoch, me napeno ai umoumoch. Ua anean pwe ua ekis mwitir ne anisi an ekkoch osupwang, me anean pwe ua ekis pwan tipepos.
Ua sani fetan won ekkewe chuk arap ngeni imwei we. Napengeni, a soun wor efou kukkun foun fau non nei sus nupwen ua fetan won ewe aan. Soponon, ua kouno me uchukau nei we sus. Nge ukan mwar ren ukukun ai mut ngeniei pwisin ai upwe fetan non metek me me mwen ai kouno me aturano seniei ewe fau.
Nupwen sia sai won ewe aanen pwon, fan ekkoch sipwe nukonuk foun fau non nouch sus non napanapen oreni mi ngaw, tipis, ika napanapangaw. Ach mwitir ne uchukireu seni manauch, epwe watte pwapwan ach sai non ei manau.
Ach sopweno siwin mi angang weires. Use tongeni aneani ai kouno won ewe aan ai upwe chok wanong sefan non nei we sus ewe foun fau mi eningeringer me emetek ewe ua keran chok wau. Usap mochen fori ena nap seni emon ningochun nipisipiskon epwe finata an epwe niwin ngeni tukutukun we.
Ua pwarata pwe pokiten Jises Kraist, sia tongeni siwin. Sia tongeni siwini ach oreni, asokano ach ekiek, me enimochu ach napanap ne winiti usun I. Me ren An aninis, sia tongeni isoni ewe siwin. Non iten Jises Kraist, amen.