Wona Sasuc Se
Nga suli kom in forlah insiom, nuhnak lom, ac nguhn lom yohk nuh sin Pahpah tuhmasr Inkuhsrao ac Wen Nahtuhl, Jisus Kraist.
Tamuhlwel ac tahmtahel sacohk wiyuck, lwen luo ke toeni luhlahp se inge arulacna wolacna! Nga insese sel Elder Jeffrey R. Holland. Oacna el fahk, sramsram, pruhe, ac on inge mokleyuck sin Leum. Nga kuloh nuh sin nohfohn ma wi ke kain in inkacnek nuhkwewa.
Ke pacl se ma inge sikyak ah, nga petsacikomlac ke nuhnak luhk uh ke kom lohng toeni se inge. Nga siyuck sel Leum in kahsreyuc in kahlwem ke ma kom puhla, elyah kac, kuh srihke in sokwack top nuh kac. Nga nuhnkuh lah meac nga ac fahk in kaliyac toeni se inge in suhpwekomlac ke nuhnak wowo ke pacl fahsruh uh ma nga etuh muh Leum El ke kom in puhla.
Kuht moul oasr ke puhluhn pacl na wolacna se, ma liyeyuck tari sin mwet pahluh ke yac siofok. Pa inge we se ma wacngihn mwe insewowo ke nguhn ac fah sruhuh nuh sin mwet suwohs nuhkwewa.1 Finne ke fohs luhn facl se inge,2 Leum Elac ke kuht in ngwet na nuh met nuh ke pacl fahsruh uh “ke pwacr.”3 Lwelah kuht in tiac furok wil nahtuhsr uh ke esam lasr ke ma sikyak ekweah. Fahsrweni luhn mwet Israel ac fahsr na nuh met. Leum Jisus Kraist El kol ma orek ke Alu lal, ac el fah ahkfahsryelah finsrak muhtahl lal.
Ma upac se nuh sum ac nuh sihk uh pa in in oruh kais sie sesr in ahkfahsryelah wolacnaiyacn kuhiyaclos. Misenge kuht kwacna lohng ke “wona sasuc se.” Fin kom arlac ke sruokyac wona sasuc se, Nga suli kom in furohklah insiom, nuhnak lom, ac nguhnum yohk na nuh sin Pahpah tuhmasr Inkuhsrao ac wen nahtuhl, Jisus Kraist. Lwelah in pa inge wona sasuc lom uh.
Sruokyac wona sasuc se lom ingacn ke auliyak lwen nuhkwewa. Suk in yohkwelihk nwacsnwacs ke nuhnak, kahs, ac orekma. Kahsruh mwet sahyac. Sruokyac ohiyacn ngwetngwet ma pahtpaht. Ahkyohkye ma kunom kuh pahng lom. Ac lah meac mwe upac lom, tamuhlwel ac tahmtahel sacohk wiyuck, moul ke kai sie lwen in muh kom ahkolah yohk in ohsun nuh sin mwet oraclah lom.4
Pa oruh oasr tempuhl uh. Akwuck luhn Leum ac olwelah lal ahkwekuht nuh ke moul ma pahtpaht, mwe ahkinsewowo se ma yohk emeet luhn God.5 Oacna ke kom etuh uh, fahsrwelihk luhn mas COVID se nuh fin facluh uh oruh enenuh in kauli tempuhl lasr uh ke kihtin pacl. Na kuht ahkfahsryelah ikacklah ahkwoyac se. Ke ohiyac ahkluo el ingena oasr ke tempuhl puhkantwen, tausin siyacnyacn elos siliyucki, ac tausin eis mwe sang muhtahl lalos ke tempuhl kena mahlwem ekahsr tari. Kuht rahrahlac nuhke lwen se ma nohfohn mempuhr suwohs ke Alu uh kuh in kahsruh mwet mahtuh lalos ac alu ke tempuhl muhtahl.
Na nga engan in ahkkahlwemye plwacn nuh ke tempuhl ohnkohsr sasuc in oreklac ke acn inge: Tarawa, Kiribati; Port Vila, Vanuatu; Lindon, Utah; Greater Guatemala City, Guatemala; São Paulo East, Brazil; ac Santa Cruz, Bolivia.
Ke kuht ac muhsahi ac liyacacng tempuhl inge uh, kuht pruhe tuh kais sie suwohs in muhsahi liyekomyang sifacna kom in muh suwohs in ilyak nuh ke tempuhl muhtahl.
Ingena, tamuhlwel ac tahmtahel sacohk wiyuck, nga ahkinsewowoye kom in sesseslah ke mislac luhn Leum Jisus Kraist. Mislac Lal El ahluhkwelah mwe kahlwem luhn moul se inge nuhkwewa.6 Nga ahkinsewowoye kom ke luhngse yohk ac kuh in ahkos masap luhn God. Nga olwelah muh fin kom oruh, kom ac ahkinsewowoyeyuck ke mwe insewowo kahkkahk, weacng puhlaik yohk, kapwack luhn fahkyuck lom sifacna, ac insese lun lohm sum, ac engan finne ke pacl tahfuh luo.
Lwelah kuht in tuhkweni fahsr nuh met in ahkfahsryelah mwe sap muhtahl lasr—in ahkwekuht sifacna ac facluh nuh ke Tuhkuh Ahkluo luhn Leum. Nga pruhe, ke luhngse luhk nuh sum, ke ine muhtahl lal Jisus Kraist, amen.