Lwelah Muhtweng in Oasr Orekma Suwohs Lal, ac Oacklah Muh Ma Inge Mwe Insewowo
Ke kuht orekmakihn muhtweng, luhlahlfongi lasr yohkwelihk. Ke yohkwelihk luhlahlfongi lasr, engan lasr yohkwelihk pac.
Yac luo tari ac, mukul fuhsr emet wiyuck, Chad, el som liki moul se inge. Misac lal oruh oasr ngal insiacn muhtwacn kiyacl Stephanie; tuhlihk srihsrihk luo nahtuhlos, Braden ac Bella; oacyacpac sucu nohfohn sahyac. Kuht konwacack mihslac ke kahs lal Elder Neil L. Andersen ke toeni luhlahp wik se met liki Chad el misac: “Ke kweokkihn ma upac luhn facluh, fahsr nuh met ke muhtweng, ac kuh in ahkkweye luhn Mwet Lahngo fah us kom nuh ke kahlwem, etwacack, mihslac, ac finsrak” (“Wounded,” Liahona, Nohfuhmpuh 2018, 85).
Oasr luhlahlfongi lasr kacl Jisus Kraist; kuht etuh tuh kuht ac sifilpac liyacl Chad, tuh kuht ahsor tuh el wacngihn ke mahno! Oasr mwet pucs suc mwet elos luhngse tuh misac. Upac in muhtweng ac sano ke pacl ma kuht ac sifilpac ohsun.
Yac se tukun el misac, kuht puhla lohsr loal se tuhkuh nuh facsr. Kuht tuh suk mihslac ke lutlutkihn ma suhmuhslah, pruhe ke oaru yohk, ac som nuh ke tempuhl pacl puhs. Kahs ke on in alu soko inge ahkuhtweyac ma kuht puhla ke pacl sacn: “Lwenwelihk tuhkuh, ac facluh nguhtwaclihk, puhkuhnyeng luhn fong tuh kahinglac” (“The Day Dawn Is Breaking,” Hymns, no. 52).
Sucu lasr tuh olwelah tuh 2020 ac yac nuh wowo se! Kuht tuh lutlutkihn Fahsruh, Fahsruh Tukuk lasr ke Wuhlweacng Sasuc ke puk lal James ke kapihn Nohfuhmpuh 2019 ke pohlohn kahs se ahkkahlwemyeyuck nuh sesr. James, sapta 1 fuhs 2 fahk, “Mwet lulalfongi wiuk, ke kain in mwe srike puspis sun kowos, kowos in oakla mu ma inge mwe insewowo nu suwos” (Joseph Smith Translation, James 1:2 [in James 1:2, footnote a]). Kena lasr in muhtwacwacack yac sasuc se, yac singucul sasuc, ke engan, kuht sulaclah tuh ke 2020 kuht “oakla mu ma inge mwe insewowo.” Kuht puhla fokoko oruh tuh Kristmas tari ac kuht sang nuh sin mwet wiyacsr fohrohk ma sihmlac kac, “Oakla mu Ma Inge Mwe Insewowo.” Yac 2020 ac pwacye yac in engan ac ahkfuhlwact.
Na, kuht oasr inge—2020 tuh us COVID-19 mas yohk, fohs ke kafucrmacn, ongaiyac, ac ma upac ke mani. Pahpah tuhmasr Inkuhsrao El sahp sang pacl lasr kuht in motko ac nuhnkuh kahlwem lasr luhn muhtweng ac sulaclah lasr in sulaclah engan.
Puk lal James tuh eis kalmac sasuc nuh sesr. James, sapta 1, fuhs 3 ac 4 kalweni:
“Tuh kowos etu lah ke pacl se lulalfongi lowos kutangla fin mwe srike inge, saflaiyac muteng lowos uh yokelik.
“Tuhsruhktuh lwelah muhtweng in oasr orekma suwohs lal, tuh kowos in kuh in suwohs ac fohnlah, wacngihn ma kowos suhfallac kac.”
Orekma lasr in konwacack engan inmahsrlon ma upac lasr, kuht tuh muhlkuhnlah tuh muhtweng pa yohk srihpac in lwelah ma upac ingacn nuh ke ma wo lasr.
Tohkohsrahi Benjamin el tuh luti kuht in sislah ma luhn mwet luhngse facluh ac eklac “sie mwet luhlahlfongi ke iwaclah luhn Leum Kraist, ac [eklac] oacna sie tuhlihk srihsrihk, fihlpacp, fakpacp, mongfihsrwacsr, muhtweng, sesseslah ke luhngse, kena ahkostwen nuh ke ma nuhkwewa” (Mosiah 3:19).
Sapta 6 ke Preach My Gospel luti tuh ohiyac yohk luhn Kraist kuht kuh in etahi: “Muhtweng pa kuh in fahsr nuh ke sano, ma upac, ma lain, kuh kweok ac tiac kasrkuhsrak, ahngyahng, kuh fosrngah. Pa kuh in oruh kena luhn God ac eis pacl Lal. Ke kowos muhtweng, kowos fokoko ye ma upac ac kuh in sun ma upac ke mihs ac finsrak” (Preach My Gospel: A Guide to Missionary Service, rev. ed. [2019], 126).
Orekma suwohs luhn muhtweng kuh in ahkkahlwemyeyuck sin moul luhn sie sin mwet tuhma lutlut luhn Kraist, Simon mwet Canaan. Mwet Zealot pa un mwet Jew suc lain ke fokoko srohoh luhn Mwet Rome. Orekma luhn Mwet Zealot kwacfe ke acnwuck lain Mwet Rome, Mwet Jew suc kahsrwelos, ac Sadducees ke pihsrwaclah kuhfa ac suk mukwikwi sahyac in kahsruh orekma lalos (liye Encyclopedia Britannica, “Zealot,” britannica.com). Simon Mwet Canaan tuh sie Mwet Zealot (liye Luke 6:15). Motko Simon el tuh srihke in oruh Mwet Lahngo in sruhkwack mwe mweun, kol un mwet mweun se, ac oruh fohs ac Jerusalem. Jisus El luti:
“Insewowo elos suc fakpacp, tuh elos fah usrui facluh. …
“Insewowo elos suc pahkomuhta, tuh elos fah eis pahkomuhta. …
“Insewowo elos nuhkwewa suc ahkiwe mwet uh, tuh elos fah pahngpahng tuhlihk nuhtin God” (Matthew 5:5, 7, 9).
Pwacye tuh Simon el tuh luhngse ac kwacfe ke facsin lal ke oaru ac insacnweacng, tuh ma suhmuhslah fahk muh ke ohiyac ac srihkasrak luhn Mwet Lahngo, eklac lohacng lal. Fahsr lal tukun Kraist tuhkuh nuh ke infulwen moul lal.
Ke kuht oraclah ac karihngihn olwelah yurun God, Mwet Lahngo kuh in kahsruh kuht in “sifilpac isuslac; ahok, isuslac sin God, ekuhllah moul in ikoac lalos ac moul in puhtatlac, nuh ke sie moul suwohswohs, iweyucklac sin God, eklac wen ac acn nahtuhl” (Mosiah 27:25).
Sin orekma fokoko luhn facsin, alu, ac kafucrmacn ke lwen lasr, lwelah mwet tuhma lutlut luhn Jisus Kraist enenuh in ip yohk ac fokoko lasr. “Tuh ke acn mwe kahsruhp lom oan oasr we an, insiom fah oasr pac we” (Matthew 6:21). Lwelah kuht in tiac muhlkuhnlah tuh finne tukun mwet tuhma lutlut luhlahlfongi tuh “oru ma lungse lun God,” elos “[tuh] enenu in muteng” (Hebrews 10:36).
Oacna ke srihkeyacn luhlahlfongi lasr orekmakihn muhtweng, ke kuht orekmakihn muhtweng, luhlahlfongi lasr yohkwelihk. Ke yohkwelihk luhlahlfongi lasr, engan lasr yohkwelihk pac.
Mahs se tari ac, tuhlihk muhtwacn ahkluo se nahtuhsr, Emma, oacna misinacri pucs ke Alu uh, enenuh in muhta sefannalac. Misinacri puhkantwen fohlohk nuh lohm selos. Misinacri puhkantwen sano pakpuck sasuc. Pucs tiac eis mwe insewowo luhn tempuhl lalos met liki elos som nuh ke acn in orekma lalos. Kuloh, elder ac tahmtahel. Kuht luhngse kowos.
Emma ac tahmtahel suc weluhl fin acn Netherlands srihkeyuck ke wik met ingacn—tuhngyak kuhtuh pacl. Oasr pacl srihsrihk in ohsun nuh sin mwet ac som lihkihn lohm selos, luhlahlfongi lal Emma nuh sin Leum yohkwelihk. Kuht pruhe kacl ke internet ac siyuck tuh kuht in kahsruh fuhkah. El siyuck sesr in ohsun nuh sin mwet suc el luti ke internet!
Sucu lasr muhtwacwacack in ohsun ke internet, sie sin sie, ke kawuck luhn Emma fin acn Netherlands. Kuht solwaclos in wi Fahsruh, Fahsr Tukuk lasr ma kuht oruh ke sucu lasr wik nuhkwewa. Floor, Laura, Renske, Freek, Benjamin, Stal, ac Muhammad nuhkwewa pa kawuck lasr ingena. Kuhtuh sin kawuck lasr luhn Netherlands tuh ilyak “ke motonoac ohsrihksrihk” (3 Nephi 14:13). Mwet sahyac kolyuck nuh ke “suwohswohsiyacn inkacnek uh, ac ohsrihksrihkiyacn muhtuhnpot uh, ma elos fah ilyak kac” (2 Nephi 31:9). Elos pa tamuhlwel ac tahmtahel wiyacsr ke Kraist. Kais sie wik kuht “oakla mu ma inge mwe insewowo” ke kuht tuhkweni orekma ke fahsr lasr ke inkacnek in olwelah.
Kuht “lwelah muhtweng in oasr orekma suwohs lal” (James 1:4) ke kuht tiac kuh in ohsun ke mahno oacna sucu in ward lasr ke kihtihn pacl. Tuh ke kuht oacklah muh ma inge mwe insewowo luhlahlfongi luhn sucu lasr ma yohkwelihk nuh ke kuhpahsr ke technology ac Fahsruh, Fahsr Tukuk lutlut luhn Puk luhn Mormon.
Prestuhn Russell M. Nelson el tuh olwelah, “Oruh suwos lom ke orekma se inge—finne ke pacl s inge ke kom ac fah puhla kom tiacna kuh in ahkfalye pwacye—ac fah eklac moul lom, ac ke sucu lom, ac facluh” (“Go Forward in Faith,” Liahona, Mei 2020, 114).
Acn se ma kuht oraclah olwelah muhtahl yurun God—tempuhl—kauli ke kihtihn pacl. Acn se ma kuht karihngihn olwelah yurun God—lohm—ikacklah! Oasr pacl lasr lohm ah in lutlut ac motko kahtoiyacn olwelah luhn tempuhl. Finne kuht tiac kuh in ilyak nuh ke ac muhtahl sacn, “insiacsr … fah engankihn yohk ke ma tuhkuh sin mwe insewowo ma fah ukwiyucklac” (liye Doctrine and Covenants 110:9).
Wacngihnlac orekma luhn mwet puhkantwen; ma wo wacngihnlac nuh sin sahyac. Kuht engan, tuhsruhk, weluhl Prestuhn Nelson, suc tuhfahna fahk: “Mwe sang tiac siyuck se tuhkuh sin mempucr tuh yohkwelihk, oacna mwe sang in kahsruh muhtuhn facl suc sun ma upac. … Kuht ac tuhkweni kuhtanglah pacl upac inge. Leum El ac ahkinsewowoye kom ke kom kalweni in ahkinsewowoye mwet sahyac” (Russell M. Nelson’s Facebook page, post ke Ohkohs 16, 2020, facebook.com/russell.m.nelson).
“Nimet sangeng” pa masap sin Leum, tiac in sahngweng (Matthew 14:27).
Kuhtuh pacl kuht semuhtweng ke kuht nuhnkuh muh kuht “oruh ma nuhkwewa wo” ac tiac eis mwe insewowo ma kuht luhngse. Enoch el fahsr yurun God ke yac 365 met liki el ac mwet lal eisyuck nuh inkuhsrao. Yac tolfoko onngoul ohnkohsr in srihke in oruh ma nuhkwewa wo, ac na sikyak! (Liye Doctrine and Covenants 107:49.)
Misac luhn tamuhlwel wiyuck Chad tuhkuh mahlwem luo tukun fuhlwelah lasr in kol Utah Ogden Mission. Ma usrnguck lah ke kuht moul fin acn Southern California, ke misin 417 ma kuht in pahngonyuck kac ke yac 2015, kuht pahngonyuck nuh ke northern Utah. Lohm in misin pa kahsruhsr stosah minit 30 nuh ke lohm sel Chad. Konwacyuck muh Chad el canceryak tukun kuht eis pahng in misin se lasr. Finne ke pacl upac emet, kuht etuh tuh Pahpah Inkuhsrao El liyekuhtyang ac kahsruh kuht konwacack engan.
Nga ahkloh ke kuh molwelah, ahkmuhtahlye, ahkpuhsisaclye, ac engan luhn Mwet Lahngo Jisus Kraist. Nga ahkloh tuh ke kuht pruhe nuh sin Pahpah Inkuhsrao ke inen Jisus, El ac topuk kuht. Nga ahkloh tuh ke kuht lohng, porongo, ac ukwe puhsrwen Leum ac mwet pahluh moul Lal, Prestuhn Russell M. Nelson, kuht kuh in “lwelah muhtweng in oasr orekma suwohs lal” ac “oakla mu ma inge mwe insewowo.” Ke inen Jisus Kraist, amen.