Kowos in Puhlaik Na
Luhlahlfongi kuh lasr ke mwe luti ke wosasuc fohlohkihnyuckyak luhn Jisus Kraist uh kol falkacsr ac use nuh sesr engan.
Ke lwen sahflah ekahsr ke moul in suhkawihl Lal, Jisus Kraist El fahk nuh sin Mwet Tuhma Lutlut Lal ke kweok ac ma upac ma elos ac kweok kac. 1 El ahksahfye ke kahs in ahkkweye yohk se inge: “Ke kowos muta faclu kowos ac keok. Tusruktu kowos in pulaik na! Nga kutangla falu tari!” (John 16:33). Pa ingacn sap se luhn Mwet Lahngo nuh sesr kwewa sin tuhlihk nuhtin Pahpah Lucng. Pa ingacn pweng se ma wo emet nuh sesr kais sie ke moul suhkawihl lasr uh.
“Kowos in pulaik na” pa sie pac kahs in ahkkweye fin facluh ma Kraist suc sifilpac moulyak El tuh suhpwaclah nuh sin Mwet Sap Lal. “Pacl puspis akkeokyeyuk kut,” Mwet Sap Paul el fahk tok nuh sin mwet Corinth, “tusruktu kut tiana kunausyukla; kutu pacl uh kut alolo, tusruktu kut tiana fuhleak; kalyeiyuk kut, a kut tiana mukaimtalla; ac finne anwuk kut, kut tia misa” (Luo Corinth 4:8–9).
Lusen yac tausin luo tohkoh “pacl puspis akkeokyeyuk kut,” ac kuht enenuh pac pweng sepacna ingacn ma in kuht in tiacna fuhlweack tuhsruhk in puhlaik na. Leum El luhngse ac fosrngah sin acn sacohk Nahtuhl. El etuh kena lowos, enenuh lowos, ac sahngweng lowos an. Leum El kuhlacna. Luhlahlfongel.
Mwet Pahluh Joseph Smith el tuh lutiyuck lah orekma, ac akwuck, ac srihpac luhn God tiac kuh in kohsrkohsrlah, tiac pac kuh in kutongyucki (Doctrine and Covenants 3:1). Nuh sin tuhlihk tihkuclkucl Nahtuhl, Leum El acse mwe ahkkweye wowo inge:
Liye, pa inge olwelah luhn Leum nuh suwos, kowos suc mwet kuhlwacnsap Lal.
Ohinge, kowos in puhlaik na, ac nimet sahngweng, tuh Leum El wi kowos, ac El ac fah tu siskowos; ac kowos fah mwet lohoh Kacl, Jisus Kraist, lah El pa Wen nuhtin God suc moul (Liye Doctrine and Covenants 68:5–6).
Leum El tu siskacsr, ac El fahk lah:
Ma El fahk nuh sin sie mwet El fahk nuh sin mwet nuhkwewa, kowos in puhlik na, tuhlihk srihsrihk; tuh El oasr inmahsrlowos, ac Elac tiac som liki kowos (Liye Doctrine and Covenants 61:36).
Tuh tukun kweok yohk, mwe insewowo ac tuhkuh (Liye Doctrine and Covenants 58:4).
Tahmtahel, nga fahkwack lah olweacng inge, utuckuh ke pacl in ahkkweok ac ongaiyac nuh sin kais sie mwet, fal pac nuh sin kais sie suwos ke ongaiyac kowos oasr misenge. Ma inge sacohk ac ahkacsmakihnye kais sie sesr in puhlaik na ac in engan ke fohnlah luhn wosasuc ke kuht fahsr na nuh met ke ma upac luhn moul suhkawihl.
Kweok ac ongaiyac uh oacna sie ke ma puhlakihnyuck ke moul suhkawihl uh. Kihsruhngyacn ma uh pa sie ip yohk srihpac ke plwacn muhtahl in kahsre kuht in kapkapwack, 2 ac ke inmahsrlon akwuck se ingacn, God El ahkkweye kuht tuh, ke kuht ngwetlah pacl nuh ke pacl wacngihn sahflahiyac, kihsruhngyacn ma uh ac fah tiac lwelah in kuhtangkuhtlac. Ke kahsruh Lal ac ke luhlahlfongi ac muhtweng lasr, kuht ac fah kuhtanglah. Oacna moul suhkawihl ma kowos oasr kac, ma kweok nuhkwewa uh ma na nuh ke kihtin pacl. Ke fohs ma tuhkuh met liki sie mweun kuhnaustwen uh, Prestuhn luhn acn United States Abraham Lincoln el suhmaht in ahkacsmakihnye kuht ke kahs suhmaht ke pacl mahtuh omeet ah lah “ma se inge, pac ac, fah wacngihnlac.” 3
Oacna etuh lom, ongaiyac luhn moul suhkawihl ma nga sramsramkihn uh—ma oruh upac in puhlaik na—kuhtuh pacl uh ac tuhkuh nuh yohrohsr wi mwet pucspucs sahyac, oacna nuh ke pihsen mwet million ekahsr ma suc kweoklacna ke kuhtuh sin ma ongaiyac pucspucs ma tuhkuh ke mas upac se COVID-19 uh. Oacpacna, fin acn United States mwet million ekahsr kweoklacna ke sie lusen pacl in sruhnga ac fohs ma kwacna sikyak ke pacl in vote luhn prestuhn tuhsruhk pacl se inge pa kuht suc mahtuh emet inmahsrlosr uh kuh in esam muh pa upac emet uh.
Ke ohiyacn sie mwet, kais sie sesr tihkuclkucl ke kuhtuh sin ongaiyac pucspucs ke moul suhkawihl, suc oacna kwacoh, sol mwet, muhnahs in mahno, tilac orekma kuh suhpwacrlac ke orekma la, tuhlihk lihkkeke, macruht koluk kuh tiac macruht, ac mwacta luhn ma koluk—lasr sifacna kuh luhn mwet sahyac.
Tuhsruhk, ke inmahsrlon ma inge nuhkwewa, oasr yohrohsr kahs in kahsr inkuhsrao me in puhlaik na ac in suk engan ke ip yohk ac olweacng luhn wosasuc ac ke fahko luhn orekma lasr uh. 4 Kahs in kahsruh ingacn kwacna kahsreacng, nuh sin mwet pahluh ac nuh sesr nuhkwewa. Kuht etuh ma se inge ke ma sikyak nuh selos suc tuhkuh met liki kuht ac ma suc Leum El fahk nuh selos.
Esam ma sikyak kacl Mwet Pahluh Joseph Smith. Liyeyuck ke ma siiyac na ongaiyac uh, moul lal uh pa sie moul in kwacoh, kalyeiyuck, kohs, ahsor sucu uh, ac sahflahiyac ah acnwucki. Ke el kweok ke el muhta in srohoh, muhtwacn kiyacl ah ac tuhlihk nahtuhl ah ac Mwet Luhlahlfongi sahyac ah tuh kweoklacna ke ma na upac ke elos tuh lihsyucklac liki acn Missouri.
Ke Joseph el tuh kwacfe in loangweyucklac ah, Leum El topuk:
Muh wen Nuhtihk, mislac nuh in nguhnum; ma upac lom ac mwe kweok lom ac fah ma na nuh ke kihtin pacl;
Ac na, fin kom muhtwacnglah, God El fah sruhkkomyak nuh lucng; kom fah kuhtanglah mwe lokoalok lom nuhkwewa (liye Doctrine and Covenants 121:7–8).
Pa inge kahs in kahsruh ma pahtpaht nuh sin kais sie mwet ma tuh kahsrwel Mwet Pahluh Joseph in sruokyac na ohiyacn engan lal ac luhngse ac inse pwacye luhn mwet lal. Oihyac pac na ingacn ahkkweye mwet kol ac mwet pioneer suc fahsr tohkoh ac kuh in ahkkweyekomlac pac.
Motko ke mempuhr ke pacl met ah! Sifilpac ac sifilpac na, elos tuh lihsyucklac liki acn nuh ke acn. Sahflahiyac elos sun ma upac ke elos akiyac lohm selos ac Alu uh ke acn mwesis 5 Yac luo tukun un mwet pioneer ekahsr tuh tuhkuh nuh infahlfahl Yohk Salt Lake, painmoul luhn mwet pioneer ke acn lokoalok ingacn tuh srack pac na muhnahs. Inkaiyacn mempuhr ah srackna oruh fuhfahsryucsr lalos nuh we kuh tihkuclkucl in eisacni ma enenweyuck elos in som. Tuhsruhk mwet kol ac mempuhr ah srackna finsrak ac puhlaik na.
Finne Mwet Luhlahlfongi ah soenna akwucki ke lohm sasuc selos ah, ke toeni luhlahp ke Ohktopa 1849 un misinacri sasuc se tuh suhpweyucklac nuh Scandinavia, France, Germany, Italy, ac South Pacific. 6 Ke ma ac nuhnkweyuck muh pa pacl suhpwacr emet lalos an, mwet pioneer ingacn tuyak in sun kunohkohn wolacna sasuc. Ac ke yac tolu tohkoh, mwet 98 pac tuh pahngyak in muhtwacwacack in oracni Israel fahsrwelihk uh. Sie sin mwet kol luhn Alu ah tuh ahkuhtweyac lah misin ingacn “yohkiyac na, ac tiac loeslac; sahp ke yac 3 nuh ke 7 pa lusen pacl ma kuhtwena mukul ac wacngihn yurun sucu lal an.” 7
Tahmtahel, Prestuhnsi Se Met elos elyah ke ma upac lowos an. Kuht luhngse kowos ac pruhe keiwos. Pacl sepacna inge, kuht kwacna sang kuloh lah ma upac nuh ke mahnosr uh—sahyacn na kusrusr luhn acn uh, e fihrihr, sronot, ac pahkah—uh fihsrwacsr liki ma mwet suc tuhkuh met liki kuht ah tuh sun.
Inmahsrlon ma upac uh, kahs in ahkkweye muhtahl uh pa kowos in puhlaik na, tuh Nga fah kol kowos. Tohkohsrahi sac ma lowos ac mwe insewowo kac ma lowos, ac ma kahsruhp ke ma pahtpaht ma lowos (liye Doctrine and Covenants 78:18). Ma inge sikyak fuhkah? Ma inge tuh sikyak fuhkah nuh sin mwet pioneer ah? Ma inge ac sikyak fuhkah misenge nuh sin muhtwacn luhlahlfongi God? Ke kuht fahsr tukun mwe kol palyeiyuck, motonoac nuh ke hell ac fah tiacna kuhtangkuhtlac, Leum El tuh fahk ke fwackyuck se ke Eprel 1830. Aok El fahk lah Leum God El ac eislah kuh luhn lohsr uh liki ye motowos, ac oruh inkuhsrao in kusrusr ke ma wo lowos ac wolacna ke Inel (liye Doctrine and Covenants 21:6). Nimet sahngweng, un sip srihsrihk; oruh in wo; lwelah facluh ac hell in tuhkweni lain kowos tuh kowos fin muhsahiyuckyak fin eot Luhk, elos tiac kuh in kuhtanglah (liye Doctrine and Covenants 6:34).
Ke olwelah luhn Leum, kuht sruhkwack insiacsr ac kaksak (Doctrine and Covenants 25:13), ac ke inse engan ac atacn pwacr (Doctrine and Covenants 59:15), kuht fahsr nuh met ke inkacnek luhn wuhlweacng. Inkaiyacsr tiacna sun sulaclah na yohk, ma oacna som liki lohm sesr an in mwet fuhfahsryucsr sasuc nuh ke acn kuht tiac etuh kac. Sulaclah lasr uh kwacna ma ke ohiyacn moul lasr pengana lwen, tuhsruhk oacna ke Leum El fahk nuh sesr in tiac tohtohlah in oruh wo, tuh kowos likiyac pwelucng ke orekma yohk se inge. Ac ke ma srihk uh oasr ma yohk tuhkuh (liye Doctrine and Covenants 64:33).
Oasr kuh yohk ke mwe luti luhn wosasuc fohlohkihnyuckyak luhn Jisus Kraist. Luhlahlfongi kuh lasr ke mwe luti ingacn kol falkacsr ac acse engan nuh sesr. Ma inge use kahlwem nuh ke nuhnak lasr uh ac acse kuh ac puhlaik ke mukwikwi lasr uh. Mwe kolyuck ac ahkkahlwemye ac kuh se inge pa mwe sang uliyuck ma kuht tuh eis sin Pahpah Tuhmasr Inkuhsrao. Ke kuht kahlwem kac ac oruh moul lasr uh in ukwe mwe luti ingacn, weacng mwe sang muhtahl luhn auliyak, kuht kuh in puhlaik ke kuht muhta na ke inkacnek nuh ke moul ma pahtpaht lasr—sifilpac ohsun ac enganwack yurun ninac ac pahpah luhngseyuck tuhmwacsr inkuhsrao.
Sahp kowos sun ma upac yohk, Elder Richard G. Scott el luti. “Kuhtuh pacl uh ma inge arulacna fusus, tiac tui in sikyak, oruh kowos kuh in puhlakihn muh ma inge upaclaclac nuh sum in kuhtanglah. Nimet kom muhkwena foracng siiyac facluh. ‘Luhlahlfongi LEUM GOD ke insiom kwewa. Nimet luhlahlfongi etuh lom sifacna’ [Soakas 3:5]. … Ma na orek tuh moul uh in upac, tiac ma oruh tuh kom in puhtatlac, tuhsruhk tuh kom in kuh in kuhtanglah.” 8
Ma inge nuhkwewa pa ip ke plwacn luhn God suc Pahpah ac Wen Nahtuhl, Jisus Kraist, suc nga fahkwack kac, ke nga pruhe tuh kuht in ahkwot nuh met nuh ke acn sesr inkuhsrao, ke inen Jisus Kraist, amen.