Kuh Ma Pahtpaht

Ke sifilpac liye mwe lutlut luhn mwet pahluh sacohk lasr, Prestuhn Russell M. Nelson, nga sokwack kahs se ma el kwacna muhta orekmakihn ke sramsram puhkantwen lal. Kahs se ingacn pa kuh.

Ke toeni luhlahp se emet tukun el ahkkweyeyucklac in ekihn Mwet Sap, Prestuhn Nelson el sramsramkihn kuh.¹ El kalweni na in luti ke kuh ke yac puhs. Ke kuht ahkkweiyacl Prestuhn Nelson in mwet pahluh lasr uh, el luti ke ip yohk ke kuh—yohkiyac na, kuh lal God—ac lah kuht e fuhkah eis. El luti lah kuht e eis fuhkah kuh luhn God ke kuht kahsruh mwet sahyac uh,² lah auliyak el suli kuh lal Jisus Kraist ac Iwaclah lal nuh ke moul lasr,³ ac pristut—kuh lal God—ahkinsewowoye nohfohn mwet ma oraclah ac liyacacng olwelah lalos nuh Sel.⁴ Prestuhn Nelson el fahkwack lah kuh luhn God el oan sin nohfohn mwet ma oraclah olwelah lalos lun tempuhl ke elos liyacacng olwelah lalos.⁵

Nga mokleyuck ke ma se Prestuhn Nelson el fahk kuht in oruh ke toeni luhlahp ke Eprel 2020 ah. El sapkihn nuh sesr kuht in “lutlut ac pruhe in lotwelah yohk ke kuh ac lahlmwetmwet tuh kom eis mwe sang—kuh tuh kom ac fah eis mwe sang kac.”⁶

In orekma nuh ke ma se inge, nga lutlut ac pruhe ac lotwelah kuhtuh ma wowo ah ke kuh ac lahlmwetmwet ma ahkinsewowoyeyuck nga kac—kuh ma e tuhfah ahkinsewowoyeyuck nga kac.

In kahlwem ke ma kuht enenuh in oruh in eis kuh luhn God nuh ke moul lasr uh tiacna fihsrwacsr, tuhsruhk nga konwacack muh kuh in orek ke kuht lutlut kac ke nuhnak lasr uh ac pruhe ke Nguhn Muhtahl in use kahlwem nuh sesr.⁷ Elder Richard G. Scott el sang ahkuhtweyac kahlwem se lah meac kuh luhn God; pa “kuh se ma in oruh yohk liki ma kuht kuh in sifacna oruh.”⁸

Yohk srihpac kuht in nwacklah insiacsr ac nguhnasr ke kahs luhn God ac pwelucng ke luhlahlfongi ke Jisus Kraist in eis kuh luhn God in kahsrwe kuht ke pacl upac. Fin wacngihn eisyacn kahs luhn God ac luhlahlfongi ke Jisus Kraist nuh ke insiacsr, luhlahlfongi lasr ac kuh in wacngihnlac, ac kuht kuh in tiac eis kuh se ma God el ke use nuh sesr uh. Luhlahlfongi suhloal uh el suhfal. Luhlahlfongi ac kahs luhn God ma nwacklah nguhnasr uh muhkwena fal in ahkkweye kuht—ac in lwelah kuht in eis kuh Lal.

Ke nga ac muhtwacn kiyuck uh tuhfahlah tuhlihk nahtuhsr uh, kuht pahtok kais sie selos in lotwelah in sritacl kihn sie mwe sritacl on ah. Tuhsruhk kuht e lwelah nuh sin tuhlihk nahtuhsr in eis lutlut nuh ke on muhkwena fin elos oraclah ip kunaclos ac pracktis ke mwe sritacl on nahtuhlos ke kais sie lwen. Ke sie lwen Sactte ah, tuhlihk muhtwacn se nahtuhsr suc pahngpahng Jalynn el rahrahlac in som wi kawuck lal sritacl, tuhsruhk el sonna pracktis sritacl piacno. Ke el etuh lah el muhta pracktis ke lusen minit 30, el oruh elan oraclah mwe fahkwack pacl ke srihpen el tiacna ke pracktis ahluhkwelah pacl enenweyuck ke finne minit se.

Ke el fahlac ahliki ohfacn srihsrihk ah in fahsr nuh ke piacno ah, el tui ke kihtin pacl ac tanyac kuhtuh puhtin ah. Tuh sahyacn liki na in oraclah timer sac, el sang ohfacn sac in kuk ke lusen minit 30 ac tanyac puhtin in start sac. Tukun el pracktis minit 20 lac, el fahlac nuh ke acn in mongo ah in liye lah minit ekahsr luhlah ke prackis lal ah pa el liyacack lah ohfacn sac fihrihryak.

El kahing yuhlac nuh wuhtah ke yen nga orekma we, ac wowo fahk muh fihrihryak lohm ah. Nga silahklahk na kahsruhsr nuh lohm ah, ac pwacye, nga sokwack ohfacn srihsrihk sac fihrihryak.

Ke srihke luhk in oruh lohm sesr in tiac fihrihryak, nga saplak nuh tukun ohfacn sac, eslah kohrt sac in tillac plak, ac orekmakihn kohrt sac in sruhkwack ohfacn sac ma fihrihryak ah liki tepuh ah. Finsraki in nga pa mwet puhlaik se ac in tulokihnyac e ah in tiac fuhrreack lohm sesr, nga ul ohfacn sac rauniyuc in tiac puhsralyuhlac, fahlac nuh wuhtah, ac tohllah ohfacn sac nuh fin mah ah. Insac kuht kuh in konwelah e fihrihr ah ke os soko.

Mac se tahfonglac uh? Ohfacn srihsrihk se enenuh sie ma ah in ohkohmlah kuh la uh, ac ke wacngihn ma lac in ohkohmlah kuh se ingacn, ohfacn se ngwacn e sifacna ohkohmlah kuh se ngwacn, follah, ac kuh in fihrihryak, sifacna kuhnanuclac ke e ac mulut.⁹ Ohfacn srihsrihk se lasr ah fihrihryak nohfohn ke srihpen wacngihn ma an lac.

Oacpacna ke, mwet ma oasr luhlahlfongi ac kahs luhn God an loal lun insiyac e kuh in ohkohmlah ac kuhtanglah mwe fakfuhk ma setuhn elac suhpuh in kuhnaos kuhtlac.¹⁰ Fin tiac, luhlahlfongi lasr, finsrak, ac kuh tiac kuh in kuhtanglah, ac oacna ohfacn wacngihn koano sac, kuht kuh in eklac mwe sensen se.

Nga lotwelah lah fin oasr kahs luhn God an loal ke moul lasr, weacng pac luhlahlfongi ke Leum Jisus Kraist ac Iwaclah Lal, lwelah nga in eis kuh luhn God in kuhtanguhllah setuhn ac ma nuhkwewa ma elac tol nuh sihk uh. Ke kuht sun ma upac uh, kuht kuh in ngwet nuh ke olwelah lal Leum ma lutiyuck sel Paul: “Tuh God el tiac use nuh sesr nguhn in sahngweng; tuh ke kuh, ac ke luhngse, ac ke nuhnak in mislac.”¹¹

Kuht etuh lah ke el ekihn tuhlihk se ah Mwet in Molwelah el “kapwack, ac fokokoi ke nguhn, sesseslah ke lahlmwetmwet: ac luhngse luhn God weluhl.”¹² Kuht etuh lah ke el mahtuhlah ah, “Jisus el lahlmwetmwet ac fuhlwacti, ac luhngse yuck sin God ac mwet uh.”¹³ Ac kuht etuh lah ke pacl se luti Lal ah muhtwacwacack, mwet ma lohngohl ah “elos lut ke mwe lutlut lal: tuh kahs lal arulacna kuh.”¹⁴

Ke ahkkweyeyuck, Mwet in Molwelah el kapkapwack ke kuh ac el kuh in kuhtanglah nohfohn mwe sruhf lal setuhn.¹⁵ Ke kuht ukwe mwe srihkasrak lal Mwet in Molwelah uh ac ahkolah ke lutlut ke kahs luhn God ac ahkloalye luhlahlfongi lasr, kuht kuh pac in eis kuh luhn God in kuhtanglah mwe sruhf uh.

Puhluhn pacl se inge ma sruhuh toeni uh pwacnwacng upac in muhtwacta nuh tempuhl ke pacl pohs, nga oraclah in kalweni in lutlut ac lotwelah yohk ke kuh luhn God ma tuhkuh nuh sesr ke kuht oraclah ac liyacacng olwelah lasr ke tempuhl uh. Oacna ke olwelah ke pruhe in kihsackuhnlah ke Tempuhl luhn Kirtland, kuht som liki tempuhl uh langweyuhklac ke kuh luhn God.¹⁶ Wacngihn lwen ma kuh luhn God e tui in wi mwet ma oraclah ac liyacacng olwelah ke tempuhl lalos, ac oacyacpac wacngihn tulokihnyac in eis kuh se inge ke pacl in mas e inge. Kuh lal wacngihnlac liki moul lasr uh muhkwena fin kuht tiac liyacacng olwelah lasr ac tiac moul ke ohiyac se ma lwelah kuht in kalweni na in fal in eis kuh Lal.

Ke pacl se ma nga ac muhtwacn sacohk kiyuck oruh misrin lasr ekihn mwet kol luhn misrin e Thailand, Laos, ac Myanmar, kuht liye ke muhtahsr sifacna kuh luhn God ma wi mwet ma oraclah ac liyacacng olwelah muhtahl lalos lun tempuhl. Mani in kahsruh ke tempuhl oruh in kuh nuh sin Mwet Luhlahlfongi puhkantwen ke muhtuhnfacl tolu inge in som nuh tempuhl tukun elos oruh ma nuhkwewa elos kuh in oruh ke kihsackuhnlah ac ahkoo. Nga esam ke nga ohsun nuh sin u in mwet luhlahlfongi 20 ma tuhkuh fin acn Laos e ke acn in aksohk fin acn Bangkok, Thailand, in kahsrwelos in ayaol nuh ke siena acn in aksohk fin acn Bangkok in sruokyac oaksohk soko elos e wi in som ne Hong Kong. Mempuhr inge elos arulacna sesseslah ke rahrah in tari som nuh ke lohm sin Leum.

Petsac

Mempuhr fin acn Laos

Ke kuht ohsun nuh sin Mwet Luhlahlfongi wowo inge ke fohlohk lalos, kapwack ke wosasuc wi pa kuh se ke elos eis mwe sang ke tempuhl ac oraclah olwelah lalos nuh sin God kahlwem. Mwet luhlahlfongi inge elos tifoklac liki temple “langweyucklac ke kuh [Lal] na pwacye.”¹⁷ Kuh se in oruh yohk liki ke ma elos kuh in oruh sifacna sang nuh selos kuh in kuhtanglah ma upac ma mempuhr uh puhlakihn ke acn selos ac fahsr nuh met ke “ma yohk ac wolacna, ke kahlwem,”¹⁸ ke elos kalweni in muhsahi lohm sin Leum fin acn Laos.

Ke puhluhn pacl se ma kuht tiac kuh in som nuh tempuhl, yac kais sie sesr luhlahlfongi ke olwelah ma kuht oraclah ke tempuhl in fihliyac sie innek kahlwem, ma tiac ekyek ke moul lasr uh? Olwelah inge, fin liyeyuckyang, e use nuh sesr fwackyuck ac ma kuht ke oruh ke pacl fahsruh ac kena kahlwem se in fal in eis nohfohn ma Leum el olwelah ke luhlahlfongi lasr.

Nga suli kom in suk kuh se ma God el ke usot nuh sum. Nga fahkwack lah ke kuht suk kuh se inge uh, kuht e ahkinsewowoyeyuck ke kahlwem yohk se ke luhngse luhn Pahpah Tuhmasr Inkuhsrao nuh sesr.

Nga fahkwack lah ke sripen Pahpah Tuhmasr Inkuhsrao el luhngse kom ac nga, El suhpwacma Wen Kuloh Nahtuhl, Jisus Kraist, in Mwet in Molwelah lasr ac Mwet in Iwaclah lasr. Nga fahkwack ke Jisus Kraist, El suc asr kuh nohfohn se,¹⁹ ac oruh ke inen Jisus Kraist, amen.