Ahkkweyelah Kuh luhn Jisus Kraist
Ke kuht tuhkuh nuh yurun Kraist ke kuht oruh luhlahlfongi lasr in El, auliyak, ac oruh ac sruokyac na wuhlweacng, muhkahlkahluh lasr uh—oacna sie srihpac oruh ohingacn an—kuh in ahkkweyeyucklac.
Ke muhtwacwacackiyacn yac se inge, kuht mukwikwi ke ma sikyak puhs ma tiac plwacniyuck. Ke oasr misac ac wacngihnlac mani ke srihpen mas upac ma sikyak fin facluh nohfohn arulacna mokleack acn nuhkwewa ac kasrpen acn nuhkwewa fin facluh.
Kusrusr, e, ac sronot ke kain in acn fin facluh, oacyacpac ongaiyac sahyac ke weather uh, oruh mwet uh puhlakihn lah wacngihn ma elos kuh in oruh in kahsruh, wacngihn finsrak, ac inse muhsahl, motko fin moul lalos uh ac oacna met ah.
Lwelah ngan sruhmuhn nuh sum sie sramsram keik sifacna ke muhkahlkahluh.
Ke tuhlihk nahtuhsr ah srihk ah, elos sulaclah muh elos ke lutlut sritacl ohkohn. Mukul tuhmuhk ah, Rudy, ac nga kena sang ma wowo se inge nuh sin tuhlihk nahtuhsr uh. Kuht tiac kuh in molwelah sie ohkohn sasuc ah, oruh Rudy el muhtwacwacack in suk sie ma ah.
Ke yac nuh ke Kristmas, el oruh kuht nohfohn lut ke ohkohn se, ke yac nuh ke yac tohkoh ah, tuhlihk nahtuhsr ah lotwelah in sritacl.
Ke tuhlihk mukul nahtuhsr elos mahtuhlah ac som liki lohm ah, ohkohn mah sac an na tuhs, pwacnwacng kuht kuhkwackuhnlah. Yac puh somlah, ac kuht sefiyac kuhtuh mani ah. Sie lwen ah Rudy el fahk, “Nga nuhnkuh muh pacl pac na kuht in molwelah sie ohkohn sasuc ah.”
Nga siyuck, “Efuh tuh kuht in molwelah sie ohkohn sasuc ah, ke nga kom tuhkweni tiacna sritacl kac?”
El fahk, “O, tuhsruhk kuht kuh in eis sie ohkohn ma kuh in sifacna sritacl ah! Orekmakihn iPad se, kom kuh in programiyac ohkohn an in sritaclkihn puhs liki on 4,000, weacng on in alu, on luhn Tabernacle choir, on ke U luhn Tuhlihk Srihsrihk, ac puhs pac sahyac.“
Rudy el mwet na wo ke kuhka uh, in fahk srihsrihk na.
Kuht molwelah ohkohn sasuc kahto se, ac lwen ekahsr tohkoh ah, mukul yohk, fokoko luo us tuhkuh nuh lohm sesr ah.
I ahkkahlwemye nuh selos in fihliyac oyac na nga mawot nuh lacah.
Ohkohn baby grand toasr se, ac in oruh in kuh in tihlyang ke sruhnguhl ah, elos eislah niyac ah ac furohklah nuh ke lacyacn ohsrihksrihk la ah ac likiyac fin mwe pahtpaht se ma elos us tuhkuh.
Lohm se sesr ah an fin acn lallal se, ac koluk ohiyac met na ke lwen sac tuh snow, oruh sroksrok ac puhsrahksrahk. Kuh kom in liye lah meac ac sikyak?
Ke mukul ekahsr ah pahtok ohkohn sac nuh lucng ke acn lallal sac, sihrihrlac, ac nga lohngwack puhsra luhlahp se. Ohkohn sac puhtatlac liki mwe pahtpaht sac ac srihfacllah upac infohk ah oruh oraclah luhf luhlahp se fin mah ah.
Nga fahk, “We, kuh sel. Kom wona?”
Kuloh lah kwewa mukul ah wona.
Muhtahlos sracsraclihk ke elos angwetwacni ah, na elos ngwetma nuh sihk ac fahk, “Sislah koluk lasr. Kuht ac fohlohkohnlah nuh ke stoh ah ac manager se lasr ah ac fah pahngon kom.
Tiac paht tohkoh na manager sac sramsram nuh sel Rudy in sackuhnlah in use sie ohkohn sasuc ah. Rudy el kuhlwacng ac nuhnakmuhnahs ac fahk nuh sin manager sac lah wona elos fin oraclah in wolac ma muhsahllah kac ah ac fohlohkohnma ohkohn sacpacna, tuhsruhk manager sac kwacfeacng na in use sie ma sasuc ah.
Rudy el topuk, fahk, “Tiac kuh in muhsahllah upac. Oraclah in wolac na us tuhkuh.”
Manager sac fahk, “Sahk kac uh kaptwelihk, ac pacl se na ma sahk kac uh kaptwelihk uh, puhsra uh eklac. Kom ac eis sie ohkohn sasuc ah.”
Tahmtahel ac tamuhlwel, yac kuht nuhkwewa tiac oacna ohkohn se inge, kaptwelihk kuhtuhsrihsrihk, srasrwelihk, ac muhsahllah, puhlakihn muh kuht ac fah tiac sifilpac oacna met ah? Tuhsruhk, ke kuht tuhkuh nuh yurun Jisus Kraist ke luhlahlfongi in El, auliyak, ac oruh ac liyacacng wuhlweacng, muhsahllah lasr uh—oacna sie ma oraclah—kuh in unweyucklac. Ohiyac se inge, ma suli unweyuck fokoko luhn Mwet Lahngo nuh in moul lasr, tiac ahksasucye kuht lac oacna met ah tuhsruhktuh ac oraclah kuht wolac liki met ah. Nga etuh lah kacn Mwet Lahngo lasr, Jisus Kraist, kuht nuhkwewa kuh in ahkwoyeyucklac, sifilpac fohnlah, ac oraclah srihpac lasr, oacna sie ohkohn sasuc ma kahto puhsra ah.
Prestuhn Russell M. Nelson el luti lah: “Ke pacl upac uh tuhkuh sun kuht, pa inge pacl se kuht in ahkyohkye luhlahlfongi lasr in God, in orekma upac, ac in kuhlwacnsuhpuh mwet sahyac. Na El ac fah unwelah inse muhsahllah lasr uh. El ac fah use nuh sesr kais sie in mihs ac ahkwoyeyuck. Mwe sang wowo ingacn ac fah tiacna kuhnausyeyucklac, finne ke misac.” 1
Jisus El fahk:
“Fahsru nu yuruk, kowos su orekma ac totola, tuh nga fah sot mongla nu suwos.
“Eis srenenu luk nu fowos ac lutlut sik, tuh nga fakpap ac inse pusisel; ac kowos fah konauk mongla.
“Tuh srenenu luk fisrasr, ac mwe utuk luk mulala.” (Matthew 11:28–30).
Unwelah muhsahllah lom an ke kom tuhkuh nuh Yohrohl, kuht enenuh in luhlahlfongi Jisus Kraist. “Kalmacn luhlahlfongi Jisus Kraist pa in fungyang na nuh Sel—luhlahlfongi ke kuh ma pahtpaht Lal … ac luhngse [Lal]. Ma inge weacng in luhlahlfongi ke luti Lal. Kalmac pa in luhlahlfongi lah finne kuht tiacna kahlwem ke ma nuhkwewa, El kahlwem kac. Ke srihpen El puhlakihn nohfohn kweok, ongaiyac, ac muhnahs lasr, El etuh in kahsre kuht fuhkah in tuyak liki ma upac lasr ke pengana lwen.” 2
Ke kuht tuhkuh nuh Yohrohl, kuht kuh in sesseslah ke engan, mislac, ac ahkwoyeyuck. Ma nuhkwewa ma [upac ac ekahk] ke moul uh kuh in ahkpwacyeiyeyucklac ke Iwaclah luhn Jisus Kraist. 3 El use kahs in kahsre kuht in ngwet nuh Yohrohl ke nuhnak nuhkwewa; in tiac ahlohloh, tiac sahngweng (liye Doctrine and Covenants 6:36).
Ke Puk luhn Mormon ke Alma ac mwet lal ah tuh kuhracnna isyucki ke ma toasr ma fihliyucki faclos, mwet uh kwacfe in moliyucklac. Leum El tiacna eislah ma toasr lalos; tuhsruhk tuh El wuhlweacng nuh selos:
“Ac Nga fah oacyacpac ahkmuhlahlahye ma toasr ma oan fin finpusowos, tuh kowos tiac kuh in puhlakihn ke fintukuwos, ke kowos oasr in srohoh uh; ac ma se inge Nga fah oruh tuh kowos in tu oacna mwet loh Keik fahlac, ac tuh kowos in etuh na pwacye lah Nga, Leum God, muhtwacta nuh yurun mwet Luhk ke kweok lalos.
“Ac tukun ma inge tuh ma toasr ma likiyucki facl Alma ac mwet wiyacl ac muhlahlahi; ahok, Leum El ahkkweyelos tuh elos in akacsruhi tuh ma toasr lalos in fihsrwacsr, ac elos oruh ke engan ac ke muhtweng nuh ke luhngse nuhkwewa luhn Leum” (Mosiah 24:14–15).
Ke kuh luhn Mwet Lahngo in unwelah ac ahkmuhlahlahye ma toasr, Elder Tad R. Callister el luti lah:
“Sie sin mwet insewowo luhn Iwaclah pa tuh kuht kuh in eis ke kuh in kahsruh luhn Mwet Lahngo. Isaiah el sikalweni na in sramsramkihn mokleyuck in ahkkweye ac ahkmihsye luhn Leum. El fahkwack lah Mwet Lahngo pa sie ‘kulana [nuh sin] mwet sukasrup … in pal in ongoiya, [sie] acn in wikla ke pacl in paka, ac acn lul ke pacl fol’ (Isaiah 25:4). A nuh selos suc ahsor, Isaiah el fahk lah Mwet Lahngo El sruok kuh in ‘akwoyalos nukewa su asor’ (Isaiah 61:2), ac ‘eela sroninmuta liki mutun mwet nukewa’ (Isaiah 25:8; liye pac Fwackyuk 7:17); ‘aksasuye lulalfongi ac finsrak lalos’ (Isaiah 57:15); ac ‘akkeyala insien mwet su munasla finsrak la’ (Isaiah 61:1; liye pac Luke 4:18; Psalm 147:3). Arulacna yohk kuh in kahsruh Lal oruh El kuh in ahollah ‘in engan ac insewowo, ac tia asor, Tuh elos in onkakin soko on in kaksak ac tia on in asor’ (Isaiah 61:3).
We, finsrak fuhkah tuhkuh ke wuhlweacng ingacn! … Nguhn Lal ahkkweye; ahksasucye; ahkwoye; mongngweack moul sasuc nuh ke insiac ma wacngihnlac finsrak la. Oasr kuh la in ekuhllah ma nuhkwewa ma sifucng ac suhlallacl ac wacngihn srihpac ke moul uh nuh ke sie ma arulacna kahto ac wolacna. Oasr kuh Lal in ekuhllah mulut luhn moul suhkawihl nuh ke wolacna luhn moul ma pahtpaht.” 4
Nga fahkwack lah Jisus Kraist pa Mwet Lahngo luhngseyuck lasr, Mwet in Molwelah lasr Mwet in Ahkkweyelah, ac kawuck oaru lasr. Kuht fin forlah nuh Yohrohl, El ac fah unwekuhtlac ac ahkkweyekuhtlac. Nga fahkwack lah pa inge Alu Lal ac El ahkolah in sifilpac fohlohk in kol ke kuh ac wolacna fin facl se inge. Ke inen Jisus Kraist, amen.