Etiwa Fansoun Mwach fiti Nuku
Ewe fansoun mwach epwe ningoch fan iten ekkewe ra monneta me sopweno ne amonneta pwe sipwe pisekin aninnis non poun ewe Samon.
Ei a eu pwin sisap tongeni nemenano. Fefinei achengicheng, ua unusen aucheani ai upwe nom remi. Oua fen nom non ai ekiek iteiten non ekkei fitu maram a pasino. Oua nap seni wanu minion mi pochokun. Esap chok ami ekkewe nampa nge ewe pochokunen manemanen ngun an epwe siwini ei fonufan. Ua fen kakaton ami fori ena non ei fansoun semwen non unusen fonufan.
Ekkoch me neimi ouwa fen mwitirngeni ne kukuta ekkewe pisekin moneta ese chiwen kon or ika kuta ew minafon angang. Chommong ra osukuna semirit me cheki chon orumi kewe. Ekkoch ra etiwaochu ekkewe misineri ra niwinsefankai seni ar kokon angangen missionary, nupwen ekkoch ami ouwa efisata pwe imwemi kewe repwene nenien an misineri kaeo. Ouwa aea ekkewe pisekin non asapwan ren chufengen me famini me chiechiemi, ne iamwir ngeni ekkana ra mefi pwe ra imuno, me ne kaeo Puken Feitto, Tapweto Mwiri fiti ekkoch. Oua kuna ekkoch minefon anen ami oupwe fori ewe Sabbath epwe mwirino. Me oua fori ekkewe ponuponun mas—a chammong ren minion!
Fiti memefin kirekiroch me tong, ua ngeni ekkewe chommongun fefin non unusen fonufan netipei minne atongemi kewe rafen mano. Sia fitikemi ne kechiw. Me sia iotek fanitemi. Sia mwareiti me iotek fan iten meinisin ra angang weires ne tumunu ekkoch ren pekin pochokunen inisir.
Ami mwichen fopun ouwa fokkun pwan pwano ren ami murinno. Inamo social media a fen paras non osonakich fiti osukosuken, chomong me neimi ouwa kuna anen ami oupwe pesei ekkoch me aprousa an ach ewe Chon amanau ewe saram.
Ami Fefin, meinisin, ami ouwa fokun pwarano ami poracho! Ua mwar ren ami pochokun ngeni me ami nukunuk. Oua fen pwarano pwe non sokkun weiresikis, ouwa pochokun ne uwefochei. Ua tongekemi, me afatata ngeni kemi pwe ewe Samon a tongekemi me kuna ewe murinon angang oua fori. Kinisou ngenikemi! Pwan eniwinisefani, oua fen pwarano pwe ami ososen ekkewe chon epinukunuk an Israel!
Oua masoweni ewe epinukunuk ena Preseten Gordon B. Hinckley a aani fan itemi nupwen a pwarano “Ewe Famini: Ew Esinesin ngeni ewe Fonufan” 25 ier a no non ewe September 1995, mwichenapen mwichen Fin Anisi. 1 A auchea pwe a kefinita an epwe pwarano ei auchean esinesin ngeni ekkewe fefin non ei mwichefen. Ren an fori ei, Preseten Hinckley a esisina ussun auchean foforun ekkewe fefin non ewe kokot an ewe Samon ese tongeni epwe siwin.
Iei, ua mochen sinei met oua kaeo non ei ier. Oua fen mefi kan ngeni ewe Samon, ika oua mefi towaw seni I? Me ifa ussun ekkewe mokutukutun fonufan ra fis iei a fori ami oupwe mefi ussun mwach kan?
Sa fen etiwa, pwe ewe Samon a fen porous ussun ach ei fansoun non ew napanap mi anoninen. A fen atawei an porous me akkom pwe non ach ei fansoun “netipen aramas [repwene kun senir” 2 me ina ekkewe mo mi kefinita repwe tonong non feiengaw repwe sonono. 3 A ureni ewe Soufos Joseph Smith pwe “kinamwe [epwe] tou seni ei fonufan” 4 me osukosuk watte epwe fisita ngeni aramas. 5
Iwe nge ewe Samon a fen pwan awora ew nemesepwi ren ifa usun mwirinon ei kinikinin fansoun. A pwarata ngeni ewe Soufos Joseph Smith pwe epwe pwarata “ewe angang … ren ekkei omuchunon ran, ew a fokkun watte. … Ningan a weires ach sipwe anapanapa, me ese wor mettoch epwe nap seni ningan.” 6
Iei, ningochun meni esap ewe fos kopwe fini om kopwe awewei ekkei omuchunon fitu maram. Ifa ussun ach sipwe etiwa ir me ruu ewe kirochun ekewe osuni me ew ningen esinesin ussun ei fansoun? Ewe Samon a urenikich ifa ussun fiti mecheresin, nge eingeingen, afatafatochun: “Ika ka moneta kosap nuokus.” 7
Mi amwarar ena pwon! Ei ew a wesewesen tongeni ekesiwini ifa ussun ach kuna fansoun mwach. Ua chok karan rongorong emon fefin a wor an anononun kapasen pwarata a fangetani pwe ewe osukosuken fonufan ren anoninenin samau a pachenong chechin fonu non ewe nemonun chuk Salt Lake, a anisi an epwe esinna pwe ese fokun moneta ngeni ussun met a ekieki pwi afen. Nupwen ua eisini ika e fosun an nenien isoisen anan mongo ika an kapasen pwarata, a emenimen me apasa, “Ewer!”
Ika amonata ina ach kien ach sipwe etiwaochu ei fansoun me fansoun mwach epwe fiti nukunuk, ifa ussun ach sipwe fokkun moneta?
Non fite ier, noun ewe Samon kewe soufos ra pesei ngeni kich pwe sipwe isoni anach mongo, konik, me isenono nouch moni ren auchean fansoun sipwe aea. Ewe osukosuken fonufan ren ei semen iei a apochokuna ewe mirit ren ena kapasen ourour. Ua pesei ngeni kemi pwe oupwe fori ekkewe ipweipwen moneta ren pekin monetan pisek. Nge ua kon fen ekieki ussun ami moneta non pekin ngun me netip.
Non na ititin, sia tongeni kaeo chommong mettoch seni Kaptin Moronai. Ussun emon meinapen ewe soufiun Nephite, a mesengeni kewe kumien sounfiu ra men pochokun seni, watte chochon, me rochongaw. Nge, Moronai a amonatai noun kewe aramas non unungat nikinik mi fokkun auchea.
Akkom, a anisir ne fori ekkewe neni ikewe repwe manau me ian—“ekkewe nenien ngas seni osukosuk” a eita ngenir. 8 Oruan, a amonata “ekiekin ekkewe aramas ar repwe nukuchar ngeni ewe Samon.” 9 Me ounungatin, ese tongeni kouno ne amonatai noun kewe aramas—non pekin inis ika ngun. 10 Sipwene ekieki ekkei unungat nongonong.
Nongonong Nampa Ew: Forata Nenien Ngas Seni o=Osukosuk.
Moronai a forata minen epetin ekkewe teninimwen Chon Nifai fiti ekkewe mettochun eppet mi pochokun, nenien chon mas mi tekia me ekkewe etip. 11 Nupwen ekkewe chon Leiman ra etto fiu ngenir, a “nap ar watten mairu, pokiten miritin ekkewe chon Nifai non ar amonata nenier kewe nenien epet seni feiengaw.” 12
Nonnongeni, nupwen watten osukosuk a fis unukun kich, a och sipwe forata ekkewe neni ikewe sipwe manau me ian, ir me ruu non pekin manawen inis me ngun. Nupwen imwom ewe a winiti ew pusin om nenien ngas ren nuku—ikewe ewe ngun a nom ian—imwom ewe a winiti ewe aewin tetenin eppet.
Ussun chok pwan ekkewe steikin Zion ir “nenien ngas seni osukosuk” 13 pokiten ra emwen seni ekkana a wor rer ekkewe kien pristut me anganga ewe mumutan pristut. Nupwen kopwe sopweno ne epuru ewe kapasen ourour an ekkana ewe Samon a ngenir ewe mumuta ar repwe emweni kemi, oupwe mefi watten ami eppet seni osukosuk.
Ewe tempel—ewe imwen ewe Samon—ew nenien epeti feiengaw a sokono seni meinisin. Ikana, ami fefin oua angei ami niffang mi murinno me unusoch ren ewe manamanen ewe pristut ren ekkewe ponen pristut mi pin ka fori. 14 Ikana, ami kewe famini ra riri fengen tori fein feino. Pwan mo ei ier, nupwen tonong non ach kewe tempel a fokkun chok kauk, om niffang mi murinno me unusoch a fis non ewe imwen tempel ra ngonuk om tufich ngeni ewe manamanen Kot nupwen ka aucheani om kewe pwon ngeni I.
Mecheresin kapas, ew nenien ngas seni feiengaw ina ekis meinisin ka tongeni mefi an ewe Ngun mi Fel nom me emwen seni I. 15 Nupwen ewe Ngun mi Fen mi nom remw, ka tongeni afanafana ennet, ina mo ika a tep ren ekkewe chamongun sokonon memef. Me ka tongeni ekiochu kewe kapas eis mi tekisoson ussun ewe kapas annim non ew nenien pwarata.
Ua tingorekemi, fefinei achengicheng, oupwe forata ew imw ewe epwe ew nenien epet seni feiengaw. Me uwa pwan eniwini ai we tingor ren ami oupwe anapano ami weweiti ren ewe manamanen ewe pristut me ekkewe angangepin non tempel me ekkewe feioch. An epwe wor nenien eppet seni feiengaw ewe minne oua tongeni su ngeni epwe anisikemi ne etiwaochu fansoun mwach kan fiti nukunuk.
Nongonong Nampa Ruu: Amonata Om Ekiek An epwe Nukuchar Ngeni Kot.
Sia fen angei ew watten angangen fori ach sipwe ne atamano nonomun me awateno ukukun masowen ewe Tempel Salt Lake.
Ekkoch ra kapas eis ren pwata sa ne aucheani ne fori ekkei kaukun. Iwe nge, nupwen ewe Salt Lake Valley a aani riaffoun ew watten 5.7 chechin fonu mi chok kaneto non ei ier, ei tempel mi chok apwangapwang a pochokun ne chech iwe ewe rapwa won ewe niosun ewe chon nang Moronai a turutiw! 16
Usun chok ewe foun nongonongen inisin ewe Tempel Salt Lake epwe fokun pochokun ne uta ngeni osukosuken ei fonufan, ach foun nongonong non pekin ngun epwe pwan pochokun. Iwe, nupwen ekkewe mettoch a efisata chechin fonu a amonona manauach, sia tongeni uta “wenechareta me sisap mokutukut kai” pokiten ach nukunuk. 17
Ewe Samon a aiti kich ifa ussun ach sipwe anapano ach nuku ne mochen kutta ach “weweiti mettoch, pwan mo ren kaeo me pwan ren nuku.” 18 Sia apochokunano ach nuku non Jises Kraist nupwen sia achocho ngeni ach sipwe aponueta an kewe annuk me “chechemeni I fansoun meinisin.” 19 Saposopnon, ach nuku a napeno iteiten fansoun sia anganga ach nuku non I. Iei met wewen kao epwe fiti nukunuk.
Awewe, ew me ew fansoun a wor ach ewe nuku ach sipwe anneasosich ngeni an Kot kewe annuk—ikamo atun memefin ekkoch epwe ponukicheno— ika atun fansoun sia suu seni ekkewe mettochun fonufan mi apwapwai kich ren ika ekiek ra apwapwai atai-annuk, sia anganga ach nuku, minne a fen anapano ach nukunuk.
Ika, ekkoch mettoch ra oueta nuku nap seni kaeon ewe Puken Mormon iteitan. Ese pwan wor ew puk epwe pwarata Jises Kraist fiti pochokunan me fatafatochun. Ekkewe soufosun, ussun a amwasangasang meren ewe Samon, a kuna ach ei fansoun me a fini ewe annuk mi ennet epwe anisi kich iteitan. Ewe Puken Mormon ina ach fansoun soponon emwenin manau.
Ewer, ach kamochunon nenien kuna eppet seni feiengaw a feito nupwen sia fangeno inisich ngeni Samach non Nang me Jises Kraist! Manau ese fiti Kot ew manau a ur ren nuokus. Manau fiti Kot ew manau a ur ren kinamwe. A iei pokiten ekkewe feioch non pekin ngun ra feito ngeni ekkewe mi nukuchar. Ach angei ach pusin pwarata seni ngun a ew me nein kewe auchean ekkewe niffang.
Ewe Samon a pwon pwe ika sipwe tingor, sipwe tongeni angei “chommong pwarata.” 20 Ua pwon pwe nupwen ka anapano ukukun om kopwe angei pwarata, ewe Samon epwe efeiochuk ren napenon emwen ren manauom me chommongun niffangen ewe Ngun.
Nongonong Nampa Unungat: Kosap Tongeni Kouno Ne Moneta Ngeni
Pwan mo nupwen ekkewe mettoch mi fetan och, Kaptin Moronai a sopweno ne amonata noun kewe aramas. Ese tongeni kouno. I ese tongeni winiti chon uopwangapwang.
Ewe chon u ngeni ese tongeni kouno ne fiu. Nge, sia tongeni sisap kouno ne amonata! Ew me napanon ach anongonong won pusin kich sia—anapano ach manota non pekin inis, pekin ekiek, me pekin ngun— ngeni an Setan kewe angangen ninni.
Achengicheng fefinei, oua nipwakoch ne forata kewe nenien ngaseno seni feiengaw fan itom me ekkewe oua tonger. Soposopono, a wor ew om auchean niffang mi unusoch a tongeni anisuk om kopwe anapwano nuku non ekkoch non amwararen napanapan. 21 Me en kosap tongeni kouno. Oua pwan fori sefan foforun ena non ei ier.
Ouse mochen sopweno chok. Ami tumunoch non ami tumunu imwemi kewe seni feiengaw me enenia nuku non netipen atongemi kewe repwe kini uan feiochun ren tapin aramas epwe feitto.
Achengicheng fefinei, a wor watten mettoch sipwe nenenoi ngeni. Ewe Samon a eneniakemi ikei iei pun I a sinei pwe a wor ami tufich ne atawei ekkewe osukosuken ewe fansoun kinikinin ekkei fansoun soponon. I a sinei pwe kopwe komochunuk ewe amwararen An ewe angang me mochen kopwe anisi ne fori ei angang epwe wes.
Use ura iei pwe ekkewe ran mwach repwe mecheres, nge ua pwon ngeni kemi pwe fansoun mwach epwe amwarar ren ekkewe ra moneta me ion a soposopono ne amonata ar repwe nom non poun ewe Samon.
Fefinei achengicheng, mutngeni sisap chok achocho non ei chok fansoun. Mutgenikich sipwe etiwa ewe fansoun mwach fiti nuku! Osukosuken fansoun ikana kewe tufich ngenikich ach sipwe fefeita non pekin ngun. Ir kewe fansoun nupwen manemanen ach tufichin ekesiwini a tongeni epwe koon pochokun nap seni non fansoun mi mosonoson.
Ua pwon pwe nupwen sia forata kewe nenien epet seni feiengaw, amonata ach ekiek repwe nukuchar ngeni Kot, me sisap tongeni kouno ne amonata, Kot epwe efeiochu kich. I epwe “angasa kich; ewer, watenon i [epwe] kapas kinamwe ngeni ngunuch, me epwe fang ngenikich pochokunen nuku, me … efisi kich ach sipwe [tongeni] apinukunuk ren ach ngaseno non i.” 22
Nupwen oua moneta ngeni ami oupwe etiwaochu ewe fansoun mwach kan fiti nukuchar, ekkei pwon repwe ami. Ua pwarata, fiti ai ennetin tong fan itemi, me ai epinukunuk non ami, non ewe it mi pin Jises Kraist, amen.