Muhtuhnfacl, U in Mwet, ac Kahs Nuhkwewa

Tamuhlwel ac tahmtahel sacohk wiyuck, nga tuhfahna ahkfahsrye sil lun tempuhl suc ma nga ukwe akwuck nuhke COVID-19. Ke nga wi mukul ac muhtwacn suc ac fah aluiyuck, ac pahpah ninac kiyaclos wi tuhlihk wiyaclos. Tiac ma fihsrwacsr se! Muhtwacn sac el pa tuhlihk ahk yuc ke sucu lal. Tuhlihk yuc inge tahk wiwina mahtuh ne ke srihk ac elos muhta loes inmahsrlo ukwe akwuck sasuc pacl inge.

Sucu se inge kwacfweacng in ekihn mwet tuhlan wowo ke acn nuhkwewa elos muhta we. Tuhsruhk, sie acn ma elos tuh muhta we ah tiac wo nuh selos_mweyen in oacna ke ninac kiyacn muhtwacn sac fahk, sucu lal uh mempucr ke Alu luhn Jisus Kraist luhn Mwet Luhlahlfongi Lal ke lwen Sahflah.

Sucu se inge srihke ma nuhkwewa in oasri kawuck lalos ke lutlut ah, elos kahsruh ac srihke in akohnohki nuh sin mwet, tuhsruhk tiac orekma. Sucu se inge pruhe ac pruhe tuh insien mwet inge in fihsracsrlah.

Sie fong ah, sucu se inge puhla muh toplac pruhe lalos, tuh tiac ke inkacnek kuh ohiyac ma elos finsrak nuhkac. Lohm selos fihrihryak ac ikori nuh in fohk uh. Tuhsruhk oasr ma se sahyac sikyak. E se inge ahkfihsrwacsryelah insiacn mwet tuhlan lalos.

Mwet tuhlan lalos ac lutlut ah fahsrweni ac oracni nuknuk, fahluhk, ac kuhtuh pac mwe enenuh sahyac nuh sin sucu se inge ma wacngihnlac ma nuhkwewa lalos ke srihpen e sac. Kuhlwacng el ikacslah kahlwem in nuhnak. Tiac pa inge ma sucu sac muhta tuhpan kuh finsrak in pa top nuhke pruhe pucspucs lalos ah. Tuhsruhk, elos ahkkahlwemye srui ke ma elos lotwelah ke ma upac ac ma elos tiac finsrak in sikyak in sang tohpohklah pruhe lalos.

Pwacyena lah, nuh selos suc ma luhlahlfongi ke insiaclos ac suc ma liyactwen uh, pahkomuhta luhn Leum ac fah sikyak nuh selos ke pacl ma arlac upac moul uh. Ke kuht tu na kuh ke luhlahlfongi in pacl upac ac kihsackihnkuhtlac uh mwe insewowo luhn inkuhsrao ac oacme nuh sesr. Ke moul se inge, oasr ma ac wacngihnlac in moul lasr kuh oasr ma kuht ac tuhpan ke pacl loes, tuhsruhk kuht ac fah sokwack ma suc ma yohk srihpac emeet tukun ma nuhkwewa sahflah. ¹ Pa ingacn olwelah Lal. ²

Ahkihlwenyacn mwe fahkwack luhlahp lasr ikacslah ke sie olwelah na oa suc fahk muh “God el luhngse tuhlihk nahtuhl ke muhtuhnfacl nuhkwewa fin facluh.” ³ Nuh sesr kais sie ke muhtuhnfacl, u in mwet, kahs, ac mwet, ⁴ God el olwelah, olweacng, ac suli kuht in ipeis ke engan ac wolacna pucspucs Lal.

Luhngse luhn God nuh sin mwet uh ahkpwacyeyuck ke ma suhmuhslah. ⁵ Luhngse se ingacn el oracni olwelah nuh sel Abraham, fahsrweni luhn tuhlihk nahtuhl, ⁶ ac ahkohnkohn Lal ke plwacn in Engan nuh ke moul lasr uh.

In sie lohm in luhlahlfongi ac fah wacngihn mwet sac, mwet fahsr ⁷ wacngihn mwet kahsruhp ac mwet suhkahsruhp, ⁸ ac wacngihn mwet lihk “sahyac.” Ke “kuht ekihn sie sin sie nuh sin mwet luhlahlfongi,” ⁹ suliyuck kuht in ekuhllah facluh in wolac, muhtwacwacack loac nuh lihk, kais sie mwet, kais sie sucu, kais sie mwet tuhlan ke kais sie pacl.

Ma se inge sikyak ke pacl kuht moulkihn ac akacsruhi ke wosasuc. Ke muhtwacwacackiyacn we se inge, Mwet Pahluh Joseph Smith el eis sie mwe palye na utuftuf suc Ma PahPah Lucng el kena tuh mwet nuhkwewa yen nuhkwewa in suk luhngse luhn God ac puhla kuh Lal in kapkapwack ac eklac.

Mwe palye se ingacn eisyuck ke acn se inge, ke lohm sahk sel sucu Smith fin acn Palmyra, New York. ¹⁰

Ahksahfyeyucklac ke 1998[sie yucfoko yucngucul alkosr], lohm sel Smith sifilpac muhsahiyucklac ke atac ac pwelucng na pwacye la. Fuckihl in mutul ke falfacl ahk luo el oasr ke fut 8 x 30 x 10 (5.5m x 9m x 3m) ke acn se pacna ma Moroni sie mwet pweng wo wolacna luhn God el sikyang nuh sel mwet fuhsr Joseph ke sie ekuh ke Septempuh 21, 1823. ¹¹

Kom esam ma Mwet Pahluh Joseph el sruhmuhn:

“[Moroni] el pahngonyuc ke inek, ac fahk … oasr orekma se nuh sihk sin God me; ac inek fah ekihn ma wo ac koluk inmahsrlon muhtuhnfacl, u in mwet, ac kahs nuhkwewa. …

“El fahk lah oasr sie puk fihliyucki, … lah fohnlah luhn Wosasuc ma pahtpaht oasr in puk se inge.” ¹²

Inge kuht wetoklac. Kuht alu nuh sin God Pahpah Ma Pahtpaht ac Wen Nahtuhl, Jisus Kraist, tiac nuh sin Mwet Pahluh Joseph kuh oacna sie mukul kuh muhtwacn moul fin facl se inge.

Na, motko lah ahkpwacyeyuck fuhkah palye ma God el sang nuh sin mwet kuhlwacnsap Lal. ¹³ Kuhtuh sa na ahkpwacyeyucklac, kuhtuh ahkpwacyeyuck tohkoh, tuhsruhk ma nuhkwewa ahkpwacyeyucklac. ¹⁴ Ke kuht lihpsre nguhn in palye luhn Leum, kuht kuh in ekihn sie ipin mwe ahkpwacyeyuck ke palye ac olwelah Lal—ipin mwe insewowo ke wosasuc nuh fin facluh.

Ke 1823, Joseph el sie tuhlihk fuhsr yac 17 ma tiac etweyuck, suc ma muhta ke sie mura tiac etweyuck, ke sie acn suc ma tuhfahna tulokyak. Finte pwacye, fuhkah ne elwacn motkweack in fahk lah el ac fah kuhfwen mwe orekma ke orekma luhn God ac ke mwe sang ac kuh luhn God el ac fah luhngaslah ma suhmuhslah muhtahl ma ac fah etweyuck yen nuhkwewa?

Na, mweyen pwacye, nga ac kom kuh in lohoh ke ahkpwacyeyen palye se inge ac kuht suliyuck in kahsruh in ahkfahsryelah palye se inge.

Tamuhlwel ac tahmtahel, fin facluh nohfohn, kais sie sesr wi toeni luhlahp ke Ohktohpa 2020 inmahsrlon muhtuhnfacl, u in mwet, kahs ma sruhmuhnyuck, ac ke palye inge.

Mihsenge, mempucr ke Alu luhn Jisus Kraist luhn Mwet Luhlahlfongi Lal ke Lwen-sahflah muhta ke muhtuhnfacl ac acn 196, ke stek 3,446 ke muhtuhnfacl 90. ¹⁵ Kuht ahollah kuhiyacn ac sruen acn inge.

Ke 1823, suc tuh muh motko muh ke yac 2020 ac puhs like milien mwet ke alu se inge ke acn tolu inge—Marike, Mexico, ac Brazil?

Kuh acn 23, kais sie acn inge oasr mempucr 100,000 ke alu uh—3 fin acn North America, 14 fin acn Central ac South America, 1 fin acn Europe, 4 fin acn Asia, ac 1 fin acn Africa? ¹⁶

Prestuhn Russell M. Nelson el pahngon Pul luhn Mormon muh “sie ma usrnguck ahluhkwelah usrnguck.” ¹⁷ Mwe lohoh nuhkac fahkwack ohinge, “Lwelah in etweyuck nuh sin muhtuhnfacl, u in mwet, kahs, ac mwet nuhkwewa.” ¹⁸ Mihsenge, toeni luhlahp lasr uh tuhtahflah nuh sin mwet uh ke kahs 100. Prestuhn Nelson el fahkwack kacl Jisus Kraist ac fohlohkyak luhn wosasuc Lal ke muhtuhnfacl 133, ac srack fahsr nuh meet oacwac uh.

Sramtweyuckyak ke kapi 5,000 ke edition se meet ke Puk luhn Mormon ke 1830, oasr kapi 192 million ke ip kuh nohfohn ip ke Puk luhn Mormon suc ma kihtakatlah ke kahs 112. Oasr pac Puk luhn Mormon ke kahs puhkantwen ke mwe tata oacna nuhke sacl fon kuh tablet ma, Lwenglah luhn Puk luhn Mormon ingena oasr ke kahs 23 ma orekmakihnyuck sin mwet milien 50 kuh puhs liki, ke kahs luhn mwet milien 4.1. ¹⁹

Ke ohiyac na srihsrihk ac fihsrwacsr—suc ma suliyuck kuht in wi oruh—ma na yohk ac fah sikyak kac.

Oacna nuh ke, sie kanfracns ma orek fin acn Monroe, Utah, oasr mwet 2,200 fin acn se inge, ac nga siyuck lah mwet ekahsr na oruh misin la. Apkuhran in mwet nuhkwewa sruhlwack paho. Kuhtuh yac somlah ah, ke stek se inge, misinacri 564[lamfoko onngoul ahkosr] oruh misin la, ke state 50 [lamngaul] nohfohn fin acn Marike ac acn 53[lamngaul tolu]__fin acn luhlahp nuhkwewa sahyacn acn Antarctica.

Ke nga sruhmuhn acn Antarctica uh, finne in acn Ushuaia ke acn kuhtuhlacp fin acn Argentina, nga liye ahkpwacyeiyacn palye se inge ke misinacri lasr akacsruhi ke fohlohkyak luhn wosasuc luhn Jisus Kraist fin sie acn ma pahngpahng “uten acn luhn facluh.” ²⁰

Sroal se ma oreklac ke kulun puk ahk ahkosr ke Saints ²¹ ahkkahlwemye sie sroal ke nuknuk ke fahko luhn wosasuc ingena ma tuhkuh nuh sin mwet luhlahlfongi ke acn nuhkwewa. Sramsram mahtuh ke Alu lasr uh el kawucki ke testimoni ac fuhfahsryucsr ke moul in luhlahlfongi luhn kais sie mempucr, weluhlwacng Mary Whitmer, sie tahmtahel fokoko luhlahlfongi la suc ma Moroni el ahkkahlwemye plet ke Puk luhn Mormon nuh se. ²²

Ke January ke yac 2021, mackuhsin luhn Alu uh—Friend, For the Strength of Youth, and the Liahona—suli mwet nuhkwewa in sie sin sie ac akacsruhi ke ma elos puhla ac testimoni lalos ke acn in luhlahlfongi lasr fin facl se inge. ²³

Tamuhlwel ac tahmtahel, ke kuht ahkyohkye luhlahlfongi lasr ke Pahpah Lucng ac Jisus Kraist, eis mwe insewowo ma pwacye ac olwelah muhtahl ma konweyuckyak ke wosasuc suc ma fohlohkyak, ac lutlut, motko, ac akacsruhi fahsr luhn fohlohkyak se inge, kuht oacwac in ahkpwacyeye ma palyeyuck.

Kuht ikihl kuht sifacna ac facluh se inge ke inkacnek luhn wosasuc suc ma ahkinsewowoye moul nuhkwewa.

Sie tahmtahel fin acn Africa el fahk ohinge, “Kuhlwacnsap luhn mukul tuhmuhk ke pristut oruh el mongfihsrwacsr ac kuhlwacng. Ac nga muhtwacwacack in eklac sie muhtwacn pahyuck ac ninac wowo.”

Sie mukul suc ma akihlenyuck ke pisnis fin acn Central Marike el fahk lah meet liki el sokwack wosasuc luhn God, el sie mwet ma muhta wewe pe inkacnek uh. Ingena el ac sucu lal sokwack moul lalos, srihpaclos, ac kuh lalos.

Sie tuhlihk mukul fuhsr fin acn Kuhtuhlacp in acn Marike el tuhf won ac kuhka ahtro in kahsruh molwelah winto nuhke lohm suc ma sucu lal muhsahi El moli sie tahfuh singucul meet. Pwacyena lah El ac fah liye winto luhn inkuhsrao ikacklah nuh sel.

Ke sroasrihk ahkosr, ke acn southwest luhn United States, sie sucu luhn Native Macrike elos ukwiyac rose bush na kahto in fahrngwelihk ke nien mwesis se inge, in mwe akucl nuh ke luhlahlfongi ac kuh in sifacna ke wosasuc.

Sie mwet ma pain moullac ke mweun fin acn Macrike, ac sie tamuhlwel fin acn Asia Kuhtuhlacp nuh Eir ma wacngihnlac finsrak lal nuh ke moul lal. El sokwack finsrak ke sie mwemwe suc ma el liye sie tuhlihk mukul wiyacl ke lutlut ah tu sruok ahluh ma nwacnwack kuhfa luhn Leum ac fahkwack ke akwuck in molwelah ac Iwaclah luhn Jisus Kraist.

Pahpah Lucng El suli kuht yen nuhkwewa in puhla luhngse Lal, ac in lutlut ac kapkapwack ke etwacack, orekma suwohs, kuh in sifacna kuhlwacnsap, ac kuhtuh ohiyac wowo ac engan suc ma kuht sokwack ke Alu suc ma fohlohkyak Lal.

Ke kuht eklac in luhlahlfongi God, kuhtuh pacl uh ke nguhsr lasr nuh sel in pacl toasr, muhkaimtacl, pacl kuht ahlohloh, kuht lotwelah lah El etwe kuht yohk ac luhngse kuht yohk liki na ke kuht etwe kuht ac luhngse kuht sifacna uh.

Pa oruh kuht enenuh kahsruh luhn God in oakiyac suwohs, oacna sie, insese, ac mislac in lohm sesr ac acn lasr. Pwacyeiyacn, loaliyacn, kahlwemiyacn sramsram, acn, ac sie sin sie ma tuhkuh ke kuht puhla luhngse moul luhn God, suk pahkomuhta ac ma usrnguck ke Iwaclah luhn Wen Nahtuhl, ac muhsaheack kuhpahsr kawihl ke olwelah muhtahl.

Ma wo ke alu ac lahlmwetmwet uh enenweyuck nuhke facluh se inge suc ma sesseslah ke ma okahrkahr, orahru, ac fohkfohk. Ohiyac fuhkah pac sahyac ma kuh in ahksasuc, mokle, ac tahpuhk nguhnan mwet uh? ²⁴

Yok sahk fin acn Haiti pa sie fanna inkacnek inmahsrlon inkacnek puhs ma oruh mwet uh in fahsrweni ac oruh ma wo. Mwet ke mura sacn, ac wi mempucr 1,800 ke Alu lasr sruhkwack sahk in yokyok, ac fahsrweni ac ukwiyac sahk 2,500. ²⁵ Orekma se inge suc ma ahkfahsryeyuck ke yac puhs ukwiyac tari sahk 121,000. Tuhpanyuck in sifilpac ukwiyucki tausin pacl singucul.

Ohiyac se inge el sang lullul, sefiyac fohk uh, ac tilokihnyac sronot. Oacyacpac ahkkahtoye acn uh, muhsaheack acn uh, ahkwoye ngwetngwetan acn, ac ahkmoulye nguhnin mwet. Fin kom siyuck sin mwet Haiti lah suc e kosrwacni fahko ke sahk inge, elos ac topuk fahk, “Oacna sie suc masrinsrwacl.”

Percent alngucul ke mwet fin facluh elos sie sin sie ke alu lalos. ²⁶ Mwet ke kain in alu sa in mukwilac kahsruh enenuh tukun ma upac sikyak, oacyacpac nuh ke enenuh luhn mwe mongo, nien muhta, lutlut, rit, ac lutlut nuh ke orekma. Fin facluh nohfohn, mempucr lasr, kawuck, ac Alu uh kahsruh mura uh kuhlwacnsuhpuh mwet ma lihllihlyak liki acn la ac sang kof, mwe ahknwacsnwacs, mwe kahsruh mwet suhkahpahs, ac mwe kahsruh ahtron muhta—sie mwet, sie mura, soko sahk ke kais sie pacl. ²⁷ Yen nuhkwewa, kuht suk in pahpah ninac wowo ac mwet wowo ke acn lasr, in wi tahpuhk mwet atuhlani lasr ac mwet ke acn lasr, wi pac inkacnek in kihtakat sin Mwet Luhlahlfongi ke Alu uh. ²⁸

God el use sukohsohk in sulaclah fin facl se inge—ac ma ac nuhnuhnkuh ma tuhkuh ke sulaclah lasr. Leum El fahkwack, “Nga, Leum God, ahksukohsohkye kowoslac, ke ma inge kowos sukohsohklah.” ²⁹ Ke fahkwelihk “sukohsohk nuh sin mwet sruhuh,” ³⁰ Leum el olwelah Iwaclah Lal ac inkacnek luhn wosasuc ma kuh in tuhlahlah kapihr luhn mahno ac nguhn. ³¹ Ke pahkotwen, molwelah nuhke sukohsohklah utuckyang nuh selos suc som liki facl se inge.

Kuhtuh yac somlah ah, sie mwet tol fin acn Central Macrike fahk nuh sihk lah el lutlut ke ohiyacn Mwet Luhlahlfongi ke Lwen-sahflah oruh “pacptais sin mwet misac.” “Nuh ke liye uh suwohs,” mwet tol sac fahk, “lah God elan sang finsrak nuh sin mwet nuhkwewa in pacptaislac, lah pacl suc kuh acn oyac elos muhta we, tuhsruhk tuhlihk srihsrihk, suc moul sin Kraist. ³² Mwet Sap Paul,” mwet tol sac fahk, el “sramsram ke mwet misac ma soano pacptais ac sifil moulyak.” ³³ Olwelah ke akwuck luhn tempuhl ma ahkfahsryeyuck sin aholyen mwet misac nuh sin “muhtuhnfacl, u in mwet, ac kahs nuhkwewa” suc ma wacngihn mwet enenuh “ac muhta na sruhuh ke misac lalos, ke hell, kuh ke kuclyuck uh.” ³⁴

Ke kuht sokolwack God, kuhtuh pacl uh top nuhke pruhe lasr uh tiac sikyak oacna ke finsrak lasr uh uskuhtlac liki inkacnek uh, uskuhtme nuhke mura lasr, luhslah lohsr liki nguhnasr, ac kol kuht in sokwack nien monglac nuhke nguhnasr ac sie sin sie ke wolacna luhn olwelah ac luhngse kawihl Lal.

Ma yohk uh kwacna muhtwacwacack ke ma srihk, tuhsruhk ma usrnguck luhn God sikyak lwen nuhkwewa. Fuhkah yohkiyacn srui lasr ke mwe sang fuhlwact luhn Nguhn Muhtahl, Iwaclah luhn Jisus Kraist, ac wosasuc ahkkahlwemyeyuck Lal, akwuck, ac olwelah ma konweyuckyak ke Alu Lal suc fohlohkyak ke Inel.

Lwelah tuh kuht in engan in eis suliyuck luhn God in eis ac kahsruh ahkpwacyeye olwelah Lal ac mwe insewowo ma palyeyuck ke muhtuhnfacl, u in mwet, ac kahs nuhkwewa, Nga pruhe ke ine muhtahl ac oa luhn Jisus Kraist, amen.