Kowos in Soano ac Pre Pacl Nukewa
Mihsenge nga lihksrweni pweng se luhk in pruhe ke mwet nuhkwewa sin muhtuhn facl nuhkwewa fin facluh.
Tamuhlwel ac tahmtahel sacohk wiyuck, ke wik sahflah orekma moul Lal, Jisus El luti Mwet tuhma lutlut lal in “kowos in soano ac pre pacl nukewa, tuh kowos in ku in lainla ma ingo nukewa ma ac sikyak, ac kowos fah ku in tu ye mutun Wen nutin Mwet.”1
Ke “ma in nuna sikyak” met liki Sifil Fohlohk Ahk Luo Lal pa “pusren mweun yen apkuran, … fah lain sie sin sie. Ac fah oasr sracl lulap ac kusrusr in acn nukewa.”2
Ke Doctrine and Covenants, Mwet Lahngo El fahk lah Ma nuhkwewa fohswackyak; tuh sahngweng fah puhtati fin mwet nuhkwewa.3
Pwacyena, kuht moul ke pacl tuh ma nuhkwewa fohsack. Puhslac mwet sahngweng nuh ke ma tok, ac puhslac insiyac forlah liki luhlahlfongi lalos ke God ac Wen Nahtuhl, Jisus Kraist.
Pweng an sramsram ke ma mweun. Kuhnaoslah luhn ma wo sihmyak ke internet. Inkuclyuck, lohm alu, ac kain in acn in alu pucspucs kuhnausyucklac.
Pandemic fin facluh an fahsrwelihk nuh ke acn nuhkwewa—mwet million masack, yohk liki mwet million misac. Ahkfuhlwactye in ahksahfye lutlut, kaksak in alu, pahyuck, orekma luhn misinacri, ac kain in mukwikwi puhkantwen ke moul uh kweok. Wi pacna, mwet pucspucs tuh mwesahs ac tu muhta na.
Ma luhn mani orek ma upac nuh sin mwet pucspucs, pwacyena nuh selos sin tuhlihk nuhtin Pahpah tuhmasr Inkuhsrao.
Kuht ngwetngwet mwet ma orekma kuh sukohsohk in sulaclah in kahskahs lain, ac mwet oracni muhlat ac mukwikwi ohkahrkahr.
Ke pacl sefanna, kuht kampare in liye kain in akuhkuhin puhs fin facluh nohfohn.
Nga nuhnkuh ke pacl kuhtuh nuh sin mwet kweok, sensen, ahsor, kuh puhla in sefanna. Nga ahkweye kais sie suwos lah Leum El etuh kom, lah El akihlen sensen ac kweok lom, ac lah El luhngse kom—pacl sa ac sum sifacna, yohk ac ne tok.
Kais sie fong nga pruhe, nga siyuck sin Leum in ahkinsewowoye mwet nuh kwewa suc puhla toasr ke ma upac, kweok, sifacna, ac ahsor. Nga etuh lah mwet kol sahyac luhn Alu wi pac ke pruhe se. Insiacsr, sifacna ac tuhkweni, fahsrwelihk nuh suwos, ac pruhe lasr nuh sin God keim.
Nga eis lwen ekahsr yac se tari ah ke acn mahtuh ke Merike ac Alu fin acn ke Merike pahngpahng northeastern, wiwina toeni yurin misinacri ac mempucr an, ac muhtwacta yurin mwet kol luhn kafucrmacn ac orekma.
Ke Sacnri, Ohktohpa 20, nga sramsram muh sin tuhkweni luhlahp fin acn Boston, Massachusetts. Ke nga sramsram ah, Nga puhlakihn in fahk, “Nga kaifwe kom … in pruhe ke muhtuhn facl se inge, ke mwet kol lasr, ke mwet lasr, ac ke sucu ma moul fin acn muhtuhn facl yohk se inge ma akiyac sin God.”4
Nga oacyacpac fahk la acn Merike ac kuhtuh acn sahyac fin facluh, oacna ke pacl met, oasr ke inkacnek yohk srihpac sac ac enenuh pruhe lasr.5
Suli luhk ah tiacna oasr ke sramsram ahkolah luhk. Kahs se inge tuhkuh nuh sihk ke nga puhla Nguhn El kaifwe nga in suli elos oasr we ah in pruhe ke muhtuhn faclos ac mwet kol lalos.
Mihsenge nga lihksrweni pweng se luhk in pruhe ke mwet nuhkwewa sin muhtuhn facl nuhkwewa fin facluh. El tiacna yohk srihpac ohiyac kom pruhe kuh nuh sin pruhe lom som, nuhnak muhnahs orekmakihn luhlahlfongi lom—finne ohiyacn luhlahlfongi oacna sie—ac pruhe ke muhtuhn facl lom ac mwet kol luhn kafucrmacn lom an. Oacna ke nga fahkwack ke Ohktohpa tari se ah fin acn Massachusetts, kuht tu mihsenge in inkacnek yohk srihpac ke pacl an, ac muhtuhnfacl fin facluh enenuh kolyuck ac kahsruh sin inkuhsrao an. Ma inge tiacna ke ma luhn politics kuh ma sap. Ma inge pa ma luhn mihs ac onwelah ma tuhkuh nuh sin mwet sifacna oacyacpac nuh sin nguhnin muhtuhnfacl—mura ac inkucl lalos—ma tuhkuh sin Tohkohsrah luhn Mihslac suc use onweyucklac, Leum Jisus Kraist.
Kac mahlwem ekahsr tuhfahna tari ah an nga eis puhla se ma tuhkuh nuh sihk ke ohiyac in kahsruh emet facluh ke pacl se inge pa in mwet nuhkwewa in ahkyohkye luhlahlfongi lalos nuh sin God ac foracng insiaclos nuh Sel ke pruhe pwacye an. Tuh in ahkinsepuhsisaclye kuht sifacna and suk moklweyuck luhn kuhsrao in kampare ac tulokihn ma yac muhtahsr pa ohiyac wowo emet in fahsr nuh met ke pacl na upac se inge.
Ma suhmuhslah sramsram yohk ke pruhe luhn Jisus oacyacpac mwe luti Lal ke pruhe ke orekma lal ke mahno. Kom ac esam Pruhe luhn Leum:
“Papa tumasr su inkusrao; Eelos oal pwaye;
“Tokosrai lalos tuku; Ma lungse lalos in orek fin faclu, ou elos oru inkusrao.
“Kite kut len se inge ma kuh mongo misenge.
“Ac nunak munas nu sesr ke ma koluk lasr, oana kut nunak munas nu sin mwet su orekma koluk nu sesr.
“Ac tia kol kut in mwel, a eiskutla liki ma koluk! Tuh Tokosrai lalos, ac ku, ac wolana ma pahtpat. Amen.”6
Pruhe se kahto inge, sulpac fahkwack fin alu luhn Kraist pucspucs, oruh fihsrwacsr ma kuht kuh in siyuck kac sin “Papa tumasr su inkusrao” nuh ke top ke ma upac lasr. Tuhsruhk, lwelah kuht in pruhe ke kolyuck muhtahl.
Nga suli kom in pruhe ke pacl nuhkwewa.7 Pruhe ke sucu lom an. Pruhe ke mwet kol luhn muhtuhn facl. Pruhe ke mwet muhtweng suc orekma ke mweun lasr uh liki ohiyacn mas social, environmental, political, ac biological ma masack mwet nuhkwewa fin facluh: kahsruhp ac suhkahsruhp, fuhsr ac mahtuh.
Mwet Lahngo El luti kuht in tiac eislah pruhe lasr nuh sin kuhtwena kain mwet uh. El pa fahk, “Luhngse mwet lokoalok lom, ahkinsewowoye elos suc kalyei kom, oruh wo nuh selos suc sruhngwac kom, ac pruhe kaclos suc ahklahlfonye kom ac kalyei kom.”8
Ke sahkseng soko fin acn Calvary, ke acn ma Jisus El misac ke ma koluk lasr uh, El orekmakihn ma El luti ke El pruhe, “Papa, nunak munas nu selos, tuh elos tia etu ma elos oru uh.”9
Pruhe pwacye nuh selos suc kuht nuhnkuh muh elos mwet lokoalok lasr ahkkahlwemye luhlahlfongi lasr lah God kuh in eklac insiacsr ac insiacn mwet sahyac. Pruhe se inge enenuh in ahkweye kuh lasr in oraclah kuhtwena eklac enenweyuck ke moul lasr, sucu, ac acn lasr.
Finne acn se kom muhta we an, kuh kahskahs lom, kuh ma upac kom puhla, God El lohng ac topuk pruhe lom ke Ohiyacl ac pacl Lal. Ke srihpen kuht pa tuhlihk Nahtuhl, kuht kuh in fahsr nuh sel in suk kahsruh, mihs, ac kena sasuc in oruh ma wo fin facluh.
Pruhe an ke nuhnuhnkuh wo, mihs, mwet suhkahsruhp, ac mwet mas tuh tiac fal kuhtuh pacl an. Tukun kuht sikuck muhtuhnte in pruhe, kuht enenuh in tuyak ac oruh ma nuhkwewa kuht kuh, in kahsruh—kuht in kahsruh kuht sifacna ac mwet sahyac.10
Ma suhmuhslah sihmlac ke srihkasrak wowo luhn mwet luhlahlfongi suc tuhkweni pruhe wi orekma in oraclah eklac se ke moul lalos sifacna ac ke moulin mwet sahyac. Ke Puk luhn Mormon, ke srihkasrak, kuht riti kacl Enos. Pa inge ahkuhtweyac lah “ke fuhs pucspucs ke puk fototo se inge ahkkahlwemye pruhe se kuh pruhe ekahsr, ac fuhs sahyac sramsram ke ma el oruh mweyen topuk el eislah.”11
Oasr srihkasrak lasr ke ohiyacn pruhe el orekmakihnyuck in oraclah eklac ke sramsram mahtuh luhn Alu lasr an, muhtwacwacackiyacn ke pruhe se met kahskahs lal Joseph Smith fin acn innimac siskacn lohm sin pahpah ac ninac kiyacl ke spring luhn yac 1820. In suk nuhnak muhnahs ac eis mwe kol luhn nguhn, pruhe luhn Joseph Smith ikacslah inkuhsrao. Mihsenge kuht insewowo ke Mwet Pahluh Joseph ac mukul ac muhtwacn Mwet Luhlahlfongi ke Lwen-sahflah sahyac suc pruhe in orekma in kahsruh akiyac Alu Luhn Jisus Kraist Luhn Mwet Luhlahlfongi ke Lwen-sahflah.
Nga nuhnkuh yohk ke pruhe luhn muhtwacn luhlahlfongi yohk oacna Mary Fielding Smith suc, ke kahsruh luhn God, oaru in kol sucu lal liki kweok yohk nuh ke acn mihs ke infahlfahl se inge, tuh oyac sucu lal ahkkweyeyuck ke nguhn ac mahno. Tukun pruhe pwacye ke el sikuckmuhtuhntei, na el orekma upac in kuhtanglah ma upac lal ac in ahkinsewowoye sucu lal.
Pruhe an fah sruhkwack kuht ac ahkfototoye kuht ke mwet sifacna, ke sucu, ke alu, ac ke facluh. Pruhe an fah mokle mwet science ac kahsruh elos in konwacack ono ma in ahksahfyelah mas luhn facluh se inge. Pruhe an fah karihngihn elos suc sucu lalos misac. El ac kol kuht in etuh ma kuht enenuh in oruh in karihngihn kuht sifacna.
Tamuhlwel ac tahmtahel, nga kaifwe kom in sulpac ahkkweye olwelah lom in pruhe. Nga kaifwe kom in pruhe ke kuhlaset an, ke fahsr ke lwen lom, ke lohm sum, ke ward lom, ac ke pacl nuhkwewa ke insiom.12
Sin mwet kol nuhkwewa ke Alu Luhn Jisus Kraist Luhn Mwet Luhlahlfongi ke Lwen-sahflah, nga tarilacna suwos ke pruhe lom kacsr. Nga suli kom in kampare pruhe an lah kuht in eis moklweyuck sin nguhn ac fahkwack in kol Alu an ke pacl upac se inge.
Pruhe kuh in eklac moul lasr sifacna. Ahkkweyeyucklac ke pruhe pwacye, kuht kuh in ahkwoye ac kahsruh mwet sahyac oacna sie.
Nga etuh kuh luhn pruhe ke oruh luhk sifacna. Pacl fototo ah nga oasr ke ohfuhs luhk muhkwena. Nga tuhfahna eis orekma srihsrihk ke pouk. El futun, swollen, ac ngal na upac. Ke nga muhtah ke desk luhk, nga tiac kuh in nuhnkuh suwos ke ma yohk srihpac mweyen nga nuhnkuh yohk ke ngal sac.
Nga sikuck muhtuhnte ac siyuck sin Leum in kahsreyuc in nuhnkuh suwos nga in ahksahfye orekma luhk. Nga tuyak ac fohlohk nuh ke pwepuh oasr ke desk soko. Finne ke pacl fototo, mihs ac nuhnak suwos tuhkuh ke insifuck, ac nga tuh kuh in ahksahfye orekma yohk srihpac yac muhtahsr.
Pacl se inge fin facluh ohkahrkahr kuh in ahksahngwengye kuht ke kuht nuhnkuh ke ma sikyak ac ma upac. Tuhsruhk pa inge luhlahlfongi luhk lah kuht fin pruhe ac siyuck sin Pahpah Inkuhsrao nuh ke mwe insewowo ac kolyuck enenweyuck, kuht ac tuhkuh in etuh ohiyac kuht kuh in ahkinsewowoye sucu lasr, mwet tuhlan lasr, acnlasr, ac muhtuhn facl yac kuht muhta we an.
Mwet Lango El pruhe na El “forfor in acn nukewa ac oru ma wo”13 in sang mongo nuh sin mwet suhkahsruhp, sang ahkkweye ac karihngihn nuh selos suc enenweyuck, ac sruhkwack ke luhngse, mihs, ac mihslac nuh sin mwet nuhkwewa suc ac tuhkuh nuh Yohrohl. El kampare in suk kacsr.
Nga suli mempucr nuhkwewa ke Alu an, oacyacpac mwet sahyac ac kawuck ke alu sahyac fin facluh nohfohn, in oruh oacna Mwet Lahngo El luti mwet tuhma lutlut Lal: “Soano ac pre pacl nukewa”14 ke mihs, ke ma wo, ac ke pacl in kuhlwacnsap sie sin sie.
Fuhkah woiyacn kuh luhn pruhe, ac fuhkah enenweyuck pruhe luhn luhlahlfongi lasr nuh sin God ac Wen Nahtuhl fin facluh mihsenge! Lwelah kuht in esam ac kuloh kuh luhn pruhe. Ke inen Jisus Kraist, amen.