Anetipochu Netipom
Ach nukuchar non ewe annukun ewe kapas allim mi aniwinato an Jises Kraist a emweni ach fetan me ngeni kich pwapwa.
Non amuchunon ranin manauan kewe, Jises Kraist a ureni Noun kewe Aposel usun ewe ninni me weires repwe riaffouni. 1 A osopano ren ei epinukunuk: “Fonufan epwe eriaffou kemi. Nge oupwe chok epinukunuk! Ua fen okkufatiw fonufan” (John 16:33). Ina an ewe Chon Amanau porous ngeni noun Samach won Nang meinisin. Ina ewe watten porousoch ngeni emon me emon kich non manauach won fonufan.
“Anetipochu netipom” pwan ew epinukunuk mi auchea me non ewe fonufan ikewe ewe Kraist mi manausefan a tinano Noun kewe Aposel. “Aua osukosuk ekis meinisin,” ewe Aposel Paul mwirinon a ureni ekkewe chon Corinth, “nge ause riaffou; aua osukosuk, nge ause tipemwaramwar; ninni, nge ause nikitino; turutiw, ngeni ause mano” (2 Corinth 4:8–9).
Ru ngerou ier mwirin sia pwan “osukosuk ekis meinisin,” me mi auchea ngenikich ena chok pwan porous ach sisap tipemwaramwar nge sipwe anetipechu netipach. A wor an ewe Samon auchean tong me aurek fan itan noun fopun mi achengicheng. Mi sinei usun met ka mochen, met mi auchea ngonuk, me om nuokus. Ewe Samon mi unusen manaman. Nuku I.
Ewe Soufos Joseph Smith a kaeo pwe ekkewe angang, me kokkot, me ekkewe popun Kot rese tongeni kouno, resap pwan namotongaw (Nengeni Doctrine and Covenants 3:1). Ngeni Noun kewe mi weires, ewe Samon a ngenikich ekki watten apinukunuk:
Iei pwonen ewe Samon ngeni kich, Noun chon angang.
Sipwe anetipochu netipach, me sisap nuokus, pun ewe Samon mi nom rech, me epwe uta rech; me sipwe pwarata usun I, Jises Kraist, pwe I Noun ewe Kot mi manau (Nengeni Doctrine and Covenants 68:5–6).
Ewe Samon mi uta unukuch, me A apasa:
Met a apasa ngeni emon a apasa ngeni meinisin, anetipechu netipom, kukkun semirit; pun I mi nom neich, me I ese nikitikicheno (Doctrine and Covenants 61:36).
Pun mwirin watten riaffou ekkewe feioch repwe fis (Doctrine and Covenants 58:4).
Fefinei, ua pwarata pwe ekkei pwon, mi kawor nukanapan ninni me osukosuken winikap, ir mi fich ngeni emon me emon ami non ami osukosuk ikenai. Ir mi auchea me achema ngeni kich pwe sipwe anetipochu netipach me pwapwa non unusochun ewe kapas allim nupwen sia nikitu ngeni weiresin manau won fonufan.
Riaffou me weires ir met sipwe mefi non manauach non fonufan. Pekin ungeni eu auchean kinikinin ewe kokkot an epwe anisi kich ne marita, 2 me nukanapan ena napanap, mi wor rech an Kot apinukunuk pwe, non manau fochofoch, ungeni esap mumuta an epwe akkufu kich. Ren An aninis me ach tupwen me nikitu, sipwe pochokun. Usun chok ewe manau won fonufan ir pekin, meinisin riaffou mi mwochomwoch. Non ekkewe tipekoum me mwen ew tatakisin maun, ewe presetenin Merika Abraham Lincoln a mirit ne achema ngeni noun kewe aramas usun ewe miriten nom pwe “ei, pwan, epwe wesino.” 3
Oua sinei, ekkewe sossotun fonufan minne ua kapas usun—minne ra aweresi kich ach sipwe netipoch—fan ekkoch ra fis ngeni kich fiti pwan ekkoch, usun minion aramas ra weires ren ekkoch ekkewe osukosuken Covid-19. Usun chok, non Merika minion aramas ra riaffou ren ew fansoun koput me tipengaw mi soun fis fansoun ututun preseten, nge non ei fansoun a kon napeno seni am ekkei aua watteno aupwe tongeni chemeni.
Ren emon me emon kich, sia weires ren chommong weiresin fonufan, usun woungaw, koputen sokofesenin aramas, samaw, ese chiwen wor angang ika tipengaw, semirit mi nukumach, pupunu mi ngaw ika ese wor pupunu, me feiengawen tipis—ach pwisin ika an ekkoch.
Nge, nukanapan ekkei meinisin, mi wor ach ourour seni nang pwe sipwe anetipochu netipach me kuna pwapwa non ekkewe nongonong me pwonen ewe kapas allim me uwan ach angang. 4 Ena ourour mi chok ina usun, ngeni soufos me kich meinisin. Sia sinei ei seni met nouch soufos akkom ra weri me met ewe Samon a urenir.
Chechemeni usun nonnomun ewe Soufos Joseph Smith. Ika sipwe ekieki ekkena weires, manauan ew manauen woungaw, ninni, ningeringer, netipengawen famini, me me ewe amuchunon ninnino. Nupwen a riaffou ren kanapus, punuwan me noun me ekkewe ekkoch Souneng ra riaffou ren watten osukosuk nupwen ra katou me non Missouri.
Nupwen Joseph a sio fan iten epwe wor ngaseno, ewe Samon a ponuweni:
Nei we at, kinamwe ngeni ngunum; om kewe osukosuk me riaffou repwe chok nom reom ekis chok fansoun;
Iwe mwirin, ika kopwe nikitu ngeni, Kot epwe seikakota won tekia; kopwe akkufu meinisin chon koum ngonuk (Doctrine and Covenants 121:7–8).
Iei an we ourour, mi fochofoch a anisi ewe Soufos Joseph an epwe anomu an tipepwapwa me ewe tong me nikitu ngeni noun aramas. Ekkei chok pwan napanap mi apochokuna ekkewe sou emwen me pioneer ekkewe ir mi fori repwe pwan tongeni apochokuna kemi.
Ekieki usun ekkewe akkomwen chon mwichefen! Fan chommong, ra katou seni neni ngeni neni. Nesoponon ra weri osukosuken forutan imwer me ewe Mwichefen non ew fonupon. 5 Ru ier mwirin ewe akkomwen mwichen pioneer ra tori nemwonun ewe Great Salt Lake, ir mi chiwen chok achocho ar repwe manau non ena neni mi wor koum. Napengeni chon ewe mwichefen ir mi chok sai won epekin ekkewe sonosonoch ika weires ne angei pisek ar repwe fori. Nge sou emwen me chon mwichefen ir mi chiwen apinukunuk me netipoch.
Inamo ika ekkewe Sounang rese mwo nom non imwer kewe minafo, atun mwichenapen mwichefen non October 1849 ew minafon mwichen misineri ra no ngeni Scandinavia, France, Germany, Italy, me ewe South Pacific. 6 Atun fansoun ita repwe fen netipengaw, ekkewe pionner ra awesi watten mettoch. Me unungat chok ier mwirin, pwan 98 ra kokko ngeni ar repwe poputa ne ionfengeni Israel mi toropas. Emon ekkewe sou emwenin Mwichefen a awewei pwe ekkei misin “napengeni, resap kon tam; neman seni 3 ngeni 7 ier epwe ina taman an emon mwan epwe no seni an famini.” 7
Fefinei, ewe Aewin Presetensi mi aureki usun ami osukosuk. Am mi tongei kemi me iotek fan itemi. Pwan chok, napengeni aua afanafan pwe ach osukosuken inis—mi imuseni chechin fonu, ekkei, no, me wonungaw—ir mi kis seni met chon akkom mwach ra weri.
Nukanapan riaffou, ewe apinukunuk seni nang ina sipwe chok anetipochu netipach, pun i epwe emweni kich. Ewe muu epwe ach me ekkewe feioch epwe pwan ach, me unusan pisekisekin fansoun ese much epwe pwan ach (Nengeni Doctrine and Covenants 78:18). Ifa usun a fis ei? Ifa usun a fis ngeni ekkewe pioneer? Ifa usun epwe fis ngeni fefin noun Kot ikenai? Ren ach apwonuetan emwenin soufos, ekkewe titin hell resap pwaracho ngeni kich, tewe Samon a apasa ren pwarata non April 1830. A apasa pwe … ewe Samon Kot epwe aparasa ewe manamanen rochopwak seni me mwemi, me fori ekkewe nang repwe chunguchung fan itach, me fan itan mi ning (Doctrine and Covenants 21:6). A apasa pwe sisap nuokus, kukkun machang; fori mi och; mut ngeni fonufan me hell repwe ungonuk, pun ika ka kauuta won ai achaw, resap win (Nengeni Doctrine and Covenants 6:34).
Ren an ewe Samon pwon, sia sachetai netipach me pwapwa (Nengeni Doctrine and Covenants 25:13), me ren ew netip pwapwa me ew mese tipoch (Nengeni Doctrine and Covenants 59:15), sipwe feino won ewe aanen pwon. Napengeni kich sipwe finata mettoch mi watte, usun ach suseni imwach ach sipwe no nom won ew fonuen ekis. Ach fifinata a kan soun fis iteitan non manauach, nge usun ewe Samon a urenikich pwe sisap chipwang non ach fori mi och, pun sia fori nongonongun ew angang watte. Me seni mettoch mi kukkun watte mettoch ra fis (Nengeni Doctrine and Covenants 64:33).
Ese wor kaukun manaman non ewe nongonongen ewe kapas allimen Jises Kraist mi niwinsefan. Ach nuku ese tongeni chung non ena nongonong a emweni eipeipwach me ngenikich pwapwa. A asarama ach ekiek me ngeni kich pochokun me apinukunuk non ach foffor. Ei emwen me saram me manaman ir niffang mi pwon ngenikich sipwe angei seni Samach won Nang. Ren ach weweiti me apacha manauach ngeni ena nongonong, mi pachenong ewe niffangen aier, sia tongeni netipoch ren ach nom won ewe aan ngeni neniach esemuch—chufengen me manau fefeita ren semach me inach won nang.
“Naman oupwe weri osukosuk mi watte,” Elter Richard G. Scott a aitikich. “Fan ekkoch ra wesen nap, resap wesen aukuk, pwe eni kopwe mefi pwe ra nap seni om tufich. Kosap anamon ne fiu ngeni fonufan. ‘Kopwe nukunuk ewe Samol ren unusen netipom; kosap epinukunuku met ka ekieki pwe ka sinei’ [Proverbs 3:5]. … A popun pwe manau epwe ekkis weires, esap pwe kepwe poutmwanino, nge pwe kepwe pworacho ngeni pwapwa.” 8
Meinisin kinikinin ewe kokkotun Kot ewe Sam me Noun we, Jises Kraist, usur ua pwarata, usun ua iotek pwe sipwe soposopono ngeni imwach nang, non iten Jises Kraist, amen.