Kot Epwe Fori Och Mettoch mine Siasapw Weweiti
Kot a fen amonata noun kewe me An Mwichefen ren ei fansoun.
Ese mo tam mwirin ar ra wareto non ewe Salt Lake Valley, ekkewe Aramas Pin ra poputa ne aueta eu tempel mi pin. Ra mefi pwe ra karan kuna eu neni ikewe repwe tongeni pini ngeni Kot non kinamwe me resapw chiwen kuna turunufas.
Iwe nengeni, nupwen chok nongonongen ewe temple a arapakan epwene wes, eu michen soufiun Meirka ra wareto ar repwe fini emon minafon governor.
Pokiten ekkewe souemwenin mwichefen rese weweiti met ekkewe soufiu repwe fori, Brigham Young a ereni ekkewe Aramas Pin repwe omokutu me ireano nongonongun ewe tempel ewe.
Ua sinei pwe ekkoch ekkewe chon ewe Mwichefen ra ekieki ika pwata ar angang weires ne aueta ewe muun Kot ra fokkun aweires fan chommong.
Nge nesoponon, ewe osukosuk a wesino, me ekkewe nongonongun ewe tempel kewe ra tureta me chekir. Nge ekkewe akaewin chon ei Mwichefen chon kau ra kuna pwe a chommong me nein ekkewe fau piru ra sat, rese tongeni chiwen ochungeni ewe nongonong.
Ren metewe a pwano, Brigham a urenir repwe forsefani ewe nongonong pwe epwe tongen murino ne anisi ekewe etip fau1 ren ewe ningemurino Salt Lake Tempel.2 Ne muchunon ewe, ekkewe Aramas Pin ra konu ewe kon “Mi Pochokun ewe Nongonong”3 me ra sinei pwe ar we tempel mi pin a kauta won ewe nongonong mi pochokun a tongeni tori ewe amuchunon tapin aramas.
Ei porous a aitikich usun an Kot nounou sosot an epwe fori mine an popun.
Eu Semwen non Unusen Fonufan
Ika ei mi ngingin mi nonno ngeni met ei a fis ngeni kich ikenai, ewer pokiten iei mi fis.
Use mwo nuku pwe mi wor emon aramas mi rong nouwei ika anneani ai kewe kapas esapw mwo osukosuk ren ei watten osukosuk a fis non unusen fonufan.
Ngeni ekkewe ra netipechou fan iten ar famini me chiener mi mano, sia fiti kemi ne netipechou. Sia tingor ngeni Samach won Nang epwe echipok me anisuk.
Nangatamonon weiresin ei semwen a nununo an aweiresi nonomun manauen aramas. Chommong famini a kouno senir ar angangen mwoni tonong a eniuokusur ren echik, nukunukumang, me aure. Sia fokkun mwar ren umoumochun chommong aramas ra achocho ne epeti chounon ei semwen. Sia tipetkison fan iten ekkewe mi angang weires me fangeta ar fansoun me manauer ne aninis, echikara, me anisi aramas mi osupwang. Netipach a fokkun uren kinisou ren ami umoumoch me tong.
Sia fokkun iotek pwe Kot epwe suki asamochon nang me ourano manauemi ren An kewe feioch esemuch.
Kich Foun Ira
Mi chok chiwen chommong mettoch ese fat ren ei semwen. Nge ika pwe mi wor eu mettoch ngang mi sinei, ei semwen esapw och mettoch mi amairu ngeni Samach won Nang. Ese pwan anamota An epwe achomongano noun sounfiu chon nang, akokou mwich atapwanapwan, ika achufengeni mettochun fonufan an epwe atawei sokkun osukosuk sise monengeni.
Ai porous ikenai ika mwo ei riafou esapw iei och mettoch sia mochen me moneta ngeni, nge Kot afen amonata Noun semirit me An we Mwichefen ren ikenai.
Sipwe nikitu ngeni ei, ewer. Nge sipwe fen anapano ach asunguru nich, komochuno won, me uti ekkewe mettoch epwe niwiniti usun manauach me nomw. Sipwe feino mwach, me sipwe pwano ach murinono.
Non eu sokkun napanap, kich foun ira. Me ren ekkewe foun ira repwe marita, a namwot repwe ireireno me mwen repwe fasareta. Iei ai pwarata pwe ika mo non ekkoch fansoun sia mefi ach ireno ren riafoun manauach ika pweni inisich ren manauen rochopwak, ewe tongen Kot me ekkewe feiochun ewe niwinsefaniton ewe kapas annimen Jises Kraist epwe ngeni kich och mettoch mine sisapw weweiti epwe fis.
Feioch A feito seni Riafou
Kinikinin fansoun meinisin mi wor weires me riafou.
Enoch me noun aramas ra manau non ewe fansoun foforungaw, maun, me osuku chaa. “Nge ewe Samon a feito me anisi noun aramas.” Mi wor mettoch mine rese tongeni weweiti a ekieki fan iter. A anisir ne auweta Zion—eu mwich aramas “ren eu netip me eu ekiek” ewe “mi manauoch.”4
Anuon Joseph, noun Jacob, ewe a koturunong non pwang, amomono ngeni chon angang, amaam, me poutano.5 Joseph epwe kan ekieki ika pwe Kot a monuki ii. Kot a ekieki och mettoch mine a weires ne weweiti faniten Joseph. A nounou ei sokkun riafou pwe epwe apochokuna manauen Joseph me wanong ii non eu wis an epwe tongeni anisi an famini.6
Ekieki usun Joseph Smith ewe Soufos nupwen a kanupus non Liberty, usun an tingor faniten ngasonon ekkewe Souneng. Ina epwe pwan ekieki ifa usun Zion epwe tongeni kauta non ekkei sokkun napanap. Nge ewe Samon a kapas pwetete ngeni, me ekkewe amwararen pwarata ra fis ra uwei ngeni ekkewe souneng kinamwe—me a sopweno ne ngeni kich kinamwe.7
Fitu fansoun non ekkewe ierin nepoputan ewe Mwichefenin Jises Kraist ren Aramas mi Pin non Fansoun Soponon ir mi mwo tipemwaramwar me ekieki ika Kot mi monukireno? Nge seni eriafou, effeingaw, me niniaramas, ewe Samonun Israel a wor met a ekieki fan iten Noun ewe kukun mwichen aramas. Mettoch mine sisapw tongeni weweiti.
Met sia kaeo seni ekkei nenien apiru—me ekkewe ipuku fite non ekkewe pukefel?
Aewin: Ekkewe aramas pung ese wor nour taropwen mumuta ar repwe amonungaw seni ekkewe nemonun chukun riaffou. Kich meinisin sipwe fetan non fansoun riafou, ren iei non ekkei fansoun riafou sia kaeo nongonongun mine a aitikich usun nonomuch me uwei ngeni kich ach sipwe arap ngeni Kot.
Aruan: Samach won Nang a sinei pwe sia riafou, me pokiten kich Noun semirit, Esapw nikiti kicheno.8
Ekieki usun ewe eu tong, ewe Chon Amanau, ewe a fangono unusen manauan ne iamwiri ekkewe mi samau, ekkewe mi netipengaw, tipemwaramwar me nukunukumang.9 Om ekieki nge ese ekieki usum ikenai?
Chienei mi achengicheng, pwi me fefinei achengicheng, Kot epwe tumunu me mwasok non ei fansoun weires me nuokus. A sinei en. A rong om kewe iotek. A nukuchar me aninisoch. Epwe aponueta An we pwon.
Kot a ekieki och mettoch mine kese tongeni weweiti fan itom me ochufengenin unusen ewe Mwichefen—eu amwararen angang me ew memef mi amwarar.
Sia Kinisou, O Kot, Ren Noum Soufos
Ranich mi murino a nomw mwach, esapw mwirich. Iei popun Kot a ngeni kich pwarata non fansoun ikenai! Ika ese wor, manauach epwe chok asfetan non eu sokkun napanap, awitiwiti ewe toputop epwe changeta pwe sipwe tongeni changetiw non kinamwe. An ewe Samon kokot fanitach a tekia seni ena. Pokiten iei ewe Mwichefenin ewe Kraist mi manau, me pokiten A emweni Noun soufos, sia feino mwach me feita, ngeni neni sise tori akomwan, ngeni asan ikewe a weires ach sipwe ekieki!
Iei, esapw wewen nge sise tongeni sipwe kuna osukosuk non ach sai non manauach iei. Esapw wewen nge ese wor ekkoch mettoch sise ekieki pwe epwe fis, kokotungawen forun mwesin, me watten osukosuken kokotun asapwan me ran. Non ennetin, mettoch repwe ngaweno me mwen epwe ochuno.
Usun emon chon uou sepenin sein moun me emon chon nemeni me uwei ewe sepenin, ua sinei nupwen use tongeni fini ewe sosot upwe fis nupwen ua fiti sepenin, ua tongeni fini ifa usun ai moneta me ifa ussun ai memef ren. Met a auchea non fansoun osukosuk sipwe mosonoson me asarama non ekiekich.
Ifa usun sipwe fori ei?
Sia kuna pungun me niwiniti ewe auchean nongonong, ngeni ewe mecheresin nongonongen ewe kapas allim, ngeni met akon auchea. Ka apochokuna om we monomonun manauen souneng—usun iotek me kaeo pukefel me aneasosich an Kot kewe annuk. Ka pusin finata anongonong won om murinon kaeo.
Angang ngeni ekkewe mettoch ka tongeni fori, me esapw ekkewe mettoch kose tongeni fori.
Kopwe apochokuna om nuku. Me ka rongorong ngeni ekkewe kapsen emwen an ewe Samon me Noun soufos ar repwe emwenuk me tumunuk.
Chechemeni, iei ewe Mwichefenin Jises Kraist—I ewe souemwen.
Ekieki usun ekkoch chomong manaman mi fis non ekkewe fansoun nomw. Upwe chok apasa ekkoch:
-
Ewe sakrament a pwapwano pwe iei wonamen ach fan non ranin Sabbath.
-
Feito, Tapweto Mwiri a kawor faniten an epwe anisi kich non-imwach, Mwichefen-pisekin apochokun ngeni emon me emon me kewe famini.
-
Sia poputani ew an mi tekia me pin ren iamwir ngeni meinisin.
-
Nounoun komputer non ach sipwe kaeo fengen ewe kapas allim me fori an ewe Samon angang ne anapano ngeni unusen ewe Mwichefen.
Usun ekkei kinikinin mwichenapen mwichefen ese tongeni epwe ponueta ika pwe ese wor ei murinon kamputer.
Pwi me fefinei, ren Kraist ewe souemwen, mettoch resap chok murinno, repwe ochun sisapw tongeni weweiti.
Ewe Angangen Achufengeni Israel Mi Chok Feino
Akomwan sipwe ekieki pwe ei riafoun osukosuk non unusen fonufan epwe eu epet ngeni an ewe Samon we angang. Awewe ren, mwokutukutun oruniach ne afanafana ewe kapas allim esapw tongeni tufich. Iwe nge, ei osukosuken semwen afen pwarata minefon me chommong anen ach sipwe anisi ekkewe mi wenechar non netiper. Ewe angangen achufengeni Israel mi wateno manamanan me amwarar. Ipuk ngoroun porous mi pwa ngeni eii.
Emon chienei amen murino ekan nomw Norway a mak ngeni kem me Harriet usun papatais a ren wateno. “Non eu neni ikewe ewe Mwichefen amen kukun,” a makei, “kukkun panen ira repwene winiti pranch, me ekkewe pranch repwene winiti wart!!”
Non Latvia, emon fefin a kuna ewe Mwichefen an a tiki ewe aporaus usun won internet a fokkun mochen epwe kaeo usun ewe kapas allimen Jises Kraist a feito ngeni an we fansoun mwich ew awa me mwan, me mwen ekkewe misineri repwe asopwano ewe aewin nesen a tingor ren ewe ranin epwe papatais.
Non Eastern Europe, emon fefin a angei eu koko seni ekkewe misineri a eis, “Sister, pwata kose chok koko me iwe? Ua chok resin utiwit!”
Chommong me nein nouch kei misineri rakon osukosuk nap seni akomwan. Chommong ra osukuna chommong aramas nap seni akkom. A wor ew wateno akoko fengen nefinen chon ei Mwichefen me misineri.
Me nomw, meni sia kon komochunuk won ekkewe orenien churi aramas ika esapw punun ei pandemic esapw suk mesem. Nengeni aua chiwen aea foun piru usun pii nupwen afen wor fau mi pechekun. Ren auchean mettoch, sia kaeo iei ifa usun aean ekkewe sokkun mettoch, pachenon computer, ne korato aramas—non pusin napanapan me sokkun an—repwe feito me katon, feito me aninis, me feito me choni.
An Angang, An Kewe Aan
Iei an ewe Samon ewe angang. A tingor ngeni kich ach sipwe kuta an kewe aanen fori, me repwe sokono seni met sia kan fofori me mwan.
Ei a fisingeni Simon Peter me ekkoch ekkewe chon kuno ekkewe ra feino ataw non ewe setin Tiberias.
“Non na pwinin rese niap.
“Nge non ewe sosoran … [feito], Jises a uta won pii. …
“Me a apasa ngneir, Oopwe oturatiw ewe cheeu pwan ewe epek]ren ewe siip, me opwe kuna.”
Ra oturatiw nour we cheeu pwan ewe epek me “rese tongeni ar repwe chiwen weit ngenir ren chommongun ekkewe iik.”10
Kot a pwarano me epwe sopweno ne pwarano umoumochun Poun. Ewe ran epwe feito nupwen sipwe chemensefani me sinei pwe non ei fansoun osukosuk, Kot a anisi kich ach sipwe kuna anen murino—An aan—ne aueta An muu won ewe nongonong mi pochokun.
Upwe pwarata pwe iei an Kot angang me Epwe sopwen ne fori chommong mettoch mine sisapw tongeni weweiti ngeni Noun semirit, Noun aramas. Kot a mware kich non poun we poun tumun me tong.
Ua pwarata pwe Preseten Russell M. Nelson I noun Kot soufosun ach ei fansoun.
Ren emon Aposel noun ewe Samon, Ua tingor me efeiochukemi ami oupwe “pwapwa ne fori mettoch meinisin mine mi nomw fan [ami] pochokun; me [oupwe] uta, ren ewe pochokun, oupwe kuna ewe manau ese muuch an Kot, me poun epwe pwano.”11 Me ua pwon pwe ewe Samon epwe fang ngenikemi mettoch mine ousapw weweiti ren ami wenecharen angang. Non iten Jises Kraist, amen.