Tingor, Kutta, me Fichifich

Nupwen ewe Chon Amanau a feito Merika mwrin an Manausefan, A eniwini eu tingor A fen ngeni Noun kewe Chon kaeo non Galilee. A apasa:

“Tingor, iwe epwe fang ngenikemi; kutta, iwe oupwe kuna; fichifich, iwe epwe suk ngenikemi.

“Pun io mi tingor, epwe angei; o are emon epwe kutta, epwe kuna; o ewe asam epwe suk ngeni, emon mi fichifich,” (3 Nephi 14:7–8; pwan nengeni Matthew 7:7–8).

Nouch soufos, Preseten Russell M. Nelson, a fen pwan ngenikich eu tingor mi nono ngeni non ach kei ran. A apasa: “Iotek non iten Jises Kraist ren ami osukosuk, ami nuokus, ami apwangapwang—ewer, unusen mochenin netipemi. Iwe mwirin ausening! Makkei ekkewe ekiek a tonong non mokuremi. Makkei ami memef me fori ren foffor ekkewe oua mefi oupwe fori. Nupwen oupwe forsefani ei etetten iteiten ran, iteiten maram, iteiten ier, oupwe ‘marita non ewe nongonongen pwarata.’”²

Preseten Nelson a pwan apasa, “Non ekkewe ran epwe feito, esap tufich sipwe manau ren ngunuch ika esap wor ewe emwen, nemenem, echipechip, nonnomochun ewe Ngun mi Fel fansoun meinisin.”³

Pwata akon auchea pwarata ngeni manauen ngunuch? Pokiten ewe fonufan a tongeni an epwe osukosuk me fitikoko, uren kapas chofona me epet. Ach fos fengen ren Semach won Nang a otufichikich ach sipwe sinei met mi ennet me met ese ennet, met mi auchea ren an ewe Samon kokkot fan itach me met ese auchea. Ewe fonufan apwan tongeni weires me anetipechow. Nge nupwen sia suki netipach ren ach iotek, sipwe mefi kinamwe minne a feito seni Semach won Nang me ach sinei pwe A tongei me aucheani kich.

Ewe Samon a apasa “emon me emon a tingor, a angei.” Usun ita a mecheres ach sipwe tingor, nge a manaman pokiten a pwarata met sia mochen me ach nuku. Nge, mi namwot sipwe nikitu me engino ach sipwe kaeo ach sipwe weweiti mongungun ewe Samon. Sipwe nenegeni ekkewe ekiek me memmef mi tonong non mokurach me netipach, me sipwe makketiw, usun chok met nouch soufos a aitikich. Ach makketiw mefiach a fokkun auchea ren ach angei pwarata. A anisikich ach sipwe chechemeni, eniwinisefani, me mefisefani met ewe Samon a aitikich.

Ekiskukuto emon ua tongei a apasa ngeniei, “Ua nuku pwe ach pwisin angei pwarata mi ennet. Ua nuku pwe ewe Ngun mi Fel epwe aitiei mettoch meinisin ai upwe fori.⁴ Mi mecheres ai upwe nuku nupwen ua mefi non netipei ese wor tipemwaramwaran.⁵ Nge met upwe fori pwe ewe Ngun mi Fel epwe kapas ngeniei non ei sokkun?”

Ngeni ewe emon ua tongei me ngeni ami meinisin, upwe apasa pwe ua pwan mochen mefi ekkewe memmef mi pochokun seni ewe Ngun mi Fel fansoun meinisin me sinei ia upwe feino ia fansoun meinisin. Nge use. Nge meni, met sipwe kon mefi fan chommong ena ewe mosonusonun, noukukunun mongungun ewe Samon a kapas non ekiekich me netipach: “Ngang iei. Ngang ua tongek. Sopweno; kopwe achocho. Upwe anisuk.” Ese namwot ach sipwe sinei mettoch meinisin are kuna mettoch meinisin.

Ewe mosonusonun, mongungu mi noukukun a apochokuna, pesei, me echipakich—me fan chommong ina chok met mi namwot ngeni kich ren ewe ran. Ewe Ngun mi Fel mi ennet, me An memmef mi ennet—ekkewe mi watte pwan ekkewe mi kukkun.

Ewe Samon a sopweno pwonei, “I ewe a kutta, a kuna.” Sipwe angang ren ach ekiek me ngunuch ach sipwe kutta—ekieki, sotuni, achocho, me anneani. Sia kutta pokiten sia nuku ekkewe pwon an ewe Samon. “Ika emon a mochen epwe feito ren God, epwe fakkun nuku pwe mi wor God, o epwe ngeni niwinin ir ekkewe mi kutta i” (Hebrew 11:6). Nupwen sia kutta, sia tipetekison ne pwarata pwe mi chiwen wor met sipwe kaeo, me ewe Samon epwe awatteno ach weweiti, me amonakichita ach sipwe angei pwan och. “Pun nengeni, iei anon ewe Samon Kot: Upwe ngeni ekkewe noun aramas kinikinin kapas won kinikinin kapas, annuk won annuk, iei ekis me pwan ina ekis; … pun ren i ewe a angei upwe ngeni i pwan och” (2 Nifai 28:30).

Saingonon, ewe Samon a apasa, “Ngeni i ewe a fichifich, epwe tongeni suk.” Sia anganga ach nuku nupwen sia fichifich. Nupwen sia tapweno mwirin I, ewe Samon a suki ewe an fan itach. Mi wor eu kon mi ning a aiti kich pwe sipwe “neno me sisap chok anchangei [imwach] won nang. Ach fofforoch mi apwapwa, nap seni ach annea, eu efeiochun angang me tong.”⁶ Elter Gerrit W. Gong seni ewe Mwichen Engon me Ruemon a awewei kukutochokei pwe fan chommong pwarata a feito nupwen sia fori angang mi murrino. A apasa: “Nupwen sia achocho ne angang ngeni aramas unukuch, ua ekieki pwe ewe Samon a ngenikich pwan ekkis An tong fan iter me pwan fan itach. Ua ekieki pwe sia rong An mongungu—sia mefi I non och napanap mi sokono—nupwen sia iotek ach sipwe anisi ekkewe chon unukuch pokiten ena ewe sokkun iotek A ennetin mochen ponueni.”⁷

Ewe kapasen pesepes non Feito, Tapweno Mwiri ach sipwe ekieki usun ai kewe feioch a awora memefin kinamwe me ua kaeo mettoch non pekin ngun. Nupwen ua sopweno ne anneani usun Alma me an angangen afanafan non Ammonihah, ua kaeo pwe Alma a eu nenien appiru mi murrino usun met wewen ach sipwe tingor, kutta, me fichifich. Sia anneani pwe “Alma a angang weires non ewe ngun, a sio ngeni Kot non ennetin iotek, pwe i epwe wau noun we Ngun won ekkewe aramas.” Nge nengeni, an iotek, ese ponu ifa usun a mochen, me ra asueno Alma seni ewe teninimw. “A choutiw ren netipechou,” ita Alma epwe fangeta, nupwen emon chon nang a apasa ngeni: “Feioch en, Alma; iei minne, sacheta mokurom me pwapwa, pun a wor om watten popun kopwe pwapwa.” Ewe chon nang a ereni i an epwe niwin ngeni Ammonihah me sotuni sefan, me Alma “a mwitir niwin.”⁸

Met sia kaeo seni an Alma tingor, kutta, me fichifich? Sia kaeo pwe mi namwot sipwe angang non pekin ngun ren ach iotek, me fan ekkoch met sia mochen ese fis. Nge nupwen sia mefi weires are choutiw ren netipechou, ewe Samon a ngenikich kinamwe me pochokun non pwan och napanap. Naman Esap ponuweni ach kewe kapas eis meinisin are awesano ach kewe osukosuk iei chok; nge, A pesei ngenikich ach sipwe nikitu. Iwe ika sia awena ach kokkot ren An kokkot, I epwe suki ewe an fan itach, usun chok met A fori fan iten Alma.