Muu Meinisin, Einang, me Sokopaten Kapas
Sia tongeni winiti ekkis non ach pwisin napanap eu kinikinin efiisita An ewe Samon kewe osini me pwon—kinikinin ewe kapas allim minne a efeiochu ewe fonufan.
Pwi me fefinei mi achengecheng, iwe chok ekis eno uwa wisen emweni eu riri fengen non ewe temple, non napanapen aurouren fansoun COVID-19. Fiti ewe mwan me fefin ra pupunu, ir me ruemon ra chiwen nukuchar mwirin ar angangen misineri, ra pwan wor semer me iner kewe me pwir, fefiner, me mongeer kewe. Ei ese mecheres! Ewe fefin i etiwemonun engon semirit. Pwiin me mongean kewe tiwemon ra mwomwot seni nampa eu ngeni saingon, mwot ekis towaw fesen.
Ewe famini ra achocho pwe repwe chon orun mi och me non nenier kewe. Nge, eu me nein nenier ese etiwa ir—pun, inen ewe fefin epwe opupunu a apasa, pwe ar famini ir chon Ewe Mwichefenin Jises Kraist ren Aramas mi Pin non Fansoun Soponon.
Ewe famini a achocho ne chiechioch me non sukun, me aninis, pwe repwe etiwa, nge ese fiis. Ewe famini ra iotek me iotek pwe netip repwe pwetete.
Eu pwin, ewe famini ra mefi pwe ar kewe iotek ra penu, nge esap ren ifa usun ra ekieki. Imwer we a kareno ren ekei. Nge pwan eu mettoch a fiis. Ewe ekei a apwetetei netipen chon orur kewe.
Chon orur kewe me ewe sukkun ra iofengeni uf, sus, me pwan ekkoch mettoch mi namwot fan iten ewe famini, minne a tur senir mettoch meinisin. Kirekireoch a suki weweoch. Esap napanapen minne ewe famini a ekieki ika mochen pwe ar kewe iotek epwe penu. Nge inamo, ra apasa ar kinisou ren met ra kaeo ren ar weires me penuwen ar kewe iotek seni netiper minne rese ekieki.
Ennet, ngeni ekkewe ren netip mi nukuchar me meser ne kuna, An ewe Samon chen mi kirekiroch ra pwa non fansoun osukosuk non manauach. Ika sia nukitu non osukosuk me fansoun asoreno feiochun nang epwe torikich. Non ei manau, a tufich mettoch resap tori kich ika sipwe witi ekkis, nge nesoponon sipwe kuna met a ennetin auchea. 1 Ina An pwon. 2
Ach esinesin ruepuku ier ren 2020 a poputa ren ewe pwon mi auchea ngeni meinisin pwe “Kot a tongei Noun kewe non muu meinisin.” 3 Ngenikich meinisin non meinisin muu, eingang, me sokopaten kapas me aramas, 4 Kot a pwon, pwon mi pin, me etiwa kich sipwe feito me angei seni watten An pwapwa me kirekiroch.
An Kot tong fan iten aramas meinisin a apungano non unusen pukefel. 5 Ena tong a tori ekkewe pwon mi pin an Abraham, iofengeni Noun kewe mi toropas fetan, 6 me An kokkotun pwapwa.
Non imwen nuku esor aramas sisap sinei, esor chon ekkis, 7 esor chon pisekisek are woungaw, 8 esor chon “ekkoch” me nukun. Pwe kich “chiechin pwan ekkewe souneng,” 9 sia etiwa ne siwiniochu ewe fonufan, seni kich tori nukun, emon. aramas, eu famini, me eu neni ekis me ekis.
Ei a fiis nupwen sia manaueni me aporousa ngeni ekkoch ewe kapas allim. Neopoputan ei kinikinin fansoun, ewe Soufos Joseph a angei eu osini mi amwarar pwe Semach won Nang a mochen pwe aramas meinisin non neni meinisin repwe kaeo usun An Kot tong me mefi An pechekun ne marita me siwin.
Ena osini a fiis ikkei, me non imwen faminien Smith we non Palmyra, New York. 10
A wesino non 1998, imwen ewe faminien Smith a kauta sefan won akkaewin nenien we me nom. Iei ewe ru sasar ruumen annut a 18 x 30 x 10 fit (5.5 x 9 x 3m) a nom non ewe chok neni ikeweie Moroni, emon amwararan chon kuno fan iten Kot, a feitto ren ewe anuon Joseph ia non kunionun September 21, 1823 [Eu ngerou wanupuku rue me unugat]. 11
Ka chechemeni met ewe Soufos Joseph a apasa usun:
“[Moroni] a apasa … a wor eu angang seni Kot fan itei; me itei we epwe wewen ngeni och me ngaw me non muu meinisin, einang, me sokopaten kapas. …
“[Moronai} a era pwe a wor eu puk mi peiaseno, … pwe unusen ewe Kapas Allim ese muuch a mak non.” 12
Iei sipwe kouno fan ekkis chok. Sia fen ngeni Kot ewe Sam ese Much me Noun we At, Jises Kraist, esap ewe Soufos Joseph ika pwan emon mwan ika fefin won fonufan.
Nge ekieki won ifa usun ekkwe osini seni Kot minne A ngeni Noun kewe chon angang ra fiisita. 13 Ekkoch ra fiisita mwitir, ekkoch mwirin och fansoun, nge iwe ir meinisin ra fiisita. 14 Ren ach rongesich ngeni an ewe Samon ngunun osini, sia tongeni winiti, ekkis non ach pwisin napanap, eu kinikinin fiisitan An ekkewe osini me pwon—kinikinin ewe kapas allim minne a efeiochu ewe fonufan.
Joseph a emon anuon minne aramas rese sinei 17 ierin chok me a nom non eu kukkun sopw non eu minafo muu. Ika ese ennet, ifa usun epwe ekieki pwe i epwe emon pisekin aninnis non an Kot angang me chiaku me ren an Kot niffang me manaman ewe pukefel minne epwe sinei won unusen fonufan?
Iwe, pokiten a ennet, en me ngang sia tongeni kuna ewe osini a fiis me pwan kich sia etiwa ne anisi non fiisitan.
Pwi me fefinei, won unusen ewe fonufan, emon me emon kich sia fiti ei October 2020 mwichenapen mwichefen sia nom me nein ekkewe muu, einang, me sokopaten kapas minne a foos usun.
Ikenai, chon Ewe Mwichefenin Jises Kraist ren Aramas mi Pin non Fansoun Soponon ra nom non 196 muu me fonu, me 3,446 steik non ewe Mwichefen mi nom non 90 [tiwe] me neir. 15 Sia tupuni watten fonu me nenien pechekun.
Non 1823, ion epwe ekieki pwe non 2020 epwe wor unugat muu minne epwe wor nap seni eu million chon ewe Mwichefen non eu me eu ir—ewe United States, Mexico, me Brazil?
Ika 23 muu eu me eu ren nap seni 100,000 chon ewe Mwichefen—unungat non North America, engon me ruanu non Central me South America, eu non Europe, ruanu non Asia, me eu non Africa? 16
Preseten Russell M. Nelson a apasa pwe ewe Puken Mormon “a eu amwararan manaman.” 17 Ekkewe chon pwarata usun ra pwarata, “Asinei ngeni muu meinisin, eingang, sokopaten kapas, me aramas.” 18 Ikenai, mwichenapen mwichefen a kawor non 100 sokun foos. Preseten Nelson a pwarata pwe Jises Kraist me An kapas allim mi niwinsefanito non 133 muu me a soposono.
Poputa ren 5,000 forien ewe 1830 aewin fofforun ewe Puken Mormon, ekkoch 192 million puk unusen ika ekkoch wokisin ewe Puken Mormon a for non 112 foos. Ekkewe Puken Mormon mi chiaku ra pwan nomw won kapiuter. Ekkewe chiakun ewe Puken Mormon iei a tori napengeni meinisin ekkewe 23 watten foosun fonufan ukukun 50 million aramas ika nap seni ra foos non, me non meinisin a mak non pwisin fosun 4.1 billion aramas. 19
Me ren kukkun me mecheres mettoch—minne kich meinisin sia fen etiwa ne aninis non—amwaran mettoch repwe fiis.
Ren awewe, non eu mwichen steik me non Monroe, Utah, eu sopw minne 2,200 mi nom non, uwa eisini fitemon me neir ra fen angangen missineri. Chipu pwe meinisin chon fiti ra eitieta peur. Non ekkewe ier a keran no, seni ena steik, 564 missineri ra feinno me angang non meinisin ekkewe 50 kinikinin Merika me pwan 53 muu—won meinisin ekkewe kinikinin fonufan me nukun Antartica.
Antarctica a achema ngeniei, pwe tori pwan Ushuaia, ewe nesopun etiwen Argentina, uwa kuna apwonuetan osini nupwen ekkewe missineri ra afanafana ewe kapas allimen Jises Kraist mi aniwinsefanito non eu neni iten “nesoponon fonufan.” 20
Ewe sasing mi fiis seni meinisin tukutukun ekkewe ruanu auchean Souneng 21 a pwari eu fonufan minne foun uwan seni manauenin ewe kapas allim a tori Sounang mi nukuchar non muu meinisin. Uruon ach Mwichefen a nom non ewe pwisin kapasen pwaratan me manauen ewe kapas allim non emon me emon memper, fiti pwan Mary Whitmer, ewe fefin mi nukuchar minne Moroni a pwari ekkewe chen ewe Puken Mormon. 22
Poputa non January 2021, nouch kewe unungat kukkun puken Mwichefen fan iten unusen ewe fonufan—ewe Friend, For the Strength of Youth,me ewe Liahonara etiwa meinisin ne nom me aporaousa fengen mettochun manauach me kapasen pwarata non ach chiechien nuku won unusen fonufan. 23
Pwi me Fefinei kewe, ren ach anapano ach nuku non Semach won Nang me Jises Kraist, angei ekkewe feioch mi nom non ewe kapas allim mi niwinsefanito me manau me ekkewe pwon mi pin, me kaeo, ekieki me aporausa usun ewe Niwinsefanito mi soposopono, kich sia fiti ewe fiisitan osini.
Sia ekkesiwini pwisin kich me ewe fonufan non napanapen ewe kapas allim minne epwe efeiochu aramas non neni meinisin.
Emon fefin seni Africa a apasa, “An punuwei angangen pristut a anisi pwe epwe tipemecheres me kirekireoch. Me ngang uwa winiti ochun emon chon pupunu me in.”
Emon a wisen anisi chommong business won unusen fonufan non Central America mi sufon a era pwe me mwen a kaeo usun an Kot kapas allim mi niwinsefanito, a manau ese esor imwan. Iei i me an famini ra sinei ir io, ar popun, me pechekun.
Emon at chok non South American a tumunu ekkoch chuko me a ameme sokuner kewe ne anisi an famini ne kamo kinasen asamen imwer we. A moni an asoren eu ne engon akkom. I epwe wesewesen kuna ekkewe asamen nang repwe suk.
Non Four Corners, non Merika, eu Native American famini ra amarata iran pokus mi ningoch non eu neni mi pwas, iwe usun ewe nuku non ewe kapas allim me pwisin tufichich.
Emon a manau non och maun mi weires, emon pwipwi non Southeast Asia a fangeno pwe esor popun manau. A angei apinukunuk seni eu taan minne emon chienan seni sukkun a kamoch eu sepien sakrament me pwarata usun angangepinen amanau me ewe Achasefanin Jises Kraist.
Semach won Nang a etiwa kich meinisin pwe sipwe mefi An tong, ne kaeo me mamarita ren sukun, angang mi och, me pwisin tumunu kich, me napananapen och me pwapwa sia kuna non An Mwichefen mi Niwinsefanito.
Ren ach kaeo ne nuku non Kot, fan ekkoch ren ach sio non napenon ach fansoun rochopwak, anaemon chok, me wewengaw, sia kaeo pwe I a sineikich me tongeikich napseni met sia sinei ika tongei pwisin kich.
Iei popun an Kot aninnis a namwot ngenikich pwe sipwe awora pungupungoch, weweoch nefinach, me kinamwe non imwach kewe me non neniach kewe. Ach ennetin, anononun, me wenecharen manau, neni me popun a poputa nupwen sia mefi an Kot tongen animenimucheno, kutta chen me manaman me ren an Noun we Achasefan, me foreta nefinach me ekkoch ren pwon mi pin.
Ochun namanam me mirit mi namwot non napanapen ikenai mi fitikoko, akurang, me nimengaw fonufan. Ren met me nukun ei sipwe tongeni apechekuna sefani, emiriti, me aouchu ewe ngunun aramas? 24
Fotun ira me non Haiti a chok eu me nein fitepuku sokun awewen aramas mi angang fengen fan iten mettoch mi och. Ewe sopw non ewe neni, fiti non 1,800 [eu ngerou wanupuku] chon ach Mwichefen, minne a fang ngenir ekkewe ira, ra mwichfengen ne fotuki chipu ngeni 25,000 [rue me nimu ngerou] ira. 25 Ei angangen fotuki ira fan fitu ier a fen fotukano napseni 121,000 ira. Me epwe angang ngeni pwan fite ngeroun pwan ekkoch.
Ei angang fengen a awora asese seni ewe akkar, anisi ewe puun, me epeti watte pupun konik epwap tongeni fiis. A aningochu nenier kewe, apechekuna aramasen sopwur kewe, anenneoch, me amongoni ewe ngun. Ika ka eisini ekkewe chon Haiti ion epwe angei foun uwan ekkei ira, ra apasa, “Ion chok a echik.”
ekkoch 80 kinikinin aramasen won ei fonufan ra fiti namanam. 26 Chon namanam ra mwitir ne aninnis mwirin osukosukan fonufan a fiis, me pwan osupwang ese much ren mwongo, imw, sukun, tufichin anneani me kaeon angang. Non unusen fonufan, nouch kewe memper, chiechiach, me an ewe Mwichefen mwichen aninis ra anisi chon ekkis me awora konik, pisekin nimenimoch, pisekin aramas mi ter, kinas ngeni mi chun—emon me emon, eu sopw me eu sopw, efoch ira me efoch ira atun me atun chok. 27 Non neni meinisin, sia achocho pwe sipwe sam me in mi och me chon neniach mi och, ne angang non supwuch kewe me manauach, me pwan me ren Latter-day Saint Charities. 28
Kot a ngenikich ach pungun finata—me pwan niwinin ach foffor. Anon ewe Samon, “Ngang, ewe Samon Kot, uwa angaseok, iwe ennetin [ka] ngaseno.” 29 Non an apasata “epichano ekkewe mi fotek,” 30 ewe Samon a pwon An Achasefan me aanen kapas allim a tongeni muti ekkewe senin pekin inis me senin pekin ngun. 31 Ren chen, ei ngaseno mi aforesefani a tori ekkewe mi fen mano seni ei manau.
Ekkoch ier ano, emon prist non Central America a kaeo usun an ewe Mwichefen angangen “papatais faniten ekkewe mi mano.” “Iwe ennet usun epwe pungupungoch,” ewe prist a apasa, “pwe Kot epwe atufichi meinisin aramas repwe tongeni papatais, ina mwo ika inet are ia ra manau ia, tiwen chok ekkewe kukun semirit minne ra ‘manau non Kraist.’ 32 Ewe Aposen Paul,” ewe prist a apasa, “a foos usun ekkewe mi mano ra witiwit fansoun repwe papatais me manausefan.” 33 Ekkewe angangen temple fan iten ekkewe mi mano ra pwon “muu meinisin, eingang, me sokkopaten kapas” pwe ese namwot emon “epwe nonnom usun chon angang ngeni mano, en, are ewe pwangen peias.” 34
Ren ach kaeo usun Kot, fan ekkoch penuwen iotek sise ekieki usun epwe uwei kich seni ewe aan, emweni kich ngeni chon neniach, asueno ewe rochopwak seni ngunuch, me emweni kich ngeni kinamwen ngunuch me nonnomuch non ewe ochun An pwon mi pin me tong ese feinno ekis.
Napengeni mettoch mi amwarar ra poputa ren kukkun mettoch, nge an Kot manaman a pwa iteitan ran. Ennetin ach kinisou ren ewe manamanen niffangen ewe Ngun mi Fel, ewe Achasefanin Jises Kraist, me ewe annuk, annuk pwisin, me pwon mi pin mi pwarata me nom non An Mwichefen mi Niwinsefanito, me iteni ren Itan we.
Amwo sipwe pwapwaiti An Kot kewe etiwa ne angei me aninis ne efiisata An kewe feioch me pwon me osini usun non muu meinisin, einang, me sokopaten kapas, uwa iotek, non iten Jises Kraist mi pin, amen.