Mihslac, Tui

Ke tuhlihk nahtuhsr ah tuh srihk ah, sucu lasr ah tuh som lwen ekahsr ke inluhluh kahto se. Ke tahfuhn lwen tok ke sie lwen lah kuhtuh sin tuhlihk ah nokomwacng life jacket ah met liki elos ahtulac nuh inkof ah. Tuhlihk muhtwacn srihsrihk se emet nahtuhsr ah liye na ahlohloh, kahkahsrihk tuni tuhlihk wiyacl ah. El sang kuhiyacl in puhlaik, el fonosyac infwacl ke lwacpo lal ah na ahtulac. El sa na pihsryak ac fosrngahlah kuhtuhsrihsrihk puhsracl ke el salah, “Kahsreyuc! Kahsreyuc!”

Inge, el tiacna ongaiyac; life jacket se lal ah orekma, ac el pahtpaht wo na. Kuht kuh in kohllah na pahosr ac oluhlma nuh ke sohs ah arulacna fihsrwacsr. Tuhsruhk tuh ke liye lal uh, el enenuh kahsruh. Sahp, oacna ma ke mihsrihsr kof ah kuh ma ke sasuc nuh sel ma el puhlakihn inge. Ne ohinge, el fanyak nuh ke sohs ah, na kuht nokomuhllah ke tahol paho se ac kaksakuhnuhl ke puhlaik lal.

Finne kuht mahtuh kuh fuhsr, puhs sesr, ke pacl kuht fosrngah, kuht sasa fahk kahs ma oacna “Kahsreyuc!” “Moliyuclac!” kuh “Nuhnakmuhnahs, topuk pruhe luhk!”

Kain pacl se inge tuh sikyak nuh sin mwet tuhma lutlut lal Jisus ke moul in luti Lal fin facluh. Ke puk lal Mark kuht riti lah Jisus El “sifilpa luti sisken Lulu Galilee. Mwet puspis tukeni nu yorol we.”¹ Un mwet sac arulacna puhs oruh Jisus El “sroak nu fin soko oak”² ac muhta fac sramsram. Lwen fohn se El luti mwet ah ke puhpuhlyuck ke elos tu weacn uh.

“Ke eku in len sacna,” Jesus el fahk nu sin mwet tumal lutlut, “Kut som nu lefahlo. Ouinge elos som liki un mwet uh,”³ elos sroang nu fin oak soko ma Jesus el muta fac ah, ac elos tukeni kalot. Sokwack sie acn ke kapihn oak uh, Jisus El toplac an ac sa na mutullac. Tiac paht na “eng na upa se tuhyak ac noa uh fungulya oak uh, ac oak uh apkuran in moti”⁴ ke kof.

Puhs sin mwet tuhma lutlut lal Jisus ah elos mwet pahtuhr ac elos etuh in mukwikwi fuhkah ke oak uh ke pacl eng upac uh. Pwacyena—lah elos mwet El luhlahlfongi, mwet tuhma lutlut—sacohk Lal. Elos som liki orekma lalos, ma elos kena oruh, ac sucu lalos in fahsr tukun Jisus. Luhlahlfongi lalos Kacl arulacna kahlwem ke elos oasr ke oak sac. Ac inge oak soko lalos ah sun noa tuhyak ac apkuhran na in tili.

Kuht tiacna etuh lah luhpahkah pacl elos kampare mukwikwi in oruh oak uh in tiac tili ke eng upac sac, tuhsruhk elos fosrngahlah okasuhlwack Jisus ac fosrngahlah puhsrwaclos, fahk:

“Mwet Luti, ya wanginna sum lah kut ac misa?”⁵

“Leum, molikutla! Kut apkuranna misa!.”⁶

Elos pahnglol “Mwet Luti,” ac El ohingacn. El pa pac “Jisus Kriast, Wen nuhtin God, Pahpah inkuhsrao ac facluh, Mwet in Oraclah luhn ma nuhkwewa ke muhtwacwacack ah me.”⁷

Ke acn El oasr we ke oak uh, Jisus El tuhkahkwek ac kai eng uh ac fahk nuh sin noa uh, “Misla, tui. Na eng uh wanginla, ac arulana mihsi.”⁸ El Mwet Luti Fuhlwact, na Jisus El luti mwet tuhmal lutlut Lal ke kihsensiyuck fihsrwacsr ac kuhlwacng luo. El siyuck:

“Efu kowos ku sangeng?”⁹

“Pia lulalfongi lowos an?”¹⁰

Oasr na pah se ke moul suhkawihl, finne sie mwe sruhf, ke kuht sun srihkeyuck, ongaiyac, kuh ma kweok ke kuht wowoyak fahk, Moliyula.” Finne Joseph Smith el kwacfe ke acn in srohoh na koluk se ke el pruhe fahk O God, Kom piyac? Ac piyac lohm in sunyac se ma afuhnlah acn in wihklac Lom?¹¹

Pwacyena, Mwet Lahngo luhn facluh El etuh ma kuht kuh in oruh ke moul in ikwoac lasr, tuh El luti kuht in puhlakihn fuhkah mihslac ac mihs finne ke eng uh upac raunikuhtlac ac noatuh uh ahksensenye in tihlmackihnyac finsrak lasr uh.

Nuh selos suc ahkpwacyeiye tari luhlahlfongi, oacna luhlahlfongi luhn sie tuhlihk srihsrihk, kuh finne sie ipin luhlahlfongi,¹² Jisus El suli [kowos], fahk: “Fahsru nu yuruk.”¹³ “Luhlahlfongi ke Inek.”¹⁴ Leum El fahk in lutlut Kacl, ac in porongo kahs Lal.¹⁵ El kai in fihsrwacsr, “Auliyak ac pacptaislac ke Inek,”¹⁶ “Kowos in luhngse sie sin sie,”¹⁷ ac “Esamyuc pacl nuhkwewa.”¹⁸ Jisus El ahkkweye, ac ahkuhtweyac: “Nga fahkot nu suwos ma inge, tuh in oasr misla yuruwos. Ke kowos muta faclu kows ac keok. Tusruktu kowos in pulaik na! Nga kutangla faclu tari!”¹⁹

Nga kuh in ngwetlah petsacelah mwet tuhma lutlut lal Jisus ke oak soko ah ipipwot ipipme ke noa tuh ah, ke srihpen yohk srihpac, oruh elos liye na ke noa tuh ah srihngihl in moti oak soko ah ac elos inihm kof ah. Nga kuh in ngwetlah petsacelah ke elos oruh nuknuk ke sail kac ah ac srihke in kihfucs oak srihsrihk soko ah. Elos lohacng na nuh ke painmoullac ke pacl sac, ac elos kwacfe ke inse pwacye in kahsreyuck elos.

Puhs sesr oacpacna ingacn ke pacl lasr uh. Ma sikyak in pacl inge fin facluh ac ke muhtuhnfacl, mura, ac sucu lasr uh oruh kuht liye kain in ma srihkeyuck ma kuht tiac pahngon muh ac sikyak. Ke pacl kweok luhlahlfongi lasr oacna in kuh in olwelihk ne ke na sun muhtweng ac etatwen lasr uh. Sahngweng uh kuh in ahklohsrye kuht, oruh kuh in muhlkuhnlah wolacna luhn God, tuh in kohsrwaclah ngwetlah liye lasr uh ac in ahklohsrye kuht. Tuhsruhk pacl upac inge ke fuhfahsryucsr lasr uh pa luhlahlfongi lasr uh kuh in tiac srihkeyuck muhkwena tuhsruhk tuh in ahkkweyeyuck.

Oacna sie ohiyacn moul lasr uh, kuht kuh in oruh kuhiyacsr in muhsaheack ac ahkyohkye luhlahlfongi lasr ke Jisus Kraist. Ac fokokoi ke kuht esam lah kuht tuhlihk nuhtin God ac El luhngse kuht. Luhlahlfongi lasr kapwack ke kuht srihke mukwikwi ke kahs luhn God ke finsrak ac oaru, in srihke kuhiyacsr in fahsr tukun luti luhn Kraist. Luhlahlfongi lasr uh yohkwaclihk ke kuht sulaclah in luhlahlfongi liki na in ahlohloh, in nuhnakmuhnahs liki na in nuhnuhnkuh, in auliyak liki na in lain. Luhlahlfongi lasr uh ahkfokokoyeyucklac ke kuht muhtweng in sano ke ohiyac wo ac pahkotwen ac luhng kuhlwacng luhn Messiah Muhtahl.²⁰

Elder Neal A. Maxwel el fahk lah luhlahlfongi uh tiac pa sie etwacack suwohs, tuh ma se inge use luhlahlfongi yohk ke God, suc etwacack Lal suwohs!²¹ Finne ke pacl upac, luhlahlfongi ke Leum Jisus Kraist uh enenuh na [kuht] in puhlaik ac kuh in eklac. Ma inge ac kahsre kuht in lihklihki ma lusrohngtwen wacngihn srihpac. Ma inge ahkkweye kuht in ahkwot na nuh met ke inkacnek luhn wuhlweacng. Luhlahlfongi uh pahtokwack in sahslah liki ma ac oruh muhnahslah insiacsr ac e lwelah kuht in ngwetwacng liye pacl fahsruh lasr uh ke sulaclah fokoko ac in tu na kuh. Ma inge mokle kuht in siyuck ke molwelah ac kahsruh ke kuht pruhe nuh sin Pahpah ke inen Wen Nahtuhl. Ac ke kwacfe in pruhe uh oacna in muh tiacna topukyucklac uh, luhlahlfongi kuh lasr ke Jisus Kraist oraclah muhtweng, mongfihsrwacsr, ac kuh [luhn sie mwet] in fahk ke ohi kahs inge tuh in oa luhngse Lom.²²

Prestuhn Russell M. Nelson el luti lah:

“Kuht tiac enenuh in lwelah sahngweng lasr uh in ahollah luhlahlfongi lasr uh. Kuht kuh in lain sahngweng ingacn ke kuht ahkfokokoye luhlahlfongi lasr uh.

“Muhtwacwacack ke tuhlihk nuhtuwos an. … Lwelah elos in puhlakihn luhlahlfongi lom, finne ke ma srihkeyuck upac tuhkuh sun kom. Lwelah luhlahlfongi lom an in siiyac na Pahpah luhngseyuck tuhmasr Inkuhsrao ac Wen Kuloh Nahtuhl, Leum Jisus Kraist. … Luti kais sie tuhlihk mukul ac muhtwacn sacohk lah el tuhlihk nuhtin God, el oreklac ke Luhmahl, ke sie srihpac muhtahl ac ma finsrakkihnyuck ke muhtahl. Kais sie mwet isuslac ke ma upac kuht enenuh in kuhtanglah ac luhlahlfongi in ahkyohkyeyuck.”²³

Tiac paht ke pacl somlah ah nga lohng tuhlihk luo matwac-yac-ahkosr elos akacsruhi ke luhlahlfongi lalos ke Jisus Kraist ke elos topuk kihsensiyuck se “Jisus Kraist El kahsre kom fuhkah?” Tuhlihk srihsrihk se met ah fahk, “Nga etuh lah Jisus El luhngse nga mweyen El misac keik. El luhngse pac mwet mahtuh.” Tuhlihk srihsrihk se ahkluo ah fahk, “El kahsreyuc ke nga suhpwacr kuh tucltucl uh. El kahsreyuc pac ke nga tili uh.”

Jisus El fahk, “Ke ma inge, el suc auliyak ac tuhkuh nuh Yuruk oacna sie tuhlihk srihsrihk, el fah Nga eis, tuh ke srihpaclos pa tohkohsrahi luhn God.”²⁴

“Tuh God El lungse faclu ouinge: El ase Wen sefanna natul, tuh elos nukewa su lulalfongi in el fah tia misa, a elos fah eis moul ma pahtpat.”²⁵

Ke pacl fototo somlah ah, Prestuhn Nelson el tuh olwelah lah ke sahngweng uh srihkeni, luhlahlfongi uh ac yohkwaclihk ke kuht muhtwacwacack sasuc na pwacye in porongo, lihksreni lohng, ac in liyacacng na kahs luhn Mwet Lahngo.²⁶

Tahmtahel ac tamuhlwel, ma upac in pacl lasr inge uh tiacna pa sahflahiyacn acn kuht ac fahsr nuh we uh. Oa mempuhr ke Alu luhn Jisus Kraist luhn Mwet Luhlahlfongi ke Lwen-sahflah, kuht eis nuh facsr inen Jisus Kraist ke wuhlweacng. Kuht luhlahlfongi ke kuh luhn molwelah Lal ac finsrak ke olwelah sacohk ac wolacna Lal. Oasr srihpac lasr in kaksak, tuh Leum ac Mwet Lahngo lasr El etuh na pwacye ke ma tikuclkucl, fosrngah, ac ahsor lasr. Oacna ke Jisus El tuh wi mwet tuhma lutlut Lal ke pacl omeet ah, El wi kuht lun oak okwacsr uh! Nga fahkwack lah El acse moul Lal tuh nga ac kom in tiac misac. Lwelah tuh kuht in luhlahlfongi El, ahkos masap Lal, ac ke luhlahlfongi, porongo ke El fahk, “Misla, tui.”²⁷ Ke ine muhtahl luhn Jisus Kraist, amen.