In Oacna El
Ke kahsruh Lal Mwet Lahngo muhkwena kuht kuh in kapwack in oacna El.
Finne kom mwet luti oaru ke moul ac kuhlwacnsap lal Jisus Kraist, sap luhn Mwet Lahngo in “oacna Nga” 1 luhman ahktuhfal ac tiac kuh in sikyak. Sahp kom oacna nga—akihlen muhnahs ac tahfonglac lom, kom konwacack fihsrwacsr in fahsr ke fohk tuhpahlpahl ac tiac kapwack. “Pwacye, mwe luti inge tiac ma kuh in sikyak,” kuht nuhnkuh ke kuht sulaclah inkacnek fihsrwacsr emet, tiac oruh ma upac in eklac.
Tuh fuhkah fin eklac “in oacna [El]” tiac sramsram muhkwena, finne ke moul in mahno lasr? Fuhkah fin, ke ip srihsrihk, kuht kuh in eis ke moul se inge ac, pwacye, enenweyuck in sulpac muhta Yohrohl? Fuhkah fin “in oacna Nga” pa kalmac pwacye ac suwohs luhn Mwet Lahngo? Na fuhkah? Kuh in orekma fuhkah kuht kena in oruh in suli kuh wolacna Lal nuh in moul lasr kuht in kuh in eklac ohiyacsr?
Elder Neal A. Maxwell el luti: “Ke kuht motko sap lal Jisus in oacna El, kuht liye tuh ohiyacsr ingena tiac ma tuh kuht mwet koluk, tuh, sahyacna, ohiyacsr pa kuht tahfuh luo ac alsruhngwesr kuhtuh ke orekma Lal—tuh pa orekma lasr, pac! Kuht kaksakuhnuhl tuh suhkwac etahinuhl.” Sie mwet kuhlwacnsap alu fuhsr, Charles M. Sheldon, fahk ke ma inge: “Moul in mwet Christian lasr luhngse in fihsrwacsr ac mihslac likina ma upac kuh toasr oacna sahkseng soko.” 3
Ke pwacye, ma nuhkwewa oasr ye sap in oacna El, oacna Jisus Kraist el eklac in oacna Pahpah. 4 Ke kuht kapkapwack, kuh eklac in fas, suwohs, ac kapwack nuh sahflah. 5 Kain mwe luti inge tiac tuhkuh ke sie alu na tuhsruhk tuhkuh sel Mwet Lahngo sifacna. Ke ma pwacye inge kuht in moul, liye sramsram lasr, ac oruh nuh sin mwet sahyac. Pwacye, tiac inkacnek sahyac in ahkkweye kihnet luhn kawuck muhsahlah kuh mura akuhkuhin likina kuht in srihke in oacna Fihsrack luhn Mihslac. 6
Lwelah kuht in muhtwacwacack ke motko, srihpac, ac oaru orekma lasr in oacna El ke eisyacn ip luhn Jisus Kraist.
Tiac Ahlohloh ac Sulaclah
Kuhtuh yac tari ah, muhtwacn kiyuck ac nga tu ke inkacnek in fanyak fohnohl luhlahp emet fin acn Japan, Finohl Fuji. Met liki kuht muhtwacwacack in fanyak kuh liye finohl ah loes liki kuht ac fosrngah kuht in kuh in oruh.
Ke kuht tuh fahsr, ullac, ngalyak mahnosr, ac upac in momong ke srihpacn fuhlwact. Ke nuhnak lasr, yohk srihpac kuht in lohacng in fahsr nuh met srihsrihk. Kuht ac fahk, “Sahp kuht loes liki finohl ah, tuhsruhk nga kuh in fahsr nuh met srihsrihk.” Tukun kuhtuh pacl kuht sun finsrak lasr—ip nuh ke ip.
Ip se met ke inkacnek se inge in oacna Jisus Kraist pa in oasr kena in oruh. Wo na in kahlwem lah kuht in oacna El, tuh enenuh in wi kahlwem sacn pa kena se in eklac, ip nuh ke ip, kuhtanglah. 7 In oasr kena lasr, kuht enenuh in etuh Jisus Kraist. Kuht enenuh in etuh ke ohiyac Lal, 8 ac kuht enenuh in suk ke ohiyac Lal ke ma suhmuhslah, alu, ac acn muhtahl sahyac. Ke kuht muhtwacwacack in etuh yohk kacl, kuht ac liye ohiyacl oasr yurun mwet sahyac. Ma inge a kahsre kuht ke suk lasr sifacna, mweyen fin mwet sahyac kuh in eis ke kuhtuh ohiyac Lal, kuht kuh in pac.
Fin kuht pwacye nuh sesr sifacna, Kahlwem luhn Kraist 9 yohrohsr mahmah nuh sesr fin oasr ma siena liki kuht luhmweyucklac nuh ke ohiyac kuht kena luhn Mwet Lahngo. 10 Kain pwacye inge yohk srihpac kuh fin kapwack in oacna El. Pwacye uh pa sie sin ohiyac Lal.
Na, kuht suc puhlaik ac sahp nuhnkuh in siyuck mwet luhlahlfongi ke sucu, mwet kom pahyuck nuh se, kawuck, kuh mwet kol luhn nguhn lah meac ohiyac luhn Jisus Kraist kuht enenuh—ac sahp kuht enenuh in ahkolah ke top lalos! Kuhtuh pacl kuht liye kuht sifacna ke mwe liye suhtuhuh ma ahkkahlwemye kuht siena liki ohiyacsr nuh pwacye.
Kawuck ac sucu luhlahlfongiyuck kuh in kahsrwe kuht liye kuht sifacna ke pwacye, tuh elos, finne luhngse ac kahsruh, kuh in liye tahfonglac kuhtuh pac. Ke ma inge, yohk srihpac tuh kuht in siyuck Pahpah Inkuhsrao luhngse tuhmwacsr ac meac kuht enenuh in lohacng orekma lasr nuh kac. El liye kuht in pwacye ac fah ahkkahlwemye ke luhngse muhnahs lasr. 11 Sahp kom ac etwaclah muh kom enenuh muhtweng, fihlpacp, luhngse pwacye, luhngse, finsrak, oaru, kuh ahkostwen in fahk kuhtuh. 12
Tiac paht tohkoh, upac nuh sihk ke sie mwet kol luhngse luhn Alu uh arlac suwohs in fahk lah oasr sie ip luhn ohiyacsr nga enenuh in ahkwoye. El fahk suwohs wi luhngse ac tiac ahkfohs. Fong sacn, nga akacsruhi ma inge nuhtin muhtwacn kiyuck. El fahk kahs kuhlwacng finne el insese nuh ke fahk lal. Nguhn Muhtahl tuh ahkpwacyeiye nuh sihk lah kahs in kahsruh lalos tuhkuh sin Pahpah Inkuhsrao luhngse.
Sahp ac kahsruh in oruh ke inse pwacye lutlut in ohiyac luhn Kraist ke sapta 6 luhn Preach My Gospel. 13
Ke kom nuhnkuh ke moul lom ke inse pwacye ac sulaclah in muhtwacwacack fahsr lom in fanyak finohl uh, kom enenuh in auliyak. Prestuhn Russell M. Nelson el luti ke luhngse: “Ke kuht sulaclah in auliyak, kuht sulaclah in eklac! Kuht lwelah Mwet Lahngo Elacn ikihlkuhtlac sifacna nuh ke mwet wo emet. Kuht sulaclah in kapwack ke nguhn ac eis engan—engan luhn molwelah Kacl. Ke kuht sulaclah in auliyak, kuht sulaclah in moul oacna Jisus Kraist!” 14
In oacna Jisus Kraist enenuh kuht in ekuhllah insiacsr ac nuhnak lasr, pwacye, ohiyacsr, ac in kuh in oruh muhkwena nuh ke luhngkuhlwacng luhn Jisus Kraist. 15
Akihlen ac Mukwikwi
Ingena ke kom sulaclah in eklac ac auliyak ac suk kolyuck ke pruhe, motko inse pwacye, ac sahp sramsram nuh sin mwet sahyac, kom ac sahp enenuh sulaclah sie ohiyac ma kom kac lohacng nuh kac. Kom ac enenuh in sulaclah in orekma oaru. Ma inge tiac tuhkuh fihsrwacsr kuh sa, tuh ke luhngkuhlwacng Lal ma inge ac tuhkuh ke ip nuh ke ip ke kuht sang kuhiyacsr.
Ohiyacn Kraist mwe sang sin Pahpah luhngse Inkuhsrao in ahkinsewowoye kuht ac elos suc raunikuhtlac. Oacna, orekma lasr in eis ohiyac inge enenuh pruhe insiyac ke kahsruh muhtahl Lal. Kuht fin suk ke mwe sang inge in kuhlwacnsap mwet sahyac, El ac ahkinsewowoye kuht ke orekma lasr. In suk mwe sang luhn God ke srihpom sifacna ac sahflah ke suhpwacr ac ahngyahng.
In lohacng yohk nuh ke sie ohiyac ma kuh enenuh, ke kom kapkapwack in eis ohiyac se, ohiyac sahyac tuhkuh pac. Kuh mwet se suc lohacng nuh ke luhngse pwacye tiac kuh in yohkwelihk ke luhngse ac inse puhsisacl? Kuh mwet se suc lohacng nuh ke ahkostwen pwacye tiac kuh in yohkwelihk ke oaru ac finsrak? Orekma yohk lom in eis ohiyac se kuh in ahkfokokoye ohiyac sahyac.
Suhmuhslah ac Karihngihn
Yohk srihpac nuh sihk ke nga srihke in oacna El in suhmuhslah ma nga puhla ac ma nga etwaclah. Ke nga lutlut sie sin ohiyac Lal loal in nuhnak luhk, ma suhmuhslah oacna sasuc ke nga liye srihkasrak ke ohiyac sacn ke mwe luti Lal, orekma Lal, ac mwet tuhma lutlut Lal. Ahtron muhtuhk oacyacpac lohacng in akihlen ohiyac sacn ke mwet sahyac. Nga liye mwet wowo ke Alu ac loac Alu uh suc ahkkahlwemye ohiyac suc oacna El. Elos srihkasrak wowo lah ohiyac sacn kuh in ahkkahlwemye fuhkah ke mwet nuh ke luhngkuhlwacng Lal.
In kapwack na pwacye, kom enenuh in sang orekma oaru. Oacna fanyak finohl enenuh in ahkolah met ac muhtweng ac inseseacng nuh ke fanyak uh, fuhfahsryucsr se inge enenuh oaru ac kihsac pwacye. Ohiyacn Kristin pwacye, ke kuht srihke in oacna Mwet Kol lasr uh, enenuh srihke wo emet lasr. 16
Ingena kahs in sensen srihsrihk. Sap in oacna El tiac oasr kom in puhla mwacta, suhfal, kuh tiac luhngseyuck. Moul lasr facluh pa in kapwack, srihke, puhtatlac, ac kuhtanglah. Finne muhtwacn kiyuck ac nga finsrak in kaliyac muhtahsr ac sohksohk ke finohl ah, tiac srihpen moul uh.
Kom fal, kom luhngseyuck, tuh tiac kalmac ma kom fas. Oasr orekma in oruh ke moul se inge ac moul se tohk. Ke kahsruh Lal muhkwena kuht kuh in kapwack in oacna El.
Ke pacl inge, ke “ma nuhkwewa [luhman] fohsack; ac … sahngweng [luhman] oasr fin mwet nuhkwewa,” 17 ono muhkwena, ahkkweyeyuck muhkwena, in srihke in oacna Mwet Lahngo, 18 Mwet in Molwelah 19 luhn Mwet Nuhkwewa, Kahlwem luhn Facluh, 20 ac suk ke El suc fahk, “Nga pa inkanek.” 21
Nga etuh tuh in eklac oacna El nuh ke ohiyac muhtahl Lal kuh in sikyak ip nuh ke ip. Fin tiac ohinge, El tiac use nuh sesr mwe sap se. 22 Nga etuh ma inge—ke srihpen nga liye ohiyac Lal ke puhkantwen suwos. Ke ma inge nga fahkwack ke inen Jisus Kraist, amen.