Tahmtahel ke Zion

Tahmtahel luhng wiyuck, nga ahkinsewowoyeyuck in sramsram ke pacl wolacna se inge fin facluh. Lwen nuhkwewa, kuht fototoyang nuh ke pacl wolacna se ke Mwet Lahngo Jisus Kraist El ac sifilpac tuhkuh nuh facluh. Kuht etuh ke ongaiyac upac ma ac sikyak met liki tuhkuh Lal, tuhsruhk insiacsr ac fah sesseslah ke engan ac ekahk pac in etuh ke olwelah wolacna ma ac fah ahkpwacyeyucklac met liki El fohlohk.

Oacna acn sacohk nuhtin Pahpah Lucng, ac oacna acn nuhtin Leum Jisus Kraist ke tohkohsrahi Lal, ¹ oasr ip yohk lom ke pacl wolacna fahsruh uh. Kuht etuh lah Mwet Lahngo El ac tuhkuh nuh yurun un mwet suc orekweni ac ahkoeyucklac in moul oacna mwet ah tuh oruh ke siti lal Enoch. Mwet we ah tuh ma sefanna ke luhlahlfongi ke Jisus Kraist ac tuh eklac arulacna nwacsnwacs oruh elos tuh utuck som nuh lucng inkuhsrao.

Pa inge mwe ahkuhtweyac ikacklah luhn Leum ke ma ac sikyak nuh sin mwet lal Enoch ac meac ac sikyak ke fihl sahflah se inge ke fohnlah luhn pacl uh:

“Ac lwen se fah tuhkuh tuh facluh ac monglac, tuh met liki lwen sacn inkuhsrao fah lohsrlah, ac mwe lihsrlihsr luhn lohsr fah nwacklah facluh; ac inkuhsrao fah kusrusryak, ac oacyacpac facluh; ac ongaiyac yohk fah oasr inmahsrlon tuhlihk nuhtin mwet, tuh mwet luhk nga fah karihngihn;

“Ac suwohswohs nga fah suhpwaclah nuh ten liki inkuhsrao; ac ma pwacye nga suhpwaclah liki facluh, in fahkwack luhlahlfongi ke Wen Sefanna nuhtihk; sifil moulyak lal liki misac; ahok, ac oacyacpac sifil moulyak luhn mwet nohfohn; ac ma suwohswohs ac pwacye ngac oruh in nwacklah facluh ke sronot, in oracni mwet ma sollac ke lacfahl ahkosr fin facluh, nuh ke nga fah ahkolah, Siti Muhtahl se, muh mwet luhk kuh in nokomwacng infulwaclos, ac sano ke pacl in tuhkuh luhk; tuh tabernacle oasr ngoh pahngonyuck Zion, Jerusalem Sasuc se.

“Ac Leum el fahk nuh sel Enoch: Na fah kom ac siti lom kwewa fah sonolos we, ac kuht ac eisuhlos nuh ke insiacsr, ac elos fah liye kuht; ac kuht fah puhtati nuh inkwaclos, ac elos fah puhtati nuh inkwacsr, ac kuht ac ngokyac sie sin sie;

“Ac we fah mwet luhk muhta, ac fah Zion, ma ac tuhkuh liki ma nuhkwewa nga tuh oreklac; ac ke lusen yac tausin se facluh fah monglac.” ²

Tahmtahel an, muhtwacn nuhtuwos, muhtwacn nuhtin tuhlihk nuhtuwos, ac muhtwacn suc karihngihn kom fah oasr insiacn oreklac luhn un mwet suc fah wi kuhpahsr wolacna nuh sin Mwet Lahngo. Kom fah oacna kuh yohk srihpac in oracni Israel ac oraclah mwet Zion suc fah muhta in mihs ke Jerusalem Sasuc.

Leum El tuh, ke mwet pahluh Lal, oraclah sie olwelah nuh sum. Ke lwen sa ke Rilif Sosaiti, Mwet Pahluh Joseph Smith el fahk nuh sin tahmtahel uh, “Fin kom moul fal nuh ke suwohs lowos, lipufacn tiac kuh in kosrweyucklac liki yuruwos.” ³

Ma wolacna sacn oasr yurum, ac kom ingena ahkolah kac.

Prestuhn Gordon B. Hinckley el fahk:

“Tahmtahel an … tiac ahkluo ke plwacn in engan ma pahtpaht ac mihs luhn Pahpah tuhmwacsr. Kowos yohk srihpac nuh pwacye ke plwacn sacn.

“Fin tiac suwos plwacn se tiac kuh in fahsr nuh met. Fin tiac suwos plwacn nohfohn in tulohkihnyucklac. …

“Kais sie suwos pa tuhlihk nuhtin God, suc eis kunohkohn muhtahl.” ⁴

Mwet pahluh lasr ingena, Prestuhn Russell M. Nelson, tuh sang ahkuhtweyac se inge ke ip lom ke ahkolah nuh ke tuhkuh luhn Mwet Lahngo:

“Tiac na fihsrwacsr in srihkeyac eklac ma … oasr sin muhtwacn uh, tiac ke sucu muhkwena tuhsruhk oacyacpac ke Alu luhn Leum, ekihn muhtwacn kiyac, ninac, ac ninac mahtuh; ekihn tahmtahel, ninac nuh sin tuhlihk nuhtin wiyaclos; ekihn mwet luti, ac mwet kol; ac yohkna ekihn mwet srihkasrak ac mwet inse pwacye in ahkkweye luhlahlfongi.

“Ma inge nuh pwacye na ke fihl in wosasuc nuh kwewa ac ke lwen lal Adam ac Eve ah. Tuhsruhk muhtwacn ke fihl se inge siena liki kuhtwena muhtwacn sahyac uh ke srihpen fihl se inge siena liki kuhtwena ma sahyac uh. Ma siena inge use kwewana mwe insewowo ac kunohkohn.” ⁵

Fihlin pacl se inge siena ke srihpen Leum El fah kol kuht ahkolah in oacna siti lal Enoch. El tuh ahkuhtweyac nuh ke mwet sap ac mwet pahluh Lal eklac fuhkah se nuh sin mwet Zion ac sikyak.

Elder Bruce R. McConkie el tuh luti:

“Lwen lal [Enoch] arulacna koluk; lwen in lohsr ac fohs, lwen in mweun ac kuhnanuclac, lwen se suc fahsr nuh ke ahknwacsnwacsyeyacn facluh nuh ke kof.

“Enoch, tuhsruhk, tuh luhlahlfongi. El ‘liye Leum,’ ac sramsram nuh sel ‘muhta nuh ke muhta’ oacna mwet se sramsram nuh sin mwet sahyac.. (liye Moses 7:4.) Leum El suhpweluhl in fahkwack auliyak nuh sin facluh, ac ahkkweyacl in ‘pacptais ke inen Pahpah ac Wen, ma sesseslah ke luhngkuhlwacng ac pwacye, ac ke Nguhn Muhtahl, ma fahkwack loh luhn Pahpah ac Wen.‘ (liye Moses 1:39.) Enoch el oraclah olwelah ac oracni un mwet luhlahlfongi pwacye, elos kwewa eklac in luhlahlfongi yohk tuh ‘Leum El tuhkuh ac muhta yurun mwet lal, ac elos muhta ke suwohswohs,’ ac elos ahkinsewowoyeyuck sin inkuhsrao. ‘Ac Leum El pahngon mwet lal Zion, mweyen elos inse sefanna ac nuhnak sefanna, ac muhta in suwohswohs; ac wacngihn suhkahsruhp inmahsrlolos.’ (liye Moses 7:18.) …

“Ac tukun Leum el pahngon mwet lal Zion, ma suhmuhslah fahk muh Enoch el ‘oraclah siti ma pahngpahng Siti luhn Muhtahl, finne Zion;’ Zion ma ‘eisyuck nuh inkuhsrao’ acn ma ‘God El eis nuh ke insiacl;” ac “tukun pacl inge mwet uh fahk, Zion kahinglac.’ (liye Moses 7:19, 21, 69.) …

“Zion se pacna inge ma eisyuck nuh inkuhsrao fah fohlohk … ke Leum El sifilpac use Zion, ac mwet la fah wi Jerusalem Sasuc, ma ac fah akiyucklac.” ⁶

Fin ma sikyak met pa muhtwacwacack, ke pacl luhn tuhkuh luhn Mwet Lahngo, muhtwacn suc insacnweacng nuh ke olwelah lalos yurun God ac fah yohk liki tahfuhn mwet suc ahkolah in pain El ke El tuhkuh. Tuh kuhtwena pihsen mwet uh, orekma lom in oraclah ma sefanna inmahsrlon mwet ahkolah nuh ke Zion ac yohk liki tahfuh.

Nga ac fahk nuh sum lah efuh nga luhlahlfongi ac ohinge. Puk luhn Mormon sang sramsram luhn mwet Zion se. Kom esam tuh tukun elos lutiyuck, luhngseyuck, ac ahkinsewowoyeyuck sin Mwet Lahngo moulyak tuh “wacngihn fohs fin acn uh, ke srihpen luhngse luhn God ma oasr ke insiacn mwet uh” ⁷

Ma nga puhlakihnyuck luti yuc tuh oasr mwe sang luhn muhtwacn nuhtin Pahpah Inkuhsrao in ahkmihsye fohs ac oraclah suwohswohs ke luhngse lalos nuh sin God ac luhngse luhn God elos oraclah sin mwet elos kuhlwacnsap.

Nga liye ke nga mwet fuhsr se ke pracns srihsrihk lasr tuhkweni ke lohm sihk. Tamuhlwel wiyuck ac nga tuh mwet suc sruok Aaronic Pristut muhkwena, pahpah tuhmuhk el mwet suc sruok Melchizedek Pristut muhkwena. Prestuhn luhn Rilif Sosaiti el welah alu ac mukul tuhmwacl tiac luhngse tuh el wi Alu. Mempucr pa tahmtahel mahtuh suc wacngihn mwet suc sruok pristut ke lohm selos. Nga liye ninac kiyuck ac tahmtahel ingacn luhngse, sruhkwack, ac karihngihn sie sin sie ac tiac tui. Nga kahlwem ingena tuh utuckyang nuh sihk in liye Zion.

Lutlut luhk ke yohk srihpacn muhtwacn luhlahlfongi kalweniyuck ke pracns srihsrihk luhn Alu uh fin ac Albuquerque, New Mexico. Nga liye muhtwacn nuhtin prestuhn luhn pracns, muhtwacn nuhtin prestuhn luhn district, ac prestuhn luhn Rilif Sosaiti ahkkweye insiacn mwet sasuc ac mwet suc wi alu nuhkwewa. Sacnri sac ma nga som liki Albuquerque, yac luo tukun nga liye mokle luhn tahmtahel we, stek se met oreklac. Ingena Leum El fihliyac tempuhl se we.

Nga som tohk nuh Boston, na nga kuhlwacnsap ke prestuhnsi luhn tistrik ma kol ye pracns srihsrihk luo ke acn sacn. Oasr fohs ma ahkwoyeyucklac pacl pucs sin muhtwacn luhngse ac nuhnak muhnahs suc kahsruh in ahkfihsrwacsrye insiac. Sacnri se nga som liki Boston, mempucr luhn Prestuhnsi Se Met tuh oraclah stek se met fin acn Massachusetts. Oasr tempuhl we ingena, fototo nuh ke acn ma prestuhn luhn tistrik tuh moul. El ituckyang nuh ke Alu uh ac na tohk pahngonyuck in kuhlwacnsap ke prestuhn luhn stek ac na prestuhn luhn misin, eis kahsruh sin muhtwacn luhlahlfongi ac luhngse.

Tahmtahel, ituckyang nuh suwohs, mwe insewowo in muhtwacn nuhtin God ke mwe sang wolacna. Kowos us yuruwos nuh ke moul uh kuh luhn nguhn in karihngihn mwet sahyac ac sruhkluhlos nuh ke luhngse ac suwohs ma ac ahkfalyaclos in tuhkweni moul ke Zion. Tiac ma suhnuhnkuh se ma Rilif Sosaiti, u se met luhn Alu uh nuh sin muhtwacn nuhtin Pahpah Inkuhsrao, ukwe kahs “Luhngse Pwacye Tiac Tui.”

Luhngse pwacye pa luhngse suwohs luhn Jisus Kraist. Ac luhlahlfongi Kacl ac mwe insewowo luhn Iwaclah Ma Pahtpaht Lal fah kahsre kom, ac selos suc kom luhngse ac kuhlwacnsap, nuh ke mwe sang wolacna in moul ke kuhphasr ke Zion luhngse ac olwelah. Acn we kowos fah tahmtahel fin acn Zion, luhngseyuck ke oasr luhn Leum ac elos suc kom tuh ahkinsewowoye.

Nga fahkwack tuh kowos wi mwet luhn tohkohsrahi luhn Leum fin facluh. Kowos muhtwacn nuhtin Pahpah Inkuhsrao luhngse, suc suhpwackowosme nuh facluh ke mwe sang yohk srihpac ma kowos olwelah in ahkinsewowoye mwet sahyac kac. Nga olwelah nuh suwos tuh Leum El ac kol kowos ke paho, nuh ke Nguhn Muhtahl El ac fahsr met liki muhtowos ke kowos kahsruh El in ahkolah mwet Lal nuh ke Zion ma El olwelah. Nga fahkwack luhlahlfongi ke ine muhtahl luhn Jisus Kraist, amen.