Ewe Oreni an Kraist

Met ren ei amwararen fonufan sia nonomw non me aea fengen, neni ngeni ei pinon aramas, kapas, oreni, me uruwo—mi paras fetan non unusen pukuen fonu me ngoroun aramas, mi tufich non oreni. Aramas repwe fokkun ingeiti me apwapwai. Nge rapwan kaeo aean—ekkewe mettoch mine sia kaeo seni ekkewe oreni sia marita non—a tongeni apochokuna manauach, a pwan tongeni, ew fansoun, epwe winiti och mettoch mi amwrar.

Epwe nikinikin nge oreni och mettoch epwe aweiresi non ekiekich me manauach me mi weires an epwe tongeni ekesiwin. A fen, ina met, watten met sia mefi pwe a annetata usuch me seni mine sia mefi sipwe sinneno non. A tongeni ew pochokunen tufichin ekesiwin sisapw tongeni kuna aramas ra fori non ngaw are a fis non ach pusin oreni, a murino ach sipwe nikitano ekkoch orenien samach kewe. An napeno ach anonga nonnomun an emon oreni epwe emwen ngeni oreni ese ketiw ren —usun kot—ekiek, napanap, me mwokutukut.

Ua sinei emon murinon mwan ese tam mwirin chommong ier ano a aninnis ne niosu ei uwonapen nongonongen oreni an myopia. Ua akaewin churi non Singapore nupwen ua emon noun sensen famini. Emon sensen Sanskirt me Tamil mi sufen, A feito seni Oruun India. Punuwen mi amwarar me noun kewe ruemon at ir chon ewe Mwichefen, nge i ese fiti ewe Mwichefen are ausening ngeni ekkewe afanafanen ewe kapas allim. Amen pwapwa ren met punuwan me noun kewe ra fori me anisir ren unusen ar aninis me wiser kewe non Mwichefen.

Nupwen ua tingorei upwe asukuna ekkewe nongonongun ewe kapas allim me aporousa ngeni ach nuku, i ese mochen. A tam fansoun ai retin ne ekieki ika pwata: a mefi pwe ika pwe a fori, iwe epwe winiti chon ungeni met akan fori me nomw, noun aramas, me an uruwo! Ngeni met a ekieki, epwe amam mettoch meinisin a fori me nomw, mettoch meinisin an famini ra aiti ngeni epwe fori, i emon mwirimwiriton chon India. Mwirin fitu maram, aua tongeni porous won ekkei osukosuk. Ua fokkun ing (nge use mairu!) usun an ewe kapas allimen Jises Kraist a tongeni suki mesan ngeni eu ekiek mi sokono.

Napengeni non an aramas kewe oreni a pwan me ruu ekkei mettoch och me ngaw, napono me kisino.

Chommong ach kei osukosuken fonufan ra fisita seni ekkei ekiek me mokutukut a feito seni ar oreni. Nge arapakan meinisin fitikoko me osukosuk repwe mwitir morono ika pwe fonufan epwe etiwa ewe pukutan oreni, ewe ew kich meinisin sia isoni ese mo pwan towaweno fansoun me nomw. Ekkewe ranin ei oreni me nom non manauach me mwen ach uputiw. Ewe oreni an Atam me Enoch. Iei ewe oreni a pwa non ewe fansoun an ewe Chon Amanau afanafan, me a tou sefan ngeni meinisin fefin me mwan non ach fansoun ikenai. Mi sokkono. Iei ewe wachemuken oreni me nein meinisin me a feito seni ewe watten kokkotun pwapwa, Kot a ota me Kraist a fori. A ochu nap seni aumuni. A echikara nap seni efeingawa.

Ewe kapas allimen Jises Kraist a aitikich pwe mi wor popun manauach. Ach nonomw ikei esapw chok och mettoch a sereni me mwanino! Mi wor popun ach nomw ikei.

Ei oreni mi pukuta me non ewe kapasen pwarata pwe mi wor Samach won Nang, pwe I mi ennet me tongei emon me emon pusin kich. Kich An “angang me [An] muu.” ¹ Ei oreni a apochokuna ekkewe ekiek mi auchea. Ese wor sineno mwich ika klass. Kich, mwirin meinisin, brother me sister, noun inach me samach won Nang semirit—wesewesan. Ese wor koput ika “kich sipwe ungenir” met epwe nomw non ekiekir ewe auchean oreni me nein meinisin. Kich meinisin “kich.” Kich meinisin “ir.” Sia nuku pwe sia pusin fori me angang fanitach, emon me emon, ewe Mwichefen, me ach fonufan. Wisach me etiwa wisach ir ouchean mettoch non ach fefeita.

Tong ennet, ennetin umoumoch usun Kraist, iei ewe foun nongonong ren ei oreni. Sia mefi ach ereki osupwangen chon oruch, non pekin aion me pekin ngun, me sia anganga ekkena memef. Ei epwe eponukuono foforungaw me koput

Sia pwapwaiti eu oreni ren pwarata, anongonong won an Kot we kapas sia angei seni ekkewe soufos (me pusin apungano ngeni emon me emon kich seni ewe Ngun mi Fel). Meinisin aramas ra tongeni sinei an Kot angang me ekiek.

Ei oreni a tumunu ewe nongonongen finata. Ewe tufichin finata amen akauchea ren ach mamarita me ach pwapwa. Finata non mirit a fokkun auchea.

Eu orenien kaeo me sukun. Sia kuta wewe me mirt me ewe akon auchea non mettoch meinisin.

A ew orenien nuku me anneasosich. Nuku non Jises Kraist ina ewe aewin nongonongen ach we oreni, me anneasosich ngeni An kewe asukun me annuk ina ewe pungunon. Ekkei a apochokuna kich.

A eu orenien iotek. Sia nuku pwe Kot esapw chok ausening ngeni kich nge epwe pwan anisi kich.

A eu orenien pwon me annuk, annuk tekia, fangono fansoun, omusano me aier, me tumunu ewe tempel inisich. Ekkei meinisin a pwarata ngeni ach pwon ngeni Kot.

A eu orenien annuk seni ewe pristut, ewe mumuta sia fori non iten Kot, ewe manamanen Kot epwe efeiochu noun semirit. A anisi me otufichi emon me emon aramas ar repwe murino, souemwen, inenap, semenap, me chiechi—me eningano ewe imw.

Ennetin manaman a fis non ei, ekkewe orenien nomw, a fis ren nuku non Jises Kraist, ewe manamanen pristut, iotek, pusin fefeita, ennetin ekesiwin, me omusano.

A eu orenien angangen misineri. Ewe auchean ngun mi watte.

Non ewe oreni an Kraist, fefin ir mi nono ngeni ar angang me wiser ese much. Esapw ir chon siwini mwan, usun napengeni ekkoch orenien fonufan ikenai.

Ei oreni a anisi ewe ningenon famini. Ewe famini ina ewe auchean chefengen ren manau esemuch. Ewe unusoch an famini a namot sokkun fangono pokiten, sia fen kaeo usun, “ese wor anen tufich epwe tongeni pochokun ngeni ach nipwakingaw non imw.” ² Ewe imw ikena ie ewe ach angang murino a tufich me ie me ach wachemuken pwapwa a fis.

Non ewe oreni an Kraist, a wor weweoch—me ekiek me emwen esemuch. Ei oreni a ekieki usun mettoch a nomotam me auchea! A feito seni ewe kapas allimen Jises Kraist, ewe ese much me awewei pwata, met, ian sia fisita me ia. (Mi pachonong, nge ese Kaimuno.) Pokiten ei oreni a punguno seni ewe tingor an ach we Chon Amanau asukun, epwe aninis ne awora echikaren pau minne a auchea ngeni ach fonufan.

Met ren ei feioch ach sia choni ei feioch me murinon anen manau! Ren ach sia choni ei, ewe wachemuken oreni me nein meinisin, a auchea epwe ekesiwin. Ekkewe soufos ra aiti kich usun auchean ach sipwe nikitano mettochun non ach kewe orenien rese wewefengen ngeni ewe oreni an Kraist. Nge esap wewen nge sipwe nikitano mettoch meinisin. Ekkewe soufos rapwan afata pwe sia ketiw, emon me meinisin, ach sipwe uweato ach nuku me tongeni me tipachem—meinisin mi och non manauach me ach pwisin oreni—ren kich me mut ngeni ewe Mwichefen “epwe apacha ngeni” seni ewe kapas allim. ³

Ewe Mwichenfenin Jises Kraist ren Aramas mi Pin non Fansoun Soponon esap mwichen Chon Notou ika ew orenien Merika mi nap. Ina mwichefenin non unusen fonufan, mi fen pusin afat pwe ina. Nap seni ena, mi wewefich. Minefon memper seni unusen fonufan ra awora tufich, chomongono, me apwapwa ngeni ach famini mi wateno. Aramas mi Pin non Fansoun-Soponon ekis meinisin ra apwapwai me asamonu pusin mwirimwiritor me itefounor, nge iei rapwan chochon och mettoch mi fokkun amwarar. Ewe oreni an Kraist a anisi kich ach sipwe kuna pusin kich ren pusin manauach, me nupwen sia kuna anen ese much, mecheres ren pungoch, a anisi kich ne anapano ach tongeni ne aponueta ewe auchean kokotun pwapwa.

Nge met a fis ngeni chienei we? Iwe, a kaeo ekkewe nesen me a choni ewe Mwichefen. Iei an famini a fen ririfengen fen fansoun ese much non ewe Sydney Australia Tempel. A fangeta ekis—me angei ewe tufichin mettoch meinisin. A sinei pwe mi pwan chiwen tongeni an epwe achechema an we uruwo, epwe fokkun mwar ren an kewe newo, an kon me poruk me angang, anan mongo, fonuan, me an aramas. Apwan sinei pwe ese wor ngawan an epwe uweianong an we oreni amen murino ngeni ewe watten oreni me nein meinisin. A sinei pwe an nikitu ne fori met mi ennet me wenechar seni manauan me nomw ngeni manauan minefo ne achocho ne fifiti ekkewe Souneng me aninis ne ochufengeni kich meinisin non eu non ewe muun nang.

Sia tongeni, ennetin, kich sipwe pwapwaasini murinon an emon me emon kich kewe orenien fonufan me sia pwan chiwen manaueni ewe oreni minen nomw me nein meinisin—ewe ionapan, ewe unusan, ewe oreni ese much a feito seni ewe kapas allimen Jises Kraist Met ren ei amwararen uruwo kich meinisin sia aea fengen. Non iten Jises Kraist, amen.